GÁLATAS 1
1
Pablohua esohui queapame acapoa Jesosaja epeejjicuanahuasijje
1Eya Pablo bajjani Eyacuiñajjija babaca ona sohuihuohuiquinequijji poani. Eya ca iña dejjacuanaja huoojea pojjeama poani, oja bajjani pojjeama pea-ai. Jesosa Quitoja huoojea ca iña poani, Eyacuiñajji Echii-aija pea-ai, ma Jesosa shequimee'yojji poajaya. 2Eyaya ojjaña jiquio enijje ani Jesosaja epeejjicuana pea-aiya esohui miquiana queabihui pojji tehueaña joya provincia Galacia meshijo ba'eca esohuijo jjachichaquipoquiani Jesosaja epeejjicuanaja ebajji. Miquianaya queameshihuisocuanajo ba'eca jjachichaquipoquiani esohuijo. 3Eyacuiñajji eseja Chii-aiya, Emeshimesenei Jesosa Quitohua pea-ai miquianaya queapamenee ca-acapoquiahuatii ojayanei ejjashahuabaquijjijo queaquijijjijajinee capomeecahua quiana pea-ai ohuaya. 4Jesosa Quito jjaquiaquiapoa emano'yojji eseja mimishicuanajo ese queamimishica'atii eba'epoqui poanijje joya ecua dejjacuana oma' jayojjatii nequipoquiani jama pea-ai ese epo poanijje. Majoya Jesosa Quito jjaquiaquiapoa Eyacuiñajjija ejjashahuabaquijji eajeyo'yojji. Eyacuiñajji eseja Chii-ai poani. 5Eyacuiñajji cabihuiacapoquiahuatii ojjañacuaa, jamaya acapoahua.
Chama'neinei pea esohui ehuohuijji ese enahue'yo epojjijo
6Eya queayenonee poani miquiaaya Eyacuiñajjija esohui cajaa acuaji'yaña shajja-ajjamajje. Eyacuiñajjiya quiana Quitojo ohua queajeanee acanijojoya iyaacanaje oja bacua epojji. Miquiaaya ca jjeya ma ebionei esohui queapame Quitojo pea esohui a'yaña. 7E'ejojonei chama'neinei pea esohui queapame Quitojo ehuohui'yojji Eyacuiñajjija nahue'yo epojjijo. Jamatii pea dejjacuana enequi miquiana queaquehua jjashahuabameequijji poani. Ma dejjacuaaya Eyacuiñajjija esohui queapame Quitohua eseya nahueca'yonaje pea huohuime aca'yani, e'ejojonei pojjeama esohui, pea. 8Jamajjeya peacuaa esohui queapame Quitojo pea huohuime aca'yajo, ma ecua ecuaa miquiana ebionei esohui huohuicoonaje jama pojjeama ohua jama aca'yajo, Eyacuiñajjiya queaneetii capomeeca'yahua ma dejjacuanaya Cuaqui-aiyasijje. Joya eyajje poe angelcuaa pea-ai esohui queapame Quitojo pea huohuime aca'yajo queaneeneetii capomeeca'yahua oya. Eya pea-ai oja esohui queapame Quitojo pea huohuime a'yajo queaneeneetii capomeeca'yahua eya. 9Yahuajopishana quiana huohuinaje, jjeyanei pea-aiya oya esohuitiiya tehueaña. Pea dejjacuaa Eyacuiñajjija esohui queapame Quitojo pea huohuime aca'yajo, ma ecua ecuaa quiana yahuajo huohuicoonaje jama pojjeama ohua pea esohui aca'yajo, queaneeneetii capomeeca'yahua Eyacuiñajjiya oya.
10Eyaya jama huohuime aña dejjacuanaja eya queaboti eajjijo pojjeama. Eyacuiñajjija eya queapame chacochacoani ebajjijo ca eyaya jama huohuime aña quiana. Bacue, eya dejjacuananijjenei jjapeequisapojjijjemo eya Quitojo echacochacojjitii pojjeama pome.
Ajea esohuijo oya Pablo ona sohuihuohuiquinequijji epojji babacacapoa
11Jesosaja epeejjicuana, bacue. Jiquio eyaya huohuiaña esohui queapame Quitojo dejja yamijjija ejjashahuabaquijji pojjeama. 12Jiquio esohui eyaya quiana huohuiaña enijje dejjaja quia pojjeama, enijje dejjaja huohuijo pojjeamanei pea-ai. Jesosa Quitohua ca eya jiquio esohui queapame bameesahuacapoa queaja'a.
13Yahuajopishana miquiaaya ecuea eba'ejjijo shajja-ajjanaje. Eya ebionei Moisesja tehuecuana esohuijonei jjashahuabaquipoquiapoa majoneitiiya. Jamajjeya eya Jesosaja epeejjicuananijje queamasenee nequipoquiapoa. Eyaya oja epeejjicuana chama'yo pomeesa-apoquiapoa. 14Moisesja tehue esohuicuana jayojja eya ba'etiipoquiapoa ma enijje nequi dejjacuana e tiineiajjaya jama pojjeama eya ba'epoquiapoa majoneitii jjashahuabapoquianiya. Eyaya ca eseja etiiquianaja esohuicuana shahuabaneineipoquiapoa, asaneineiapea-aiapoa ecuea maya esohuicuana queanahue poajojoya. 15Jamatii eya teejo ba'etii cuayajjimahua Eyacuiñajjija eya ebatii poa ohuaya eya quijje babacacaje ojayanei ejjashahuabaquijjijo, ejo pojjeama. Jamajjeya quijje ohuaya eya queapame bacapoa ojo echacochacopoquijji. 16Majoya ohuaya eya oja Bacuaejja bameesahuacapoa ojo queaja'a ejjashahuabaqui'yojji. Jamajjeya Eyacuiñajjiya eya babacacapoa esohui queapame Quitojo judío pojjeamacuana sohuihuohuiquinequiya epoquijji. Majoya aje eya pea dejjanijje mimijjimanei poa yajja ecuea acajji. 17Eya ca poquijjimatii poa ciudad Jerusalén meshiyasijje dejjacuana ma Eyacuiñajjija babaca baa. Ma dejjacuanaya ebionei oja babaca pocooapoa ona sohuihuohuiquinequijji epojji. Eya ca shonoshonojjimanei nequi poquiapoa provincia Arabia meshiyasijje. Majo nequiya eya cuama poeo'oyapoa ciudad Damasco meshiyasijje.
18Majoya aje quijje tres shequiajame huiso jjayejjequiajo eya poquiapoa Jerusalén meshiyasijje Pedro baa. Majotii eya aniapoa so'o onijjetii 15 cahuime huiso. 19Eya majotii ani pea dejjacuana Eyacuiñajjija babaca ona sohuihuohuiquinequijji poani bapojjima'nei aniapoa. Santiago ca oenei ma eseja Emeshimeseneija chahua eyaya bapoa. 20Eyacuiñajjiya eya bacani jiquio eya miquianaque tehueaña esohui e'ejojonei poani, siajje pojjeama.
21Majoya eya quijjepishana poquiapoa provincia Siria meshiyasijje, provincia Cilicia meshiyasijje pea-ai. 22Eya ca provincia Judea meshiyasijje poquijjima poa. Jamajjeya Jesosaja epeejjicuana ma meshijo esohuijo jjachichaquipoquianicuanaja ca eya bajjimanei poa ojaya ecojjaja. 23Majo ba'ecacuaa ca mahuiso esohui oopana shajja-ajjamajamajacapoa ejo jama ba'a: —Ma yahuajopishana esohuijo ese queanee pomeejji popoquinaje dejjaa caca jjeya esohui queapame Jesosa Quitojo huohuicani cuana majo ejjashahuabaqui'yojji. Ma esohui yahuajo ohuaya chama'yo asa-acapoquinaje jjeya ohuaya oya esohuiya huohuica'yoqui— jamaya poa cuana ejo. 24Jamajjeya queahuisocuaa Eyacuiñajji bihuiacapoa yajja Eyacuiñajjiya eya pomeeca'yonaje shajja-ajjamajje.
Currently Selected:
GÁLATAS 1: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
