Nsengo sa Vanandeje 23

1UPawulo wávahonekha avakhome vala, wávajovela wáaja, “Valukholo lwangu, one nakwisa kiiva na mahiiva manofu kwa Nguluvi mbakha iminsiyaano.” 2Umutambule umukhome uAnaniya wáganile kipulikha ndeeno, wávajovela vala vina vakhandi vayiimile nkholeela nu Pawulo kiija, vamubamule ikhofi ku mulomo. 3Baheene uPawulo wámujovela wáaja, “Na yuuwe uNguluvi asikutove, owe yuna uli ngaja luhengo luna vapashile inswakhala!#23:3 Luhengo luna vapashile inswakhala: Uluganulo lwakwe, muunu umumyansi. Ukheele apa kiija unihije kilingana ni ndaji sa Musa, leelo owe usikisiyinatila indaji, kwa kiiva ya luna wiijova, nibamulwe ikhofi!”

4Avaanu vala vina vakhandi vayiimile nkholeela nu Pawulo vamujovela vaajova, “Wuli, usiiwona nsoni kimuliga umutambule umukhome wa Nguluvi?” 5UPawulo wávayankha wáaja, “Valukholo lwangu, nisaava nimeenye kiija umwene mutambule mukhome kwa kiiva yiyandiikhwe kiija, ‘Usikhalogolaga fivi kwa muyimililaaji wa vaanu vaakho.’#23:5 Yimba mu litaafili lya Kihuma 22:28.”

6Mu livansa mula, uPawulo akhandi iimanya kiija kuna Vasadukaayo na Vafalisaayo, wákhoosa kilogola wáaja, “Valukholo lwangu, one nili Mufalisaayo, muswamuve wa Mufalisaayo. Niihigwa kwa kiiva nihuviilila kiija vina vafwile, vakhafyukha.” 7UPawulo wáganile kimala kilogola ndeeno, gayansa amakhaananio kwa Vafalisaayo na Vasadukaayo, vabagunkhana fipuga fivili. 8(Kiiva aVasadukaayo viija, vina vafwile vasikwiliile kifyukha, khanji vasihuviilila kiija avamalayikha vakwali, awu kiija amanguluvi gakwali. Leelo aVafalisaayo vihuviilila kiija ago goona gakwali.)

9Baheene kwava kuna makhaananio makhome mandu mu vakhome vala. Avamanyisaaji vamonga va ndaji sa Musa kihuma mu shipuga sha Vafalisaayo vayiima kuno vikhaanania viija, “Tisiwaajile wuvi wowoona kwa muunu uyu. Pamonga linguluvi, awu umalayikha, yumwene wálogola na woope.” 10Vakhaanania mandu. Umukhome wa vayimililaaji va vasulukhali wátiila kiija, vasimunyugulanje uPawulo ave fipilije pilije. Wálajisa avasulukhali vaakwe kiija, vayinjile paakhati pa Vayahuudi kiija, vamutoole uPawulo kwa ngufu, vamutwale mu litengule lya vasulukhali.

11Ishilo shiisho, uMutwa uYeesu wáyiima palubali pa Pawulo, wámujovela wáaja, “Jimfyaga inumbula! Wanibedela apa pa Yelusalemu, shiisho ndeeno wisakulwa kinibedela na ku lijumbi lya Luumi koope.”

Ulugulumilo ulwa kimubuda uPawulo

12Kwaganile kiisha ulwamilaawu, aVayahuudi vamonga vakungaana kwa mbuusa, vagulumila kimubuda uPawulo. Vayiyiiga kiija, vasiilya wala vasiingʼwa, mbakha vamubude. 13Awo vina vayiyiigaga kigaha ilyo, vakhandi vaanu vinshi kishila mashumi gana. 14Baheene vavalutila avatambule avakhome na kwa vakhome va Vayahuudi, vavajovela vaaja, “Tiyiyiijile kiija, tisiilya shoshoona mbakha timubude uPawulo. 15Lino, omwe lumo ni livansa mumulombe umukhome wa vayimililaaji va vasulukhali avaleetele uPawulo. Muve ngaja mwisakula kiseesa wunofu umukhole guna mumusitaashile. Ose tisimuyalushile mu nsila na kimubuda pina asinaafishe apa.”

16Leelo umwana wa wulumbu wa Pawulo wápulikha ulugulumilo ulwa kimuyalushila. Wáaluta mu litengule lya vasulukhali, wámujovela uPawulo. 17Baaho uPawulo wámushemeela umuyimililaaji yumo wa vasulukhali, wámujovela wáaja, “Mutwala umwana umudiimi uyu kwa mukhome weenyu, ana liswi ilya kimujovela.” 18Baheene umuyimililaaji uyo wámutwala umwana umudiimi kwa mukhome wa vayimililaaji, wámujovela wáaja, “UPawulo yuna adindiilwe wánishemeela. Wánilomba kiija, nikuleetele umwana umudiimi uyu, aasi, ana liswi ilya kikujovela.” 19Umukhome uyo wámukhata iliwokho umwana umudiimi yula, wámutwala pashipata, wámuposa wáaja, “Aasi, una liswi lishi lina wisakula kinijovela?”

20Umwana umudiimi yula wámugomosesa wáaja, “AVayahuudi vapulinkheene kiija, vakulombe umutwale uPawulo pamulaawu pa livansa. Vasikujanjilise kiija, visakula kiseesa wunofu umukhole guna vamusitaashile. 21Leelo owe usikhavayitikhaga, kuna vagoosi kishila mashumi gana mu awo, vina visakula kimuyalushila uPawulo mu nsila. Vayiyiijile kiija, vasiilya awu vasiingʼwa shoshoona, mbakha vamubude. Lino, vayipinyanjile, vahepeleese uwulamulaaji waakho.” 22Baheene umukhome yula wámujovela umwana umudiimi wáaja, “Usikhamujovelaga muunu yoyoona kiija, wanijovela imola isi.” Wámujova kiija awuushe.

UPawulo itwalwa kwa mukhome wa nyi

23Baheene umukhome wa vayimililaaji wávashemeela avayimililaaji vavili vina ikivayimiilila, wávajovela wáaja, “Muvayandaale avasulukhali magana gavili (200) vina vasijende na magulu, lumo na vanji mashumi fungati vina vasiilute ni falaasi, na vanji magana gavili (200) vina vasiilute vasumwile imalala. Awo woona vasiihume panu ilisala ilya wutatu paashilo, kiija valute ku lijumbi lya Kayisaliya.#23:23 Kayisaliya: Mu Kayisaliya mukhandi ni mbalino ya Valuumi ni litengule ilikhome lya vasulukhali mu nyi ya ku Yudeya. 24UPawulo woope mumupeele ifalaasi simonga sina sisimutwale, mumufisaaje wunofu kwa Feliki, umukhome wa nyi.”

25Baheene umukhome wa vayimililaaji wáyandikha ibalula yina yiijova,

26“UFeliki mutiilwa, mukhome wa nyi, one ni Kilawudiyo Lusiya, nikikuhunjila. 27AVayahuudi vamukheete umuunu uyu, vakhandi nkholeela kimubuda. Naganile kimanya kiija umwene Muluumi, naaluta na vasulukhali vangu, namukulusa. 28Nikhandi nisakula kimanya lyolyona lina aVayahuudi vamusitaashile, namutwala pa livansa lyanave. 29Naawona kiija vikimusitaakha kwa maposo ga ndaji saanave. Leelo lisikhandi likwali iliswi lyolyona ilya kiija, akwiliile kidindilwa awu kibudwa. 30Naagana kijovelwa imola kiija, kuna vaanu vina vana lugulumilo luvi ulwa kimubuda, gwalimo nalamula avasulukhali kiija, vamuleete kunyaakho. Navalajisaaga vina vikimusitaakha kiija, vamusitaashe kunyaakho.”

31Baheene avasulukhali awo, vamutoola uPawulo ngaja shina vajovelwagwa, vamutwala ishilo shiisho mu lijumbi lya Antipatili. 32Kwaganile kiisha, avasulukhali awo vina vajendaga kwa magulu vaawuya mu litengule lya vasulukhali, vavalekha avayaanave vina vajendaga ni falaasi, valute lumo nu Pawulo. 33Pina avayaanave vala vaafikha apo pa Kayisaliya, vayifisa ibalula mu mawokho ga mukhome wa nyi, vamutwala nayu Pawulo. 34UFeliki wáganile kimala kiyimba ibalula yila, wávaposa wáaja, “Umuunu uyu wa nyi nshi?” Vaganile kimujovela kiija uPawulo wa ku Kilikiya, 35wámujovela wáaja, “Umukhole gwakho, nisigupuliise pina vaafikha vina vakusitaashile.” Wálajisa kiija, vamuyangalilaje uPawulo mu mbalino ya mutwa uHelode.#23:35 Mbalino ya mutwa uHelode: Iyi yasengwagwa nu Helode umuvaha yuna wáfwisaga uluhaavi lufupi kihuma pina wásaviilwe uYeesu. Yimba mu litaafili lya Luuka 1:5.

Currently Selected:

Nsengo sa Vanandeje 23: Shisangu

Highlight

Copy

Compare