APOCALIPSIS 5

Joya Ovejaja Bacuaejja jayojja poaniya papeni ejjajja jaa pichojjojjocanaje

1Majoya eyaya jjacahuibaquiani jayojja aniya Emeshimesenei o quii-anijjiaijo eanioque ani papeni ejjajja oja ebañei mejji nequi banaje. Omiji pea-ai tehue poanaje. Siete huisome ecuiabaji bajjanijji papenijo jaanaje. 2Majo pea-ai aniya eyaya shajja-ajjanaje oe ángel queaca'aneeya janobajjimanei huohuiajjacaje jama ba'a: “¿Ache shai yani queapameneenee poani jiquio siete huisome ecuiabaji bajjanijjicuana cajjajji papeni pichojjojjojji?” jama huohuiajjameya acanaje. 3Chama'neinei poanaje joya queapameneenee poani papeni pichojjojjojji esohui majo etehue jaa ajji. Chama'neinei poanaje cuana eyajo, meshijo, meshidojjojo emano'yocuana pea-ai ma etehue jaa pichojjojjojji. 4Jamajjeya chama'neinei queapameneenee poani papeni pichojjojjojji esohui majo etehue jaa ajji bamajje eya paneineinaje. 5Majo aniya ca oe etii poaniya eya jama acanaje ba'a: “¡A'a oe patiijji! Bacue, enequi oe Judaja osecua, joya 'Docuei Ibia'' bajjani, ojjañacuana huoojeapoquiajji poani Davidja osecua. Comaaya ebionei eshahua Satanás bajjani jeabichajeaca'yonaje. Jamajjeya ohuaya papeni ejjajja jaa siete huisome ecuiabaji bajjanijjicuana cajjacaje epichojjojjojji majo etehue jaa ebajji jamaya poanaje enijje.”

6Majoya aje eyaya banaje joya Ovejaja Bacuaejja jayojja poani ma cuatro huisome yamijjicuanayiyesamaneijo nequi, ma 24 huisome etii poanicuanayiyesamaneijo oya nequipea-ainaje. Joya Ovejaja Bacuaejja jayojja poani onaja manomee'yo jjeya eshe nequi'yo bapea-ainaje. Oya siete huisome eshe'anacuana sapajji nequinaje. Oya siete huisome cojjame nequinaje pea-ai. Ma siete huisome ecojjacuana joya ecua Eyacuiñajjija Edojjoshahuapame siete huisome poani jayojja queaca'aneetii nequi jjabameequiani jamaya. Ma Edojjoshahuapame siete huisome poani jayojja ehuoojea poanaje ojjaña meshiyasijje. 7Majoya aje Emeshimesenei quii-anijjiaiyasijje poquimajje joya Ovejaja Bacuaejja jayojja poaniya papeni ejjajja majo Eyacuiñajjija ebañei mejji eiñanequia jaa papeni jjeshecanaje. 8Papeni ejjajja ohua jjeshecajo ma cuatro huisome yamijjicuana, ma 24 huisome etii poanicuana pea-ai bahua jaaoquenananaje meshiyasijje joya Ovejaja Bacuaejja jayojja poani cojjaneijo o bihuiajji. Ojjaña macuanaya arpa eiñaqueyajji mejji poanaje, peamiji emejje plato oro edahuapejja mejji poanaje. Ojjaña ma platocuana shiyeshiye edahuashiyejji queacuataneejji poanaje. Ma shiyeshiye edahuashiyejji joya ecua Eyacuiñajjija'yo poanicuana oja mimi onijje jamaya. 9Ma cuatro huisome yamijjicuana, ma 24 huisome etii poanicuana pea-ai sohuicuayanaje esohui eyacua jama ba'a:

“Miya oenei queapameneetii poani papeni ejjajja jaa pichojjojjojji,

ojaya siete huisome ecuiabaji bajjanijji cajjajji pea-ai.

Miyaya queahuisonee Eyacuiñajjija'yo epojjicuana

jjeshe'yapoa mi quecuaca'yapoa sosejje,

miquea ena' cuayaqui'yapoa sosejje.

Jamajojoya ojjaña pea meshijo ba'ecacuana iyehuiso,

ojjaña peajaajjicuana queahuesha iyehuiso,

ojjaña pea esohuijo mimianicuana pea-ai

iyehuiso anicaje Eyacuiñajjija'yo epojji.

10Ojjaña joya Eyacuiñajjija'yo poanicuana

miyaya nequimeenaje minijjetii peajaajjicuana huoojeapoquiajjitii epojji,

peacuanajo Eyacuiñajjinijje emimipea-aipoquijji nequimeenaje.

Jamaya oja nahue'yocuana Eyacuiñajjijo chacochacopoquije jiquio meshijo ba'e.”

Jama sohuicuayameya poanaje ma cuatro huisome yamijjicuana, ma 24 huisome etii poanicuana pea-ai.

11Majo ani jjabajeasohuaquimajje angelcuana queahuisoneenee, millón huisomecuana yajja sicome yajji sohuicuayacaqui shajja-ajjanaje. Ma angelcuana queahuisonee o quii-anijjiai nequijo ejjanequiyiyoqui nequicanaje. Ma 24 huisome etii poanicuana, ma pea cuatro huisome yamijjicuana pea-ai Emeshimesenei quii-anijjiai nequijo ejjanequiyiyoqui nequipea-aicanaje angelcuana queahuisoneenijje. 12Ma angelcuana queahuisoneenee nequica Emeshimesenei bihuiajji janobajjimanei sohuicuayacani shajja-ajjanaje jama poaje ba'a:

“Ejjabihuiaqui

ma jjaquiaquiapoa onaja manomee'yojji Ovejaja Bacuaejja jama.

Ejjabihuiaqui

oya oenei queaca'aneetii nequipoquianijojoya.

Oya eojjaña-aquianacuanamese, oya queasapaja'aneetii,

chama'nei ojaya queacamaja eajji pea-ai,

jamajjeya ca-acapoquiahua cuaa esohui queapamenee ojo.

Oya queaca'aneetii queasajajanee nequipoquiani,

jamajjeya ojoneitii casohuicuayapoquiahua cuana”

jama sohuicuayameya angelcuana ponequinaje Emeshimeseneijo.

13Eyaya shajja-ajjapea-ainaje ojjaña Eyacuiñajjija panacuana eyajo nequi, meshijo ani, enaojjojo jaa, emano'yocuana meshidojjojo jaa pea-ai ojee sohuicuayacani jama ba'a:

“Joya Emeshimesenei quii-anijjiaijo ani,

joya Ovejaja Bacuaejja jayojja poani pea-ai

ejjabihuiatiitiiquipoqui.

Esohui queapamenee ca-acapoquiahua cuaa

oya oenei queaca'aneetii, queasajajanee nequipoquianijojoya.

Jamaya oya potiitiipoquije.”

14Majo nequiya aje ma cuatro huisome yamijjicuaa jama huohuime acanaje ba'a: “Jamaya capoahua.” Ma 24 huisome etii poanicuaa oja ecuioshajjajo nequimajje Eyacuiñajji, joya Ovejaja Bacuaejja jayojja poani pea-ai bihuicanaje.

Currently Selected:

APOCALIPSIS 5: ESE

Highlight

Compare

Copy