Nsengo sa Vanandeje 24

AVayahuudi vileeta umukhole gwanave

1Saganile kishila nsiku sisaanu, umutambule umukhome uAnaniya wáafikha mu lijumbi lya Kayisaliya lumo na vakhome avanji va Vayahuudi nu muunu uyunji uwa kivalogolela umukhole gwanave, ilitaawa lyakwe akhandi yu Telitulo. Awo vaaluta kimujova uFeliki, umukhome wa nyi, amaswi gina vakhandi vikimusitaakha uPawulo. 2Vaganile kimushemeela uPawulo, uTelitulo wáyansa kilogola amaswi aga kimusitaakha wáaja, “Owe Feliki mutiilwa, uwulongosaaji waakho wunofu, wuleetile uwulindamafu wukhome mu nsiku soona isi, khanji inyi iyi yisingameele mu manofu minshi, kwa kiiva ya wumanyi waakho. 3Koona na popoona tikiliyanushila iliswi ili kwa kihonjesa mandu. 4Lino nisigeene kiija, nikulafye luhaavi lutali mandu. Nilomba ulugugumilo lwakho, kitupuliisa umukhole gwesu kwa luhaavi lufupi.

5“Tikimwaga umuunu uyu kiija ana mabaatu mandu. Umuunu uyo iyansa ilibaatu kwa Vayahuudi va nyi soona. Umwene mukhome wa vahuvililaaji va muunu wa mu Nasaleti. 6Pina isakula kiyishafula hata inanda imbaagule iya kifuunyila, tamukhataga nyangu. [Tikhandi tisakula kimuhiga kwa ndaji seesu, 7leelo umukhome yula wa vayimililaaji, uLusiya, wáyinsa, wátupokha kwa ngufu. 8Wávalajisa kiija, vala vina vamusitaashile vayinse vamusitaashe kunyaakho.]#24:6-8 Amaswi aga, gakusiina mu mayandikhwa agamonga amakuulu. Owe yuuwe nda umuposeelese, baheene usiimanye kihuma kunyaakwe kiija, injowo isi soona sina tikimusitaakha kunyaakho sa shiyooli.” 9AVayahuudi woope vaajova kiija ago goona ga shiyooli.

UPawulo ikiyitanga pa Feliki umukhome wa nyi

10Baheene umukhome wa nyi wámugolosesa uPawulo uludole, kiija woope alogole. UPawulo wáyansa kilogola wáaja, “One nimeenye kiija, maakha minshi wiihiga amakhole kwa ndaji mu nyi iyi. Ilyo lilyene likinigaha kiija, niyitanje panyaakho kwa wushendeefu. 11Owe yuuwe ukwiliile kiseesa wunofu kiija, sishilile nsiku ishumi na sivili hela, kihuma uluhaavi luna nalutaga ku Yelusalemu kimufuunya uNguluvi kula. 12Avaanu ava vina vikinisitaakha, vasikhanyaajile nikhaanania nu muunu yoyoona mu lukeeke lwa nanda imbaagule iya kifuunyila, wala kivahonsa avaanu mu nanda sa kifuunyila, awu uluvala ulunji loloona luna luli mu lijumbi ilyo. 13Amaswi aga gina vikinisitaakha uluhaavi ulu, vasikwiliile kijinia kiija ga shiyooli.

14“Ila lina niyiitikha panyaakho ili, ilya kiija nikimufuunya uNguluvi wa vambuyeesu, niyinatila iNsila ya Mutwa uYeesu, hata nda avaanu ava viijova kiija, lihuuvi lya wudehi. Lumo na ago, nikigahuviilila goona gina gali mu ndaji sa Musa, na gina gayandiikhwe mu mataafili ga vakuwamalago. 15One nikimuhuviilila uNguluvi, ngaja avaanu ava woope shina vamuhuviliile, kiija akhavafyusa vina vafwile woona, avagolofu na vina vasili vagolofu. 16Lulwene nijimba nsiku soona kiiva na mahiiva manofu pa Nguluvi na pa vaanu.

17“Naganile kikhala kutali maakha minshi, naatina ku Yelusalemu, kiija nitwale ihela sa kivatanga avapiina mu nyi yeesu na kihumya isadaakha kwa Nguluvi. 18Pina avaanu ava vikinyaaga nisenga ago mu nanda imbaagule iya kifuunyila, nikhandi niyivaleese. Pasikhandi ni lilugu lya vaanu lumo noone, khanji nisikhagahile libaatu likhome lyolyona umo. 19Leelo vakhandi vakwali aVayahuudi vamonga vina vahumile ku nyi ya Asiya, awo vaveene visakulwa vave panyaakho valogole umukhole gwanave, nda vana liswi ilya kinisitaakha. 20Awu ava vina vali apa, vajove vaveene uwunansi wuna vawaagaga kunyangu, pina nikhayiimile mu livansa lyanave. 21Pamonga vawonaga fivi kwa liswi limo ili lina nalyova kwa shawuti panyaanave kiija, ‘Iminsiyaano niihigwa panyeenyu, kwa kiiva nihuviilila kiija vina vafwile, vakhafyukha.’”

22Baheene uFeliki, yuna wámanyaga wunofu iNsila ya Mutwa uYeesu, wáyiimya umukhole gula. Wávajovela wáaja, “Nisiihumye uwulamulaaji wa mukhole gwenyu, mbakha ayinse apa uLusiya, umukhome wa vayimililaaji va vasulukhali.” 23UFeliki wámulajisaaga umuyimililaaji wa vasulukhali kiija, amuwuyiise uPawulo mu shifungo na kimuyangalila wunofu, leelo ave ikimuleshela ayiyeshelaje padoodo, na asikhavasivilaga avamanyi vaakwe kimupeela ifiinu fina isakula.

UFeliki ipuliisa imola sa Yeesu

24Saganile kishila insiku ndoodo, uFeliki wáyinsile lumo nu mudala waakwe uDulusila yuna akhandi Muyahuudi. Wálajisa kiija vamuleete uPawulo. UPawulo wáganile kiyinsa, wáyansa kivajovela ulwa kimuhuviilila uKilisito Yeesu. 25Wáyitenekha kivataviilila goona gina idobokha uNguluvi, shina avaanu visakulwa kiyisivila mu wunansi, na kiija uNguluvi akhavahiga avaanu. UFeliki wáganile kipulikha ago, wátiila. Wámujovela uPawulo wáaja, “Lino uwuushe, nikhakushemeela khanji pina nikhava nayiteeha.” 26Kuunyuma uFeliki akhandi ikimushemeela uPawulo kiija, ave ilogola na woope, kwa kiiva akhandi ihuviilila kiija, pamonga uPawulo akhamupeela ihela.

27Gaganile kishila maakha gavili, uPolikiyo Fesito wápyanila pa Feliki, wáava mukhome wa nyi. Kwa kiiva uFeliki akhandi isakula kivashendeefya aVayahuudi, wámulekha uPawulo mu shifungo.#24:27 Wámulekha uPawulo mu shifungo: Indaji sa Valuumi sikhandi sikimutawula umuunu yuna adindiilwe mu shifungo, ave idindulilwa nda umukhole gwakwe gusihijiilwe kwa maakha gavili.

Currently Selected:

Nsengo sa Vanandeje 24: Shisangu

Highlight

Copy

Compare