HEBREOS 7

Jesosa ma ecua Melquisedec nequipoquiapoa jama pea-aiya poani

1Melquisedec bajjani dejja Salem emeshimese poa. Oya Eyacuiñajji Eyajo queaca'aneetii nequinijje mimipoquiapoa. Yahuajonei Abraham ma ojo chacochacoanicuananijje cuatro emeshimesecuana, oja soldadocuana pea-ai quecua'yomajje huacuaya poe'yapoa oja meshiyasijje. O poe'yanijoya Melquisedec cuayapoa o baa. Majoya Melquisedecya esohui Eyacuiñajjija o queapame pomeejji acapoa. 2Majoya aje Abrahamya aquianacuana emeshimesecuanaja oja jjeshe'yo jjaquecuaquimajje iyehuiso Melquisedec quiacana'yapoa. Diez macacuana oja jjeshe'yo oe maca ohuaya quiacana'yapoa oya. Jamaya mahuiso acapoa ojjañajo oja jjeshe'yo aquianacuanajo. Bacue, Melquisedec bajjani jama poanijje ba'a: “Emeshimese queapameneetii mimishiamanei nequiani.” Oya Salem emeshimese pea-ai poa. Maya jama poanijje ba'a: “Peacuana queaquijijjijaji pomeejji emeshimese nequiani.” 3Bajjimanei poa ojjañacuanaja, a'ya Melquisedecja chii a'ya oja nae pea-ai. Oja baba, ano pea-ai bajjimanei ojjañacuanaja poa. Ae shequiajajo oya cuayapoa, ae shequiajajo oya mano'yapoa bajjimanei ojjañacuanaja poa. Jamatii oya jiquio ecua Eyacuiñajjija Bacua Eyacuiñajjinijje emimipoquijji popoquianitii jama pea-aiya poa.

4Jjeya jjashahuabaquicue so'o Melquisedecjo. Oya queaca'anee queapamenee nequipoquiani bacapoa cuaa. Eseja etiiquiaa Abrahamya emeshimesecuanaja aquianacuana oja jjeshe'yo onijje jjaquecuaquimajje Melquisedec quiacana'yapoa. Diez macacuana oja jjeshe'yo oe maca ohuaya quiacana'yapoa oya. Jamaya mahuiso acapoa ojjañajo oja jjeshe'yo aquianacuanajo. 5Eyacuiñajjija esohui Moisesja tehuecuana jaajo ojjaña Eyacuiñajjija equi-aijo chacochacopoquiani Levija osecuacuana aquiana, bobicuana quiacapoquijji poa iyehuiso israelitacuanaja. Oja diez oveja enequijo ohuaya oe oveja quiacapoa. Jamaya oya sosema' quiacapoquiapoa israelitacuaa. Eyacuiñajjija equi-aijo chacochacopoquianicuana aquiana iyehuiso quiacapoquijji poa ojjañacuanaja jamatii oja huapa pojjeamacuana poa, oya Abrahamja osecua pea-ai poa. 6Melquisedecya jamatii Levija osecua pojjeama poaya Abrahamja jjeshe'yo aquianacuana oja quia iyehuiso jjeshecapoa. Majoya Melquisedecya Abraham Eyacuiñajjija o queapame pomeejji esohui acapoa oja quia iyehuiso jjeshemajje. Jamaya ohuaya Abraham esohui acapoa jamatii Eyacuiñajjiya yahuajonei Abraham babacacapoa ojaya o queapame pomeejji. 7Queaja'anee seja bacajji joya Eyacuiñajjija pea queapame pomeejji esohui huohuijji poanicuana queaca'a nequiani. Joya oja esohui ehuohuijo queabihui poajecuana ca iyeca'a. 8Bacue, Levija osecuacuana peaja quia aquianacuana iyehuiso jjeshepoquiajji poa. Oya dejja pea-aiya yamijji poa quijje emano'yojji. Eyacuiñajjija esohui etehue jaa ca jama poani Melquisedecjo ba'a: “Oya eshetii nequipoquiani, mano'yoajja.” 9Ojjaña Eyacuiñajjija equi-aijo chacochacopoquiani Levija osecuacuaa aquiana iyehuiso jjeshecapoquiani onaja quia. Jamatii Levija osecuaa aquiana iyehuiso quiapea-aicapoa jayojja oja baba Abrahamya Melquisedec iyehuiso aquiana oja jjeshe'yo yahuajonei quiacapoajojoya. 10Queaja'a bacajji jama ba'a: Abrahamaya Melquisedec aquiana oja jjeshe'yo iyehuiso quiacana'yapoajo oja osecua Leví oja yamijotii aniapoa ohuaya quijje jeacajejojoya. Jamaya Leviya aquiana iyehuiso Melquisedec quiacapoa jayojja quijje oja osecua poajeyajjejojoya.

Beca Eyacuiñajjinijje emimipoquijjijo tehuecapoa

11Yahuajonei Eyacuiñajjiya Moisés oja esohui etehue achajja queaja'a ba'ecapoquijji quiamajje huohuicapoa Levija osecuacuana ojaya epojji. Jamatii oja nequimee dejjacuaa Eyacuiñajjija equi-aijo chacochacopoquiapoacuaaya onijje ba'ecaja oja mimishima'yo pomeejjimatii acapoa. Jamajojoya aje Eyacuiñajjiya pea onijje emimipoquijji poani ojjaña macuana mimishima'yo pomeejji nequimeeca'yapoa ma ecua Melquisedec nequipoquiapoa jama pea-ai epojji. Aaronja osecuacuana jama pea-ai epojji pojjeama pea nequimeeca'yapoa. 12Bacue, Eyacuiñajjija equi-aijo echacochacopoquijji pea epo'yojji dejjacuanaja jamatii nequimeeca'yoajja. Eyacuiñajjija esohui Moisesja tehuecuana pea tehue'yome acajji jama pomee'yosa-amajje. 13Eseja Emeshimesenei ma ecua Moisesja tehuecuaa huohuicani jama pojjeama poa Eyacuiñajjinijje emimipoquijji etii epojji. Oya caca pea Israelja bacuaejjaja osecua poa, Levija osecua pojjeama ma Eyacuiñajjija esohui Moisesja tehueja huohuijjima poa. 14Ojjañacuanaja bacajji eseja Emeshimesenei Judaja osecua poani. Moisés ca mimijjimanei poa Judaja osecuacuana Eyacuiñajjija equi-aijo echacochacopoquijji epojjijo.

15Bacue, Eyacuiñajjija equi-aijo chacochacopoquiapoa Levija osecuacuaa onaja mimishima'yo pomeejjimatii acapoa. Jamajjeya Eyacuiñajjiya pea onijje emimipoquijji nequimeeca'yonaje ma ecua Melquisedec nequipoquiapoa jama pea-aiya epo'yojji. 16Melquisedec Eyacuiñajjinijje emimipoquijji nequipoquiapoa Moisesja tehuecuana jayojja jama pojjeama, oja babajo pea-ai pojjeama. Oya queaca'aneetii nequipoquiani bamajje Eyacuiñajjinijje emimipoquijji etii epojji nequimeecapoa. 17Eyacuiñajjija esohui etehue jaajo ohuaya oja Bacuaejja jama acapoa ba'a:

“Miya enijje emimipoquijji nequipoquijetii

ma ecua Melquisedec nequipoquiapoa jama pea-ai epojji.”

18Jamajjeya ma ebionei esohui Moisesja tehuecuana ehuohuipoquiajjitii pojjeama aca'yapoa maya dejjacuana oja mimishima'yo pomee'yoajjajojoya, ca'a-ama. 19Eyacuiñajjija esohui Moisesja tehuecuaa dejjaja mimishicuana cuijea'yojjimatii acani, ma esohui etehuejo dejja mimishima'yo epojji pojjeamatii poaje. Jamajjeya oja ejjocojo ehuohui'yojji Eyacuiñajjiya pea esohui queapamenee quiacapoa ma quijje ohua acaje. Ma esohui queapameneejoya eseya queabihui jjaishoaquipoquimajje Eyacuiñajjique jjanequichipiquiani.

Jesosa Eyacuiñajjinijje emimipoquijji nequipoquianitii queaca'anee ma ecua Levija osecuacuana jama poa pojjeama

20Eyacuiñajjiya oyatii queaca'anee poaniya esohui oja bajjanineijo huohuicapoa ojjañacuanaja ebajji Jesosa onijje emimipoquijji queaca'aneetii nequipoquije. 21Ma ca peacuana Eyacuiñajjija equi-aijo chacochacopoquiani Levija osecuacuana nequimeecapoa, jamatii esohui oja bajjanineijo ojjañaja ebajji Eyacuiñajjija huohuijjima poa. E'e, jamaya Emeshimesenei Eyacuiñajjiya oyatii queaca'anee poaniya esohui oja bajjanineijo huohuicapoa ojjañaja ebajji Jesosa onijje emimipoquijji nequipoquijetii. Eyacuiñajjija esohui etehue jaa jama poani ba'a:

“Emeshimeseneiya oyatii queaca'anee poaniya esohui oja bajjanineijo huohuicapoa ojjañaja ebajji,

jamajjeya oja huohui esohui pea ea'yojji pojjeama.”

Jama oya poa ba'a:

“Miya enijje emimipoquijji nequipoquijetii.”

22Eyacuiñajjiya oja esohui eyacua ese queapame ojaya'yo epojji quiacapoa ma ecua oja ebionei quia esohui etehue ca'a-ama poani jama pojjeama. Ma ebionei oja quia esohui israelitacuanajanei epojji oja quia queapamepishana poa. Jiquio pea oja quia esohui queapame ese ojaya'yo epojji Jesosaa queaca'a nequimeecani, pea eamee'yojji pojjeama poaje. 23Ma yahuajo Eyacuiñajjija equi-aijo chacochacopoquiapoacuana, queahuiso nequicapoquiapoa Moisesja tehuecuana jayojja macuana manocapoqui'yapoajojoya. 24Jesosa caca oe mano'yoajjanei nequipoquijetii Eyacuiñajjinijje emimipoquijji, jamajje chama'nei pea poaje oja ejjocojo enequi'yojji. 25Jamajjeya ohuaya nahuecapoquije'yotii ojjaña joya Eyacuiñajjique jjanequichipiquinaje huisotiicuana Jesosajo jjanahuemeequi'yomajje. E'ejojonei Jesosaa eseya nahuecapoquije'yotii oya nequipoquianitiiyajjejojo Eyacuiñajjinijje emimipoquijji ojjaña ese oja nahue'yocuanajo.

26E'ejojonei Jesosa queapamenee poani Eyacuiñajjinijje emimipoquijji ebionei etii poani esejo. Oya queapameneetii mimishima'nei nequipoquiani. Jesosa mimishijo jjashahuabaquiajjanei, dejja mimishicuananijje oya jjapeequiajjanei. Eyacuiñajjiya oya Eyahuasijje quea-aoneenee nequimeecapoquianitii. 27Jesosa joya ecua pea Eyacuiñajjija equi-aijo chacochacopoquiani ebionei etiicuana jama pojjeama nequiani. Macuaaya ojjaña pojjajo ehuonecuana equia enaa jehuicapoqui'yani ojayanei mimishijo, pea onijje ba'ecaja mimishicuanajo pea-ai Eyacuiñajjija ebajji. Jesosa caca oenei jjaquiaquime poa emano'yojji ojjañacuanaja mimishijo ehuone enaa jehui'yo equia jama. Jamajjeya oya ejjaquiabecaqui'yojji pojjeamatii poa ojjañacuanaja mimishijo emanopoquio'oyajji. 28Moisesja tehuecuanajo dejjacuana Eyacuiñajjija equi-aijo chacochacopoquiani ebionei etii mimishijjitii nequiani, mimishima'nei pojjeama. Moisesja tehuecuana equiajo Eyacuiñajjiya oyatii queaca'anee poaniya esohui oja bajjanineijo huohuicapoa ojjañaja ebajji oja Bacuaejja onijje emimipoquijji esejo ebionei etii nequipoquijetii. Jama enequipoquijji o queapamenee poani ma ecua peacuana poa jama pojjeama.

Currently Selected:

HEBREOS 7: ESE

Highlight

Compare

Copy