HEBREOS 9

Yahuajo ma ehuone enaa jehui'yo equiacuana mimishi cuijea'yoajjanei poa

1Bacue, ma ebionei Eyacuiñajjija quia esohuiya ojaya'yo epojji huohuicapoa achajja Eyacuiñajji bihuiame acapoquijji. Huohuipea-aicapoa jiquio meshijo ani daquiequijo achajja chacochacopoquije cuana Eyacuiñajjijo majo nequi. 2Eyacuiñajji anijji daquiequi huanasohuacapoa cuaa, quecuayijijji beca acapoa. Ma ebionei equecuayijji queapame mimishima' eanijji bajjanicapoa. Majo nequiapoa cuaquijijisisicuana ejeaja'a nequiajji. Majo pea-aiya oe mesa nequiapoa pahuijji Eyacuiñajji oja quia. 3Ma pea equecuayijji bajjanicapoa queapameneenee mimishima'nei eanijji. Daqui queaquemo ba'yapoa equecuayijijji'ya pea enobiqui poanijje. 4Majo nequiapoa oe altar equecua oro oopana acuishiye dahuashiyepoquiajji. Majo pea-ai oe cajón equecuayiyedojjojo ebiajjejo pea-ai oro oopana eiya aniapoa. Cajondojjojo oe edahuapejja oro oopana maná bobijji nequiapoa. Aaronja acui ejjaquecuaca'aquijji ma yahuajonei pohua'yapoa majotii jaapea-aiapoa. Eyacuiñajjija esohui meibejejo oja tehue majotii pea-aiya jaapoa. 5Ma cajonbiajje beca angelnisho oro oopana edahua nequiapoa omiji pea-ai ojee huacuaya cojja Eyacuiñajji majonei ani ebajji cuanaja. Oja ecuichocuanaja queya cajón aniapoa. Mahuisoya, jjeya ca ecuea etehuetiijji pojjeama poaje ma o anijji poa daquiequijo ani aquianajo.

6Eyacuiñajji anijji daquiequi apoa acajo Eyacuiñajjija equi-aijo chacochacopoquianicuana nobimajamajaquinequiapoa ma ebionei equecuayijji aniyasijje ojaya echacojji aa Eyacuiñajjijo. 7Ma pea queapameneenee equecuayijjidojjohuasijje oenei Eyacuiñajjija equi-aijo chacochacopoquiapoa ebionei etii dejja oe nobiquime ponequiapoa oe eshequiajajo. Cuama nobiquimajjeya ohuaya ehuonecuanaja na' dojonobiaquicapoa ojayanei mimishi cuijeajji, ojjaña israelitacuanaja mimishi cuijeajji pea-ai ma acapoquiapoa cuaa jamatii mimishiama poso jjabaquianiya. 8Majoya Edojjoshahuapameya queaja'a eseya bameecani Eyacuiñajji anijji daquiequi eanitiijo dejjacuana, eponacuana pea-ai Eyacuiñajji ani queapameneenee equecuayijjidojjohuasijje enobiquijji pojjeama poanaje so'o. 9Ojjaña ma yahuajonei acapoquiapoa cuaa o anijji daquiequijo nequiya ese queaja'a jjashahuabameequijji poani jjeya. Eyacuiñajjija equi-aijo chacochacopoquiapoacuaa quiacapoquiapoa ehuonecuanaja na' dejjacuana eponacuana oya majo oja mimishima' poaje ejjabaquijji. Jamatii mimishi oja esapajo nequi cuijea'yojjimatii acapoa oja quia ehuoneja naa. 10Oja quia ebionei Eyacuiñajjija'yo epojji esohuijo queahuisoneecuana poquicanequiapoa queaboejea jayojja epojji jjapomeequi'yohua enaneiya shacajje. Pea bobicuana ijjia-ajjapoa cuana queamimishi epo poanijje. Ma esohui etehuecuana queaboejea jayojja epojji pajeacaje'yo cuaa ma pea esohui eyacua Eyacuiñajjija'yo epojji yecajo.

Quito ojjañajo jjaquiaquinaje queapame Eyacuiñajjiya bacapoa

11Bacue, jjeya Quito Eyacuiñajjinijje emimipoquijji ebionei etii nequipoquianiya queaja'a bameecani ma Eyacuiñajjiya ese queapame acapoquinaje. Jamaya Quitohua acapoa jiquio meshijo ani, daquiequidojjohuasijje nobiquianiya pojjeama. Eyacuiñajjija equi-ai Eyajo aniyiyedojjohuasijje nobiquimajje ca ohuaya jamaya acapoa. 12Quito Eyacuiñajji anijji equecuayijji queapameneenee Eyajo anidojjohuasijje nobiquiapoa ehuonecuanaja najji pojjeama, macaja na' chivoja pea-ai dojonobiaquijjima poa. Ohuaya ojayanei ena' oenei quiame acapoa, equiabeca'yojjitii pojjeama acapoa. Majoya jama jjaquiaquime pomajje ohuaya oja enaa ojjaña eseja mimishicuana cuijeaca'yapoa Eyacuiñajjija'yo epojjitii. 13Ehuonecuana chivoja enaa, macaja pea-aiya dejjacuanaja eponacuanaja mimishi paacapoa ebiajjejjetii. Macaja eyami edahuatehuejeyo pohuiya dejjaja eponaja yamiyasijje natacajje queaboejea jayojja poa cuana Eyacuiñajji bihuiajji. 14Ehuonecuanaja ena' queapamepishana poa. Jama poani bamajje Quitoja ena' queapamenee queaca'anee pea-ai bacajji quianaja. Edojjoshahuapame eshetii nequipoquianiya Quito queaca'anee pomeecapoa ejjaquiaquijji mimishima'nei nequi Eyacuiñajjija emanomee'yojji ojjañacuanaja mimishijo. Quitoja enaa mimishi eseja sapajo ehuanaquehua jaacuana chama'yo acani, cuijeaca'yani. Mimishijjitii ba'epoquimajje Cuaqui-aiyasijje poquije'yo mano'yomajje. Eseya mimishima'yo queaboejea pomeecajje chacochacocapoquijji se Eyacuiñajji eshetii nequipoquianijo.

15Jamajjeya Jesosa Quitohua pea esohui eyacua ese Eyacuiñajjija'yo epojji yecapoa jjaquiaquimajje. Oya mano'yapoa ma ebionei oja quia esohui eseya mi-ajeyopoajojoya mimishicuana cuijea'yojji. Ojjaña ma Eyacuiñajjiya iyaacanaje huisotii cuaa jjeshecaje oja quiacuana quijje Eyahuasijje ojaya'yo poaniyajjejojoya. 16Bacue, dejjaja ojaya oe-ejjenei esohui acheya oja aquiana ejeana'yo jjeshecaje'yo ebajji, ohuaya tehuemeecaje eshe nequiya. Majoya oya ebionei manoca'yojji oja esohui oe-ejjenei peaja eajji. 17E'e, dejjaja esohui oe-ejjenei acheya oja aquianacuana jjeshecaje'yo ebajji ojaya tehuemeecajji eshe nequija. Jamajjeya o eshe enequijo oja aquianacuana jjeshemee'yojji oja esohui oe-ejjenei ameeca-ajja so'o. 18Oya jayojjaya ebionei Eyacuiñajjija esohui Moisesja tehue quiacapoa ehuoneja ena' cuayameequicaje bamajje, jamatii pojjeama quiacapoa Eyacuiñajjiya. 19Ebionei Moisesya Eyacuiñajjija quia esohui etehue ojjañatii ja'anei huohuicapoa ojjaña majo ejjachichaqui anicacuanaja ebajji. Majoya ohuaya macasho'ija ena' chivoja pea-ai enaneijo huacapoa ojee enequijji. Jama amajje ohuaya acui-iña aajji ovejaja ñahuo'o pea-ai iyanobiacapoa Eyacuiñajjija ebionei esohui etehue jaa shajji. Majoya ohuaya ojjaña israelitacuana majo ejjachichaqui anica pea-ai bisoneiya bahua shacapoa oja hua enaa. 20Majo nequiya Moisesya jama huohuime acapoa cuana ba'a: “Jiquio enaa Eyacuiñajjija esohuicuana e'ejojonei acajji pomeecani. Jamajjeya jiquio ohua quiacanaje esohuicuanajo jjashajja-ajjaquipoquicue Eyacuiñajjinijje queapame eba'epoquijji.” 21Moisesya shapea-aicapoa ma Eyacuiñajji anijji daquiequi, ojjaña majo anica aquianacuana o bihuiajji yajji pea-ai ehuonecuanaja enaa. 22Eyacuiñajjija quia esohui Moisesja tehue jama poani beshahuanei ojjaña aquianacuana o bihuiajji yajji queaboejea pomeecajji enaa. Eyacuiñajjija equi-aijo chacochacopoquianicuana pea-ai queaboejea pomeecajji enaa. Jamajjeya mimishicuana cuijea'yoajja ena' cuayaquijjimajo. 23E'ejojonei ehuonecuana enaa jehui'yo quiacapoquijji poa Eyacuiñajji bihuiajji yajji aquiana jiquio meshijo nequi queaboejea pomeejji. Jamaya acapoquiapoa cuaa ese jjashahuabameequijji ma Eyacuiñajji bihuiapoquiajji equi-ai Eyahuasijje ani queaboejea pea-ai pomeecajji. Jamatii ehuonecuanaja enajo pojjeama queaboejea pomeecajji. Pea ena' queapamenee ca quiacajji ma o bihuiapoquiajji equi-ai Eyahuasijje ani queaboejea pomeejji.

Quitoja enaa eseja mimishi cuijeaca'yapoa

24Quito nobiquijjima poa jiquio meshijo nequicaja iya Eyacuiñajji anijji equi-ai eyiyedojjohuasijje. Eyacuiñajji anijji Eyahuasijje equi-ai queapamenee anijo ejjashahuabaquijji ma pea equi-ai aniapoa jiquio meshijo dejjacuanaja iya. Quito ca Eyacuiñajji eanioque aniyasijje nobiquiapoa oja equi-ai ani Eyahuasijje eseja mimishicuana Eyacuiñajjija cuijeamee'yojji oja na' sosejje. 25Eyacuiñajjija equi-aijo chacochacopoquiani ebionei etii oe eshequiajajo oe nobiquime ponequiapoa jiquio meshijo Eyacuiñajji anijji equecuayijji queapameneenee eyiyedojjohuasijje. Oja ena'nei pojjeama ohuaya dojonobiquiaquicanequiapoa, ehuonecuanaja ena' ca quiacapoquiapoa mimishi paapoquiajji. Quito ca jama pojjeama poa. Oja ena' quiamajamajajjima poa ojjañacuanaja mimishi cuijea'yojji. 26Bacue, Quitoja ena' oja equiamajamajapoajojjemo ojjañacuanaja mimishi cuijea'yojji Quito ojjaña shequiajajo manopoquio'oyaquiae ojjaña aquianacuana ohua panacapoajo. Quito caca manomajamaja'yojjimatii poa. Eyacuiñajjija esohui queapamenee ma yahuajonei oja quia ajeyojji epojja apoa poajo Quito poeapoa. Majoya oenei jjaquiaquime Quito poa emano'yojji ojjañacuanaja mimishicuana cuijea'yojji, emanobeca'yojji pojjeamatii oya poa. 27Oya jayojja pea-aiya ojjaña jiquio meshijo ba'ecacuana oenei mano'yome poaje. Majoya quijje Eyacuiñajjiya oja mimishicuana ja'anei huohuicaje'yo o queaneenee pomee'yojji. 28Jamaya Quito emano'yojji oenei jjaquiaquime poa ojjañacuanaja mimishicuana cuijea'yojji. Majoya quijje oya poeje o'oya mimishi cuijea'yohua pojjeama. Quito ca poeje o'oya ojjaña joya ojo queabihui jjaishoaquipoquiani huisotiicuana dojo'yohua oja nahue'yocuanaya.

Currently Selected:

HEBREOS 9: ESE

Highlight

Compare

Copy