SANTIAGO 2

Ojjañacuana oya jayojja pea-ai poani bacajji

1Ecue dohuecuana jjo'icuana, miquianaya Emeshimesenei Jesosa Quitojo ejjashahuabaqui'yo. Oya queaca'aneetii queasajajanee nequipoquiani Eyajo. Miquianaja meshijo ba'ecacuana ojjañatii queapame poani oya jayojja bacajji. A'a oe queapame poani, pea pameama poso ajji. 2-3Miquianaya esohuijo ejjachichaqui anijo oe dejja pojja'a quea-aquianahuiso poeje. Oja daqui queanahuenee oja huosho ba'e, emebajji orojji poani bamajje jama quiaa oya aje ba'a: “Ma-aje equii-anijji queapame ehuiyasijje eanioquejji.” Maneitii eshequi nequijo pea dejja aema'nei poani daquichijji poepea-aije. Oya jama poeje bamajje jama quiaa aje ba'a: “Comajotii nequicue queahueshapishana. E'e pojja'a meshijotii anioquecue.” 4Miquiaaya o jama amajje oe dejja queapame baña aquianajo, pea dejja ca peajja jayojja quiaa aña aema'jojoya. Majoya quiaa queaquehua jjashahuabaquimajje oya bataiaña ache queapame poani ache queapame pojjeama.

5Ecue dohuecuana jjo'icuana, ecuea quiana queajeanee, jamajjeya shajja-ajjaneicue jiquio esohui. Eyacuiñajjiya babacacanaje queahuisocuana joya jiquio meshijo nequicacuaa bacani aema' ba'e. Coma aema'cuanaya Eyacuiñajjiya ojaya esohuijo jjashahuabameequica'yonaje jamatii aema' ba'e. Jamajjeya Eyacuiñajjiya ojjaña joya o queajea ajji poanicuana quijje nequimeecaje'yo ma ohua huoojeacapoquianitii meshi Eyahuasijje ma ecua yahuajonei ohuaya esohui huohuicapoa jamaya. 6Miquiaaya ca aema'cuana peajja jayojja baña. Eyacuiñajjiya ca jama pojjeama bacani. Eyaya quiana huohuiajjaje jama ba'a: ¿Ache dejjaa acuae quiana queacamaja pomeecani? ¿Aya miquianaya nequimeecani emeshimese etii poanicuanaja enapameejji? 7Dejja quea-aquianahuisocuaa quiana jamaya acani. Jesosa Quitoja bajjani peajja, queapame pojjeama ajeacani coma dejjacuaaya. Ma bajjani queapamejoya miquiana yahuajopishana jjashahuabaqui'yonaje ojaya'yo epojji.

8Eyacuiñajji Emeshimeseneija esohui ebionei queapamenee poani etehue jaa jama ba'a: “Mi pejjejo ba'ecacuana oe queajeanee acue jiquio ecua miyanei queajea jjabaquiani jama pea-aiya.” Miquianaya jama pomajje queapamenee ba'epoquije. 9Jamatii miquiaaya queaquehua jjashahuabaquianiya oe dejja baña queapame, pea dejja ca peajja jayojja aña. Pea dejja jama peajja jayojja bamajje quiana queamimishi poani. Eyacuiñajjija esohui Moisesja tehuecuaa quiana oja esohui jayojja pojjeama ba'yani huohuicaje jama poajoya. 10Bacue, joya beshahuanei ojjaña Eyacuiñajjija esohui Moisesja tehuecuana jayojja ba'epoquijji dejja jamatii oenei oja esohui etehue ojaya ajjimajo, Eyacuiñajjiya coma dejja bacaje queamimishi poani. Oenei esohui ojaya ajjimajo Eyacuiñajjiya oya bacaje shajjama' jayojja poani ojjaña oja esohuicuana apojjima' jayojja. 11Yahuajonei Eyacuiñajjiya esohui jama acapoa ba'a: “A'a peacojjojji pojji.” Jama pea-ai poa ba'a: “A'a oe pea dejja quecua'yojji.” Jamajjeya miyaya pea epona cojjopojjima' nequiya pea dejja quecua'yajo, Eyacuiñajjiya miya queamimishi poani bacaje. Oja esohui etehue jayojja pojjeama ba'yani bacaje. 12Jamajjeya quiana oe queaja'a ba'epoquicue, queasohuipame mimipoquicue pea-ai. Eseja mimishicuana e-esemesetii pojjeama pomeeca'yonaje, jamajjeya eseya jjeya queapame ba'ecapoquijji. Quijje Eyacuiñajjiya eseya ja'anei huohuicaje'yo a'a se oja esohui jayojja ba'epoquinaje, a'a jamatii queamimishitii ba'epoquinaje huohuicaje'yo. 13Joya peaja eba'ejjijo queayeno po-ajjacuana Eyacuiñajjiya comacuanaja oja mimishi yenoamaa huohuicaje'yo oya jayojjaya. Joya peaja eba'ejjijo queayeno poanicuana Eyacuiñajjiya comacuana bacaje ojaya queanee epomee'yojji pojjeama, oya queapame ba'epoquinaje bacaje ohuaya.

Jiquio ecua se oja esohuijo jjashahuabaquiani jama ba'ecapoquijji

14Ecue dohuecuana jjo'icuana bacue, queapame pojjeama oe dejja jama poani oya Eyacuiñajjija esohuijo ejjashahuabaqui'yo jjabaquiani, jamatii queaquehuatii oya ba'epoquiani oja esohui jayojja pojjeama. ¿A'a coma dejja e'ejojonei oja esohuijo jjashahuabaqui'yonaje ejjanahuemeequi'yojji? Chojja, oya e'ejojonei pojjeama. 15-16E'e pojja'a beca Jesosaja epeejjicuana bobima' daquima' ani so'o. Majoya o jama ani bamajje o asahuapojjima' ba'eya jama acanaje ba'a: “Queapame anicue, cua miya ijjiasa-aje bobicuana miquea ijjiacajji, daquicuana queapame miquea huoshocajji.” ¿A'a jamaya esohui queapame mimicajji onijje o asahuapojjima' ba'e? Chojja. 17Oya jayojja pea-aiya becacuana oja esohuijo poani. Oya jjabaquiani Jesosajo ejjashahuabaqui'yo jamatii queaquehuatii ba'epoquiani Eyacuiñajjija esohui jayojja pojjeama. Jiquio ecua oya Eyacuiñajjija esohuijo e'ejojonei jjashahuabaqui'yonaje jama pea-aiya ba'ecapoquijji. Jama mipomajje oya jamatii mimiani Jesosajo jjashahuabaqui'yonaje, e'ejojonei pojjeama.

18Eya pojja'a huohuiajjacaje cuaa ebajji jama ba'a: “¿A'a miya e'ejojonei Jesosa Quitojo ejjashahuabaqui'yo?” Eyaya oya saja-aje ba'a: “E'e, bacue eya queapamenee ba'epoquiani oja esohui jayojja.” Jamajo eya bacajji e'ejojonei Jesosa Quitojo jjashahuabaqui'yonaje. Miquianaya jamatii oja esohui jayojja pojjeama ba'e, ¿achajja jjabameequime poaje quiana peajo e'ejojonei Jesosa Quitojo ejjashahuabaqui'yo? Achajjapishana. Eya ca oja esohui jayojja ba'epoquiani bamajje eya e'ejojonei ejjashahuabaqui'yo Quitojo poani bacaje cuaa majoya. 19Pea quiana jama poani ba'a: “Ecuana e'ejojonei oja esohuijo jjashahuabaqui'yani, Eyacuiñajji oenei enequi. Jama jjashahuabaquime pomajjeya ecuana oja nahue'yo poani.” Jamaya queapame ejjashahuabaquijji, eshahuamasecuana pea-ai jjashahuabaquiani Eyacuiñajjijo oya oenei enequi. Jamatii eshahuamasecuana oja esohuijo jjanahuemeequi'yoajja. Eshahuamasecuana ca queameteneetii nequipoquiani o yajjajo. 20A'a quiana oe queaquehua jjashahuabaquijji sapadojjoma' jayojja. Eyaya quiana jjeya queaja'a huohuije. Joya Eyacuiñajjija esohuijo ejjashahuabaqui'yo jjabaquianicuana jamatii queapame pojjeama ba'epoquiani oja esohui jayojja pojjeama, comacuanaya jamatii jjashahuabaquinaje, oja nahue'yo pojjeamatii ba'e. 21Bacue, eseja baba Abraham poa. Eyacuiñajjiya oya oja mimishima'yo bacapoa ohua oja bacuaejja Isaac quia-ajjacajje. 22Jamajjeya eseya majoya queaja'a jjabahuejjaquicajji Abrahamja eba'ejjijo. Oya Eyacuiñajjija esohuijo jjashahuabaqui'yapoa, mahuisojoneitii pojjeama. Oya ca oja esohuijo jjashajja-ajjaquiapoa. Jamajjeya oya Eyacuiñajjija esohuijo jjashajja-ajjaquiapoajojoya queahuisocuaa oya bacapoa e'ejojonei oja esohuijo ejjashahuabaneiqui'yo. 23Eyacuiñajjiya oja esohui yahuajonei tehue ajeyoca'yapoa ma ecua ohuaya huohuicapoa jamaya. Maya jama poani ba'a: “Abraham Eyacuiñajjija esohuijo jjashahuabaqui'yapoajojoya oya oja mimishima'yo bacapoa Eyacuiñajjiya.” Ohuaya Eyacuiñajji oja bacuaejja Isaac quia-ajjacapoajo eseya baña oya e'ejojonei jjashahuabaqui'yapoa oya Eyacuiñajjija esohuijo jjashajja-ajjaquiapoajjejojoya. Jamajojoya jama poa cuana ojo ba'a: “Abraham Eyacuiñajjija epeejji nequipoquiani.”

24Jamajjeya ma Abrahamjoya eseya queaja'a jjabaquicajji Eyacuiñajjiya eseja mimishima'yo bacani mahuisonei oja esohuijo ese jjashahuabaqui'yanijo pojjeama. Eseya oja esohuijo jjashajja-ajjapea-aiquicajji e'ejojonei ojo jjashahuabaqui'yomajje. 25Oya jayojja pea-ai Eyacuiñajjiya Rahab bajjani epona bacapoa. Oya peacojjojji poa bejjo sosejje yahuajonei. Oya Eyacuiñajjija esohuijo jjashajja-ajjaquiajo oja mimishima'yo bacapoa Eyacuiñajjiya. Ma eponaa israelita dejjacuana ehuoojea onaja meshi baa iyaquehuacapoa soldadocuaa oya equecuaca'yo poanijje. Majoya ohuaya ma dejjacuana pea ejeojjijje quehuahuoojeaca'yapoa. 26Bacue, eseja eyamijo eseja dojjoshahua chamajo, eyami emano'yo poani. Oya jayojja poani joya oja esohuijo jjashahuabaqui'yani jjabaquijjicuana jamatii queaquehuatii ba'epoquiani, comajoya ejjashahuabaqui'yojji oja esohuijo siajje poani emano'yo jama.

Currently Selected:

SANTIAGO 2: ESE

Highlight

Compare

Copy