APOCALIPSIS 18
18
Babilonia meshi chama'yo pojeameecaje
1Majoya eyaya jjacahuibaquiani jayojja aniya pea ángel eyajje ba'eoqueje banaje. Oya queaca'anee etii poani pea angelcuana huoojeapoquiajji poanaje. Ohuaya jeaja'aja'acanaje ojjaña meshiyasijjeyee queasajajanee poanajeyajjejojoya. 2Oya ángel queasohuisajeanee taaanaje jama ba'a:
“Babilonia meshijo anica equicuana aoao, queaquemo pea-ai eoquequi'yo jaa.
Jamajjeya ma meshicuiñajjicuana chama'yo,
che oema'nei majo ba'e.
Queahuisonee eshahuamasecuana ca jjeya Babilonia meshijo enequi'yo.
Cuichojjicuaa joya peajjanei, emano'yocuanaja eyami ijjiajji poanicuaaya,
joya queamase pea-ai oja meshijo eja queahuiso iyaca'yonaje.
3Babilonia meshicuiñajjicuaa queahuiso pea meshicuiñajjicuana
huohuicapoquinaje queamimishinee eba'epoquijji.
Jamajjeya o jayojja queamimishinee posapea-aipoanaje peajaajjicuana.
Jiquio ecua uvajjajjana' queaseseneejo coocajje queahuisonee ishimajamajasapoani cuana ehuoojji,
oya jayojjaya Babilonia meshicuiñajjicuaa ojjaña peajaajjicuana queamimishi pomeecapoquinaje.
Ojjaña meshijo nequica emeshimesecuana queamimishinee popoquinaje
onijje joya ecua dejja epona peacojjojjinijje jaani jamaya.
Babilonia meshijo ba'ecacuaa aquiana queahuiso jjeshecapoquinaje.
Jamajjeya aquiana quiajji poanicuana queabejjohuisonee pomeecapoquinaje
oja aquiana queahuisonee jjeshesaneipopoquinajeyajjejojoya”
jama huohuimeya angelya eya acanaje.
4Majoya eyaya Eyacuiñajji Eyajo ani mimije shajja-ajjanaje jama poaje ba'a:
“Miquianaya joya ecuea'yo poani quiana Babilonia meshijo ba'eca cuaya'yocue
ona jayojja pea-ai queamimishinee epo poanijje, ona jayojja queaneenee pea-ai epo'yo poanijje.
5Ma meshijo ba'ecacuana queamimishineetii popoquianijojoya
eyaya Eyacuiñajji poaniya onaja mimishicuana eyahuasijjeyee ba'esohuaquiani jama banaje.
Jamajjeya eyaya queaneenee pomeeje'yo cuana oja mimishijo.
6Ma ecua Babilonia meshijo nequicacuaa ecuea'yo poanicuana queaneenee acapoquinaje,
oya jayojja queaneenee macuiñajjicuana eyaya pomeepea-aije'yo esosejje.
Eyaya queaneenee pomeeje'yo cuana
ma ecua ecuea'yo poanicuana queaneepishana acanaje cuaa jama pojjeama.
Queaneenee pomeeje'yo cuana.
7E'ejojonei Babilonia meshijo ba'ecacuana oyatii queaca'anee poani poso jjabaquipoquiani, queamimishica'anee poani.
Jamajjeya ma ecua macuiñajjicuana oyatii queaca'a poso jjabaquinaje huisoajjaya
queaneenee pomeeje'yo cuana oja mimishicuanajo.
Queayenonee pomeepea-aije cuana majoya.
Ojaya esohuiquipajje jjashahuabaquiani cuana jama ba'a:
‘Eya ca iña queaca'anee poani jjabaquiani,
ojjaña cua eya jjeshesa-aña huisotii jjeshepoquiaña.
Eya ca iña eahuemano'yo jama pojjeama,
eya yenoamatii poani’
jama jjashahuabaquimeya oya poani.
8Jamatii quijje oe pojjajotii Babiloniacuiñajjicuana queaneenee pocuajicaje'yo,
bobima' pea-ai pocuajicaje'yo cuana,
queahuisoneecuana manocaje'yo,
cuaquijijiya dahuacaje'yo cuana pea-ai.
Eyaya Emeshimesenei queaca'aneetii nequiya
Babiloniacuiñajjicuana queamimishi popoquiani huohui'yomajje queaneenee pomeeje'yo cuana”
jama huohuimeya Eyacuiñajjiya eya acanaje.
9Queahuiso emeshimesecuana ma yahuajo queamimishinee nequipoquinaje joya ecua dejja epona peacojjojjinijje jaani jama ba'e queayenonee poaje quijje. Babilonia meshijo anica equicuana quiyo'yoqui huichacha ba'esohuaquiequi bamajje ma emeshimesecuana paje, queayenonee mimije macuiñajjicuanajo. 10Ma emeshimese dejjacuana queahueshanee nequicaje Babilonia meshijo Eyacuiñajji yajjajo ohua oya jayojja queaneenee epomeepea-aica'yo poanijje. Jama queayenonee poaje cuana ojo ba'a:
“Ecuana queayenonee poani.
Miquianaja ciudad queaquemonee Babilonia bajjani, queaca'anee anipoquinaje.
Jjeya ca miquiana queaneenee po'yojji poecuajinaje shonoshonojjimanei.”
11Ojjaña meshijo ba'e poe aquiana quiapoquiajji poanicuana queayeno paje Babilonia meshi jama acaje'yo bamajje. Queayenonee mimipoquije pea-ai ma ciudadjo, macuiñajjicuanajo oja aquianacuana jjeshepoquiajji dejjacuana eponacuana chama'yo poajejojoya. 12Macuanaja aquianacuana queasosenahuenee queahuisonee aninaje equiapoquiajji jama ba'a: oro, meioshe, pea meicuana queasiyo queasosenahue, perlacuana, daqui queanahuenee huo'onei, pea huo'ome pea-ai, pea daqui queasosenahueneecuana socojjima queasiyo queajeyonee pea-ai, acuicuana queashiyenee queasosehuiso, aquianacuana queabiso onaja ne enequiajji marfil bajjani, meihuo'o, baajee, meijeyo queanahue mármol bajjani pea-ai oja ne aninaje. 13Pea aquianacuana oja quiapoquiajji queahuiso aninaje ba'a: queashiyenee bobicuana johua huanajji, canela, shiyeshiye edahuashiyejji, shiyeshiye eyami shicuijji, daqui shiyejji, uvajjajjana', acuijjajja olivo bajjani oja cuiapasha esei, pohuipohui queasosenahue, anosoai pohuipohui pea-ai. Quiacapoquinaje cuaa macacuana, ovejacuana, monacuana, meshijjepojjicuana pea-ai. Quiapea-aicapoquianaje cuaa dejjacuana eponacuana pea-ai peajo echacochacopoquijjitii ejjeshe, ijjiacajjicuana jamaya jamatii oya dojjoshahuajji poani. Ma aquianacuanaya Babiloniacuiñajjicuaa jjeshecapoquinaje bejjo sosejje. 14Ma aquianacuana quiapoquiajji poanicuana jama queayenonee mimime poanaje Babilonia meshicuiñajjicuananijje ba'a:
“Jjeya chama'yotii ma miquiaaya sapoquianaje aquianacuana,
chama'yotii bobi queasosehuiso,
ebanajjajjacuana ma miquiaaya sapoquianaje.
Chama'nei'yo miquianaja aquiana dejjaja ne queabamenee queasosehuiso,
miquianaja bejjocuana pea-ai chama'yo.
Ojjañacuana chama' po'yonaje,
ebabeca'yojji pojjeamatii quianaja poaje”
jama mimimeya poanaje cuana onijje.
15Ojjaña meshijo ba'e poe aquianacuana quiapoquiajji poanajecuana queabejjohuisonee popoquinaje ma Babilonia meshijo ba'ecanajecuanaja bejjojo. Majo ba'ecacuana chama'yotii Eyacuiñajjiya pomeecaje'yo oja mimishijo bamajje quea-ohueshanee nequicaje aquiana quiapoquiajji poanicuana queameteneejjejojoya ohua oya jayojja pea-ai jama eaca'yo poanijje cuana quijje oja mimishijo. Paneineije, queayenonee mimije pea-ai jama ba'a:
16“E'ejojonei ecuana queayenonee po'yani
ma ciudad ona ba'ejji queaquemonee poanajejojoya,
equicuana queaca'anee anipoquinajejojoya.
Macuiñajjicuaa daquijeyo queasosehuiso huo'o, pea huo'ome pea-ai huoshocapoquinaje.
Macuiñajjicuanaja eyamijo ba'enaje aquianacuana eyijji,
eshajjajo eba'ehuanajji oro,
pea mei queasiyo queasosehuiso, perlacuana pea-ai.
17Jjeya ca ojjaña ma aquianacuana queasosehuisonee chama'yotii ponana'yonaje”
jama mimimeya poanaje cuana ojo.
Ojjaña oja meshijo ani bae-aiai enajo ba'e ebishe'aimesecuaa ma bishe'aicuana a-aequijji poanicuaa ma oja bishe'aicuanajo chacochacoanicuaa pea-ai queahueshanee bae-aiai enajo ba'eya Babilonia meshi chama'yotii acaje'yo bacanaje. 18Huichacha queahuisonee ba'esohuaquiequi bamajje janobajjimanei taaanaje cuana jama ba'a: “¡Chama'neinei pea ciudad queaquemonee, queapamenee ani jiquiajjaya!” jamaya taaame poanaje macuana. 19Babiloniacuiñajjicuana quiyoje'yo bajji poanajecuana queayenonee pomajje meshipohui jeasohuajeacanaje oja sapahuasijje ma bishe'aijo chacochacoanicuana. Pa-ani, queayenonee mimiani pea-ai janobajjimanei taaanaje jama ba'a:
“E'ejojonei ecuana queayenonee po'yani
ma ciudad queaquemonee poanajejojo,
ma equicuana queaca'a anipoquinajejojoya.
Ojjaña ecuana ebishe'aimesecuana ecuanaja bishe'aicuana bae-aiai enajo ba'e
queabejjohuisonee popoquinaje macuiñajjicuanajo.
Jjeya ma meshijo anicanaje equicuana, majo ba'ecanajecuana pea-ai
chama'yotii quiyocuajica'yonaje”
jama taaameya ponequinaje cuana.
20Miquianaya ca oe joya Eyajo ba'eca'yo queabihuinee pocue.
Ojjaña joya Eyacuiñajjija'yo poani quiana,
ojjaña ma Eyacuiñajjija esohuihuohuiquinequijji poacuana,
ma Eyacuiñajjija quia esohuihuohuijji poanajecuana pea-ai queabihuinee popea-aicue
Eyacuiñajjiya Babiloniacuiñajjicuana chama'yotii pojeameeca'yonaje macuiñajjicuaa miquianaya queaneenee acapoquinaje sosejje.
21Majoya aje oe ángel queaca'aneeya mei-ai queaquemonee joya anosoai ijjiatabomeejji poani quemoajjaya jjequisohuamajje jeaoqueajeacanaje bae-aiai enahuasijje. Jama amajje ohuaya huohuicanaje cuana jama ba'a:
“Jiquio ecua mei-ai bae-aiai enaojjohuasijje ejeaoqueajea aninobicuajijeaquinaje chama'yotii poanaje,
oya jayojjaya miquianaya Babiloniacuiñajjicuana chama'yotii pocuajije'yo.
Miquianaya jjeya queahuisonee ba'e oya meshijo ojee queaca'a nequipoquiani,
queaca'anee popoquiani bacani cuaa pea-ai,
jamatii quijjepishana miquiana ebabeca'yojji pojjeamatii poaje cuanaja.
22Babilonia meshijo arpa eiñaqueyabeca'yojji pojjeamatii quianaja poaje,
esohuicuayabeca'yojji pojjeamatii quiana poaje.
Dehue, baasa' pea-ai emiabeca'yojji pojjeamatii quianaja poaje.
Chama'neinei poaje'yo dejjacuana joya acui quecuajji poani,
joya meicuana nejji poani pea-ai.
Dejjacuaa oja meshijo anosoai mei-ai queaquemoneeya ijjiatabomeecani shajja-ajjajjimaneitii poaje'yo cuanaja.
23Babilonia meshijo cuaquijijicuana ejeaja'apoquijji poanaje chama'yotii poaje.
Dejja eponajo ejjahuanaquijji fiesta queabihuinee acani cuaa ma meshijo
eshajja-ajjabeca'yojji pojjeamatii poaje cuanaja.
Miquianaja meshi Babilonia chama'yo pomeecanaje
miquianaja meshijo nequica aquiana quiapoquiajji poanajecuaa peajaajjicuana queamimishi pomeecanajejojoya queabejjohuisonee pomajje.
Ma dejjacuaaya oja esohui siajjejo queahuiso meshijo ba'ecacuana dasiacapoquinaje.
24Babiloniacuiñajjicuaa Eyacuiñajjija esohuihuohuijji poanajecuana,
ma queahuiso ojaya'yo poanajecuana pea-ai
quecuacapoqui'yonaje ojjaña meshiyasijje.
Peacuana pea-ai jamatii nequi quecuacapoqui'yonaje cuaa.
Jamajjeya Eyacuiñajjiya ma meshi chama'yotii pojeameeca'yonaje”
jama huohuimeya angelya acanaje.
Currently Selected:
APOCALIPSIS 18: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
