SANTIAGO 5

Esohui joya quea-aquianahuiso poanicuanaja ebajji tehuepea-aicapoa

1Jiquio esohui joya quea-aquianahuiso poaniya quiaa shajja-ajjaneicue. Miquiana queacamajanee pojji jjeyanei poeje bamajje queayenonee pocue quiana, majoya oe pacue. 2Bacue, miquianajaya aquianacuana chiichii'yani, eanitiitiipoquijji pojjeama poaje. Miquianaja sejja'yocuana ihuinaje. Miquianaja daqui queasosehuiso jjeshe huiña'yani, mojohua ijjiaca'yani. 3Miquianaja bejjo esodojjo, oro, meioshe pea-ai jamatii queahuisonee chichanaje quiaa. Bejjo echichatii ani see'yonaje bamajje pea asahuapojjima'neitii ba'enaje jjabaquije quiana. Majoya Eyacuiñajjiya quiana queamimishi poanaje huohuicaje'yo quijje-ejjenei epojja apoa poajo. Miquianaja bejjo esee'yo peajja epo'yo ani queayenohua baje quiaa. Miquianaya Cuaqui-aiyasijje queaneeneetii popoquije'yo jjabaquimajje queayenoneenee poaje'yo. 4Bacue, becaa quiaa joya miquianaja quejo chacochacoanicuana siajje aña, sosequiajeyojjima aña. Majoya queayenonee pomajje queahuiso mimiani cuana miquianaja esohui siajjejo. Eyacuiñajji eojjañacuanamese queaca'aneetii nequiya shajja-ajjacanitii joya miquianajo chacochacoani cuanaja esohui miquiaa oya siajje aña. 5Miquiaaya caca jiquio meshijo ba'eya fiesta amajamajapoquiaña. Miquiananei queabihui epojjijo jjashahuabaquipoquianitii. Bobi queahuiso ijjiapoquiaña joya ecua ehuonejjicuaa huo seimeecani quijje ecuia'yojji jamaya quiana queahuiso ijjiaijjiani. Bacue, miquiana queaneenee pomee'yojji epojja poeje miquianaja mimishijo joya ecua huocuana seimeecani quijje ecuia'yojji jama miquiana po'yojjiya poeje. 6Miquiaaya joya mimishiamanei ba'yanicuana manomee'yonaje, huohuinaje peaja ecuia'yojji pea-ai. Macuana ca'a-amanei poanaje oyanei ejjanahuequijji.

Quenequenecuajiajja ba'ecapoquijji

7Ecue dohuecuana jjo'icuana, miquianaya peaa queacamajanee pomeecajje queaca'atii ba'epoquicue Emeshimesenei poeo'oyajo. Joya ecua que chacojji poanicuaa ena ishoacani oja banacuana pohua'yojji, oja banacuana quijje esejja'yojji pea-ai ishoacapoquiani, jama pea-ai quiana oe pocue. 8Oya jayojjaya queaja'a ba'epoquicue miquiana queacamajanee pomeejji poeajo. Queaca'atii oe ba'epoquicue oja esohuijo Emeshimesenei poeo'oyajji epojja apoa queachipineejojoya.

9Ecue dohuecuana jjo'icuana, a'a quiana oe Jesosaja epeejjicuanajo jjaniñebaquijji Eyacuiñajjija miquiana queamimishi poanaje huohui'yojjima yajji. Eyacuiñajji caca ese queamimishi poanaje huohui'yojji poani. Jjeya oya poeje ojjañacuanaja oja mimishi ja'anei huohui'yohua. 10Jesosaja epeejjiya quiaa shahuabacue ma yahuajonei Eyacuiñajjija esohuihuohuijji poacuana. Jamatii queacamajanee nequiya hueyahueyajjima esohui Emeshimeseneijo huohuiquicapoquiapoa cuaa. Jama pea-aiya quiana oe nequipoquicue. 11E'ejojonei eseyaya baña cuana queabihuinee poani joya queaca'atii ba'epoquianicuana jamatii onaa queacamajanee acani oja esohuijo. Miquiaaya shajja-ajjanaje Job bajjani dejjajo. Queaneenee yahuajonei pomeecajje oya queaca'atii nequipoquiapoa. Majoya quijje Eyacuiñajjiya oya jjajeameequica'yapoa, oya queahuiso asahuacao'oyapoa pea-ai. Eyacuiñajji queapamenee poaniyajjejojoya ojo queayenonee jjashahuabaquimajje jamaya oya aca'yapoa.

12Ecue dohuecuana jjo'icuana, esohui miquianaja quijje oya jayojja eajeyo'yojji a'a Eyacuiñajji Eyajo nequija ebajjijo ajji. A'a jiquio meshijo nequicaja ebajjijo pea-ai esohui ajji quijje oya jayojja miquianaja eajeyo'yojji. Miquianaja esohui a'a e'ejojonei poani peaja ebajji peaja bajjanijo aca-ajja. Jamajjeya miquiaaya e'e pomajje e'ejojonei ajeyocue. A'a esohui e'enisho ajji. Oya jayojja miquiaaya chojja pomajje a'a a'yojji. Eyacuiñajjiya quiana queanee pomeecaje miquianaja esohui mi-ajeyo'yajo.

13Oe miquiana Jesosaja epeejji queayenonee queacamajanee poani jjabaquimajje Eyacuiñajjinijje mimicue. Joya queabihui poani quiana jjabaquimajje sohuicuayacue Eyacuiñajji bihuiajji. 14Joya queamanonee jaaa Jesosaja epeejjiya caiyaameecahua Jesosaja epeejjicuanajaahuanapoquiajji poani etiicuana epoejji Eyacuiñajjinijje emimijji ojo. Majoya Emeshimeseneija bajjanijo onijje mimianiya etiicuaa oya sapa shacaje eseiya. 15Eyacuiñajjiya oya jja-ajameequicaje'yojo jjashahuabaquianiya Emeshimesenei huohuiajjacaje cuaa o oja jja-ajameequi'yojji. Majoya oya jja-ajameequicaje'yo. Emeshimeseneiya oya anisohuameecaje'yo. A'a pojja'a oya queamimishi poanaje. Emeshimeseneiya oja mimishi cuijeacaje'yo, chama'yo acaje ohuaya. 16Jamajjeya miquianaja mimishicuanajo pea Jesosaja epeejjicuananijje mimi'yocue. Miquianaja meshijo ba'eca Jesosaja epeejjicuanajo mimipea-aipoquicue o oja jja-ajameequi'yojji. Joya queaja'a ba'epoquiani mimishiamaja mimi Eyacuiñajjiya shajja-ajjaneicani. Cua ohua huohuiajjamajamajacaje huisotii Eyacuiñajjiya acaje. 17Bacue, yahuajonei esohuihuohuijji poa Elías bajjani eseya jayojja pea-aiya dejja yamijji poa. Oya mimineineipoquiapoa Eyacuiñajjinijje oja ena pomeejjima yajjijo. Majoya Eyacuiñajjiya ma meshijo ena pomee'yojjimatii acapoa tres y medio shequiajame huiso. 18Majoya aje quijje Elías mimio'oyapoa Eyacuiñajjija ena epomee'yojji. Jama mimime onijje o poajo Eyacuiñajjiya ena huoojeacao'oyapoa ebanacuana pohua'yojji.

19Ecue dohuecuana jjo'icuana, miquianaja meshijo ba'e Jesosaja epeejjiya Eyacuiñajjija esohui e'ejojonei cajaa aca'yonaje queamimishi eba'eo'oyajji. Miquianajaya maya huohuineica'yojji o Eyacuiñajjinijje ejjapeequio'oyajji. 20Jamajjeya joya pea Jesosaja epeejji Eyacuiñajjinijje ejjapeequimeeo'oyajji poanicuana oya queaquehuatii eba'epoqui poanijje comaya queapame chacochacoani miquianaja bacajji. Ohuaya Jesosaja epeejji nahuecanaje oja mimishijo. Majoya Eyacuiñajjiya oja mimishicuana queahuiso cuijeajeyo'yomajje Cuaqui-aiyasijje huoojea'yojjimatii acaje.

Currently Selected:

SANTIAGO 5: ESE

Highlight

Compare

Copy