SANTIAGO 3

1Ecue dohuecuana jjo'icuana, a'a quiana oe queahuiso Eyacuiñajjija esohuihuohuijji posapea-aipojji. Miquianajaya eba Eyacuiñajjiya ecuana jiquio oja esohuihuohuijji poani baneicani achajja ecuana ba'epoquiani. Pea Jesosaja epeejjicuana jama pojjeama ohuaya ecuana baneicani. 2Ojjaña eseya Jesosaja epeejji epo nequi queapameneetii pojjeama ba'epoquiani. Joya oja yanajo queamimishi mimime po-ajjaneicuana caca oe queapamenee tiipoquiani oja esohuijo. Jamajjeya joya oja esohui ca'ajji poaniya oja yami nahuepea-aicani queamimishi epo poanijje majoya. 3Bacue, dejjacuaa monacuana baacuiisisi naba huoshocani jjonojji o huijjequijeapoquiajji cua ohua o poquimeesa-acaniyasijje. Jama acajje monacuana jjashajja-ajjaquipoquiani jamatii oya queaquemonee queaca'a poani baacuiisisi oja nabajo equecuahuosho nequijojo. 4Oya jayojja pea-aiya bishe'aicuana enajo ba'e ebishe'aimeseya huijeacasohuaquiani che quiica'ajji bisoneiya jamatii beni queaquemo poequijo. Cua ohua o asohuaquisa-acajeyasijje dojocani bisoneija quiica'aa. 5Oya jayojjaya esejaya yana poani. Oya queabiso nequi eseja yamijo jamatii queaca'anee poani. Esejaya yana queacamajanee esohui ca'ajji. Jiquio ecua cuaquijijibisoneiya quijje cuaqui queaquemo jijimeecuajicani jama pea-aiya esejaya yanaa esohui queaquemo pomeecani. 6E'ejojonei esejaya yana joya ecua cuaqui queaquemo jijipoquiani queahuiso dahuacapoquiani jamaya poani. Eseja esohui queataicuaa enabajje cuayamajje queahuiso mimishicuana pomeecani eseja yamijo nequiya. Edosiquiaa esejaya yana queamimishica'a pomeecani. Majoya queahuisocuana queamimishi ba'ecapoquiani oja yanajo. 7Bacue, dejjacuanaja joya queamase ebiocuiñajjicuana huonecajji, maseama ojaya pomeecajji. Cuichojjicuana, peyo queamasecuana, bae-aiaijo jaacacuana pea-ai ohuaya huonecani, jjabahuonemeequicani. 8¿Ache dejjaa che oja yana nahuetiitiicani, esohui ca'acapoquianitii? Acheyapishana. Esejaya yana queaca'anee jjajochimeequiajjanei, esohui queatai jeacuayameecapoquianitii. Eseja esohui queataicuana enabajje cuayani peyoja esena' queaneenee jamaya poani. 9Eseja enabaa eseja Chii-ai Emeshimesenei bihuiaña. Majoya oya enabaa eseyaya peacuana queatai aña ma Eyacuiñajjiya panacapoacuanaya o jayojja pea-ai epojji. 10Jamajjeya oya enabaa esohui queapamenee Eyacuiñajji bihuiajji, esohui queatai peacuana ajji pea-ai acani ojee. Ecue dohuecuana jjo'icuana, jama epojji queapame pojjeama oya enabaa esohui queapame, queatai pea-ai ojee acani. 11Ena meshiquipajo nequi cuayaquinequiani cuiahuajjima. Ena queabiquia cuayaquinequiani ena queasesenijje pojjeama. Oopana cuayaquinequiani. 12Oya jayojja acui higo bajjani pea acuijjajja aceituna bajjani po-ajja. Oya jayojja uvajjono bajjani pea acuijjajja higo bajjani po-ajja. Jamajjeya ecue dohuecuana jjo'icuana, ena meshiquipajo nequi cuayaquinequiani queasesenee oya ena queabiquia epojji pojjeama, jjacuiahuaquiajja.

Queaja'anee jjashahuabaquicajji Eyacuiñajjija esohui jama

13Jamajjeya miquianaja meshijo miquiananijje nequi oe dejja queasapaja'a jjabaquiani ache queapame acajji ache aca-ajja, comaya queaja'anee ba'ecapoquijji Eyacuiñajjija esohui jayojja. Coma ca oyaneitii queaca'a poani jjabaquica-ajja. Oya jama queaja'a ba'eme popoquiajo queahuisocuaa oya queasapaja'a poani bacaje. 14Beca quiana queasapaja'a pojjeama ba'yani peaja echacojji jayojja etii epojji posaneipomajje. Miquiana queapamepishana poani etii epojji peaa acajje quenequeneani. Miquianaya jamaya queaquehua jjashahuabaquimajje, a'a jama mimime pojji ba'a: “Ecuana ca queasapaja'anee ba'e Eyacuiñajjija esohui jama.” Chojja, miquianaya ba'epoquiani e'ejojonei pojjeama, siajjepojji. 15Coma ejjashahuabaquijjicuana queaquehua Eyacuiñajjija jama pojjeama poani. Jiquio meshijo nequica dejjamimishicuanaja poani comaya. Dejjaja sapajonei nequi coma ejjashahuabaquijji cuayaquiani. Edosiquiana pea-ai jama jjashahuabaquime pomeecani cuana. 16Jamajjeya miquianaya Jesosaja epeejji poani peaja echacojji jayojja pea-ai posaneipomajje, peaa miquiana queapamepishana poani etii epojji acajje quenequenemajje, queacamajanee quiana ba'epoquije, onijje mimijajipoquije. Majoya queahuiso pea mimishicuana apoquiaje jama queaquehua jjashahuabaquimajje. 17Joya Eyacuiñajjija ejjashahuabaquijji jama ba'epoquianicuana ca jama pojjeama poani. Comacuanaya queapame mimishiama ba'epoquiani. Oya quenequenecuajiajja, queabeitii ba'epoquiani, ojjañacuananijje queapame popoquiani, peacuana asahuacapoquiani pea-ai. Oe dejja queapame pea queapame pojjeama ba-ajja. Oya e'ejojonei ba'epoquiani, siajje pojjeama, Eyacuiñajjija ejjashahuabaquijji ajji poani comacuanaya. 18Jamajjeya joya peacuana queabei queneama ba'emeesapoquijji poanicuana opejjejo ba'ecanijje e'ejojonei queabeitii ba'epoquije. Majoya oja meshijo ba'ecacuana queapame queneama ba'epoquije ojaya eba'ejjijo.

Currently Selected:

SANTIAGO 3: ESE

Highlight

Compare

Copy