APOCALIPSIS 9

Quinto angelya baasa' miapea-aicanaje

1Majoya aje pea quinto angelya oja baasa' miapea-aicanaje. Ohua miacajo eyaya banaje oe eshahuamase eyajo nequi meshiyasijje oqueje majameta jayojja. Majoya Eyacuiñajjiya ma eshahuamase eoque majameta jayojja oe llave quiacanaje pea eshahuamasecuana queahuisonee ejeanobia anica jjani queadoenee quipojoma'jo ani ca'apejojji o cuayaqui'yojji. 2Ohua eshahuamasecuana anijji jjani ca'apejocajo huichacha queamooneenee cuayanaje jiquio ecua que dahuacani cuaa queahuichachahuojamooneenee poani jama. Huichachaa eshequi, eyatahuatahua pea-ai queyacanaje, quea-aaponee pomeecanaje. 3Ma huichachahuojamootejjee cuayanaje queahuisonee eshahuamasecuana satejjee jayojja meshiyasijje. Eyacuiñajjiya ma eshahuamasecuana satejjee jayojja queaca'a pomeecanaje so'o queahuisocuana queaneenee pomeejji ajija quecua jama. 4Eyacuiñajjiya eshahuamasecuana satejjee jayojja huohuicanaje jama ba'a: “A'a oe sipone, tata, acuijjajjacuana pea-ai napajji, queatai ajji. Ojjaña joya ecuea'yo pojjeama poanicuana queaneenee pomeecue. Ojjaña ecuea'yo poanicuana ebahua jeasii ca oe, a'a queanee pomeejji. 5Ecuea'yo pojjeama poanicuana cinco ba'ime huisotii queaneenee pomeepoquiacue, jamatii a'a manomee'yojji cuana” jama huohuimeya Eyacuiñajjiya acanaje. Eshahuacuanaja satejjee jayojjaja quecua queaneenee poanaje jiquio ecua ajija quecua queaneenee poani jama.

6Ma cinco ba'ime huisotii queahuisoneecuana mano'yosapoaje jamatii eshe ba'eje. E'ejojonei queahuisoneecuana mano'yosapoaje queaneenee pomajje. Jamatii aji jayojjaja quecuajo mano'yojjima poaje cuana.

7Ma eshahuamasecuana satejjee jayojja jiquio ecua mona apoa epo epoquijji jjaquecuaquiya jama nequinaje. Oro copocopo esapajo iya nequinaje. Oja cojjacuana dejjaja ecojja jayojja poanaje. 8Ojaya esao eponaja jayojja quea-ao ba'enaje. Ojaya ese'cuana docuei ibiaja jayojja quea-ao, queashejji nequi bapea-ainaje. 9Oja yami queyajji baajee daqui ba'e bapea-ainaje. Ma eshahuamasecuana satejjee jayojja cuichojji poanaje. Cuabesamajje queashajjaquijjoneenee poanaje cuana joya ecua monacuana queahuisohua meshijjepojjicuana queashajjaquijjonee dojocuajicani jjaquecuaquiya jamaya. 10Ma eshahuacuanaja satejjee jayojjaja hua'o joya ecua ajija ehua'ojo equima nequi jama poanaje, queaneenee ejjaquecuaquijji eyaya banaje. Majoya eshahuacuaa satejjee jayojjaa cinco ba'ime huiso quecuacapoquinaje cuana. 11Oe ángel queaca'a queamimishi epo eshahuamasecuana jjani queadoenee quipojoma'jo anica huoojeajji nequinaje. Ojaya bajjani hebreo esohuijo jama acani ba'a: “Abadón”. Griego esohuijo ca “Apolión” bajjani acani.

12Majoya aje apoa jjayejjequinaje ma ebionei queaneenee epomeejjicuana. Majoya pea beca ona queaneenee pomeejji poeje quijjepishana.

Sexto angelya oja baasa' miapea-aicanaje

13Majoya pea sexto angelya oja baasa' miapea-aicajo oe mimije eyaya shajja-ajjanaje. Oe altar oro equecua Eyacuiñajji ani cojjaneijo nequinaje. O quii mijipea-ai eshe'anajje nequi mimije banaje eyaya. 14Oe miminaje sexto angelnijje joya baasa'jji poaninijje jama ba'a: “Ma cuatro angelcuana cuei queaquemo Éufrates bajjanipejjejo ejeyo ani, pichojeacue.” 15Jamajjeya ma cuatro angelcuana ejeyo ani pichojeacanaje. Ma cuatro angelcuana apoa epotii jjaishoaquinequinaje ache eshequiajajo, ache ba'ijo, ache pojjajo, achenei eshequi nequijo Eyacuiñajjiya oya pichojeameecaje queahuisoneecuana jiquio meshijo ba'eca manomee'yojji. 16Soldadocuana monabiajje eanisohuaqui ani apoa epo ejjaquecuaquijji queahuisoneeneecuana bapea-ainaje. Eyaya shajja-ajjanaje 200 milloncuana huisome ejjaquecuaquijji monabiajje ani.

17Jamaya eyaya jjacahuibaquiani jayojja aniya banaje soldadocuana queahuisoneenee monabiajje eanisohuaqui ani. Maya soldadocuana jjase'oqueyaquinaje baajee daquihuo'ojo cuaquijijiqui jamajo, baajee daquitahuajo jacinto jamajo, baajee daquijahuajo azufre jamajo pea-ai. Oja monacuana docuei ibia' jayojja sapame poanaje. Oja nabajje cuaquijiji, huichacha, azufre pea-ai cuayaquinequiani bapea-ainaje. 18Majoya cuaquijijiya, huichachaa, azufre pea-aiya ma monacuanaja enabajje cuayaquinajeya queahuisoneecuana jiquio meshijo ba'ecacuana manomeeca'yonaje. 19Jamaya queahuisoneecuana manomeeca'yonaje oja enabajje cuayaquijeya. Ma monacuanaja ehua'o peyoja sapa jayojja poanaje. Ohua ijjiacajje queaneenee pocanaje cuana.

20Jamatii ca ma peacuana queahuiso quecua'yojjima poanaje pea jjashahuabaquime po'yojjimatii ba'epoquinaje. Ma queamimishitii poanicuaaya eshahuamasecuana eyacuiñajjinisho oja dahua oro, meioshe, baajee queanahue bronce pea-ai bihuiacapoquinajetii. Acui oja jehui mei oja nequia bihuiacapoquinaje pea-ai. Ma eyacuiñajjinishocuana ca onaja ne jjabaquiajja, jjashajja-ajjaquiajja, jeoajja pea-ai. 21Ma quecua'yojjima poanajecuana peacuananijje jjaquecuaquipoquinajetii, eshahuanijje mimipoquinajetii pea manomee'yojjijo, peanijje ojahue pojjeamanijje oja huanase pojjeamanijje jaapoquinajetii, aquiana siicapoquinajetii pea-ai.

Currently Selected:

APOCALIPSIS 9: ESE

Highlight

Compare

Copy