Deuteronómio 31
31
Moisés chatata uje Josué u jne ujetiga basája jogadi jne iji itoringai quigade
1Enga Moisés e catecãrápoi darasade israélgose ore to rĩ, enga chojninga:
2"Yejnanie siquerei e chise 120 to, ga e garósi yetotiguei to jeta yijína uágaja uacajesúode to. Enga Yocangarádejnai chetágome yu to jeta yaquesu tié Jordán aja ojningai punire ueradéjna yui to. 3Ga a ca yijína uaque to jne aja uté jne. Mu Yangarádejnai Dupade u jne jeta nóna uágaja uacajesúode erámio, ga a uté u jne ujetiga chicha raja uacaquéode to. Enga a uté u to jeta chijócãre purása quedéjnane aja quedéjnane to iji uacaquéode. Enga jé basa ga a oyo uacajnéngu ore unirone to jne. Mu uacojórique ayoré uje i tu Josué, a uté jõra uágaja Dupade ojningai punire yui to jne. Enga Dupade iroi tuté a u jne jetiga oyo uacangaráni iji gaté to jne jeta nóna uágaja quedéjnane to. Uje jé Yocangarádejnai urúo to gu. 4Ga Yocangarádejnai jé u nanique uje chicha amorréogosi casodica ore aja yoquijmainie ica, ga yujégo ore ga yujegopo ore eduguéjna cuchábode to nanique rĩ uje ore íode u Sehón, Og ore. Enga Dupade a jé u to jne ujetiga chicha cananéogosode aja uacajmainie to jne rĩ jetiga diga uaqueso yote quedéjnai Jordán uéchamitó to dirome. Ga a jĩraque ejnáño ore to jne, jetiga oyo uacajnéngu ore uniri uté to. 5Ujetiga Yocangarádejnai Dupade chicha puniri unirisórone udore iji uacajmainie jne enga beyopísi yuruode quigode ga ejnáñopise puniri unirisórone ore jnese jne, enga jé ca aquetáyo uñeque to jne. 6Beyoi ga etoguipise uaque, enga dicasepise uaque to jne rĩ. Enga ca atodóyo ore yúode to jne jetiga e agúsoi pocaningane gáyode. Chamáñaje Yocangarádejnai a nóna uágaja quedéjnane to jne enga a déji uacajade jne aja uacajesúode. Enga a ca noñome uáguiji te jmete jne."
7Enga jé u uje Moisés e catecã́ri Josué to iji darasade ore edominone. Enga chojningame:
"Josué á, ajnorapise Dupade iroquéode to enga ca atodo cuchárique yúrique to jne. Enga dicasepise ua ome cuchade yúode to jne. Josué á, e bajneque yocurasade udore ore jnese to jeta bo ore údi to aja Dupade ojningai punire ueradéjna uje chichagája yocáqui cásodicáite ore yui nanique. Mu a quene tocade uruode ome ore ape disi ejode uaque to, ga a uaque u jne jeta uaqueyaque ojningai punire ueradéjna uté to jne. 8Bangarádejnai Dupade upúsu jne jeta nóna ua aja quedéjnane to iji ore ujade ga chijñaque uágaja uacajesúode erámio. Enga a bajõrai upúsu uté jne. Ga a cucha gajnarétique chise ua, mu a uté u jne jeta chijnime ua iji jmainie. Chamáñaje Bangarádejnai uté a ca noñome ua iji te jmete. Jecute ca atodo cuchade yúode, enga ca arosóñime bojórique ayoré to."
Moisés cho levígosode ore quique ujetiga ore naráraja Dupade uruode gai iji ore urasade iquei jnese
9Moisés churúsãre Dupade ajegaidode cucha nanique, ga chisi ome darusarane udore ome Dupade irógode levígose ore. Yojningane u udore uje ore gajneque Dupade uruode pi cajo to uje jecucha ore chijnóngaja quedéjnane to. Enga israélgosode ore angaránone ore gajneque urusarane udore to. 10-11Enga catecã́ri ore ga chósi tome ore:
"Uacarajáyo uje israélgosode yisecãco siqueredie, ga chise siqueredie uje gare iji ti yijmanai uñai enga jé u uje yicadíjoi yocujórigo ayoré ijnose carubode iji yocari, ga jé yocate iji yoquisecaranenie siquerei udire jnese. Ga jé yósi tome uaque: a chise uacajnusinamánone díño uje i tu 'Guiguíjna Porójo Uéguedie' iji siqueré uaté uje uacaroño uaquéode iji ñane gari to ga amátayo uacarasade israélgose aja ñane iji jogatique jne uje Dupade a chingome uaque, ga ãrarachója yurusarane Dupade urúo gáyode to ome ore to, jeta ore tangári to. 12Enga apúso ore aja jnese jne ome uacajirigode Dupade urúo to: jé aja chequedíe, jnanione ore to, jé aja disiode to, jé aja purása quedéjnane ore to jne rĩ uje e uacarása ore to. Mu que gusu jeta ore tangári Dupade uruode, mu jeta ore dopísi quigode to jne rĩ. 13Uacabode udore uje cáma ore chudute Dupade uruode to, a ore chudute uacajirigode Dupade urúo jne enga a ore chagutíyame udore to jne. Ga a ore quérã to jne iji uacangarádejnai Dupade adode to, enga ore chopo dangaráni iji uacangaráni uté to rĩ, enga a ore chajnerame adode jne jé aja deruéode to iji uacagaidi punire icha uté to iji yote quedéjnai Jordán uéchamitó."
Uje e idógosi Moisés itoringai enga Dupade catecãrápoi rĩ ga chingo cucha piqueminórone ome
14Enga udojo quigade nanique ga Yocangarádejnai Dupade catecã́ri Moisés gaté rĩ. Enga chojningame:
"Moisés á, e idógosi batoringai. Mu ajína Josué aja yiguíjnai ajé uñai uje i tu 'Dupade, Yutuãjóa Ñane Iji Te,' ga a yingo yipotigádode cucha aja uté jnese jne."
Ga jé u uje Moisés, Josué que ore chajirape cuchárique ga ore quítequiguíji Dupade iguíjnai. 15Ga e ore chise daqui tuté mu Dupade chiqueta raja ore ga pi tu gue abuja aja ore. Ga gue abuja tuaté chijnare raja jnumi iji Dupade iguíjnai piagoi. 16Ga Dupade narare ga jé u uje catecã́ri Moisés to, ga chojningame to:
"E idógosipise batoringai, jecute a yingome cucha piqueminórone ome ua to jne. Israélgosode a ore chise yojningai punire ueradéjna jne, mu a jĩraque ore chirate purása quedéjnane ome ore angurenone cucha bisidécho to. Yisi ome yuru iyiejájnane ome ore dayode nanique, mu a chise diri jne ujetiga ore abode cho cucha bisidéguiji yuru iyiejájnane udore, ga a ore noñome yu iji te jmete jne. 17Mu a ájningaránguipíse yu ome ore isijnaringuéone udore ga jé basa yijíñome ore iji te jmete to. Enga a ca yajirápo ore yúrique to jne rĩ. Enga a jé u jeta ore chejnáringui jóroque dajnetígo cucha to jeta tṍraji dajñarenie ome ore to. Mu a quene ore jnusina uyu to jne ga ore chojningame ñane to: 'Ise ga Dupade ujuyaquéode u cucha dacate tocachugode udojo to ome yoque to. Mu ujetiga dérasi yoquejode to ga charanguirase yógome cucha dacate tocachugode udore to.' 18Mu a yudute udore ore uruode ome yu to, mu a qué yingarama yijogatígome ore to enga cho jetiga idájapise yu ome ore. Enga a ca toque jne jeta gosi urúrigo chise yu iji yiyaritique to. Uje a ore pésu dagajnarétigade ome yu gu uje ore icatecãrainone u cucha bisidégode to, jé aja ore ipesute gajnarénguipísode uje a yujnapise udore to jne gu.
19Moisés á, a yisi ome bachachagúgode ome ua to enga arúsãrape quigode bajaque. Enga acate barasade ome to jne. Enga a ore chirate baradedie udire aja dajesúode erámio to jne. Enga a ore chirate to jne ga bachachagúgode udore a chinguíra dipoi taja ore jne, uje jé cho jetiga ore jnusina dasoca bajade gu. 20Enga a ore chise yojningai tuté punire jne uje yingonguémeque ome ore dayode nanique enga a ore gachidode agutíyabádode u garáijnane iji yojningai tuté punire to jeta ore tagu acãrai iji to. Ga israélgosode a ore agutíyabádode u cutérone to uje tṍraji dedodie. Enga a chise diri jeta ore chise dasubudéringáringo iji puniri uté ome cutejmáringo cucha pibose dipeséo to, enga a ípiso ore jne. Ga a jé u jne jeta ore cháta raja purása quedéjnane to iji dajade to enga a ore chiradápo ore aja ore angurenone cucha bisidécho to jne rĩ. Enga a ore chicotápise dangurenone cucha bisidécho to jne, jé basa ga a ore dojnóngaja Dupápisi uyu to jne. Ueradípise yuruode quigode ome ore dayode nanique, mu disi ejode a ore tagu yuruode udore aja to ga a ore cho cucha bisidéguiji yuru iyiejájnane udore uje a ore gajnechórase mu. 21Jeta ore cha yu to jne enga a jé u jeta cucha gajnaréngone chise, chise ore to jne. Ujetiga ore ape disi ejode doi enga ore chirate bapesudé yiradé achachagúgode to enga a ore chojninga: '¡Chi! Cachi Dupade chimópise yocadode nanique uje iradedie chijnárepise raja yocadode to.' Yirajapise israélgosode áyipiedie bajaque to. Uje cáma ore chise yojningai punire ueradéjna mu e yiraja uje a ore chicai quedéjnane ome yu to iji uté jne."
22Uje Moisés chudute Dupade uruode udore ga jé u uje chácare ga churúsãre Dupade gueranone pachachagúcho. Ga deréjnai jé u uje Dupade chirógaja ujetiga churúsãre, enga e doi ga churúsãre achachagúgode to. Ga Moisés chacate israélgosode ore ome to.
23Dupade e catecã́ri jnani bajai Nun ujnacari to, uje i tu Josué. Enga chojningame:
"Josué á, ajnusi ua ome yiroquéode to jne, ga adota ua ome cucha ponáyone jnese to. Chamáñaje a ua u gu ujeta bo barasade israélgose ore údi aja yojningai punire ueradéjna to. Enga a yugúsiji bari to jne ga a yijína ua aja quedéjnane to jne rĩ."
24-25Uje Moisés e chimate darusarane Dupade urúo quigode to ga jé u uje tibidi Dupade uruode pi cajo jnungórone ore to. Enga chojningame ore:
26"De dojo yurusarane Dupade uru iyiejájna. Ga achayóji Dupade uruode pi cajo ejórique to iji Dupade iguíjna cuchábi ajé uñai to. Ujetiga israélgosode acayoi quedéjnane ome Dupade to enga a ajicho yurusarane udojo ga a chinguíra pajegátigai aja uaque to, ga jé uacáringane máraque pijoque quigode ome uaque to. 27Yirajapise yujode israélgose uaque gu. Uje ducusuréchoquí uaque. Enga uacacho Pangarádejnai Dupade uruode aja. Yimo uacadode uje qué yiqueca, ga jecucha uacacho Pangarádejnai uruode aja. ¿Ama uacasocárique to dirome jeta e yitoi to? Uje a ca paquĩraque uágome cuchade to dirome enga jogadi a u jne jeta uacasijnaringuéone quérã, quérã." 28Enga Moisés chojninga: "Abichoi israélgosode uáguedie to jeta ore eduguéjnane chise yu iji udojo to, jé aja uacangaránone ore jnese. Yigaidi tu gu ujetiga ore tangári Dupade uruode udojo iji yibijnani to ujetiga yĩraráraja gai jne. Enga jnumi, gaté a ore chudute yu to jne enga a yuruode pijogúsorone u ore jne uje que yipógu Dupade uruode quigode ome uacangaránone udore gotique. 29Yirajapise uje a yitoi dirome ga a jĩraque beyoi cucha gajnaréngone jne anga a acayóji quedéjnane ome Pangarádejnai Dupade jne. Enga a ajíñome yacajnaquéode Dupade urúo iji uacaquigade jne. Mu a chise dínique to jne jeta pajegátigai chinguíra uágaja jnumi to uje que beyoi Dupade ojningane cucha quigode gu. Enga uacapesudode cucha a gajnarenguipise ome Dupade jne ga a chiborátaja uté ájningadatéode ome uaque jne."
30Uje israélgosode e ore chise Moisés ejode jnese ga jé u uje chatata dapesudé Dupade iradé achachagúgode ome ore to. Achachagúgode umáño mu Moisés jé chise eruéode jnese to.
Currently Selected:
Deuteronómio 31: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
