1 PEDRO 1
1
Pedrohua ebionei esohui Jesosaja epeejjicuana queabihui pojji acapoa
1Eyaya Pedrohua Jesosa Quitoja huoojea ona sohuihuohuiquinequijji poaniya jiquio esohui tehueaña miquianajaya Eyacuiñajjija babacacuanaja ebajji. Queameshihuisocuanahuasijje jjaba'echejjequi'yo ba'e quiana, miquianaja meshineijotii pojjeama. Jjeya quiana provincia Ponto meshiyasijje ba'e'yo provincia Galacia, Capadocia, Asia, Bitinia pea-aiyasijje ba'e'yo. 2Eyacuiñajji Echii-aiya yahuajoneitii quiana babacacapoa ojayanei ejjashahuabaquijjijo. Oja Edojjoshahuapameya quiana jjashahuabameequicani queaja'a eba'epoquijji ojaya'yo, Jesosa Quitoja esohuijo ejjashajja-ajjaquipoquijji ohuaya quiana jjashahuabameequicani. Jesosa Quitoja enaa miquianaja mimishicuana cuijeaca'yonaje. Eyacuiñajjiya quiana queapamenee ca-acapoquiahuatii queahuiso ojayanei ejjashahuabaquijjijo, queaquijijjijajinee capomeecahua quiana pea-ai ohuaya.
Eseya ba'ecapoquijji jjaishoaquipoquianitii Eyacuiñajjijo
3Eyacuiñajji Jesosa Quitoja Chii ejjabihuiatiiquipoqui oya Emeshimesenei poanijojoya e-esemese. Ohuaya eseya queapamenee acanaje, queanee pomeecuaji'yojjima acanaje eseja mimishijo. Ohuaya eseya cuayameecao'oyanaje Jesosa Quito emano'yo jaa ohua shequimeeca'yapoajojoya. Jjeya eseya eyacua, pea jjashahuabaquime ba'epoqui'yani oja esohuijo. Jamajjeya ma ohua huohuicapoa huisotii esohuicuanajo eseya queabihui jjaishoaquipoquianitii acheshono maya esohui ohuaya ajeyocaje'yo. 4Majoya ma Eyacuiñajjiya queapamenee apoa acapoa quijje ese quiajji Eyahuasijje e'ejojonei maya eseyaya jjesheñaquije ojaya'yo poaniyajjejojo. Maya ihui'yoajjanei poaje, ejjachamaqui'yojji pojjeama anitiitiipoquije, pameama'yo epojji pojjeama poaje pea-ai ma Eyacuiñajjiya huanaca'acapoa huisotii quijje ese quiajji. 5Miquianaya Eyacuiñajji queaca'aneetii poanijo jjashahuabaquipoquiani, jamajjeya ohuaya queaca'aneetii nequiya quiana jaahuanacapoquiani quijje Eyahuasijje ojaya edojo'yojji. Ma epojja apoa poajo quijje miquiaaya queaja'anee baje ohuaya quiana nahuecaje'yo onijjetii eba'epoqui'yojji.
6Jamajjeya quiana Eyacuiñajjiya jama queapamenee acapoquije quijje jjabaquimajje queabihui poani jamatii jjeya onaa queanee, queacamajanee pomeecani quiana oja esohuijo. 7Miquianaya queanee, queacamaja acani cuaa oja esohuijo shajja-ajjamajje queahuisocuaa quiana bacaje e'ejojonei oja esohuijo jjashahuabaneiquipoquiani, siajje pojjeama ba'yani bacaje cuaa. Jiquiajja ba'a: Dejjacuaa a'a oro e'ejojonei ani ebajji dahuacani, jamatii maya oro anitiitiiajja, jjachamaqui'yani. Oya jayojja pea-ai eseya queaja'atii jjashahuabaquipoquiani oja esohuijo jamatii queacamajanee, queanee ba'e shajja-ajjamajje queahuisocuaa eseya e'ejojonei jjashahuabaquipoquiani bacaje majoya, oro e'ejojonei poani jama. Eseya jamatii jjashahuabanishoquiani pojjeama bacaje cuaa. Jama poajoya se Eyacuiñajjiya queabihuiya bacaje apoa epo etiica'a oja esohuijo. Majoya ohuaya esohui queapame esejo acaje Jesosa Quito poeo'oyajo.
8Miquiaaya Jesosa Quito queajeanee apoquiaña jamatii oya miquianaja ecojjaja bajjimajotii. Jjeya pea-aiya miquianaya ojo jjashahuabaquipoqui'yani jamatii miquianaja ecojjaja oya bajjima añajo so'o. Jamajjeya miquianaya queabihuineenee ba'epoquiani ojo. Chama' pea esohui miquianaja eajji majoya miquianaya queabihuinee poaniyajjejojo. 9E'ejojonei Jesosa Quitojo jjashahuabaqui'yonajejjejojoya miquiana Eyahuasijje poquije'yo. Jjeya pea-ai miquianaya jiquio meshijo ba'e onijje jjapeequipoquianitii ojaya'yo epo.
10Yahuajonei esohuihuohuijji poa dejjacuana oja esohuijo jjashahuabatiiquipoquiapoa achajja quijje Eyacuiñajjiya nahuecaje'yo cuana ebajji. Ma dejjacuanaya queahuiso mimiapoa oja esohuijoya Eyacuiñajjiya queapamenee acaje cuana ojayanei ejjashahuabaquijjijo. Jamatii maya esohui bajeyojjima cuanaja poa miquiana jjanahuemeequi'yojji Jesosa Quitojo. 11Quitoja Edojjoshahuapameya oja yamijo nequiya yahuajonei oja esohuihuohuijji poa dejjacuana bameesahuacapoa ebionei oya Quito queaneenee acaje cuaa ojjañacuanaja mimishijo. Majoya Quito queaca'aneetii queasajajanee nequije'yo ojjañacuana huoojeapoquiajji epojji quijje bameesahuacapoa cuana. Ma ebionei esohuihuohuijji poacuana queahuiso jjashahuabaneiquipoquiapoa majoya ma ebajji nishoya ache dejja shai jama poeje, acheshono shai maya poeje pea-ai. 12Esohuihuohuijji poacuanaja ache dejja shai jama poaje, acheshono shai oya poeje pea-ai ebajji pojjeamatii poa. Eyacuiñajjiya jjashahuabameequicapoa ma esohuihuohuijji poacuana oja esohui ejjanahuemeequi'yojji ojaya ebajeyojji pojjeama. Ma esohuiya quijje esejaya queaja'anee ebajji ca tehuemeecapoa cuana Eyacuiñajjiya. E'ejojonei miquiaaya jjeya shajja-ajjaneinaje Eyacuiñajjija esohui queapameneejo ejjanahuemeequi'yojji huohuijji poanija esohui. Ma miquiana sohuihuohuijji poanicuanaya Eyacuiñajjija Edojjoshahuapame yamijji poani, Eyajje poe Eyacuiñajjija huoojea Edojjoshahuapame. Ohuaya queaca'anee nequiya ma dejjacuanaya sohuihuohuimeesahuacanaje. Eyacuiñajjija angelcuaa jiquio esohui ebajji nisho asatiiacani acheshono apoa acaje'yo ojjaña oja epeejjicuana nahue'yojji.
Eyacuiñajjiya eseya queaja'a ba'emeesa-acani
13Jamajjeya queajjashahuabaquija'anee ba'epoquicue quiana apoa epo ojo echacochacojji. Queapame eba'epoquijji oe jjajaahuananeiquicue queamimishi epo poanijje. Jjashahuabaneiquipoquicuetii ma quijje Eyacuiñajjiya quiana queapamenee quiacajejo Jesosa Quito poeo'oyajo. Ma jjeshejjijoya oe queabihui jjaishoaquipoquicuetii.
14Miquianaya Eyacuiñajjija bacuacuana poani ojaya'yo jjabaquicue ojaya esohuijo ejjashajja-ajjaquipoquijji. Ma ecua miquiana yahuajo Eyacuiñajjima' jayojja queamimishi posaneipoa, a'a jama jayojjatii ba'epoquijji oja sohuima'tii. 15Jjeya quiana ca mimishiamanei queapame ba'epoquicue miquiana nahue'yojji poani Eyacuiñajji mimishima'nei queapameneenee poanijojoya. Ojjaña miquianaja eba'ejji queapame apoquiacue. 16Eyacuiñajjija esohui yahuajonei etehue jaa jama poani ba'a: “Queapamenee mimishiamanei ba'epoquicue eya jiquio Eyacuiñajji queapameneenee mimishima'nei nequijojoya.”
17Miquianaya Eyacuiñajjinijje emimijji jama poani ba'a: “Ecue Chii-ai Eyacuiñajji.” Ma Eyacuiñajjiyatiiya ojjañacuanaja oja mimishicuana ja'anei huohuicaje'yo. Ohuaya ojjañacuana oya jayojjaya queaja'anee huohuicaje'yo achajja oya ba'epoquianinaje. Jamajjeya quiaa jiquio meshijo eshe ba'eya so'o oya queaca'aneetii nequipoquiani shahuabapoquiacue. 18Miquianajaya eba Eyacuiñajjiya quiana jjesheca'yonaje jamatii eba'ejeapoquijji pojjeama mimishiña. Ma ecua miquianaja etiiquiana yahuajo queamimishi ba'epoquiapoa jama pea-ai eba'epoqui poanijje jjesheca'yonaje. Miquiana jjeshe'yojji sosejje pojjeama poa aquianacuana, oro, meioshe pea-ai. Maya anitiitiipoquiajja, jjachamaquije'yo. 19Quitoja ena' queanahueneenee sosejje ca quiana ca oe jjesheca'yonaje Eyacuiñajjiya. Oya mano'yapoa ma ecua oveja ehuone queapamenee sima'nei naa jehuica'yapoa cuaa Eyacuiñajji quiajji, jama epojji pea-ai oya mano'yapoa acuijo. 20Yahuajoneinei jiquio meshi chamahuajo oja panajjimahuajo Eyacuiñajji jjashahuabaquianiapoa Quito oja jama epomeejjijo. Majoya quijje epojja o poejji apoa poajo oya huoojeacapoa jiquio meshiyasijje miquiana nahue'yohua. 21Miquianaya Quitojo jjanahuemeequi'yonajejjejojoya Eyacuiñajjija esohuicuanajo jjashahuabaneiquipoquianitii ma quijje ohua ajeyocaje'yo esohuicuanajo. Ma Eyacuiñajjiya, Quito emano'yo jaa shequimee'yojji poaa, Quito queaca'aneetii queasajajanee nequimeecanaje. Jamajjeya quiana Eyacuiñajjijonei jjashahuabaqui'yanitii. Queabihui jjaishoaquipoquianitii ojo acheshono ohuaya oja esohui ajeyocaje'yo.
22Jjeya miquiana Eyacuiñajjija esohui e'ejojoneijo jjashajja-ajjaquimajje queaboejea poani miquianaja eyamiquipajje. Jamajjeya quiaa majoya pea miquiananijje ba'e Jesosaja epeejji queajea apoquiaña. Jamaya oya queajeaneetii acapoquijji e'ejojonei, miquianaja enabaneiya pojjeama. 23E'ejojonei miquianaya cuayao'oyanaje miquianaja chii yamijjija jea o'oya pojjeama. Chojja, jama pojjeama. Eyacuiñajjija esohuijo ca quiana ca oe cuayao'oyanaje eyacua eba'epoqui'yojji. Ma esohuiyaya eseya eyacua pomeecani queaja'a eba'epoquijji. Oja esohui oe po-ajjanei ejjachamaqui'yojji pojjeamatii poani. 24Jamajjeya oja esohui yahuajonei etehue jaa jama poani ba'a:
“Ojjaña dejjacuana jiquio meshijo nequica sipone jama.
Dejja queaca'a poani so'o jiquio ecua sipone shashani jama.
Majoya quijjepishana siponecuana sajjai'yomajje
oja shasha oquequi'yani meshiyasijje.
25Emeshimeseneija esohui ca jama pojjeama.
Oya oe po-ajjanei, jjachamaqui'yoajjanei”
jamaya etehue jaa oja esohui. Maya esohui queapamenee ese jjanahuemeequi'yojji poani Quitojo, ma yahuajo miquiana huohuicanaje cuaa esohuiya.
Currently Selected:
1 PEDRO 1: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
