HEBREOS 5

1Ojjaña joya Eyacuiñajjija equi-aijo chacochacopoquiani ebionei etiicuana Eyacuiñajjija babaca poani onijje dejjacuananijje nequi. Eyacuiñajjiya oya queaja'a huohuicani pea-ai ache echacojji ohuaya acapoquije. Ohuaya ehuonecuana onaja ye enaa jehui'yo quiacapoquiani Eyacuiñajji oja mimishi cuijeajji sosejje. Onaja ye esejja'yo Eyacuiñajji quiajji ohuaya jjeshecapoquiani pea-ai. 2Eyacuiñajjija equi-aijo chacochacopoquiani ebionei etiiya joya queaquehuanee ba'yanicuana, sohuima'neijjejojoya queayenoneeya bacani oya o jayojja yamijji pea-ai poaniyajjejojoya. 3Ohuaya queamimishi poani jjabaquimajje ehuone enaa jehui'yo Eyacuiñajji quiapea-aicani oja mimishi cuijeajji sosejje. Ma ecua ohuaya pea onijjejaajjicuanaja mimishicuanajo quiacapoquiani jama pea-ai ohuaya acani ojayanei mimishi cuijeajji sosejje. 4Dejjacuana Eyacuiñajjija equi-aijo chacochacopoquiani ebionei etii epojji oyatii jama epojji jjapomeequiajja. Eyacuiñajjiya caca dejja jama etii epojji nequimeecapoa queahuisocuanaja ebajji oya queapame nequi jama echacochacopoquijji. Yahuajonei Aarón bajjani jama etii epojji Eyacuiñajjiya nequimeecapoa, oyatii pojjeama. 5Oya jayojjaya Quito Eyacuiñajjinijje emimipoquijji ebionei etii epojji oyatii jjapomeequiajja poa. Eyacuiñajjiya ca oya jama epojji nequimeecapoa ojjañacuanaja ebajji oya queapamenee nequi jama echacochacopoquijji. Eyacuiñajjiya oya jama acapoa ba'a:

“Miya ecue Bacuaejja,

e'ejojonei jiquio pojjajo jamaya eyaya miya baña.”

6Eyacuiñajjiya oya jama apea-aicapoa pea oja esohui etehue jaajo ba'a:

“Miya enijje emimipoquijjitii nequipoquije.

Ma ecua yahuajonei Melquisedec enijje mimipoquiapoa jama pea-aiya epojji miya nequipoquijetii”

jamaya acapoa. 7Jesosa jiquio meshijo eshe nequi mimiapoa Eyacuiñajjinijje janobajjimanei queacojjayenonee pea-ai. Ohuaya huohuiajjaneicapoa oja o manomee'yojjima eajjijo. Eyacuiñajjiya oja mimi shajja-ajjacapoa oya Jesosa oja esohuijo jjashajja-ajjaquijjitii poajojoya. 8Bacue, Jesosa Quito Eyacuiñajjija Bacuaejja poani. Jamatii onaa queaneenee pomeecajje oya Eyacuiñajjija esohuijo jjashajja-ajjaquicapoquijjitii jama epojjiya Jesosa jjabaquiapoa. 9Majoya oya jjashajja-ajjaquipoquijjitii poani mimishima'nei jiquio meshijo nequipoquiani jamatii queacamajanee nequi bamajje Eyacuiñajjiya oya ojjañacuana nahue'yojji epojji acapoa. Jamajjeya cua oja esohuijo jjashajja-ajjaquijji poaje huisotiicuana ohuaya nahuecaje'yo. 10E'e, Eyacuiñajjiya Jesosa onijje emimipoquijji ebionei etii epojji nequimeecapoa ma ecua Melquisedec nequipoquiapoa jama pea-ai epojjiya.

Esohuijo tiicapoquijji queaca'a eba'epoquijji tehuepea-aicapoa

11Ecuaa quiana queahuiso esohui huohuisa-aña majoya. Jamatii ecuanaja queacamaja maya ehuohuineijji miquianaya hueyahueyacuajiani, majoya esohui shajja-ajjatiipoquia-ajja. 12Queashequiajahuiso miquianaya oja esohui shajja-ajjamajamaja epo ba'epoquiani, jamajje apoa epo pocajji quiana peacuana sohuihuohuipoquiajji epojji. Chojja, miquianaja ma ebionei Eyacuiñajjija esohui ebacoojji queaquehuatii poani. Miquianaya huohuicao'oyajji maya ma ebionei esohuitiiya queaja'a miquianaja eba'yojji. Ca'a-amanei quiana po'yonaje joya ecua jjeyanei cuaya ebacuasho'iya tojjona' oopana ishicani jama quiana eyaya ba'yonaje, bobinei queaca'a ijjia'yoajja jama. 13Joya ebionei esohuicuana batiitiipoquiajji poanicuana joya ecua ebacua tojjojo ba'epoquianitii jamaya. Comajaya bajjimatii poani ache queapame acajji ache aca-ajja queaja'a mimishiama eba'epoquijji. 14Bobicuana queaca'a noecuana pea-ai caca etiija ijjiacajji. Oya jayojja pea Eyacuiñajjija esohuicuana bacapoquijji joya queaca'a tiipoquianija. Macuanaya ache queapame acajji ache aca-ajja bamajje queaja'a ba'epoquiani mimishiama.

Currently Selected:

HEBREOS 5: ESE

Highlight

Compare

Copy