APOCALIPSIS 11

Beca dejja Eyacuiñajjija esohuihuohuijji poeje quijje

1Majoya eya quiacanaje acuibeje epinei jama ache ao eipiajji. Eyacuiñajjiya eya huohuicanaje jama ba'a: “Nequisohua'yocue. Ecuea equi-ai ipiaquicue ojjaña mijijje. Majo nequi altar equecua ipiapea-aicue. Ojjaña joya Eyacuiñajji bihuiajji poanicuana majo ani sicopea-aiquicue. 2A'a ca oe ma Eyacuiñajjija equi-aiquiquibo meshi ipiajji ma meshi ohuaya judío pojjeamacuanaja yajji quiameecanajejojoya. Peajaajjicuana judío pojjeamacuana Eyacuiñajjija meshi jjeshe'yomajje majotiiya 42 ba'ime huisotii ba'epoquije. 3Majoya quijje eyaya huoojeaje beca dejja ecuea esohuihuohuijji poani. Oya daquisha'a huoshojji poaje ojjañaja ebajji oya queayeno poani. Ma beca dejjaa ecue quia esohui 1.260 cahuime huisotii huohuicapoquije cuana” jamaya Eyacuiñajjiya eya huohuicanaje.

4Ma beca dejja Eyacuiñajjija huoojea oja esohuihuohuijji poani jiquio meshijo nequije ma Eyacuiñajji ani cojjaneijo beca acuijjajja olivos bajjani nequi jama. Ma eojjaña-aquianamese poani Eyacuiñajji ani cojjaneijo cuaquijijisisi nequiajji beca nequi, jama pea-aiya oya poaje. 5Ojjaña joya o queanee posapomeejji poajecuana coma beca dejjaa oja enabajje cuaquijiji cuayaquijeya dahuajeacaje'yo. Jamaya ohuaya ajeacapoquije'yo ojjaña joya o queanee posapomeejji poajecuana, o quecua'yojji posapoajecuana pea-ai. 6Eyacuiñajjiya ma beca dejja queaca'anee pomeecaje ojaya ena oquemee'yojjima yajji meshiyasijje. Eyacuiñajjija esohui ae poaje quijje ohua huohuicapoquianijo ena oque'yojjimatii poaje so'o. Oya queaca'anee pomeecaje ojjaña ena meshijo jaaca, anica pea-ai ena' quea-ihuinee pomeejji. Ojjaña meshijo ba'ecacuana queaneenee pomeejji ma beca dejja nequije. Cua ohua queaneenee pomeesa-acaje huisotiicuana oja mimishijo queaneenee pomeecaje.

7Eyacuiñajjija huoojea beca dejjaa oja esohui huohuijeyocajo oe ebiocuiñajji jayojja queamaseneenee cuayaquije ma jjani queadoenee quipojoma'jo ani onijje jjaquecuaquiya. Majoya ohuaya ma beca dejja quecuacaje'yo. 8Majoya ma beca dejjaja oja yami ciudad queaquemojo jaajeaje ejeojjiaisahuajotii. Ma beca dejjaja eyami Emeshimesenei acui ecuiata'apeejo onaa manomeeca'yapoa meshijotii jaajeaje. Maya Sodoma meshi jayojja poani, Egipto meshi jayojja pea-ai. 9Ma beca dejjaja eyami ejeajea jaa baa, queahuisonee pea meshicuanajo ba'ecacuana, peajaajjicuana, pea mimicuana pea-ai poecaje. Jamatii oya mojeameejjimatii acaje cuaa tres y medio cahuime huiso. 10Queahuiso meshijo ba'ecacuana queabihuinee poaje ma beca dejja quecuaca'yonaje bamajje queaneenee pomeejji ohua huoojeamajamajacanajejojoya oja mimishijo. Fiesta queaquemo acaje cuaa o mano'yonajejo. Aquianacuana pea onijje ba'ecacuana sosema' quiacaje cuaa queabihuinee po'yaniyajjejojoya.

11Majoya aje tres y medio cahuime huisotii ma beca dejja emano'yo jaa Eyacuiñajjiya oya shequimeecaje'yo. Oya nequisohuameecaje'yo. Jamajjeya ojjaña joya o eshequi'yo nequi ba'yojji poajecuana queameteneenee ponanaje ojo. 12Majoya ma beca dejjaa shajja-ajjacanaje oe eyajo nequi onijje mimije janobajjimanei jama ba'a: “¡Jiquiacua ba'esohua'yocue!” Majoya o sapo'yoajjanei poanicuaa bacanitii ma beca dejja ba'esohuaquije'yo botejjee eyahuasijje. 13O ba'esohuaqui'yojeahuajotii meshi janobajjimanei huehuahuehuaneineije. Equicuana queahuisonee ani, una décima parte, oquejeacuaji'yomajje dejjacuana, eponacuana, esho'iquiana pea-ai ojjañajo 7.000 huisome cuana cuiapashajeacuajicaje'yo. Ojjaña ma meshijo eshetii mano'yojjimacuaa queameteneenee pomajje Eyacuiñajji Eyajo queaca'aneetii nequi bacaje.

14Jamaya ma pea segundo queacamajanee pomeejji poecuajije. Quijjepishana pea tercer queacamajanee pomeejji poeje.

Séptimo angelya oja baasa' miapea-aicanaje

15Majoya aje pea séptimo angelya oja baasa' miacajeahuajo angelcuaa queamimisajeaneeya huohuicaje shajja-ajjanaje jama ba'a:

“Eyacuiñajjiya eseja Emeshimeseneiya jjeya ojjaña meshijo ba'ecacuana huoojeacapoquijetii

oja huoojea ojjañacuana nahue'yojji poani Quitonijjetiiya.

Ojjañacuana huoojeapoquiajjitii poani oya popajea'yoajjanei nequipoquije”

jamaya huohuicanaje. 16Ma o quii-anijjijo ani ma 24 huisome etii poanicuana Eyacuiñajji ani cojjaneijo oja ecuioshajjajo anioquemajje bahua jaaoquenaje meshiyasijjeyee o bihuiajji. 17Jama bihuiame oya acanaje etiicuaa ba'a:

“Eyacuiñajji miya Emeshimesenei queaca'aneetii nequipoquiani.

Miya yahuajonei eanitiiapoa, jjeyanei eanitii pea-ai.

Ecuaaya miya bihuiaña miya queaca'aneetii poanijojoya.

Jjeya miya ojjañacuana huoojeapoquiajjitii poani.

18Ojjañajaajjicuana queaquenenee poani minijje,

epojja mi onanijje queaqueneneenee pojji poeyanajejojoya.

Ma pojjajo miyaya ojjaña emano'yocuana shequimee'yomajje

achajja ba'ecapoquianinaje cuana ja'anei huohuije'yo.

Ma pojjajo pea-aiya ojjaña mique nahue'yocuana,

ma mijo chacochacopoquinajecuana,

ma miquea esohui huohuipoquiajji poanajecuana,

ma mi bihuiapoquiajji poanajecuana,

ojjaña ma queaca'a ba'epoquinaje,

ma oyatii ca'a-ama poanaje jjabaquijjicuana pea-ai

miyaya o queabihui pojji quiaje.

Jamatii ojjañacuana emeshimesecuana pea-ai

ma peacuana queacamajanee pomeejji ponequinaje,

jiquio meshicuana peajja pomeejji poanaje pea-ai

miyaya queaneenee pomeeje'yo”

jama bihuiameya Eyacuiñajji acanequinaje angelcuaa.

19Majoya Eyacuiñajjija equi-ai ma Eyajo ani oyatii jjaca'apejoquinaje. Eyacuiñajjija quia esohui meibejejo tehue jaajji cajón majo nequi bacanaje cuaa. Eyajo cueji queasajeanee poequi, ona taaaqui jayojja queashajjaquijjonee poani pea-ai shajja-ajjacanaje cuaa. Baasiyocuaa jeaja'acanequinaje, meshi huehuahuehuanaje pea-ai. Mejaca'a queaquemo queahuisonee pea-ai oquenaje meshiyasijje.

Currently Selected:

APOCALIPSIS 11: ESE

Highlight

Compare

Copy