Deuteronómio 34
34
Moisés toi nanique ga chicha dagachodi aja moábgosode ore uniri ajei
1-2Enga jé u uje Moisés noñome israélgosode iji ore irengúi to uje déji erãpetarei uté iji moábgosode ore uniri eruei to. Enga doi cucarani Nébo enga choru to ga chise ore ajmini to iji cucarani ójo uje i tu Písga, uje cucarani uté déji ore idai Jericó dosadi to. Ga Dupade e chingome punirone jnese ome Moisés uje déji ore údi. Ga ajirigode u galaádgosode ore uniri, jé aja dángosode ore uniri to, jé aja punirone uñane jnese iji ore ujai. Chajire neftalígosode ore uniri jogadi to rĩ, jé aja efraíngosode, manasésgosode ore unirone jogadode to. Enga chajire judágosode gajnepídi jogadi to rĩ uje chichagápise raja yote quedéjnapísi uje i tu Mediterráneo. 3Chajire erãpetarei to uje i tu Neguev, uje uté chichagápo raja yote quedéjnai Jordán edúdi to rĩ. Chajirápo garáijnai rĩ iji ore idai Jericó ejode to uje ijnaque quedéjnamúo ore idai uté to. Ga chajire ore idai Zoar to nanique rĩ. 4Enga Dupade chojninga:
"Moisés á, bajirigode udore cucha, jé u yuru baja cásodicáite to ome uacayode jnani bajácho Abraham, Isaac, Jacob ore nanique uje yojningame ore nanique: 'A yisi ome punire ueradéjnai ome uacape disi ejode jne.' Enga yipotapísa jeta ajirape to ome benomite bisidégode to, mu a ca ese to jne."
5Ga jé u uje Dupade iroguipísi Moisés topísi to nanique. Ga chicha dagachodi taja moábgosode ore uniri ajei to. Uje jé Dupa eyúgojmai urúo ome to gu. 6Enga Dupade chijóchame Moisés iji cucaranone ujai to nanique iji moábgosode ore uniri ajei to. Ga cucaranone udore ore déji moábgosode ore idai Bet-peor dosadi to nanique. Mu a jé ca ayorérique doi ga chiraja ode jogatique nanique. 7Enga Moisés guejnanie siquerei chise 120 nanique uje topísi to. Enga edominone qué uneréjnapiso to, enga qué uajadipise to nanique.
8Enga Moisés que diapo nanique rĩ ga urasade ore popísiji ejode to iji erãpetarei uté uje déji moábgosode uniri eruei to. Ga ore guejnane dire chise 30 ome dáringane ugo. 9Áyipieranguipíse Nun ujnacari Josué uté nanique. Chamáñaje Moisés cãra Josué uté jogadi nanique gu ujetiga pangarate uté to, ga chajo gatoi aja jnumi enga catecã́ri Dupade iji gai. Jecute que etatique cuse to iji Moisés itoringai quigade, ga jĩraque israélgosode ore cho dangaráni iji Josué uté to, enga ore pésupúsu uté acajnaquéode Dupade urúo quigode uje Dupade cho quique udore ome Moisés nanique.
10Jiei Dupade uruode atatasórone ore iji Moisés uté quigade uje ore chajnerame Dupade uruode ome darasade israélgose to, mu que uñeque déji jeta cho Moisés. Chamáñaje Dupade, Moisés ore catecãripísi ñane gu. 11Dupade irógode uñane déji to nanique rĩ uje ore pésu cucha pitijabádode to, mu que uñeque cho Moisés uje Dupade edugádi u ome dapesútedatéode cucha nanique. Uje Moisés u gu nanique uje pésu cucha pitijabádode to nanique iji egíptogosode ore ujade uje ore eduguéjnai Faraón, ujode eduguéjna ore cho dajosipié ome ore to nanique. 12Ujopíerãque Dupade irógode uñane to nanique, mu que uñeque chopise Moisés to ome úringai ujopíeranguipíse uje pésu cuchadatéode iji darasade israélgose ore edominone nanique.
Currently Selected:
Deuteronómio 34: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
