APOCALIPSIS 19

1Majoya eyaya jjacahuibaquiani jayojja aniya queahuisoneenee Eyajo ejjachichaqui anica queamimisajeanee mimije shajja-ajjanaje jama poaje ba'a:

“¡Eyacuiñajji ejjabihuiaqui!

¡Oya oenei ese nahue'yojji poanitii,

oya oenei queasajajanee poani,

oya oenei queaca'aneetii nequipoquiani!

2Jamajjeya oya oenei queajjashahuabaquija'anee poanitii ojjañacuanaja mimishicuana huohui'yojji.

Ohuaya ma epona peacojjojji jayojja poani queaneenee pomeeca'yonaje

ohua queahuiso meshijo ba'ecacuana queamimishinee pomeecapoquinajejojoya.

Eyacuiñajjiya oya queaneenee pomeeca'yonaje

ma Eyacuiñajjijo chacochacopoquinajecuana ohua quecuameecapoqui'yonaje sosejje.”

3Majoya ma Eyajo anicacuana queamimisajeanee mimio'oyanaje

jama poanaje ba'a:

“¡Eyacuiñajji ejjabihuiaqui!

Babilonia meshi quiyo'yoquijo

huichacha ba'esohuaquiequitii equiyojeyo'yojji pojjeamatii poaje.”

4Majoya aje ma 24 huisome etii poanicuana, ma cuatro huisome pea yamijjicuana pea-ai oja ecuioshajjajo anioquemajje bahua jaaoquenaje meshiyasijje Eyacuiñajji o quii-anijjiaijo eanioque ani bihuiajji jama ba'a: “Jamaya capoahuatii. ¡Eyacuiñajji ejjabihuiaqui!” 5Majoya eyaya Eyacuiñajji quii-anijjiaipejjeneijo nequiya oe mimije shajja-ajjanaje jama poaje ba'a:

“Eyacuiñajji bihuiacue ojjaña joya ojo chacochacopoquianiya quiaa,

ojjaña meshijo ba'eca quiaa joya queaca'a poaniya,

joya ca'a-amanei poani quiaa pea-ai oya bihuiacue.

Ojjaña joya Eyacuiñajji oenei queaca'aneetii bajji poani quiaa oya bihuiacue.”

Ovejaja Bacuaejja jayojja poaniya ejjahuanaquijji jayojja fiesta acaje

6Majoya eyaya shajja-ajjanaje queahuisoneecuana queamimisajeanee mimiani jiquio ecua ena queaquemonee oquequinequiani jama, cueji queashajjaquijjo ponequiani jama pea-ai. Jama mimime poanaje cuana ba'a:

“¡Eyacuiñajji ejjabihuiaqui!

¡Oya Emeshimesenei poani,

esejaya Eyacuiñajji queaca'aneetii nequipoquianiya!

¡Ohuaya ojjañajaajjicuana huoojeacapoquianitii!

7Jamajjeya eseya queabihuineenee epo ojo,

queabihuineeya Eyacuiñajji bihuiacapoquijji.

¡Ejjabihuiatiiquipoqui oya oenei queaca'aneetii poanijojoya!

Jjeya apoa, joya Ovejaja Bacuaejja jayojja poani jjahuanaquije epojja poeyanaje.

Epona ojo ejjahueaquijji jayojja apoa epo ani jjeya.

8Eyacuiñajjiya oya daquijeyo queapamenee, quea-oshenee, queaboejeanee, queasiyo pea-ai quiacanaje oja huoshojji”

jamaya poanaje cuana. Ma daqui queapameneeya bameecani cuana Eyacuiñajjija'yo poanicuana queaja'anee ba'epoquianinaje.

9Majoya aje oe angelya eya huohuicanaje jama ba'a: “Jiquio esohui tehuecue. E'ejojonei queabihuinee poanicuana joya Eyacuiñajjiya iyaacanaje Ovejaja Bacuaejja jayojja poani jjahuanaquije fiestahuasijje epoejji onijje aniya.” Ma angelya huohuipea-aicanaje jama ba'a: “Jiquio esohui e'ejojonei poani Eyacuiñajjija esohuiya.”

10Majoya eya ma ángel nequi cojjaneijo ecuioshajjajo anioquemajje bahua jaaoqueajjanaje o bihuiajji nisho. Ohuaya eya jama acanaje ba'a: “¡Chojja, a'a eya bihuiajji! Eya ca iña Eyacuiñajjijo chacochacopoquiani mi jayojja pea-aiya. Jesosaja epeejjicuana jayojja pea-aiya eya joya esohui Jesosajo jjashahuabaqui'yanitiicuana jayojja. Eyacuiñajji oenei bihuiapoquiacue” jama huohuimeya angelya eya acanaje. Esohui queapamenee Jesosajo jjashahuabaquipoquimajje Eyacuiñajjija esohuihuohuijji poacuana queaca'a nequicapoquiapoa Eyacuiñajjija esohui huohuipoquiajji epojji.

Joya monaosheja daasabiajje eanisohuaqui anijo tehuecapoa

11Majoya eyaya jjabajeasohuaquimajje eyatahuatahua ejjaca'apejoqui nequijo oe monaoshe majo nequi banaje. Ma monaosheja daasabiajje eanisohuaqui ani jama bajjani poani ba'a: “E'ejojoneitii poani.” Pea bajjani ca “Joya ojaya esohui ajeyopoquiajji poani.” Jama bajjanimeya oya acanaje cuaa ohua queajjashahuabaquija'aneeya ojjañacuanaja mimishi huohuicapoqui'yanijojo, mimishicuana queaneenee pomeecaje'yojojoya. Eyacuiñajji dejjamimishicuananijje jjaquecuaquije. 12Ojaya ecojja cuaquijiji jama jijinequinaje. Oja sapajo queahuisonee copocopo corona queanahuenee eiya ani bapea-ainaje. Ojaya bajjani oja yamijo etehue jaa, jamatii ojjañacuanaja queaquehua poanaje yajja poanijje shai maya jaa. Ojayanei caca oe ebatii poani queaja'a. 13Oja daqui-ao eyamijo ba'e queañahuo'omoo poanaje. Ojaya pea bajjani poani ba'a: Eyacuiñajjija Esohui bajjani. 14Eyajo nequi queahuisoneenee soldadocuaa monaoshecuanaja daasabiajje eanisohuaqui aniya oya equijje acapoquinaje. Ma soldadocuana queahuisonee daquijeyojji queaboejeanee quea-oshenee poquicanaje oquiquishijji. 15Joya Eyacuiñajjija Esohui bajjani poani baase'beca queashejjinee nabajji poquinequije ojjañajaajjicuananijje jjajajaquiya. Ohuaya ojjañajaajjicuana queaneenee pomeemajje queaca'aneetii nequiya ojjañacuana huoojeacapoquije. Majoya quijje ohuaya queaca'aneetii nequipoquianiya queaqueneneeya ojjaña mimishicuana queaneenee pomeecaje'yo jiquio ecua dejjaa uvajjajja quishipashaneineicani jamaya. 16Oja daqui-aojo oja quisejo pea-ai oja bajjani etehue jaa bapea-ainaje jama ba'a: “Ojjaña emeshimesecuana nequica huoojeapoquiajji poani oya. Oya oenei Emeshimesenei nequipoquianitii eojjañacuanamese.”

17Majoya eyaya oe ángel eshequibiajje nequi bapea-ainaje. Ohuaya ojjaña cuichojji joya eyatahuatahuajo cuabesaba'yani emano'yocuanaja eyami sa-ajjajji poani queamimisajeaneeya iyaacanaje jama ba'a: “Poeajja jiquiacua jjachichaquiya. Eyacuiñajjiya miquianaya bobi queahuisonee quiacaje. 18Cuichojjicuana, ocue poeajja emeshimesecuana emano'yoja eyami ijjia'yohua, soldado etii poanajecuana emano'yoja eyami ijjia'yohua, soldadocuanaja, monaja, joya monabiajje eanisohuaqui anicacuana emano'yoja eyami ijjia'yohua pea-ai. Poeajja ojjaña meshijo ba'ecacuana emano'yoja eyami ijjia'yohua ba'a: joya ejjeshe peajo chacochacopoquinajetiicuanaja, joya oyatii chacochaconajecuanaja, joya queaca'a poanajecuanaja, joya ca'a-ama poanajecuanaja eyami pea-ai ijjiaje'yo.” Jama huohuimeya angelya acanaje cuichojjicuana.

19Majoya eyaya jjacahuibaquiani jayojja aniya banaje ma enaojjojo ani nequisohua eyami queaquemonee, queahuiso nequica emeshimesecuana, ojjaña ojaya soldadocuana pea-ai ojee jjachichaquicanaje ejjaquecuaquijji joya monaoshejo eanisohuaqui aninijje, ojaya soldadocuananijje pea-ai. 20Ebionei ma esohuihuohuijjinisho poanajeya dejjaja ajjima'neineicuana acapoquinaje ma enaojjojo ani nequisohua eyami queaquemonee cojjaneijo nequiya. Oja esohui siajjejo jjadasiameequimajje queahuisoneecuana ma enaojjojo ani nequisohua eyami queaquemoneeja bajjanijo jjajeasiimeequicanaje. Majoya oja eyami jayojja onaja ne oja ecuioshajjajo nequiya bihuiacapoquinaje queahuisocuaa jjadasiameequimajje. Majoya aje quijjepishana onijje jjaquecuaquimajje ma enaojjojo ani nequisohua eyami queaquemonee iñaca'ajeacanaje eyaya banaje, esohuihuohuijjinisho ma siajje popoquinaje iñaca'ajeacanaje bapea-ainaje. Majoya ma enaojjojo ani nequisohua eyami queaquemonee, ma esohuihuohuijjinisho siajjepojji pea-ai iñaca'ajeamajje eshetii jeajeaca'yonaje cuaquijiji bae-ai ena quemoajja tejjee quiyoquiyasijje. 21Joya monaosheja daasabiajje eanisohuaqui aniya baa queashejjinee nabajjiya ojjaña majo ejjachichaqui nequica ejjaquecuaquijji Eyacuiñajjinijje yacuajeyoca'yonaje. Majoya ojjaña cuichojjicuaa eyacua'yo jaacuanaja eyami ijjiacapoqui'yonaje, queajejjeneenee poca'yonaje onaja yamijo.

Currently Selected:

APOCALIPSIS 19: ESE

Highlight

Compare

Copy