HEBREOS 6

1Jamajjeya se oe oja esohuijo etiipoqui queaca'a eba'epoquijji, joya ecua ebacuasho'i tiiajja jama pojjeama. Esohuicuana ebacoojji Quitojo batiitiica-ajja. A'a mayatii huohuimajamajajji oya esohuitii Quitojo ejjashahuabaqui'yojji. Dejjacuana oja chaco sosejje poqui'yoajja Eyahuasijje esohui a'a mayatii huohuimajamajapoquiajji. 2Pea esohuicuana enahuasijje ejjaiñajeanobiameequijjijo, esohui ajeo eme huanacajji pea Jesosaja epeejjija yamijo, esohui a'a emano'yocuana shequimeecaje'yo, esohui acheshono Eyacuiñajjiya huohuicaje'yo cuana queaneenee epomee'yojji pea-ai ma esohuineicuana a'a bamajamajajji. 3Etiipoqui pea oja esohuicuanajo jama saya Eyacuiñajji poani esejo. Ma ebionei ebacoojji esohuicuanaya esejaya ebamajamajapoquiajji pojjeama.

4-5Bacue, becacuaa Quito cajaa aca'yonaje. Macuanaya ebionei Eyacuiñajjiya oja esohui e'ejojonei poani bameecanaje. Oja Edojjoshahuapame yamijji pomeecanaje Eyacuiñajjiya. Ohuaya queapamenee acanaje macuanaya ojayanei ejjashahuabaquijjijo. Eyacuiñajjija esohui queapamenee poani bapea-aicanaje. Macuanaya jjabapishanaquinaje Eyacuiñajjiya queaca'aneeya oya huoojeacapoquiani. 6Majoya quijje macuanaya oja esohuijo jjashahuabapajeaqui'yajo chama' pea esohui o huohui'yojji poaje o pea jjashahuabaquime epo-o'oyajji Quitojo. Jama po'yomajjeya macuaaya Jesosa acui ecuiata'apeejo manomeecao'oyani oja mimishijo, jama jayojja oya acao'oyani. Majoya oya jama acao'oyani bamajje queahuisocuana soaje Jesosajo. 7Esohui ebameesahuajji jama poani ba'a: Ena queaquemo poajo meshiya eoque ani ena ishicani. Ma ena eoquejoya oja banacuana queapame tiiajo queabihui poaje ma quechacojji poanicuaa ejjajja queahuiso sejjacaje'yojojoya. Ma meshi queapame poani bamajje Eyacuiñajji queabihui poani. 8Eyacuiñajjija oquemee enajo acuishacuana queahuiso pohuajo oja que jjajja-ajja epojji ma meshi peajja poaje. Eyacuiñajjiya ma meshi peajja poani huohuicaje. Majoya ma meshi dahuajeacaje cuaa peajjajojoya. Jama jayojjaya poani joya Quito cajaa a'yojji poanicuana.

9Ecuana queayenonee mimiani miquiananijje ma Quito cajaa a'yojji poanajecuanajo. Ecuanaja quiana ca queajeanee. Ecuana queabihui jjashahuabaquiani miquianajo Quito cajaa apojjima'nei ba'epoquiani. Ecuana jjashahuabaquiani miquianajo miquiaaya queapamenee apoquiaña joya ecua Quitojo jjanahuemeequi'yanicuaa acani jama pea-aiya. 10Bacue, Eyacuiñajji queapameneetii mimishima'nei nequipoquiani. Jamajje ojaya epajea'yojji pojjeama poaje miquianaja chaco ojo. Miquiaaya quea-ojeanee poaniya Eyacuiñajjija'yo poanicuana asahuapoquianaje jjeyanei pea-aiya. Ohuaya miquiana jama poani shahuabacajetii. 11Miquianaya queabihui peacuana asahuamajamajapoquiajji ecuaa huohuiaña jamaya quiana queapame eba'epoquijji. Majoya jama ba'eme popoquimajje Eyacuiñajjija quia queapame jjesheje quijje ma ohua huohuicapoaya. 12Eyacuiñajjija echacojji eapoquiajjijo miquiana queahueya, chacochacosapo'yoajja basapo-ajja ecuana. Joya queaja'atii ba'epoquiani oja esohui jayojja jamatii queacamajanee acani cuaa oya jayojja pea-ai quiana oe ba'epoquicue. Jama ba'eme popoquimajjeya ojjaña macuaaya Eyacuiñajjija quiacuana jjeshecaje quijje ma ohua huohuicapoaya.

13Yahuajonei Eyacuiñajjiya Abraham oja esohui huohuicapoa oya jayojjaya quijje ohuaya ajeyocaje. Chama'nei pea oya jayojja queaca'aneetii poanija ebajji Eyacuiñajji jama poaje. Jamajjeya Eyacuiñajjiyatiiya ojayanei ejjashahuabaquijjijo Abraham jama huohuime acapoa chama'nei pea oya jayojja poajojoya. 14Eyacuiñajjiya Abraham yahuajonei jama huohuime acapoa ba'a: “Eyaya miya queapamenee ba'emeesahuapoquiaje. Miquea osecuacuana queahuisoneenee pomeepoquiaje” jama huohuimeya acapoa. 15Abraham queashequiajahuisonee acheshono oja huohui esohui ajeyocajejo jjaishoaquipoquiapoa. Majoya quijjenei ohuaya jjeshecapoa ma Eyacuiñajjiya o huohuicapoa huisotiiya. 16Dejjacuaa oja huohui esohui e'ejojonei poani peaja ebajjijo huohuicani oja Eyacuiñajjiya oya shajja-ajjacani. Ohua oja esohui mi-ajeyocajo oja Eyacuiñajjiya oya queaneenee pomeecaje. Majoya ohuaya oja esohui e'ejojonei poani huohuicajo queahuisocuaa bacaje e'ejojonei oja esohui ajeyocaje. 17Bacue, Eyacuiñajji jjabameequisaneipoa cua oja quiacuana quijje Eyahuasijje jjeshejji poajecuanajo. E'ejojonei ohuaya oja huohui esohui quijje ajeyocaje ma ohua huohuicapoa huisotiiya oyatiiya. Jamajjeya oja huohui esohui e'ejojonei poani ebajji Eyacuiñajjiya oja bajjanineijo maya huohuicapoa, peaja bajjanijo pojjeama. 18Eyacuiñajjiya huohuicapoa oja bajjanineijo e'ejojonei oja huohui esohui ajeyocaje. Ma beca esohui oja huohui pea huohui'yome eajji pojjeama, oyatii poaje. Majoya ma beca oja esohuijoya Eyacuiñajjiya oyatii queaca'anee poaniya huohuicapoa, oya siajje jjapomeequiajjaneinei esejo. Jamajjeya ojjaña eseya joya ojo jjanahuemeequi'yanicuana queabihui jjaishoaquipoquianitii ma quijje ohua queapamenee acajejo. 19Ma ohua quijje queapamenee acajejo queabihui jjaishoaquipoquimajje eseya jjeya queaca'a ba'epoquije eseja eyamiquipajje. Jiquio ecua jjono queapaninee bishe'ai jeyojji'ya edojojeaca poanijje jama pea-aiya quiana queaca'a ba'epoquije ma quijje ohua queapame acajejo jjaishoaquipoquimajje. Esejaya eba e'ejojonei queapamenee acapoquije quijje Eyacuiñajji anijji equi-aiyiyedojjojo Jesosa majo anijojoya. 20Majotii ani Eyacuiñajjiya Jesosa onijje emimipoquijji ebionei etii pomeecanaje ma ecua Melquisedec nequipoquiapoa jama pea-aiya oya poanitii.

Currently Selected:

HEBREOS 6: ESE

Highlight

Compare

Copy