APOCALIPSIS 21

Eya eyacua, meshi eyacua pea-ai

1Majoya aje eyaya jjacahuibaquiani jayojja aniya eyatahuatahua eyacua, meshi eyacua pea-ai banaje ma ebionei eyatahuatahua, meshi pea-ai Eyacuiñajjiya chama'yo pomeecanajejojoya. Bae-aiai ena pea-ai chama'yo pomeecanaje.

2Eyaya bapea-ainaje Eyacuiñajjija meshi ciudad Jerusalén Eyacua bajjani eyajo ani jaaoqueje oja jaaoquemee. Jiquio ecua epona ahuema' aniya daqui-ao quea-oshenee, queabamenee huoshocani ejjahueaquijji, jama jayojja ma ciudad jaaoqueje banaje. 3Majoya aje oe Eyacuiñajji quii-anijjiai nequijo nequi queamimisajea mimije shajja-ajjanaje jama poaje ba'a: “Bacue, jiquio meshijotii Eyacuiñajji nequipoquijetii oja panacuananijje. Ojjaña ojaya'yo poanicuana onijjetii ba'epoquije'yo. Eyacuiñajji ojayanei Eyacuiñajji popoquije onijje enequipoqui'yojji. 4Cuamaya ohuaya ojjaña macuanaja cojjana' cuicaje'yo, papajeameecaje'yo cuana. Ojjaña majo anica'yo onijje ojaya'yo poaniya emanobeca'yojjitii pojjeama poaje'yo. Yenoamatiitii poaje'yo, pa'yoajjatii poaje, neeamatiitii poaje'yo pea-ai ojjaña majo anica'yocuana. Ma ecua yahuajo jiquio meshijo, eyajo pea-ai ba'ecapoquinaje jama epobeca'yojji pojjeamatii pocaje'yo ma ebionei meshi, eyatahuatahua pea-ai chama'yotii poaje'yojojoya.”

5Eyacuiñajjiya o quii-anijjiaijo eanisohuaqui aniya jama huohuime acanaje ba'a: “Eyaya ojjañatii aquianacuana pea eyacua ao'oyaña.” Ohuaya huohuipea-aicanaje jama ba'a: “Jiquio eya aña esohui tehuecue ojjañacuana jjashahuabaquica'yojji jiquio esohui e'ejojonei poanijojoya.”

6Majoya eya huohuipea-aicanaje jama ba'a: “¡Apoa, ojjaña ajeyo'yonaje! Eya yahuajoneinei eanitiiapoa ojjaña aquianacuana chamahuajo, quijjenei pea-ai eya anitiitiipoquije. Ojjaña joya queanabataja poanicuana eyaya ena ma quea-oshenee cuayanequiani eba'etiitii'yojji ishimeeje jamatii sosema'. 7Ojjaña joya mimishi cajaa apoquiajji poanajecuana queabihuitii jjashahuabaquipoquije. Eya ojaya Eyacuiñajjitii popoquije, oya ecue bacuacuana popoquijetii pea-ai, jamaya jjabaquipoquije'yo cuana. 8Peacuana ca joya queamimishitii ba'epoquinaje joya Eyacuiñajjija esohui ona yajjajo basapo'yoajja poanajecuana, joya Jesosa Quito cajaa a'yojji poanajecuana, joya queamimishinee popoquinajecuana, joya pea quecua'yojji poanajecuana, joya peacojjojji poanajecuana, joya jjaquiaquinaje eshahuajo echacochacopoquijji, joya eyacuiñajjinishocuana bihuiajji poanajecuana, joya siajje popoquinajecuana pea-ai, ojjaña comacuanaya Eyacuiñajjiya jeajeameecaje'yo Cuaqui-aiyasijje, ma cuaquijiji azufretejjee quiyo'yoqui bae-ai ena quemoajjahuasijje. Jama poanijje emanobeca'yojji. Ma jaaya Cuaqui-ai Emanobeca'yojji bajjani.”

Jerusalén meshi eyacua

9Majoya aje oe ángel ma pea seis huisome angelcuananijje edahuapejja mejji poanaje poeyanaje eque. Yahuajopishana ma siete huisome angelcuana queacuatanee edahuapejja ena mejji nequinaje, queahuisocuana queaneenee pomeejji poanaje. Ma eque poeyanaje angelya eya huohuicanaje jama ba'a: “Poeajja enijje epoqui. Epona ahuema' ani jjeya jjahueaquije eyaya miya bameeje, oya joya Ovejaja Bacuaejja jayojja poanija ehuanase poaje.” 10Majoya eya jjacahuibaquiani jayojja ani Edojjoshahuapameya bameecanaje oe angelya eya dojosohuaquicaje eyiyo quea-aoneenee nequiyasijje. Majo ani eya bameecanaje Eyacuiñajjija'yo poanicuana anitiitiipoqui'yojji ciudad Jerusalén bajjani eyajo ani jaaoqueje Eyacuiñajjija jaaoquemee. 11Eyacuiñajji queasajajanee poaniya oja meshi ma ciudad queajijisiyonee acanaje. Ma ciudad eyajo ani queajijisiyo poani jiquio ecua mei jaspe queanahuenee tahuoo-oshe queajijisiyonee poani jamaya. 12Ma oja ciudad eyajo ani jaaoqueje ojjaña cuatro mijime huiso epeei queaquemo, quea-aonee pea-ai nequi banaje. Ma epeei queaquemojo 12 huisome esecuejjaniai ca'ajji nequinaje, 12 huisome angelcuana pea-ai esecuejjaniai queyajji nequinaje. Ojjaña ma esecuejjaniai ca'ajji bajjanijji nequi banaje, Israelja bacuaejjacuanaja bajjanijji. Oe oja bacuaejjaja ebajjani jaanaje oe esecuejjaniai ca'ajjijo. Pea esecuejjaniai ca'ajjicuanajo pea Israelja bacuaejjacuanaja bajjani jaapea-ai banaje. 13Ma ciudad peeijji'ya queaquemonee cuatro mijime huisojje tres esecuejjaniai ca'ajji nequi banaje. Eeno poeanimijijje, eeno poquianimijijje pea-ai, eshequi jaasohuanimijijje, eshequi jaaoquequianimijijje pea-ai tres huisome esecuejjaniai ca'ajji nequinaje. Ojjañajo 12 huisome nequi banaje. 14Ma Eyacuiñajjija ciudad epeei queaquemonee 12 huisome mei-aicuana anibiajje nequi banaje. Ojjaña ma mei-aicuana bajjanijji ani banaje, Jesosa Quitoja huoojea ona sohuihuohuiquinequijji dejja poacuanaja bajjanijji. Oe oja huoojea poaja bajjani jaanaje oe mei-ai anijo. Pea mei-aicuana anijo pea oja huoojea poaja bajjani jaapea-ainaje.

15Ma enijje miminaje ángel oro acui ache aome eipiajji mejji poanaje. Majoya ohuaya ma meshi ciudad ache mijiquemo, ache mijiao pea-ai ebajji ipiacanaje. Esecuejjaniai ca'ajjicuana, epeei queaquemonee nequi pea-ai ache mijiquemo, ache mijiao ebajji ipiacanaje. 16Ma meshi oja ciudad epeei queaquemonee ohuaya ipiacanaje miji oejje 2.400 huisome kilómetros aome, oya aome huiso pea-ai peamijijje ipiacanaje. Ojjaña cuatro huisome mijijje oja ciudad peeijji'ya oya aome, oya quemome pea-ai poanaje. 17Ache aome ebajji epeeicuana nequi ipiapea-aicanaje. Sesenta y cinco huiso metros aome poanaje. Jiquio ecua dejjaa equicuana ache mijiquemo ipiacani oya jayojja angelya ciudad peeijji'ya ipiacanaje.

18Ma meshi oja ciudad peeijji'ya oopana mei queanahuenee jaspe bajjani ani banaje. Oja ciudadjo anica equicuana, ojjaña majo ani aquianacuana pea-ai oro oopana ani banaje, joya ecua tahuoo-oshe queasiyonee jama poanaje. 19-20Ma oja ciudad peeijji'ya 12 huisome mei-aicuana anibiajje nequinaje. Ma mei-aicuana eiya ani banaje oopana mei queanahueneecuana anica. Ebionei mei-aijo mei queanahue jaspe bajjani eiya ani banaje. Pea mei-aijo mei queanahue zafiro bajjani eiya aninaje. Pea mei-aijo mei queanahue ágata bajjani eiya aninaje. Pea mei-aijo mei queanahue esmeralda bajjani eiya aninaje. Pea mei-aijo mei queanahue ónice bajjani eiya aninaje. Pea mei-aijo mei queanahue cornalina bajjani eiya aninaje. Pea mei-aijo mei queanahue crisólito bajjani eiya aninaje. Pea mei-aijo mei queanahue berilo bajjani eiya aninaje. Pea mei-aijo mei queanahue topacio bajjani eiya aninaje. Pea mei-aijo mei queanahue crisopraso bajjani eiya aninaje. Pea mei-aijo mei queanahue jacinto bajjani eiya aninaje. Pea mei-aijo mei queanahue amatista bajjani eiya anipea-ainaje. 21Ma 12 huisome escuejjaniai ca'ajjicuana mei queanahuenee perla bajjani oopana nequi banaje. Doce huisome perlacuana nequinaje ma 12 huisome esecuejjaniai ca'ajji epojji. Ma meshi ciudadjo oe ejeojji queaquemonee epoquinequijji jaa banaje oro oopana cuiahuajjima, queajijisiyonee.

22Ma meshi oja ciudadjo ecuea ba'yojjimatii poanaje Eyacuiñajji bihuiajji equi-ai ejjachichaquipoquijji. Emeshimesenei Eyacuiñajji queaca'aneetii nequipoquiani, joya Ovejaja Bacuaejja jayojja poani pea-ai ma meshijotii nequijojoya, chama' poanaje equi-ai o bihuiapoquiajji. 23Ma oja ciudadjo ba'ecacuana jeaja'ajji eshequi, ba'i pea-ai chama'nei banaje Eyacuiñajji queasajajaneeya ojjaña ciudadmijiyasijjeyee jeaja'acapoquianijojoya. Joya Ovejaja Bacuaejja jayojja poani ojjañacuana jeaja'apoquiajji cuaquijiji jayojja poanijojoya chama' poanaje eshequi. 24Ma meshi oja ciudadya jeaja'acapoquijetii ojjaña meshijo ba'ecacuanahuasijje. Ojjaña meshijo nequica emeshimesecuana poenequije cuamaya ojaya aquianacuana queanahuenee, queasosehuisonee pea-ai jeaquiya. 25Ma oja ciudad esecuejjaniai ca'ajji'yacuana enobiquijji epojjajo eca'apejotii nequipoquije. Jamatii nequipoquijetii majo sineajjajojoya. 26Pea meshicuanajo ba'ecacuana ma ciudadhuasijje poenequije oja aquianacuana queanahuenee, queasosehuisonee pea-ai jeahuaa. 27Aquiana queatai ca ejeahuanequijjitii pojjeama poaje'yo ma ciudadhuasijje. Oya jayojjaya joya queamimishinee ba'ecacuana, siajjepojjicuana pea-ai ejjequinobiajji pojjeamatii poaje cuama. Mahuisotiicuana nobiquije ciudad Jerusalenyasijje ba'a: Ojjaña joya oja bajjani etehue jaa huisotiicuana Ovejaja Bacuaejja jayojja poanija librojo eba'etiitii'yojji nobiquije, mahuisoya.

Currently Selected:

APOCALIPSIS 21: ESE

Highlight

Compare

Copy