APOCALIPSIS 20

Edosiquiana 1.000 shequiajame huiso ejeyo'yo jaapoquije

1Majoya eyaya jjacahuibaquiani jayojja aniya oe ángel eyajo nequi ba'eoqueje llave mejji, cadena-ai mejji pea-ai banaje. Ma llave jjani queadoenee quipojoma' jaa nabaca'apejojji poani. 2-3Ma angelya ba'eoquemajje meshiyasijje shadaa-ai jayojja iñaca'ajeacanaje ma yahuajoneinei peyopojji poaya. Maya edosiquiana poani, ebionei eshahua Satanás bajjani pea-aiya. Iñaca'ajeamajje ohuaya cadena-aiya oya jeyocanaje. Majoya oya jjani queadoenee quipojoma'huasijje jeanobiajeacanaje. Jjani nabaca'ajji'ya jeasiimajje ca'acanaje peaa eca'apejoca poanijje. Mil shequiajame huisotii majotii oya jaapoquije. Ojjaña meshijo ba'ecacuana ojaya dasiajjimatii popoquije 1.000 shequiajame huiso oe poajo. Majoya quijje oya jjani queadoenee quipojoma'jo jaa Eyacuiñajjiya huoojeacuayameecaje so'o.

4Majoya eyaya etii poani quii-anijji queahuiso nequi Eyajo bapea-ainaje. Quijje majoya anicaje cuana queaca'a nequimeecaje peacuana huoojeapoquiajji epojji. Eyaya bapea-ainaje Jesosaja epeejjicuana poanaje emano'yoja ojaya edojjoshahuacuana. Ojjaña macuana esapa jajasejjajea'yo poanaje esohui Jesosajo huohuicapoquinajejojoya, Eyacuiñajjija quia esohui huohuicapoquinajejojoya. Macuanajaya yahuajo enaojjojo ani nequisohua eyami queaquemonee, o jayojja epojji onaja ne pea-ai bihuiajjimatii poanaje. Ma Jesosaja epeejji poanaje equecua'yo ebahuajje, emejje pea-ai jjajeasiimeequiajjatii poanaje. Jamajjeya ojjaña macuana Eyacuiñajjiya shequimee'yomajje queahuisocuana huoojeapoquiajji epojji, 1.000 shequiajame huiso, pomeecanaje Quitonijjeya. 5Ma esapa jajasejjajea'yo poanajecuana ojaya esohuijo ebionei shequimeeca'yonaje Eyacuiñajjiya. Majoya peacuana ma ojaya'yo poanajecuana, ojjaña ojaya'yo pojjeamacuana pea-ai quijje Eyacuiñajjiya shequimeecaje'yo 1.000 shequiajame huiso oe poajo. 6E'ejojonei queabihuineenee poaje'yo ojjaña joya Eyacuiñajjiya ebionei shequimeecaje'yocuana ojaya'yo poanajejojoya. Macuanaya queaneenee epomee'yojji pojjeamatii poaje Cuaqui-aiyasijje. Eyacuiñajjinijje emimipoquijji caca macuana poaje. Quitojo echacochacopoquijji pea-ai poaje. Quitonijjetii 1.000 shequiajame huiso ojjañacuana huoojeacapoquijetii ma ebionei ohua shequimeecaje'yocuaaya.

Ebionei eshahua Satanás bajjani ejeyo'yo queahuesha jeajeacaje'yo

7Majoya aje quijje 1.000 shequiajame huiso apoa poajo jjayejjequiajo Eyacuiñajjiya ebionei eshahua Satanás bajjani jjani queadoenee quipojoma'jo jaa pichojeameemajje jeacuayameecaje so'o. 8Ohuaya cuayaquimajje queahuisonee meshijo ba'ecacuana, omiji pea-ai dasiaquicaje o'oya. Peajaajji queahuisoneecuana Gog bajjani, Magog bajjani pea-ai Satanasya iyaacajje jjachichaquicaje queahuisoneenee soldadocuana meshijajisiyo huisoajja, yajja sicome yajji ejjaquecuaquijji Eyacuiñajjinijje.

9Majoya queahuisoneenee jjachichaquimajje ojee poquicaje ciudad Eyacuiñajjija queajeanee poani aniyasijje, ma Eyacuiñajjija'yo poanicuanaja meshiyasijjeya. Majoya soldadocuana peajaajjicuana poani queahuisoneenee ma ciudadhuasijje poquimajje jjanequiyiyoquicañaquije ojjañamijiyasijje majo ba'eca quecua'yojji. Majoya cuaquijiji queaquemonee eyajje oquecuajimeecaje ojjaña ma soldadocuana ejjanequiyiyoqui nequicahuasijje ona dahuajeajeyo'yojji. 10Majoya aje edosiquiana ma queahuisoneecuana dasiapoquiajji poanaje jeajeaca'yonaje cuaquijiji bae-ai ena quemoajja azufretejjee quiyoquiyasijje ma enaojjojo ani nequisohua eyami queaquemonee, esohuihuohuijjinisho siajjepojji pea-ai ejeajea'yo cuaquijiji jaahuasijje jeajeaca'yonaje. Majotii ani'yo ojjaña pojjajo, mecajje pea-ai queaneenee potiitiipoquije'yo, jomishocajjimanei.

Oe-ejjenei Eyacuiñajjiya ojjañacuanaja mimishi huohuicaje'yo ona queaneenee pomee'yojji

11Majoya eyaya jjacahuibaquiani jayojja aniya Emeshimesenei quii-anijjiai quea-oshenee nequi banaje. Eyacuiñajji majo eanisohuaqui ani bapea-ainaje. Majoya o ani cojjaneijo ojjaña meshicuana, eyatahuatahua pea-ai jjachamacuajiquinananaje, ebabeca'yojjitii pojjeama poanaje. 12Majoya eyaya bapea-ainaje ojjaña emano'yocuana ma queaca'a poanaje, ma pea ca'a-amapishana poanaje eshequi'yo nequi Eyacuiñajji quii-anijjiai nequi cojjaneijo ejjachichaqui nequica. Majoya librocuana she'acaje bapea-ainaje etehue jaa achajja ba'ecapoquianinaje cuana. Pea librojo ca etehue jaa ojjaña ma Eyacuiñajjinijje ba'etiitiipoquije'yocuanaja oja bajjanijji. Majoya ma librocuana angelcuaa she'acanaje eba'yojji. Eyacuiñajjiya ojjaña majo eshequi'yo nequicacuanaja oja mimishicuana ja'anei huohuica'yonaje ma ecua onaya ba'ecapoquianinaje jamaya ojaya etehue jaa. 13Majoya Eyacuiñajjiya ojjaña emano'yocuana, ma bae-aiai enaojjojo ehui'i'yocuana, ojjaña ma emano'yocuana emojea meshiquipajo jaaca, ojjaña ma pea emano'yocuana anijji Hades bajjanijo anica pea-ai shequimeeca'yonaje o ani cojjaneijo enequimeejji. Eyacuiñajjiya ojjaña macuanaja oja mimishicuana ja'anei huohuica'yonaje ma ecua oya ba'ecapoquianinaje jamaya. 14Majoya ojjaña ma emano'yo poanajecuana eshequi'yo nequi, ojjaña ma emano'yocuana anijji Hades bajjanijo anica eshequi'yo nequi pea-ai jeajeaca'yonaje Cuaqui-ai jijiqui bae-ai ena quemoajjahuasijje. Ma jaaya Emanobeca'yojji bajjani poani. 15Jamajjeya ojjaña joya oja bajjani chama' poanaje huisotii libro eba'etiitii'yojjijo Eyacuiñajjiya comacuanaya jeajeameeca'yonaje Cuaqui-ai jijiqui jaa bae-ai ena quemoajjahuasijje.

Currently Selected:

APOCALIPSIS 20: ESE

Highlight

Compare

Copy