GÁLATAS 2

Pea Eyacuiñajjija babaca ona sohuihuohuiquinequijji poanicuaa a'a Pablohua esohui queaja'a huohuicani bacapoa

1Majoya aje quijjenei eya 14 shequiajame huiso jjayejjequiajo poquio'oyanaje Jerusalén meshiyasijje Bernabenijje. Tito pea-ai dojonaje ecuananijje. 2Ecuana cuamaya poquio'oyanaje jamatii pojjeama. Eyacuiñajjiya eya huohuicanaje queaja'a e cuamaya epoquio'oyajji. Majotii ani eya jjachichaquinaje etii poanicuana oopananijje. Etii poanicuaa shajja-ajjacanaje ache esohui queapame Quitojo eyaya judío pojjeamacuana huohuiaña oja bajji. Jamaya eyaya huohuiquinaje cuana ecuea echacojji peajja jayojja ma etiicuaa ebaca poanijje. 3Majo aniyaya etii poanicuaa Tito, ma enijje poqui griego dejja poani, bacanaje ecuiishasha jehuisejjajeameejji pojjeama oya poaje. Judío dejja jama pea-ai epojji oya ameeca-ajja huohuicanaje etii poanicuaa. 4Jamatii becacuana Jesosaja epeejjinisho poani ecuananijje jjapeequipea-ainaje, ecuanaja oya bajjimanei poanaje. Ma dejjacuaaya achajja ecuana Jesosa Quitoja nahue'yo ba'e quehuajje bacanequinaje eniñebajji. Jamajjeya ecuana Moisesja tehue esohuicuana ojjañatii jayojja ba'emeeneisa-acao'oyanaje ma dejjacuaaya. 5Ecuana ca jama ba'esapobeca'yoajjaneitii poanaje. Jamajjeya ma esohui ecuaa cajaanei anaje. Esohui queapame Quitojo ca ecuaa nahueneinaje miquianaja queaja'atii ebapoquiajji.

6Ma dejja etii poanicuaa Jerusalén meshijo nequicaa eya niñesheajjima acanaje ecuea peacuana ehuohuiquijjijo. Jamatii queaja'a Eyacuiñajjija esohui huohuiaña eya bacanaje cuaa. Onijjejaajji Jesosaja epeejjicuaa ma dejjacuana bacanaje ebabaca etii poani pea sohuihuohuijji epojji. Eyacuiñajjiya ca se ca ebiajjejje pojjeama bacapoquianitii achajja eseya ba'e. Jamajjeya eya meteama poanaje etiicuana ani cojjaneijo nequimajje emimijji onijje. 7Ma dejja etii poanicuaa eya Pablo e'ejojonei judío pojjeamacuana esohui queapame Quitojo huohuiquinequijji poani Eyacuiñajjija babaca bacanaje. Ma ecua Eyacuiñajjiya Pedro judiocuana sohuihuohuijji epojji babacacanaje jama pea-ai epojjiya etiicuaa eya bacanaje judío pojjeamacuana sohuihuohuiquinequijji epojji. 8Jamajjeya Eyacuiñajji queaca'aneetii poani ma Pedro huoojeajji poaya judiocuana sohuihuohuiquinequijji epojji oya Eyacuiñajji queaca'aneetii poaniya eya huoojeapea-aicanaje judío pojjeamacuana sohuihuohuiquinequijji epojji. 9Majoya aje Santiagohua, Pedrohua, Juanya pea-ai bacanaje Eyacuiñajjiya eya peacuana sohuihuohuiquinequijji epojji e'ejojonei babacacanaje. Ma tres dejjacuana Jesosaja epeejjicuaa bacapoquinaje o sohuihuohuijji etii poani. Jamajjeya eya Pablo Eyacuiñajjija babaca oja echacojji yajji bacanaje ma dejja etiicuaaya. Majoya ojaya eme jeaacanaje eque, Bernabeque pea-ai ja'anei ojjañaja ebajji ecuana queapame chacochacopoquije ojee Eyacuiñajjija esohuijo. Ecuana judío pojjeamacuana sohuihuohuipoquiajji poani bacanaje cuaa. Ma etii poanicuana ca judío oopanacuananijje chacochacopoquijetii jjabaquinaje. 10Oe esohuineiya ecuana huohuicanaje ma etii poanicuaa. Jama huohuime acanaje ba'a: —Jesosaja epeejji Jerusalén meshijo ba'eca aema', bobima' poanicuana, ¡a'a pajeajji!— Eya ma cuanajoya queahuiso chacochacopoquianitii hueya-amanei.

Pedro ciudad Antioquía meshijo nequi Pablohua ja'anei oya tecueacapoa oya queaquehua jjashahuabaquiani bamajje

11Majoya aje quijje Pedro ciudad Antioquía meshijo aniñaquiajo eyaya Pablohua oya tecueanaje o cojjaneijo nequimajje. E'ejojonei oya queaquehua jjashahuabaquinaje, jamajjeya eyaya oya tecueanaje. 12Bacue, ebionei Pedro judío pojjeamacuananijje queabihui ijjiaijjiapoquinaje. Majoya judío dejjacuana Santiagoja huoojea poeajo, oya Pedro jjanequishiñaquinaje ma onijje ijjiaijjiani judío pojjeamacuanajo Santiagoja huoojea judío dejjacuana queaquene epo poanijje onijje. Jamajjeya Pedro judío pojjeamacuananijje ijjiaijjiapajeanaje. Ma poeyanaje judío dejjacuana Santiagoja huoojea, judío pojjeamacuana cuiishasha jehuisejjameecajji esohuihuohuijjinei poanaje. 13Majoya aje Pedro jama poani bamajje pea judiocuana Jesosaja epeejji jjanequishiñapea-aiquinaje judío pojjeamacuanajo. Santiagoja huoojea dejjacuana queaquene epo poanijje onijje, Bernabé pea-ai jjanequishiñaquinaje. 14Eyaya Pedro, pea judiocuana pea-ai banaje Eyacuiñajjija esohui queapame Quitojo jama pojjeama ba'yani. Jamajjeya eyaya Pedro ja'anei queahuiso ejjachichaqui anicajo tecueanaje jama ba'a: “Miya caca judionei poani, jamatii joya ecua judío pojjeamacuana ba'yani jama pea-aiya miya pea mecajje ba'enaje. Jamajjeya, ¿apiojji acuae jjeya joya judío pojjeamacuana miyaya judiocuana jama ba'emeepea-aisa-aña Moisesja tehuecuana jayojjatii eba'epoquijji? Jamaya miya queaquehua poani ¡de!” jama tecueaneimeya eyaya Pedro anaje.

Judiocuana, judío pojjeamacuana pea-ai Eyacuiñajjija nahue'yo poani Jesosa Quitojo jjashahuabaqui'yamajje, mahuisojotiiya

15Eyaya Pablohua jama huohuime apea-aiaña ba'a: —Ecuanaja chiicuana judío dejja poa, jamajje ecuana judionei epojji cuayapoa. Joya ecua judío pojjeamacuana Eyacuiñajjija sohuima'nei poani jama epojji pojjeama ecuana cuayapoa. 16Jamatii ecuanaja ebanei chama'neinei dejja, eponacuana pea-ai oja mimishima'yo poani ojjaña Eyacuiñajjija esohui Moisesja tehuecuana jayojja oya ba'epoquianijotii, majonei pojjeama. Jesosa Quito oeneijo jjashahuabaqui'yajoya caca oe oya oja mimishima'yo bacaje Eyacuiñajjiya. Jamajojoya aje ecuana judionei poaniya Jesosa Quitojo jjashahuabapea-aiqui'yapoa. Majoya ecuana Eyacuiñajjiya bacapoa ecuanaja mimishima'yo poani, mahuisojoya, ojjaña Moisesja tehuecuana jayojja ba'epoquianijotii pojjeama. Chama'neinei dejja che oema' oja mimishima'yo bacani Eyacuiñajjiya oya ojjaña Moisesja tehuecuana jayojjatii ba'epoquianijo.

17—Bacue, e'ejojonei ecuana jjashahuabaqui'yapoa Jesosa Quitojo ecuana mimishima'yo Eyacuiñajjija ebajji. E'e pojja'a beca judiocuaa ecuana majoya bacani mimishijjitii poani Moisesja tehuecuana jayojja miba'etiipoquiajo. ¿A'a jama poanijjeya Quitohua ecuana queamimishi pomeecani? Chojja de, jama pojjeama. 18Eya esohui jama huohuio'oyame añajojjemo ojjaña Moisesja tehuecuana jayojja ba'epoquianijotii dejja oja mimishima'yo bacaje Eyacuiñajjiya, eya queamimishi pome eya esohui huohuitaiañajojoya. 19Bacue. Jiquio ecua dejjacuana mano'yonaje jama pea-aiya eya po'yonaje Moisesja tehuecuanajo.#2.19 Nota: Jiquio esohui dejjacuana mano'yonaje jayojja Moisesja tehuecuanajo jama poanijje ba'a: Jjeya Moisesja tehuecuana o huohuipoquiajjitii pojjeama po'yani.* Jjeya eya ojjaña oja tehuecuana jayojja ba'etiipoquiajja. Jamajjeya ca eya jjeya ba'epoquiani ma Eyacuiñajjiya e ameesa-acani huisotiijo 20Eya acui ecuiata'apeejo Quitonijje mano'yonaje jayojja po'yonaje jjabaquiani. Jamajjeya jjeya eenei pojjeama ba'epoquiani. Quito ca ecue yamijo nequipea-ai'yani enijjetii. Jamajjeya jjeya eya jiquio ecue yamijo eshe poani eya queapame ba'epoquiani Eyacuiñajjija Bacuaejjajo, ojo jjashahuabaquipoqui'yanijjejojoya. Ohuaya eya queajeanee acanijojoya oya jjaquiaquiapoa emano'yojji e nahue'yojji epojjijo. 21Eyacuiñajjiya eya queapamenee acanaje ojayanei ejjashahuabaquijjijo. Jamajjeya ecuea oya cajaa ea'yojji pojjeamatii ohua jama acani jjabaquimajje. Bacue, dejjacuana eponacuana pea-ai ojjaña Moisesja tehuecuana jayojja ba'epoquianitiijojjemo oja mimishima'yo Eyacuiñajjija ebajjijo Quito jamatii mano'yoquiae.—

Currently Selected:

GÁLATAS 2: ESE

Highlight

Compare

Copy