Nsengo sa Vanandeje 22

1“Valukholo lwangu na vawiheesu, munipuliise! Lino nikiyitanga panyeenyu.” 2Avaanu vala, vaganile kipulikha kiija uPawulo ilogola kwa shilogolo shaanave isha Shihebulaniya, vaava vapisisiime tototo mandu. UPawulo wáyitenekha kivajovela wáaja, 3“One nili Muyahuudi, nikhasaviilwe mu lijumbi lya Taliso mu nyi ya Kilikiya. Leelo nikuliile baaha pa Yelusalemu. UGamaliyeli#22:3 Yimba mu litaafili lya Nsengo sa Vanandeje 5:34. yumwene yuna animanyiise indaji soona kwa wuyinatifu sina avambuyeesu vatuleshelaga. Nikhayihumiise kwa ngufu soona kimuyinatila uNguluvi, ngaja omwe shina mukiyihumya kwa ngufu iminsiyaano.

4“Nikhavalemeese na hata kivabuda avahuvililaaji va Nsila ya Mutwa uYeesu avagoosi na vashimaayi, nikhandi nikivakhata na kivadindila mu shifungo. 5Ago gina nikivajovela omwe, hata nu mutambule umukhome lumo ni livansa lya Vayahuudi vakwiliile kilunjikha kiija ga shiyooli. Aveene vakhanipeelile ibalula isa kivatwalila aVayahuudi vayeesu vina vakhandi mu lijumbi lya Damesiki. One nikhandi niiluta ukho, kiija nivapinye avaanu ava, na kivaleeta pa Yelusalemu apa, kiija valafisiwe.

6“Pina nili mu nsila nkholeela na kifikha ku Damesiki, paminsi mu lisala lya mutanda, shitu baaho ulungʼali ulukhome kihuma kushaanya lwaningʼalikha mandu imbali soona. 7Naagwa pansi, napulikha ishawuti yikinijova yiija, ‘Sawuli! Sawuli! Kwashi ukinilafya?’ 8Baheene one naaposa naajova, ‘Owe yuuwe naani mutwa?’ Wánigomosesa wáaja, ‘One yuune Yeesu wa ku Nasaleti yuna owe ukinilafya.’ 9Avayangu vina tikhandi lumo valwaga ulumuli, leelo ishawuti iyo vasikhayimeenye. 10Baheene naaposa naajova, ‘Wee Mutwa, nigahe wuli?’ Wánigomosesa wáaja, ‘Yiima! Ulute ku Damesiki. Umo mumwene muna muunu yumonga asikujovele insengo soona sina one nikugulumiile owe usisenje.’ 11Kwa luhaavi ulo nikhandi nisiloleela, kwa kiiva ya lumuli ulukhome ulo, lukhanipofwese ameeho. Baheene avayangu awo vanikhata amawokho, vanifisa ku Damesiki.

12“Apo pakhandi nu muunu yumonga, ilitaawa lyakwe yu Ananiya. Uyo akhandi ikiyihumya mandu kiyinatila indaji seesu, aVayahuudi woona ava ukho vakhandi vikimusufya viija uyo muunu munofu. 13Wáyinsa, wáyiima panyangu palubali, wánijovela wáaja, ‘Lukholo lwangu Sawuli, uyanse kiloleela.’ Shitu baaho ameeho gangu gagubutukha, namwaga.

14“Baaho wánijovela wáaja, ‘UNguluvi wa vambuyeesu wákubaagula, kiija umanye ulugano lwakwe, umwaje yula yuna wa Shiyooli,#22:14 Yula yuna wa Shiyooli: Uyu yu Yeesu, leelo uPawulo asikhageene kimutambula pa vaanu kiija, asikhavakhalasaaga aVayahuudi. na kipulikha ishawuti yaakwe yumwene. 15Goona gina wagaaga na kigapulikha kunyaakwe, usiive mulunjikhaaji waakwe wa kivajovela avaanu woona. 16Lino, uheepile shishi? Yiima! Utwinisiwe, umulombe uNguluvi kiija uvalasiwe uwunansi waakho, kwa kiiva ya kilihuviilila ilitaawa lya Yeesu.’

17“Baheene naatina ku Yelusalemu. Pina nikimufuunya uNguluvi mu nanda imbaagule iya kifuunyila, nagaaga amahilu. 18Mu mahilu ago, namwaga uMutwa uYeesu ikinijovela kiija, ‘Wuukha nyangu mu Yelusalemu! Kiiva avaanu va lijumbi ili vasiyiitikha uwubedelo waakho uwa one.’ 19Namuyankha naaja, ‘Wee Mutwa, aveene vameenye wunofu kiija nikhandi niishila mu nanda sa kifuunyila, nikhandi nikivadindila mu shifungo na kivatova vina vikikuhuviilila! 20Hata pina vamubudaga umulunjikhaaji waakho uSitefano, na yuune naali niyiimile baaho. Niyitiishe kiija vamubude, amakhooti ga vina vakhamubudile, one nikhagayangaliile.’ 21Baaho uMutwa uYeesu wániyankha wáaja, ‘Lutaga! Nikhakufilikha ulute kutali kwa vaanu vina vasili Vayahuudi.’”

UPawulo ikiyikhoona kiija umwene Muluumi

22Amaswi ago goona aga Pawulo, avaanu vagapuliisa. Leelo wáganile kilogola ago aga kuwudugo, valyova kwa ngufu vaajova, “Vamuwuuse umuunu uyu mu nyi iyi! Isakulwa kiifwa!” 23Khanji vayitenekha kilyova, vakhandi vipunga amakhooti gaanave na kitiimula amankundi kushaanya. 24Baheene umukhome wa vayimililaaji va vasulukhali wávalajisa avasulukhali vaakwe kiija vamuyinjise uPawulo mu litengule lya vasulukhali. Wálajisa kiija vamutove kwa majalidi, kuno vikimuposa kiija alogole ishiinu shina shahonsa avaanu vala vamulyovele uPawulo. 25Avasulukhali vala pina vikimupinya uPawulo kiija vamutove na majalidi, uPawulo wámuposa umuyimililaaji waanave yuna ayiimile baaho wáaja, “Wuli, indaji sikivatawula kimutova kwa majalidi uMuluumi,#22:25 UMuluumi: UPawulo akhandi Muyahuudi, khanji wásawaagwa ku wutwa wa Shiluumi. yuna asinaahigwe?”

26Umuyimililaaji yula wáganile kipulikha ndeeno, wáaluta wámuposa umukhome waakwe wáaja, “Wisakula kigaha shi? Umuunu uyo mukhaaya wa ku Luumi!” 27Baheene umukhome wa vayimililaaji va vasulukhali yula wáafikha kwa Pawulo, wámuposa wáaja, “Nijovela, wuli, owe uli mukhaaya wa ku Luumi?” UPawulo wámugomosesa wáaja, “Eena. Nili Muluumi.” 28Umukhome yula wámujovela wáaja, “Na yuune nikhawupatile uwukhaaya uwa Shiluumi kwa nsila ya kihumya ihela nyinshi mandu.” UPawulo wámugomosesa wáaja, “Leelo, one nili Muluumi wa kisawa.”

29Baaho, avasulukhali vala vina vakhandi vihiiva kimuposa uPawulo, vaalekha. Umukhome yula woope wátiila, kiiva wáamanya kiija uPawulo Muluumi, khanji amupinyile kwa manyololo.

UPawulo pa livansa lya Vayahuudi

30Kwaganile kiisha, umukhome uyo uwa vayimililaaji wa vasulukhali, akhandi isakula kimanya lyolyona lina lyahonsa kiija aVayahuudi awo vamusitaashe uPawulo. Ndeeno wámudindulila, wálajisa kiija avatambule avakhome lumo ni livansa#22:30 Livansa: Yimba iliswi Livansa lya Vayahuudi mu Maswi aMahensa. lyona vakungaane. Baheene wámuleeta uPawulo, wámuyiimya paveene.

Currently Selected:

Nsengo sa Vanandeje 22: Shisangu

Highlight

Copy

Compare