APOCALIPSIS 12

Oe epona, shadaa-ai jayojja pea-ai queamasenee aninaje

1Majoya ojjañacuanaja yahuajo bajjimanei poa eyajo ani jjaja'acuajiquinaje onaja queaja'a ebajji jama ba'a. Oe epona eshequi jama daqui yamijji aninaje. Ojaya ejeojjiquimejejje ba'i nequinaje. Ojaya esapajo copocopo corona bajjani iyajo doce huisome majametacuana nequinaje. 2Maya epona oejji poanaje. Ebacuaneejo oya sasianeinaje oja bacua jjeyahuanei cuayaje.

3Majoya ojjañacuanaja yahuajo bajjimanei poa pea eyajo ani jjaja'acuajiquinaje onaja queaja'a ebajji jama ba'a. Oe shadaa-aihuo'o jayojja queamasenee jjaja'aquinaje. Oya siete sapame huiso queanahuenee copocopo corona iyajji poanaje. Oya diez she'aname huiso poanaje pea-ai. 4Ma shadaa-ai jayojjaja ehua'ohua queahuisonee tercera parte majametacuana eyajo nequi, cuiajeaoqueajeacanaje meshiyasijje. Majoya shadaa-ai jayojja epona bacuaneeani cojjaneijo jaanaje ebacua cuayajo eijjia'yojji nisho. 5Majoya ma eponaja ebacua cuayanaje yahuesho'i. Oja bacua tiimajje queaca'anee pocajji poanaje ojjañajaajjicuana huoojeapoquiajjitii epojji. Jamatii oja bacua cuayajeahuajo oe angelya oya dojosohuaquicanaje Eyacuiñajji aniyasijje, o quii-anijjiai nequiyasijje. 6Enaese ca quehuapoquicuajinaje se-ejjama' meshiyasijje ma Eyacuiñajjiya o anijji epojji queapame acanajeyasijje. Majo ani Eyacuiñajjiya epona bobiacapoquinaje, jaahuanacapoquinaje pea-ai 1.260 cahuime huisotii.

7Majoya aje quijje eyahuasijje jjaquecuaquicanaje cuana. Oe ángel queaca'a Miguel bajjani pea onijje angelcuana pea-ai jjaquecuaquicanaje ma shadaa-ai jayojjanijje onijje eshahuacuananijje pea-ai. 8Ma shadaa-ai jayojjaa, onijje eshahuacuaa pea-ai angelcuana jeabichajea'yojjima acanaje. Majoya o anijji chama' po'yonaje Eyahuasijje. 9Jamajjeya ma ángel queaca'aa Miguel bajjaniya onijje angelcuaa pea-ai shadaa-ai jayojja onijje eshahuamasecuana pea-ai Eyajo ani jeaoqueajeaca'yonaje meshiyasijje. Ma shadaa-ai jayojja yahuajoneinei peyopojji poa. Jjeya oyatiiya edosiquiana bajjani poani, ebionei eshahua Satanás bajjani pea-aiya. Ohuaya ojjaña meshijo ba'ecacuana dasiacapoquianitii. Maya, ojjaña pea onijje eshahuamasecuana pea-ai huoojeaoqueajeaca'yonaje meshiyasijje.

10Majoya aje oe eyajo ani janobajjimanei mimije shajja-ajjanaje jama poani ba'a:

“Jjeya apoa epojja epoe

Eyacuiñajjija ojjaña joya ojo jjashahuabaqui'yonaje huisotiicuana nahue'yojji.

Jjeya Eyacuiñajji ojjañacuanajo jjabameequinaje oya queaca'aneetii nequipoquiani

jiquio meshijo ba'ecacuanaja Emeshimesenei poani.

Eyacuiñajjija huoojea ojjañacuana nahue'yojji poani

Quito pea-ai jjabameequinaje oya queaca'aneetii nequipoquiani ojjaña meshijo ba'ecacuana huoojeapoquiajjitii poani.

Edosiquiana Eyacuiñajji ani cojjaneijo nequipoquinaje epojjajo,

mecajje pea-ai ojjaña Jesosaja epeejjicuana queamimishihuiso ajji poani.

Jjeya ca angelcuaa oya huoojeaoqueajeaca'yonaje meshiyasijje.

11Joya Ovejaja Bacuaejja jayojja poaniya oja na' quiacajje

Jesosaja epeejjicuaa edosiquiana cajaa aca'yonaje.

Jamajjeya Jesosaja epeejjicuana meteama ba'epoquinaje jamatii Jesosajo emano'yojji.

Oja epeejjicuana apoa epo jjabaquinaje Jesosajo emano'yojji,

jamajjeya meteama poanaje edosiquianajo.

12Ojjaña quiana Eyajo ba'e'yocuana queabihuinee pocue.

Ojjaña joya jjeya eshe ba'eca jiquio meshijo,

bishe'aicuanajo ba'eca pea-ai

ca queayenonee pocajji edosiquiana meshiyasijje huoojeaoqueajeaca'yonajejojoya.

Edosiquiana epojja o Cuaqui-aiyasijje poqui'yojji poechipiani bamajje queaquenenee poani.”

13Majoya ma shadaa-ai jayojjaa meshiyasijje ejeaoqueajea'yo aniya jjabaquimajje ma epona jjeyanei cuaya bacuasho'ijji poanaje sa-ajjaquicanaje. 14Jamajjeya Eyacuiñajjiya ma epona quiacanaje beca huipaja cuicho o cuabesacuajinanajji ma se-ejjama' meshiyasijje epoquijji. Ma meshijo ani shadaa-ai jayojjaja oya napajjima anije. Oya majotii ani Eyacuiñajjiya tres y medio shequiajame huiso bobiacapoquije, jaahuanacapoquije pea-ai. 15Majoya ma shadaa-ai jayojjaa ena queahuisonee ojjajeacanaje oja enabajje cuei queaquemo jama epojji ma epona hui'ijeamee'yojji nisho. 16Majoya meshi oyatii jjaca'apejoquinaje shadaa-ai jayojjaja enabajje ojjajea ena queaquemo enobiquijji ma epona ehui'ijea'yo poanijje. 17Ma epona hui'ijea'yojjima bamajje shadaa-ai jayojja queaquenenee poanaje onijje. Jamajjeya oya poquinaje ojjaña eponaja osecuacuananijje, ma Eyacuiñajjija esohuijo jjashajja-ajjaquijji poanicuananijjeya, ma esohui Jesosajo jjashahuabaqui'yanitiicuananijjeya jjaquecuaquiya. 18Jamajjeya ma shadaa-ai jayojja bae-aiai anisahuajo nequinaje.

Currently Selected:

APOCALIPSIS 12: ESE

Highlight

Compare

Copy