APOCALIPSIS 17

Ciudad queaquemonee ani ma peacojjojji epona jayojja poanaje

1Majoya aje oe angelya ma pea seis angelcuana edahuapejja mejji nequinajenijjeya eya huohuicahuanaje jama ba'a: “Enijje poquicue so'o. Eyaya miya bameeje oe ciudad queaquemo queacueihuisojo ani. Ma meshiya epona peacojjojji poani queaca'a jama. Eyaya huohuiaña Eyacuiñajjiya quijje ma epona queaneenee pomeecaje oja mimishijo. 2Ojjaña meshijo nequica emeshimesecuana ma epona queamimishinee poaninijje jjachichaquinaje. Jamajjeya Eyacuiñajjiya ojjaña emeshimesecuana ma epona peacojjojjinijje jaanaje jayojja bacanaje. Ojjaña meshijo ba'eca onijje jaamajje huoonaje jama Eyacuiñajjiya bapea-aicanaje cuana” jama huohuimeya angelya eya acanaje.

3Majoya Edojjoshahuapameya eya queaca'a pomeecanaje ma e huohuicaje queaja'a ebajji. Oe angelya eya dojocanaje se-ejjama' meshiyasijje. Majotii aniya eyaya epona shadaa-aihuo'o jayojjaja eyamibiajje eanisohuaqui ani banaje jjacahuibaquiani jayojja aniya. Shadaa-aihuo'o jayojjaja eyamijo Eyacuiñajjija bajjanicuana queahuisonee etehue jaa poanaje. Oyanei Eyacuiñajji jayojja poani jjabaquinaje. Jama poca-ajja. Jamajjeya Eyacuiñajji queaqueneneeya bacanaje ojayanei ebajjanicuana majo jaa. Ma shadaa-aihuo'o jayojja siete huisome sapajji poanaje, diez huisome she'anajji poanaje pea-ai. 4Ma peacojjojji poani eponaja daqui queahuo'onee, pea huo'ome pea-ai poanaje. Oja yamijo ba'enaje oro queahuiso, perlacuana, pea meicuana queahuiso queanahuenee pea-ai ba'enaje. Oya oro caneco mejji poanaje. Ma eponaja mimishicuana, ma ohua peacojjojji poaniya peanijje queatainee acapoquinaje ena queajehueneenee jayojja poanaje ma oja canecojo queacuatanee nequinaje ena jama. 5Ma eponaja ebahuajje oja bajjani etehue jaanaje jama poanijje ba'a: “Eya Babilonia meshi queaca'anee poani. Eya ojjaña peacojjojji poanicuanaja enaese poani. Eyaya ojjaña meshijo ba'ecacuana queamimishinee pomeepoquiaña.” Ma bajjani eponaja ebahuajje etehue jaa ojjañacuanaja queaquehua poanaje yajja poanijje shai maya. 6Majoya eyaya ma epona ehuoo ani jayojja banaje. Ohuaya Eyacuiñajjija'yo poanajecuanaja ena' ishimajamajacanaje. Ma eponaaya manomeeca'yonaje Jesosaja epeejjicuana joya Jesosa cajaa a'yojjima'nei poanajecuana.

Ma epona bamajje eya jjabaneineiquinaje ojo. 7Majo ani oe angelya eya huohuiajjacanaje jama ba'a: “¿Yajjajje shai miya jjabaneineiquiani ojo? Epona, ma shadaa-aihuo'o jayojja siete huisome sapajji, diez huisome she'anajji epona dojojji poani pea-ai yajja poanijje shai oya eyaya miya jjeya huohuije ojjañacuanaja queaquehuanee poanijojoya. 8Bacue, ma shadaa-ai jayojja miyaya banaje yahuajo oya eshe nequinaje, jjeya chama' so'o. Quijje ca oya jjani queadoenee quipojoma'jo ani cuayaje. Majoya Jesosaa oya ejeyotii queahueshanee huoojeacaje'yo. Yahuajoneinei Eyacuiñajjiya ojjaña aquianacuana panajjimahuajo oja nahue'yo poajecuanaja bajjani tehuecapoa oja librojo eba'etiitii'yojji. Ma oja bajjani tehuejjima poacuana ca jjabaneineiquinaje ma shadaa-ai jayojjajo. Ebionei oya eshe nequiapoa, jjeya oya chama' so'o, quijje ca jjanequija'aquije o'oya. Oya jama poaje'yo bamajje queahuisocuana oya queaca'anee poanijo jjashahuabaquije.

9“Joya queasapaja'a poanicuanaja queaja'a bacajji jiquio yajja poanijje. Ojaya siete huisome esapacuana joya ecua siete huisome eyiyocuana nequi jama. Ma eyiyocuanajamacoojo epona ani. Ma nequi eyiyocuanaya, siete huisome emeshimesecuana jama pea-aiya poani. 10Yahuajo cinco huisome ma emeshimesecuana mano'yonaje, jjeya chama'yo. Jjeya ca oeneiya huoojeacapoquiani cuana. Ma pea oe-ejjenei epojji ca nequijjima so'o ona huoojeapoquiajji epojji. O emeshimese epojji epojja poeajo iyehuiso cahuime nequije emeshimese epojji. 11Shadaa-ai jayojja ma yahuajonei eshe nequiapoa, jjeya ca ma chama' so'o, maya emeshimese número ocho poaje quijje. Oya nequije ma ecua pea siete emeshimesecuana nequipoquinaje jamaya. Majoya quijje oya ejeyotii queahueshanee huoojeacaje'yo.

12“Ma diez eshe'ana huiso miya banaje joya ecua diez huisome pea emeshimesecuana epojji jama. Macuanaya nequijjima so'o emeshimese epojji. Quijje che oepojjinei una hora jayojja ma emeshimesecuana nequije shadaa-ai jayojjanijje ojjañajaajjicuana huoojeapoquiajji epojji ojee. 13Majoya quijjepishana ma diez huisome emeshimesecuaa oya jayojja jjashahuabaquime, pomajje shadaa-ai jayojja oenei oja etii epojji queaca'anee nequimeecaje ojjañajaajjicuana huoojeapoquiajji epojji oeneiya. 14Majoya quijje ojjañajaajjicuana jjachichaquimajje jjaquecuaquicaje joya Ovejaja Bacuaejja jayojja poaninijje, oja epeejjicuananijje pea-ai. Joya Ovejaja Bacuaejja jayojja poaniya ojjaña emeshimesecuana, shadaa-ai jayojja pea-ai jeabichajeacaje'yo oya oenei Emeshimesenei queaca'aneetii poaniyajjejojoya, oya ojjaña emeshimesecuana huoojeapoquiajjitii poaniyajjejojoya. Onijjetii nequicaje'yo ojjaña joya ojaya'yo poanicuana oja babacacuanaya. Macuanaya ojaya esohui jayojja ba'epoquianitii.” Jama huohuimeya angelya eya acanaje.

15Eya huohuipea-aicanaje jama ba'a: “Ma miya banaje queacueihuiso jaajo epona peacojjojji poani o quii-anijjijo ani joya ecua queahuisonee peajaajjicuana queahuesha ba'eca, pea esohuijo mimianicuana jama pea-aiya. 16Ma diez huisome eshe'anacuana joya ecua diez huisome emeshimesecuana jama pea-aiya poani. Majoya quijje ma diez huisome emeshimesecuana, ma shadaa-ai jayojja pea-ai queaqueneneenee poaje ma epona peacojjojji poaninijje. Jamajjeya ojjaña ojaya aquianacuana jjeshejeyocaje'yo. Oya daquima'nei jamapajipaji pomeecaje'yo. Majoya emeshimesecuaa epona manomee'yomajje oja yami ijjiacaje'yo o dahua'yomajje. 17Eyacuiñajjiya ma diez emeshimesecuana jama pomeesapomajjeya oya jayojja jjashahuabaquime pomeecaje cuana ma shadaa-ai jayojja ojaya etii ojjaña huoojeapoquiajji epojjijo. Oya oenei queaca'anee nequije so'o. Jamajjeya shadaa-ai jayojja ojjañajaajjicuana huoojeacapoquije Eyacuiñajjija nequimeeya oja esohui apoa ajeyocajo. 18Ma peacojjojji poani epona miya banaje joya ecua oe ciudad queaquemonee ani jamaya. Ma meshijo nequica etii poanicuaa ojjañajaajjicuana huoojeacapoquiani. Jama poanijje oya meshi queaquemo jama” jama huohuimeya angelya eya acanaje.

Currently Selected:

APOCALIPSIS 17: ESE

Highlight

Compare

Copy