SANTIAGO 4

Dejja mimishicuana jama ba'esapoca'yoajja

1¿Achejje poeani mimishicuana miquiananijje Jesosaja epeejjicuananijje mimijajimeejji poani? Miquianajayanei ejjashahuabaquijji eyamiquipajotii nequiya miquiana queamimishitii pomeesa-acani, peaja ejjashahuabaquijji queapame shajja-ajjameejjima acani pea-ai. 2Miquiaaya aquiana saneineimajje jamatii maya jjeshejjimatii aña. Majoya queaquehuanee jjashahuabaquimajje ma miquiaaya saneineiaña aquiana jjeshejjijo pea quecua'yojjijo jjashahuabaquiani. Miquiaaya peaja jjeshe aquiana jeabaneineiaña ma jjeshejjimatii jjabaquimajje mimijajiani, quenequeneani, jjacuiapea-aiquiani quiana majoya. Jjeya quiana eyaya huohuije yajjajo comaya aquiana mijjesheaña. Eyacuiñajjinijje mimiajjajjejojoya mijjesheaña ma miquiaaya saneineiaña aquianacuana. 3Becaa quiaa queaquehuatii jjashahuabaquianiya ma aquiana ejjeshejjijo Eyacuiñajji huohuiajjaña. Jamajojoya quiana Eyacuiñajjiya miquiacani miquiana queaquehuatii ojo jjashahuabaquianijojoya. Miquianaja ejjashahuabaquijjineijo maya aquiana saña queabihui epojji jamatii Eyacuiñajjima' jayojja ba'eya. 4Miquianaya caca joya ecua epona peacojjojji poani jama pea-ai ba'epoquiani ojahuejonei jjashahuabaquiajja jama. Eyacuiñajjija ejjashahuabaquijji sapo-ajjanei quiana. Jiquio meshijo nequica dejja mimishija ejjashahuabaquijji ca queajea baña quiaa. ¿A'a quianaja bajjima poani jama pomajje Eyacuiñajji sa-ajjanei quiana poani, o botiamanei? 5Jamatii ejaajeajji pojjeama Eyacuiñajjija esohui etehue jaa. Jama poani ba'a: “Eseja eyamijo Eyacuiñajjija nequimee Edojjoshahuapameya eseya queajeanee acapoquiani.” 6E'ejojonei Eyacuiñajjiya eseya queapamenee acapoquianitii ojjaña pojjajo ojayanei ejjashahuabaquijjijo. Jamajjeya oja esohui yahuajonei etehue jaa jama poani pea-ai ba'a: “Eyacuiñajji joya oyaneitii queaca'a poani poso jjabaquijjicuana asahua-ajja. Comacuana caca ohuaya cajaa acani. Joya oyanei queaca'a jjabaquiajja poanicuana caca oe Eyacuiñajjiya asahuacani queahuiso ojayanei ejjashahuabaquijjijo.” 7Jamajjeya quiana oe Eyacuiñajji emiquianamesenei poanijo jjabaquicue oja esohuijo ejjashajja-ajjaquipoquijji. A'a oe edosiquianaja esohuijo jjashajja-ajjaquijji, oja ejjashahuabaquijjicuana cajaa acue. Majoya miquiana jama ba'eme popoquiani bamajje oya jjanequishiñaquinanaje, queahuesha miquianajo poquije. 8Eyacuiñajjinijje oe jjapeeneiquipoquicue, oya queajeaneetii apoquiacue. Majoya oya miquiananijjetii nequipoquije queachipi ojee. Miquiaaya joya queamimishitii poaniya miquianaja mimishi cajaanei a'yocue. Joya ecua dejjacuaa enaa eme queajehue shacuacani jamaya miquianaja mimishijo jjapomeequi'yocue. Miquiaaya joya jjashahuabaqui beca ba'epoquianicuaa, jiquio meshijo nequica dejjaja ejjashahuabaquijji queamimishi poani cajaa anei'yocue beca jjashahuabaquimetii eba'epoqui poanijje. 9Miquianaja mimishi enequijo jjabaquimajje queayenonee pocue. A'a quiana oe jamatii mimishijjitii ba'e queabihui pojji. Miquiana queamimishi poani jjabaquimajje pacue. A'a majoya soajji. Jamajjeya miquianaja mimishijo queayenonee pocue. 10Miquianayanei ca'a-ama poani oe jjabaquicue ejjachichaqui ani Emeshimeseneinijje emimijji. Miquianaya jama poani bamajje Eyacuiñajjiya quiana queaca'a pomeecaje quijje peacuanaja miquiana queaca'a poani ebajji.

A'a miquiananijje Jesosaja epeejji queamimishi poani oja yamiquipajje bajji

11Ecue dohuecuana jjo'icuana, a'a miquianaja meshijo ba'eca Jesosaja epeejjicuana niñebajji. A'a quehuajje ojo jjaniñebaquijji. Joya Jesosaja epeejji niñebajji poanicuaa, joya o queamimishi ajji poanicuaa pea-ai Eyacuiñajjija esohui etehue queapame jaa peajja jayojja acani. Jamajjeya Eyacuiñajjiya esohui etehue queapame peajja jayojja ajji poanicuana oja esohui etehue queapamejo ejjashajja-ajjaquijji pojjeamatii poaje. 12Ohuaya Eyacuiñajji oeneiya oja esohui etehue meibejejo yahuajonei quiacapoa. Ma Eyacuiñajjiyatiiya huohuicaje'yo ache queamimishi poanaje cuana ojaya quijje queaneenee epomee'yojji. Chama'nei pea enequi o jayojja pea-ai. Ohuayatiiya eseya nahuecaje'yo, queaneenee pomeecaje'yo cuana pea-ai oja mimishijo. Jamajjeya acue quiaa ¿ajeo miquiananijje ba'e Jesosaja epeejji niñebaña? ¿Apiojji quiana jama?

Ae shai mecahuajje epojja poaje maya bajjima seja

13E'e, jiquio esohui shajja-ajjaneicue. Beca quiana jama poani ba'a: “Jjeya, mecahuajje pojja'a ecuana poquije ciudadhuasijje. Majotii nequi ecuana oe shequiaja chacochacomajje quea-aquianahuiso poaje, bejjo queahuiso chichaje” jamaya becacuana poani. 14Miquianajaya ca bajjimanei ae shai poaje mecahuajje, achajja shai poaje miquianaja eba'ejji pea-ai. Miquianaja eba'ejji joya ecua huoja mecajjeahuanei nequioqueani jamaya. Majoya quijjepishana jjapojjaquiajo jjachamaqui'yani, jamaya quiana poaje'yo. 15Jama mimime pocajji ba'a: “Emeshimesenei esejo jama sapoajo se cuamaya poquije chacohua. Oya esejo jama sapoajo se jiquio meshijo queapame ba'epoquije so'o.” 16Miquianayanei ca queaca'a poani poso jjabaquimajje cuamaya poquisapoani miquianajanei ejjashahuabaquijjijo jamatii Eyacuiñajjima' jayojja ba'e. Mimiani queahuiso ae chacoje mecahuajje. Jama mimime pomajje quiana queamimishi poani. 17Joya dejjaja ebajo ache queapame ojaya acajji Eyacuiñajjija esohui jayojja jamatii ojaya maya ajjima'tii, Eyacuiñajjiya oya bacani queamimishi poani majoya.

Currently Selected:

SANTIAGO 4: ESE

Highlight

Compare

Copy