HEBREOS 8

1Jiquio ecuaa quiana huohuiaña esohui Jesosajo baneineicajji. Oya Eyacuiñajjinijje emimipoquijji ebionei etii poani anioque'yapoa Eyahuasijje Eyacuiñajji queaca'anee ojjañacuana huoojeapoquiajji poanija equii-anijjiai nequi ebañeimijijje. 2Jesosa Eyacuiñajjinijje emimipoquijji poani Eyacuiñajjija equi-aiyiyedojjojo Eyahuasijje nequi chacochacopoquianitii ojo. O anijji equi-ai queapamenee ani Eyahuasijje Emeshimeseneija chaco, dejjacuanaja chacojo pojjeama oya nequipoquiani.

3Jiquio meshijo ojjaña Eyacuiñajjija equi-aijo chacochacopoquiani ebionei etiicuana ehuone enaa jehui'yocuana quiapoquiajji epojji nequiani onaja mimishijo. Jamajjeya Jesosa pea-ai o ebionei etii pomajje ojaya quiapea-aicajji poanaje ojjañacuanaja mimishijo. 4Jesosa jiquio meshijo enequitiipoquianijjemo oya Eyacuiñajjinijje emimipoquijji pojjeama pome. Jiquio meshijo enequi Eyacuiñajjija equi-aijo chacochacopoquianicuana. Macuaaya ehuonecuana enaa jehui'yo quiacapoquianitii Moisesja tehue jayojjaya. 5Jiquio jjeya Eyacuiñajjija equi-aijo echacochacopoquijji dejjacuana jiquio meshijotii chacochacopoquiani. Jamatii ma oja equi-aijo Eyacuiñajji aniajja, oya ca Eyajo nequi. Ma Eyacuiñajjiya iyameecapoa equi-ai o anijji jiquio meshijo ma ecua ojaya Eyajo ani jamaya epojjiya. Bacue, Moisesya yahuajonei Eyacuiñajji bihuiapoquiajji yajji daquiequi huanasohuameesa-acapoajo Eyacuiñajjiya oya huohuicapoa jama ba'a: “Shajja-ajjaneicue ecuea esohui. Eyaya eyiyojo nequiya queaja'anee miya huohuije ache quemo oe equi e anijji miyaya huanasohuameeje. Ecuea huohui jayojja ameecue cuana.” Eyacuiñajjija equi-aijo echacochacopoquijji poacuana ma equijo achajja chacochacopoquiapoa bamajje, achajja Jesosa quijje chacochacopoquije Eyajo ani equi-aijo queaja'a poaje cuanaja ebajjijo. 6Bacue, jjeya Jesosa Eyacuiñajjinijje emimipoquijji ebionei etii poani esejo queapame chacochacopoquiani joya ecua Moisesja tehuejo chacochacopoquianicuana jama pojjeama. Eyacuiñajjija esohui queapame eyacua ese Eyacuiñajjija'yo epojji Jesosaa queaca'a pomeecani. Oja esohui eyacua queapamenee ma ecua Eyacuiñajjiya Moisés quiacoocapoa jama pojjeama. Jiquio esohui eyacua ese Eyacuiñajjija'yo epojji Jesosajo queapamenee poani Eyacuiñajjiya queapamenee quijje acaje huohuicapoajojoya. Ma ecua ohuaya israelitacuananei oopanaja epojji huohuicapoa jama pojjeama.

Moisesja etehuecuana ca mimishi cuijea'yoajja

7Ebionei Eyacuiñajjija quia esohui Moisesja tehuecuana ona Eyacuiñajjija'yo pomeejji queapamenee poajojjemo chama' poquiae pea esohui eyacua ese jjashahuabaqui'yojji Jesosajo ojaya'yo epojji. 8Eyacuiñajji ma Moisesja tehuecuana esohuijji poacuana queamimishitii ba'epoquinaje bamajje jama poa ba'a:

“Emeshimesenei jama poani.

Jjeya iyeshono eyaya pea esohui eyacua quiaje

queahuisocuana ecuea'yo epojji.

Maya eyaya huohuije israelitacuana, Judaja osecuacuana pea-ai.

9Jiquio pea esohui eyacua eyaya quiaje queahuisocuana ecuea'yo epojji

ma ecua yahuajonei eyaya miquianaja etiiquiana quiapoa jama pojjeama.

Ma ebionei esohui eyaya quiapoa cuana Egipto meshijo ba'e jjequicuayamee'yomajje.

Majoya miquianaja etiiquiana ecuea ebionei quia esohui Moisesja tehuecuanajo shajjama' jayojjatii ba'epoquiani bamajje cajaa apoa macuana.

Jamaya poani Emeshimesenei.

10Jiquio pea esohui eyacua ecuea'yo epojji eyaya israelitacuana quiaje quijje.

Jamaya poaje ma pea esohui eyacua ecuea'yo epojji ecue quia.

Eyaya ecuea esohui etehuecuana israelitacuanaja sapajo nequimeeje.

Eyaya esohui tehueaña jayojja jaameeje israelitacuanaja eyamiquipajo ma esohuijotii ejjashajja-ajjaquipoquijji.

Eya ojjaña macuanaja Eyacuiñajji nequipoquijetii,

ojjaña macuanaya ecuea'yotii popoquije.

11Dejjacuaa oja huapa pojjeamacuana, opejjejo ba'ecacuana pea-ai

esohui Emeshimeseneijo ejjanahuemeequi'yojji huohuipajeacaje queahuisoneecuana ejo jjashahuabaquicaje'yojojoya.

Joya esho'inei ca'a-ama, joya etii queaca'a pea-ai ejo jjashahuabaquije'yo.

12Majoya eyaya israelitacuanaja mimishicuana cuijeaje'yo chama'yo ajeyoje.

Oja mimishicuana ecuea eshahuababeca'yojjitii pojjeama poaje”

jamaya poa. 13Eyacuiñajjiya jiquio pea esohui eyacua queahuisocuana ojaya'yo epojji aca'yani ma ohua ebionei Moisés quiacapoa esohui ehuohuipoquiajjitii pojjeama acapoajojoya. Ma ebionei esohui ehuohuitiipoquiajji pojjeama'yo esohuiya quijjepishana chiichii'yajo jayojja pajeacaje'yo cuaa.

Currently Selected:

HEBREOS 8: ESE

Highlight

Compare

Copy