APOCALIPSIS 22
22
1-2Majoya ma angelya eya bameecanaje oe cuei queanaoshenee jaa tahuoo-oshe queasiyoja'anee jama. Ma enaaya ba'etiitiimeecapoquiani cuana. Ma cuei queanaoshenee Eyacuiñajji quii-anijjiai nequijje, joya Ovejaja Bacuaejja jayojja poani quii-anijjiai nequijje cuayaquinequiani banaje ma ciudadyiyesamanei anijje oquequiani, ejeojji queaquemonee jaapea-aijje oquequiani. Cuei jaa omiji pea-aijje acuijjajja eba'etiitii'yojji nequi bapea-ainaje. Ojjaña ba'ijo jjajjapoquianitii, jamajje oe ba'ijo oja jjajja jahuani, majoya pea ba'ijo jahuapoquio'oyani eijjiapoquiajji banaje. Ma acuijjajja oja eiñacuaa ojjañajaajjicuana quea-ajanee manoamatii pomeecapoquinaje. 3Ma meshi queapameneejo Eyacuiñajjija dejja, epona, ojjaña aquianacuana pea-ai esohui o queacamajaneetii epopoquijji eajji pojjeamatii poaje'yo. Eyacuiñajji quii-anijjiai, joya Ovejaja Bacuaejja jayojja poani quii-anijjiaiya oja ciudadjotii nequi. Jamajjeya ojjaña majo ba'ecacuaa ma Eyacuiñajjijo chacochacopoquianicuaaya ecuioshajjajo nequiya oya bihuiacapoquijetii. 4Eyacuiñajji ani cojjaneijo nequiya bacapoquije ma ciudadjo ba'ecacuaa Eyacuiñajji. Oja bajjanija bahua jea poaje ojjaña majo ba'ecacuana. 5Ma meshiyasijje meca quea-aapo epobeca'yojji pojjeamatii poaje. Cuaquijiji ejeaja'apoquijji, eshequi pea-ai chama' poaje cuama Emeshimesenei Eyacuiñajji ojjaña jeaja'apoquiajji majo enequijojoya. Ma oja ciudadjo ba'ecacuaa ojee Eyacuiñajjinijjeya ojjaña peajaajjicuana huoojeacapoquijetii.
Jesosa poeje o'oya
6Ma angelya eya huohuipea-aicanaje jama ba'a: “Jiquio esohuicuana e'ejojonei poani, jamajjeya jjashahuabaquica'yojji ojo. Emeshimesenei Eyacuiñajjiya ma ona sohuihuohuiquijji poacuana queaja'a huohuimeesahuacapoquiapoa oja Edojjoshahuapamejo. Maaya oja ángel jjeyanei huoojeacanaje joya ojo chacochacopoquianicuanaja queaja'a ebajji ae poaje quijjepishana, jjeya pojja'a.”
7Jesosa jama poani ba'a: “Shajja-ajjaneicue. Eya jjeyahua poeje o'oya. E'ejojonei queabihui poanicuana ojjaña joya ae poaje quijje jiquio etehue jaa esohuijo jjashajja-ajjaquijji poani cuana” jamaya poanaje.
8Eya Juan bajjaniya jiquio ae poaje quijje queaja'a shajja-ajjanaje, banaje pea-ai. Jamajjeya ae poaje quijje bamajje, shajja-ajjamajje pea-ai eya ecuioshajjajo nequiajjanaje ma ángel queaja'a e bameejji poanajeja ejeojjipejjeneijo o bihuiajji nisho. 9E jama po-ajjaje bamajje ma angelya eya huohuicanaje jama ba'a: “¡Chojja, a'a eya bihuiajji! Eya ca iña miya jayojjaya Eyacuiñajjijo chacochacopoquiani pea-ai. Ma ecua esohuihuohuijji poacuana, ojjaña joya oja esohuijo jjashajja-ajjaquijji poanicuana jayojja pea-aiya eya poani. ¡Eyacuiñajji oenei oe bihuiapoquiacue!”
10¡A'a jiquio esohui ae poaje quijje peacuana huohuiquijjima ajji! “Ojjaña jiquio miya tehuenaje huisotiiya esohui ohuaya ajeyocaje'yo jjeyahuanei pojja'a, eshonoshonojji pojjeama. 11Bacue, joya queamimishica'a poanicuana queamimishica'atii capoahua. Peacojjojji poanicuana joya Eyacuiñajjiya queajehuenee jayojja bacani cuanaya, jamatii oya jayojjatii caba'epoquiahua oya jama sapomajje. Peacuana ca joya queapamenee ba'epoquiani, queapameneetii caba'epoquiahua. Joya Eyacuiñajjija'yo poanicuana oja esohuijo cajjashajja-ajjaquipoquiahua.” Jama huohuimeya angelya eya acanaje.
12Majoya aje Jesosaa huohuipea-aicanaje jama ba'a: “¡Shajja-ajjaneicue quiaa ecuea esohui, eya jjeyahua poeje o'oya! Majoya eyaya ojjaña meshijo ba'ecacuana achajja oya ba'epoquinaje sosejje quiaje. 13Eya yahuajoneinei eanitiiapoa ojjaña aquianacuana chamahuajo, quijjenei eya anitiitiipoquije pea-ai. Eya ebioneinei nequiapoa, quijjenei nequipea-aipoquijetii.” Jamaya poanaje Jesosa.
14E'ejojonei queabihuinee poajecuana ojjaña joya oja daqui-ao shacuajji poanaje huisotii. Majoya Eyacuiñajjiya comacuanaya ojaya ciudadhuasijje nobiquimeecaje'yo, majo nequi acuijjajja eba'etiitii'yojji ijjiameejji. 15Ojjaña joya queamimishitii ba'epoquinajecuana ca esecuejotii nequijeaje, nobiquijjimatii. Jamajjeya ojjaña joya peanijje queatainee jaapoquijji poanajecuana, ojjaña joya eshahuajo chacochacopoquinajecuana pea dasiajji, joya peacojjojji poanajecuana, joya peaquecua'yojji poanajecuana, joya dejjaja ne eyacuiñajjinishocuana bihuiajji poanajecuana, joya siajjepojjicuana, joya peacuana dasiajji poanajecuana pea-ai esecuejotii nequijeapoquije. Macuanaya enobiquijjitii pojjeama poaje'yo.
16Jesosaa jama huohuime apea-aicanaje ba'a: “Eyaya Jesosa bajjaniya ecuea ángel huoojeanaje jiquio esohui huohuiya ojjaña miquianaya joya Eyacuiñajjija esohuijo jjachichaquipoquianicuanaja ebajji. Eya Davidja osecua poani. Eya queajijija'anee majameta eshequihuiyejji poani jayojja” jamaya poanaje.
17Eyacuiñajjija Edojjoshahuapame epona ahuema' ani Ovejaja Bacuaejja jayojja poanijo jjahueaquije pea-ai ojee jama poani Jesosanijje ba'a: “¡Poecuajicue!”
Ojjaña joya ojaya esohuijo jjashajja-ajjaquijji poanicuaa cahuohuipea-aicahua jama ba'a: “¡Poecuajicue!”
Ojjaña joya queanabataja poanicuana ma ena eba'etiitii'yojji ishisapomajje poecuajicue ena eba'etiitii'yojji ishiya jamatiiya sosema'.
Juanja esohui oe-ejjenei
18Majoya aje Juanya huohuicanaje cuana jama ba'a: —Ojjaña joya jiquio etehue jaa esohui ae poaje quijje shajja-ajjajji poanicuana eyaya huohuineiaña. Joya pea esohui tehuejji popea-aije jiquiajja pea-ai pojjeama ae poaje quijje, Eyacuiñajjiya macuanaya queacamajaneenee pomeecaje'yo jiquio ecua esohui jiquiojo etehue jaa jamaya. 19Ojjaña joya esohui etehue jaa ae poaje quijje huohuijeyojjima ajji poajecuana Eyacuiñajjiya macuanaya eba'etiitii'yojji acuijjajja ijjiameejjimatii acaje'yo. Ojaya ciudadhuasijje jiquio esohuijo etehue jaa, cuamaya enobiquimee'yojji pojjeamatii poaje.
20Jiquio esohui e tehuemeecanaje jama poani ba'a: “E'ejojonei, eya jjeyahua poeje o'oya.” Jamaya capoeahua. ¡Emeshimesenei Jesosa Quito poeo'oyacue!
21Emeshimesenei Jesosa Quitohua ojjaña miquianaya queapamenee ca-acapoquiahuatii ojayanei ejjashahuabaquijjijo.—
Currently Selected:
APOCALIPSIS 22: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
