Deuteronómio 32
32
Moisés chirate dapesudé Dupade iradé achachagúgode ome darasade nanique
1"¡Gatajnoquei á, angarami yu to é, uje qué yirate Dupade iradé to é!
¡Jnumi á, jé cho ua to á, ga angarami yu to é!
2Yiradedie udire gajnui u gue ayérigui to uje chuta cucha pacade.
Enga gajnui tupo pocatique to rĩ uje déji durasé to ga pésu jnacarade ijóningai to.
3Enga a yĩ́care Pangarádejnai i ueradéjnai to.
Ga beyoi ga ẽ́cacho Dupa Pujnuéngaisṍri uté úringai cuchadaté to.
4Uje yoquirotangóri u uté gu.
Enga uté ipesudode cucha ujñapetácho jnese to.
Uje uté chatata cucha dacatique ga que cho cutuc, cutúgome dajiritique cucha to ga ũrepise ome datatagode cucha to.
Ga que purupatáringárique cunguésõri uté pijnani to, enga que cho dajuñame ayorérique bisideque to.
Uerate Dupade adode jnese ga que pésupúsu pisijnaringuérique gotique. Ũrepise uté to ga que uté urúrique toja gotique, mu uruode tocade jnese.
5Ate gajnaréngone uaque á, uhuaque uje gajnareque uacaruode ome Dupade to á, angáchoi yuruode to ome uaque:
Urénga, que atiócho gotique ujetiga Dupade cho dabi iji uaque, chamáñaje uacadojnóchoja uacai uté gu.
6¿Ama ca Dupade u a uje ipesute uáguiji taningai to? U arĩ́e, jecute uacagúsoji erámi tudé to. ¿Ama jé ca u to a? uje cho dabi iji uaque iji erámi tudé, ga chojningame uaque: 'Oyo uacaji yu to.'
U arĩ́e. Jecute uté gajnenguírase uacacotaquéode, mu uhuaque ga uacadojnóchoja Dupa eyúgojmai uté to. Enga áyipie eyuque uaque, israélgosode uaque á, enga cho jetiga ca arajayopise cuchárique to.
7Acueyoi uacayode, choquíjnane ore iji uacajade to ga ojnichome ore to: 'Beyoi, atatayóba Dupade átedatéode gotígo to ga yangácobí quitígo to.' Ga omi tu jeta uacáyipiedie déji cucha baja casodé to, ga ajnusínaño Dupade átedatéode gatuaque to.
8Chise diri nanique uje Dupade chajuguína dapesudode ayoréo iji jnumi péode, péode to, jeta ore chicáji ga ore cho daniri iji péode to.
Enga chingo ore unirone eruéode ome ore to jeta ore chiraja danirone eruéode to.
Uje Dupade chajire punirone udore iji erámi údode jnese to ga chajire israélgosode ore to enga jé u uje noñome denominone iji israélgosode ore gari to.
9Enga chojninga: 'A yo yajnéngu yedójnariesṍri Jacob uté ape disi ejode jne, enga a yo yurása iji udore ore to jne.'
10Uacarajáyo uje israélgosode que ore déji cuchárique iji taningane nanique. Jé chopo ore uniri to nanique rĩ, gusu erámi nanique ga úyujnanie di ga chubúchu erámi ga jno jnumi arĩ údi to.
Mu Dupade chijnóra israélgosode udore ore nanique ga doi ga chisa ore pajéode aja re to nanique. Ga isocai tu jnanírique uje chijnorapise datique ga chisa pajei aja re, ga chicha dabi uté aja detarúdode gai to enga chopise cuchade quigome dabi tuté to.
11Ga yacãra Dupade isocade aja arorei to uje chijnóra dabode ga jnusi rome dabode jeta ore chó to. Uje arorei abi todópisa choi to ga doi dabi ga chicháji dedoboi to ga jé u uje chó dabi údi to. Ga jé u uje chimate dabi aja choi.
Ga Dupade isocade u udojo ome israélgosode uaque to uje jecucha jnusi rome uaque to enga chiroque uágaja cucha omone to.
12Ga Dupa ugurui u uje jno israélgosode ore údi aja quedéjnane to.
Ga que dupa quedéjnarique átapio ore gotique aja ore ajesúode to.
13Enga Dupade jno ore údi mu jecucha chicha cuchade aja ore iquéode to jeta ca cuchárique chona ore to.
Ga chorei óriji cucarãte cototedie ójodie to ga ore chimo punire ueradéjnane iji darosadode to aja dajesúode erámio to.
Enga ore tagu purása quedéjnane acadie cucha aja dajesúode, ga uneréjna poridie adie ome ore to.
Ga ore chise cucarãte orónenie ga ore chipese cutepéode iji to.
Uje ore chise cucarané jnupiedie mu poridie déji uté to ga ore chijose adie ga aceite tṍraji to ome ore.
14Enga ore tagu basángosode ore gachidode áyasa choqui arione iji uté to ga ípiso ore gachidode udore nanique.
Ga ore chijose aquirájnanie ijnanie to ga ore chijnime cutejmane iriso dipeséjna to ga ore pésu quéso iji ome raque to.
Ga querújna trígo ubugode iji uté to ga ore posode u udore to.
Ga ore chijósapo úvadie adie to rĩ ga uneripise ore joyade iji to. Gatíjnapise ore joyade to, ga ueradipise.
15Ore chĩ́care Jesurún aja israélgosode ore nanique uje urui uté qui tu 'Ayoré Ate Omi.' Mu 'Ayoré Ate Omi' uté urojna nanique ga chécãre dasocade ga ayoré ducusuréchoquí. Urojna ga guejnatúbi uté to.
Ga noñome Dupade iji te jmete uje ipesungóri u mu.
Irotangóri u Dupade ga gãrésõri upo rĩ, mu que cucha ome uté gotique, ga doi ga dojnóngaja Dupade nanique ga que tangári gotique.
16Ga israélgosode ore cho dadupa iji ayoré gajnu guichayade to.
Ga ore ijnimique dangureni casé Dupápise ájningai ome raque to. Ga Dupade gajnúrique u jnani ocácachoquírique to, uje ocácachoquí ome dacoté to.
17Uje ore tẽrája Dupade ome deranone cucha to nanique, mu cho jeta ore chijnapóji Dupade gari rĩ ga ore chisi ome dangurenenie docoré guichayai to.
Chamáñapise uje ore chejna raja dangurenone cucha bisidécho uje quene ore chimo ore to, mu que ore dayode chimo udore to nanique, mu ore ape disi ejode chopise dadupa iji udore to.
18Israélgosode uaque á, uacacadichopísi uacayode ore angureni Dupápise to, uje charanguipise ore ome cuchade to nanique.
Uacacuecaringuéone guẽrasṍri u uté to, mu jĩraque uacacadíchoi uté to.
19Uje uacajnicho Dupade ájningai ome uaque to ga uté chetaque dabode, dabidie uaque to.
20Enga chojninga: 'A yisi ome yidoboi ome israélgosode ore to jne. Ga a yajico jne jeta jé ore ecáji dínique to.
Enga urénga, sijnanguipise ore to, enga ore gajnui tu jnanírique atígo uje ore dai chiroque ore mu que ore doi dai uruode to enga ore dai que agutíyame ore to.
21Cachi cucha bisideque ore angurenone cucha, ga que dupa udore gotique. Enga cho jeta ore chojningame ñane: Boyo yico ga yicagóji yoquicatecãrainone ayoré gajnúo to enga Dupade a tocãra yógome udore ore to.
Enga cho jetiga ore gaidi tu jeta ore chijnime yájningane to. Mu a jé yirate ore isocade to enga a yorei yidoboi iji ore to jne, jé basa ga a yajire purása quedéjnane yúode to jne, enga a yejna yicaniratiguéode aja ore to jne.
Enga a quene ore tocãra jóroga uyu to jne ome ore etégode purása quedéjna to uje yajni ore gai to.
22Uje gosi ijnimique yájningai enga quene chiraja uje cuchadaté yájningai to.
Ga gajnúrique u pióquedatérique to uje tagu dajesui erãpe enga tagu jnumi urui aja dajesui to iji daróbuchatíque to, enga que cuchárique chapídiji iquénique to.
23A cucha tocachugode tṍraji dajñarenie ome israélgosode jne, ga a cho jne jeta yicho ore gáyode to ome cucha dequejnangóningo to.
24Enga a yicho ore gajiné enga yojo bajé a u chaguhéode ome ore jne enga a ore toi ome dayaguhéode to jne. Yojo uña a u ducósedatéi jne uje pioque ore gáyode iji jmainie.
Ga yojo uña a u cuchiso sijnaque chagúode ome ore to jne.
Ga yojo eruemito a u uga chagúode to jne ujetiga chequésãre ore to.
25Enga a chisápo diri to jne rĩ jetiga ore umajosórone cugujnáji ore to iji ore idáyode enga a ore chichagu ore ababode pajéode to jne ome dasórenie enga a ore chicha ore cachotígo aja ore ũrajeque pajéode to.
Ga a ore pógu jórogu re to jne iji daguíjnane ajéode to ome desórone ujnopode to.
Enga ore umajosórone a chejnápise ore jne. Enga a jé ore chátaja ore acucarane ore ape to jne, jé aja disi urẽjájnane jnese, jé aja choquíjnane ore to.
26Enga unérirase ome yu jeta yĩro israélgosode ga yajo ore aja jnumone táca, táca, táca. Enga a jé ca ayorérique chimopórase ore to jne rĩ.
27Mu a ca yipésu jne. Que yipota gu ujetiga yumajosórone ore chujñieta yu to. Ga a ore chojningárasa ome yu to gu: 'Chiese Dupade u uje chejna israélgosode ore, mu que u gotique. Yejnángo yoquetotiguei ome ore ga uyoque u uje yejnángo ore.'
28Israélgosode ore áyipie omenie e bijnáñime ore to, ga que ore chirajapise cuchárique to.
29Ujetiga israélgosode áyipieranguiráse ore to, ga a jĩraque ore chaquĩ́rarase re to ome cucha gajnaréngone to.
Mu que ore chiraja cuchárique, ga a jé ore chise deruéningo to jne ome dapesudode cucha gajnarécho to.
30A chise dínique jne ujetiga ore chojninga: 'Cachi jiei israélgosode ore arĩ́e, ¿mu gotique gu a uje ore chayome damajosórone, uje garósi ore múñi?' Mu a ore jorane chajnai ore uruode udore jne enga a ore chojninga: 'U arĩ́e uje israélgosode udore ore chijnime darotangóri Dupa ájningai gu, ga e uté noñome ore iji te jmete ga chicha ore aja ore umajosórone jmainie.'
31Yocumajosórone ore changureta dangurenone cucha ujetiga chirota ore, mu ore chiraja uje yoquirotangóri Dupa suépise ore angurenone cucha gáyode jnese.
32Ore jmapiedie u sodómagosi casodica ore jmapiedie to, jé aja gomórragosi casodica ore jmapiedie to rĩ. Jé basa ga ore gajnunie u ore acadie úvai uje udire adie sujnánguei, ga gosi tagu adie udire ga gosi toi to.
33Ore gajnúone upo ugade rĩ, uje tagu ayorérique ga ujopié jĩraque chacája potique ayoré údode ga que chapídome to.
34Ga Dupade chojninga: 'Que yicadiguipise cucha dacadode udore gotique. Enga cho ujetiga yipésu ore adode aja ñane to ga yicháji ti yui to jé aja diri uté ujetiga yo yujnutabádu yu ome ore.
35Chamáñaje yajnei tu gu ujetiga yo ayoréode oré ome ore ate gajnaréngone. Enga a chise diri jne jeta yo yujuñame ore to. Ga e yipésu ore ujñapié ajã́tigai. Enga e idógosi jeta yejnápise ore to.'
36Mu Yocangarádejnai Dupade a chimo jne uje que qué israélgosode ore ujñapéguiji damajosórone ore jmainie to. Ga a jé u jne jeta díji ore to ga jnutaque re ome ore to.
A chosõre darógode israélgose ore jne ujetiga chimo uje ore beta jnese, dacasutedie jé aja ayoré gajnaréngone ore jnese.
37Ga a Yocangarádejnai chojningame ore jne: '¿Déji rique uacangurenone ayoré gajnúo to? Uje a anguretáyo udore mu que uacangurenone chátaja uaque to iji de to.
38Uje uacajusopise ore guio diríca ga uaquẽchója ore ga ore gajneque uaquegode dosipécho íode to diríca.
Enga ore jódode u to uaqueranone úva otacho to diríca.
¡Enga abichoi ore ga ore tibágui uaque to enga chirota uaque to!
39Gosójningai Dupa ugurui tu yu to ga uyu jé u uyu to. Ga que dupa uñeque cusipise to.
Ga uyu u uje yẽrate pucuecaringuei ome ayoréode. Ga uyu upo rĩ uje yijnimique pucuecaringuei iji ayoréode to. Yaquesu ayoréode ore údode, mu quigade enga yiqueta ore ga ijõrápo ore rĩ.
Uyu u uje yisa ayorérique, ga que ayorérique cuse jeta chejñu uté gosi iji yijmainie.
40-41Ũrepise yu uje a yo yujnutabádu yu ome yetesórone jne. Enga que toc ujetiga yuruode udore ca tocade. Uje Dupa eyúgojmai uyu gu, ga eyúgojma yidáidatéi iji gaté to, ga jé cho yarecujaidie to, eyúgojma ga yuruode tocade jnese.
A chise diri jeta yata yiguebei jne ga yipésu nanganataringuei iji to jne.
Enga a yiji yumajósõre chojmara, chojmarane enga a yichagu ore ome to jnese ome yúringai jnutaque to. Ga a yetesórone ore gajneque dapesutígo orérigui to jnese jne.
42Enga a yicho ore ome yojodie to jne ga a yijnime diquiyojna quedéjnanie ome yojodie to jne. Ga jé adi tupo ome yasõre to. Enga a yimesẽre diquiyojna quedéjnaraque ore gai to jne.
Uje ore asutedie ore acarane umáño mu a diquiyojnájnai to jne iji ore gáyode, jé aja yisagode to uje yo yisaguíji ore to.'
43Erámi unirisórone uaque jnese á, ¡Beyoi ga acotáyo israélgosode ore angureni Dupa to!
Uje Dupade chimo uje ore chujé irógode to ga a cho dajnutabádu daroque chugode udore to jne.
Ga jé adi u ome detesórone ore jnese, enga a cho dajuñame ore jnese to.
Mu Dupade a chicadígui darasade ore isijnaringuéone to uje ore pésu iji daniri nanique, ga a chĩro ore ate gajnaréngone jnese to jne. Ga ore uniri uté a ueradápo jne rĩ ujeta pĩroque pisijnaringuéone jnese uje pipesute iji uté nanique."
Moisés uru erueminórone u udojo nanique ome darasade israélgose ore
44-45Uje Moisés chijñecáraja dapesudedie Dupade iradei ga jõrai tu Nun ujnacari Josué to. Ga israélgosode ore déji ore ejode to jnese. Ga Moisés, Josué ore chejna iradedie achachagúgode aja guesode to ome darasade ore to. 46Enga e ore cha ore chijñecáraja Dupade iradedie ga Moisés chojninga:
"Jé ca uacáyipiedie jnoji yatatagode cucha jnese uje yacate uágome iji diri udé que. Ga acachopise uacabode ome to ga ojnichome ore: 'Beyopísi quigode to.' 47Chamáñaje uacadudigode yacajnaquéo que cucha bisidécho gotique jeta gosi chudute mu jĩraque jnoji gosi áyipie to. Uje Dupade urúo gu ga gosi a tangaripísi quigode ga chisi ome pucuecaringuei ome angarásonique to. Jecute ujetiga oyo uacajnéngu Dupade ojningai punire ueradéjna uté jne iji yote quedéjnai Jordán uéchamitó ga beyopísi Dupade uruode udore quigode. Enga a jé basa ga iyajmanguipise uáguiji uacajnei jnupe uté to jne."
Dupade juéga jeta Moisés chajire dojningai punire ueradéjna ome dedominone, mu charángome jeta chise to
48Uje Moisés e cha daruode ga jĩraque Dupade catecãrápoi gaté rĩ, jé iji diri uté nanique.
49Ga chojningame:
"Moisés á, bo ga acáji cucarani Abarim, ga oru cototé umarejna iji uté uje i tu Nébo. Uje cototé tuaté déji moábgosode ore uniri ajei to iji ore idáidatéi Jericó ejode. Ga ajire ore uniri Canaán iji bádi jne uje puniri uté u gu uje a yisi ome barasade israélgose ore jne iji baquigade. 50A ese yojningai cucarãte ójo jne mu a atoji uté ójo to jne enga a acha bagachotígaja to jne. Ga a jé u jne jeta ajnime batigate jmané to jne uje toji cucarãte uña ójo to diríca uje i tu Hor. Ga jogadi u jne jeta báquiode, bayode, batigate ore gajnei pitoringa chise ua to. 51Bamo gu uje batigate Aarón, uhuaque que beyoi yuruode ica iji uacarasade israélgose ore iquei to. Yojningai tu uje uacagúsoi erãpetarei Zin ica iji uacapáringai uje i tu Meríba-Cádes. Uacarasade ore pojna uágome dayádode to ica. Enga yojningame ua ica: 'Be, ga acatecã́ri cucarané to ga a yodi tṍraji to ome baruode.' Mu bayó yuruode gai ica ga bajé cucarané. Enga cho jetiga oyo cucha bisidéguiji yu iji ore iquei ica. 52Jecute a ca ese yojningai punire ueradéjna to jne. Mu oru yojningai cucarani uté jne, enga a ajirape jne ome bedominone iji ti."
Currently Selected:
Deuteronómio 32: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
