APOCALIPSIS 16

Eyacuiñajjiya queaqueneneeya siete huisome ojjaña mimishicuana queaneenee pomeejji huoojeacaje

1Majoya eyaya shajja-ajjanaje Eyacuiñajjija equi-ai Eyajo ani oe queamimisajeanee mimije ma siete huisome angelcuananijje jama poaje ba'a: “Poquicue meshiyasijje. Cuamaya poquimajjeya Eyacuiñajji queaqueneneeja ojjaña mimishicuana queaneenee pomeejjicuana onaja meshicuanahuasijje huoojeacue. Edahuapejjacuana uvajjajjana' queacuataneejji shojeacue onaja meshiyasijje” jama huohuimeya angelcuana acanaje.

2Majoya aje ebionei angelya poquimajje ma oja edahuapejjajo nequi ona queaneenee pomeejji shojeacanaje meshiyasijje. Majoya ojjaña joya enaojjojo ani nequisohua eyami queaquemoneeja numerojo jjajeasiimeequicuana, joya o bihuiajji poanicuana pea-ai queamanonee pomeecanaje. Queabojohuiso pomeecanaje, queahuisonee majoya queaneenee jaacanaje.

3Majoya aje pea segundo angelya oja edahuapejjajojo nequi ona queaneenee pomeejji shojeapea-aicanaje bae-aiai ani enahuasijje. Jamajjeya ojjaña bae-aiai ani ena joya ecua dejja equecua'yoja ena' jama quea-ihuinee ponananaje. Majoya ojjaña ma bae-aiai enaojjocuiñajjicuana manoca'yonaje, chama'yotii poanaje aquiana eshe bae-aiaijo, manojeyomeeca'yonaje.

4Majoya aje pea tercer angelya ma oja edahuapejjajo nequi ona queaneenee pomeejji shojeapea-aicanaje ojjaña pea ena queapame jaahuasijje, ena queapame eishijji nequiyasijje pea-ai. Jamajjeya ojjaña ma ena queapame jaa, nequi pea-ai ena' quea-ihuinee eca'aca ponananaje. 5Eyaya shajja-ajjanaje ma ángel ena jaahuanapoquiajji poani Eyacuiñajjinijje mimije jama ba'a:

“Ecuanaja Emeshimesenei miya yahuajoneinei oenei eanitiiapoa,

miya oenei Eyacuiñajji poani

jjeya pea-ai queapameneetii, mimishima'nei.

Miyaya queajjashahuabaquija'anee poanitiiya jiquio meshijo ba'ecacuana queaneenee pomeejji huoojeaña oja mimishijo.

6Dejja mimishicuaa queahuiso mique nahue'yocuanaja ena' cuayameequica'yonaje,

miquea esohuihuohuijji poanajecuanaja pea-ai.

Jamajjeya jjeya miyaya ma dejja mimishicuana ena' eihui ishimeeaña

queahuisocuanaja ena' ma dejjacuaaya cuayameequica'yonajejojoya.

Jamaya miquea pomeecajji poanaje cuana oja mimishijo.”

7Majoya altar equecua nequijo oe mimije shajja-ajjanaje jama poaje ba'a: “E'ejojonei Emeshimesenei Eyacuiñajji queaca'aneetii nequipoquiani. Miyaya queajjashahuabaquija'aneetii poaniya ma mimishicuana queaneenee pomeenaje oja mimishijo, e'ejojonei miquea jamaya pomeecajji poanaje cuana.”

8Majoya aje pea cuarto angelya ma oja edahuapejjajo nequi ona queaneenee pomeejji shojeapea-aicanaje eshequi nequiyasijje. Ohua jama shojeame acajo eshequi queaquiyoneenee jijineinaje. Queahuisonee meshijo ba'eca mimishicuana dahuacanaje, queaquiyonee pomeecanaje. 9Eshequiya dahuaneineicajje jamatii ma mimishicuana queatainee mimipoquinaje Eyacuiñajjijo queahuisocuana queaneenee pomeejjicuana ohua huoojeacanajejojoya. Macuanaya pea jjashahuabaquime posapo'yoajjanei poanaje oja mimishijo, Eyacuiñajji queaca'aneetii poani bihuiajjima acapoquinaje cuaa.

10Majoya aje pea quinto angelya ma oja edahuapejjajo nequi ona queaneenee pomeejji shojeapea-aicanaje enaojjojo ani nequisohua eyami queaquemonee quii-anijjiyasijje. Ohua jama shojeame acajo quea-aaponeenee ponananaje queahuisonee meshiyasijje joya enaojjojo ani nequisohua eyami queaquemonee bihuiapoquiajji poanicuanaja meshiyasijjeyee. Ma meshicuanajo ba'ecacuana queaneenee jjabaquimajje jja-anaijjiajeaquicanaje. 11Jamatii queaneenee ba'e jjabahuejjaquijjima, queatainee mimipoquinaje cuana Eyajo nequi Eyacuiñajjijo ohua queaneenee, queachijihuisonee pea-ai pomeecajje. Queamimishitii ba'ecapoquinaje cuana, pea jjashahuabaquime posapo'yoajjanei poanaje oja mimishijo.

12Majoya aje pea sexto angelya ma oja edahuapejjajo nequi ona queaneenee pomeejji shojeapea-aicanaje cuei queaquemonee Éufrates bajjani jaahuasijje. Ohua jama shojeame acajo cuei queaquemo huosanana'yonaje, enama'yo poanaje. Quijje ma cuei ehuosa'yo jaajje eshequi jaasohuanimijijje poecaje emeshimesecuana, ojjaña oja soldadocuana pea-ai jjaquecuaquiya peacuananijje.

13Majo aniya eyaya banaje ma shadaa-ai jayojja nequi, ma enaojjojo ani nequisohua eyami queaquemonee nequi, oe esohuihuohuijjinisho nequi pea-ai. Ma trescuanaja enabajje tres eshahuamasecuana enahuio' jama cuayaquije bapea-ainaje. 14Ma tres huisome eshahuacuaa queahuisonee dejjaja ajjima'neineicuana acapoquinaje queahuisocuanaja ebajji. Majoya ma tres eshahuamasecuana poquinaje ojjaña meshijo nequica emeshimesecuana oja soldadocuana pea-ai jjachichameequiya ejjaquecuaquijji. Ma ejjachichaqui nequica jjaquecuaquicaje Eyacuiñajji queaca'aneetii poaninijje, ojaya epeejjicuananijje pea-ai epojja Eyacuiñajji queaca'aneetii poani ojjañacuanajo jjabameequijji poeajo.

15Emeshimesenei Jesosa jama poani ba'a: “¡Shajja-ajjaneicue mo! Eya poecuajije o'oya joya ecua siipojji quehuajje poecuajiani jama. E'ejojonei queabihuinee poaje joya ecuea epeejjicuana ejo jjaishoaquipoquianitii joya ecua dejja cahuijjimatii ani oja daqui epoqui'yojji eiyajea apoa'ya ani jama jayojja. Dejja joya daqui iyajeapojjima' jamatii poquinanani daquima' jama pea-ai epo poanijje, e poeo'oyajo queabicho epo poanijje, jama ba'ecue.”

16Majoya aje ma tres eshahuacuaa ojjaña meshijo nequica emeshimesecuana oja soldado queahuisoneecuana pea-ai jjachichaquimeecanaje ojee ejjaquecuaquijji oe meshiyasijje. Ma meshi hebreoja esohuijo Armagedón bajjani poani.

17Majoya aje pea séptimo angelya ma oja edahuapejjajo nequi ona queaneenee pomeejji shojeapea-aicanaje beni poequiyasijje. Eyacuiñajjija equi-ai Eyajo anijo, o quii-anijjiai Eyajo nequijo pea-ai oe queamimisajea mimije eyaya shajja-ajjanaje jama poaje ba'a: “Apoa, oe-ejjenei epojja poeyanaje.” 18O jama mimime pojeahuajo pojjejjecuana queajeaja'anee ponananaje. Cueji queashajjaquijjonee, dejjacuanaja esohui queashajjaquijjo mimije pea-ai shajja-ajjanaje. Majoya meshi huehuahuehuaneineinaje janobajjimanei ma ecua yahuajoneinei Eyacuiñajjiya meshi panacajeahua iyequemo huehuahuehuapoa jama pojjeama. 19Jamajjeya ojjañajaajjicuanaja ciudadcuanajo anica equicuana, aoao anica pea-ai oquejeacuajinanaqui'yonaje. Babiloniacuiñajjicuanaja equicuana queaca'anee ani, queaquemonee pea-ai oquejeacuajinanaqui'yonaje. Oja meshi jjapojojeaquinaje tres mijime meshi pea-ai epojji. Eyacuiñajjija pajeajjimanei poanaje macuiñajjicuana queamimishineetii ba'epoquinaje. Jamajjeya ohuaya queaquenenee poaniya oja mimishijo Babiloniacuiñajjicuana queaneenee pomeeca'yonaje. 20Meshi huehuahuehuaneineiajo queahuiso nequi nasicuana aninobiqui'yonaje enaojjohuasijje, eyiyocuana oquequi'yonaje, chama'yo poanaje. 21Eyajo nequi mejaca'a queabiquienee, 45 kilos biquieme, oquenaje jiquio meshijo ba'eca mimishicuanabiajje. Jajapashaca'yonaje cuana. Jamajjeya majo ba'eca mimishicuana joya mano'yojjima queatainee miminaje Eyacuiñajjijo ona queaneenee pomee'yojji mejaca'a queabiquienee ohua oquemeecajo.

Currently Selected:

APOCALIPSIS 16: ESE

Highlight

Compare

Copy