APOCALIPSIS 6

Ma papeni ejjajjajo jaa siete huisome ecuiabaji bajjanijjicuana cajjacapoa

1Majoya eyaya jjacahuibaquiani jayojja aniya joya Ovejaja Bacuaejja jayojja poaniya papeni ejjajja ebionei ecuiabaji bajjanijji jaa cajjacaje banaje. Ohua cajjacajo oe ma cuatro huisome yamijji poaniya cueji poani jama janobajjimanei esohui acanaje jama ba'a: “¡Poecue!” 2Majoya poemajje oe monaoshe jjanequija'ananaquije banaje. Ma monaosheja daasabiajje eanisohuaqui ani dejja cohuijji mejji aninaje. Eyacuiñajjiya copocopo corona bajjani queanahue oja sapajo eiyajji quiacajo oya etii epojji, queaca'anee poani bacanaje cuaa. Majoya oya poquinaje queahuiso meshiyasijje Eyacuiñajji sapo-ajjaneitii poanicuana quecua'yohua.

3Majo aniya eyaya joya Ovejaja Bacuaejja jayojja poaniya papeni ejjajja pea segundo ecuiabaji bajjanijji jaa cajjacaje o'oya bapea-ainaje. Ohua cajjacajo ma pea segundo yamijji poaniya jama acanaje oya jayojjaya ba'a: “¡Poecue!” 4Majoya poemajje pea mona jjanequija'ananaquije bapea-ainaje. Ma ca monahuo'o poanaje. Ma monahuo'oja daasabiajje eanisohuaqui ani dejja baase'beca-ao mejji poanaje. Oya queaca'anee pomeecanaje ojjaña meshijo nequicacuana queamase pomeejji peajaajjicuananijje ejjaquecuaquipoquijji. Majoya queahuisojaajjicuana peajaajjinijje jjaquecuaquicanaje.

5Majoya aje joya Ovejaja Bacuaejja jayojja poaniya papeni ejjajja pea tercer ecuiabaji bajjanijji jaa cajjacao'oyanaje. Ohua cajjacajo ma pea tercer yamijji poaniya jama acanaje oya jayojjaya ba'a: “¡Poecue!”

Majoya poemajje pea mona jjanequija'ananaquije bapea-ainaje. Ma ca monatehue poanaje. Ma monatehueja daasabiajje eanisohuaqui ani dejja aquiana ache biquie huisome ebajji mejji poanaje. 6Majoya ma cuatro yamijjicuanayiyesamaneijo aniya oe mimije eyaya shajja-ajjanaje jama ba'a: “Bobicuana chama'neinei popoquije, jamajje queasosehuisonee poaje ejjeshejji. Oe epojja echaco sosejje oe kilo anosoai jjeshecaje cuaa. Tres kilos cebada jjeshecaje cuaa oe epojja chaco sosejje. A'a esei, uvajjajjana' pea-ai peajja pomeejji queahuiso epomeejji enajo.”

7Majoya aje joya Ovejaja Bacuaejja jayojja poaniya papeni ejjajja pea cuarto ecuiabaji bajjanijji jaa cajjacao'oyanaje. Ohua cajjacajo ma pea cuarto yamijji poaniya jama acanaje oya jayojjaya ba'a: “¡Poecue!” 8Majoya poemajje pea mona jjanequija'ananaquije bapea-ainaje. Ma ca monapohui poanaje. Ma monapohuija daasabiajje eanisohuaqui ani dejja “Emano'yojji” bajjani poanaje. O ani quiijje pea dejja aninaje maya “Emano'yocuana Huoojeajji Poani” bajjani. Ma beca dejja queaca'a pomeecanaje queahuisoneecuana cuarta parte ojjaña meshijo ba'ecacuana chama'yotii pojeamee'yojji. Queahuisoneecuana manocaje'yo quijje peajaajjinijje jjaquecuaqui'yomajje, bobiyasijje po'yomajje, emanomeejjicuaa iñacajje, ebiocuiñajji queamaseneecuaa ijjiaca'yajje pea-ai.

9Majoya aje joya Ovejaja Bacuaejja jayojja poaniya papeni ejjajja pea quinto ecuiabaji bajjanijji jaa cajjacao'oyanaje. Ohua cajjacajo eyaya banaje altar equecuaquimejjejje queahuisoneecuana Jesosaja epeejjicuanaja edojjoshahuacuana anica. Macuanaya quecuaca'yonaje cuaa Eyacuiñajjija esohuihuohuijji poanajejojoya. Macuana queaja'atii ba'epoquinaje, Jesosa cajaa a'yosapo-ajjatii poanaje. 10Majoya Jesosaja epeejji poanajecuanaja edojjoshahuacuana janobajjimanei jama mimime poanaje ba'a: “Emeshimesenei Eyacuiñajji eojjañacuanamese poani, miya queaca'aneetii nequipoquiani, queapameneetii mimishima'nei. Miquea ejjashahuabaquijjicuana miyaya ajeyopoquiaña, pajeapajea'yoajjanei. Jamajjeya, ¿acheshono miyaya joya mi sapo-ajjanei poanicuana queahuiso meshijo ba'eca queaneenee pomeeje'yo ecuana miquea esohuijo quecuaca'yonaje sosejje?” jama emano'yocuana poanaje. 11Majoya Eyacuiñajjiya Jesosaja epeejjicuana equecua'yo daquiosheao quiamajje huohuicanaje jama ba'a: “A'a queayeno pojji. Jomishocasocue. Capoesahua jiquiacua pea Jesosaja epeejjicuana esohuijo chacochacoanijojoya quecuacaje'yo cuaa, miquiana jayojja pea-aiya acaje'yo. Majoya eyaya ecuea epeejjicuana quecua'yojji poanajecuana queaneenee pomeeje'yo.”

12Majoya aje joya Ovejaja Bacuaejja jayojja poaniya papeni ejjajja pea sexto ecuiabaji bajjanijji jaa cajjacaje o'oya banaje. Ohua cajjacajo meshi huehuahuehuaneineinaje. Eshequi quea-aaponeenee ponananaje daquitehue jayojja. Ba'i ca queacojjahuo'onee ponananaje ena' jayojja. 13Majametacuana eyatahuatahuajo queahuiso nequi oquequinaje meshiyasijje jiquio ecua acuijjajja etahua ba'e beniaiya jeahuojojeacani meshiyasijje jama. 14Eyatahuatahua chama' pocuajinanaje bapea-ainaje jiquio ecua papeni iñajjajjacani jama. Ojjaña eyiyocuana, nasicuana pea-ai meshi huehuahuehuaneiajo jjanequishiñajeaquinaje pea jjocohuasijje enequi'yojji. 15Majoya queahuisoneecuana, emeshimesecuana, pea etii poanicuana, soldadocuana huoojeapoquiajji etii poanicuana, joya quea-aquianahuiso poanicuana, joya queaca'a poanicuana, joya ejjeshe peajo chacochacopoquianitiicuana, joya oyatii chacochacopoquianicuana pea-ai meteneineimajje jja-aniquehua-ajjaquicaje meijjanicuanahuasijje bapea-ainaje. Eyiyocuanajo nequica mei-aiyasijje poquicuajicanaje cuana. 16Ojjaña macuanaya taaanequinaje jama ba'a: “Eyiyocuana, mei-aicuana nequijebecue ecuana queyaa, Emeshimeseneija o quii-anijjiaijo anija ecuana bajjima yajji. Joya Ovejaja Bacuaejja jayojja poani queaqueneneeneeya ecuana queaneenee epomeeca'yo poanijje ecuana queyacue. 17Emeshimeseneija, joya Ovejaja Bacuaejja jayojja poani pea-aija ecuana queaneenee pomee'yojji epojja apoa, poeyanaje. ¿Acheya che ecuana queaneenee pomee'yojjima acaje? ¡Acheyapishana de!” jama taaame poajeya eyaya shajja-ajjanaje.

Currently Selected:

APOCALIPSIS 6: ESE

Highlight

Compare

Copy