COLOSENSES 3

1Eyacuiñajjiya miquiana Quitonijjetii shequimeeca'yonaje eyacua eba'epoqui'yojji ojo. Jamajjeya quiana ca oe jjeya Eyacuiñajjinijje eba'etiitiipoqui'yojjijo jjashahuabaquipoquicuetii. O baneineijjijo jjashahuabapea-aiquipoquicue. Majo Eyacuiñajjija ebañeimijijje ani'yohuaya Quitohua ojjañacuana huoojeacapoquianitii. 2Eyacuiñajjinijje eba'etiitiipoqui'yojjijo jjashahuabaquipoquisapocue. A'a oe jiquio meshijo nequica dejjaja ejjashahuabaquijji jayojja pea-ai ba'esapojji. 3E'ejojonei miquianaya mano'yonaje Quitonijje queamimishitii eba'epoqui poanijje. Jjeya quiana ca eyacua ba'epoqui'yani Quitoja'yo poanijjejojoya. Jamatii Eyacuiñajjima' jayojjacuanaja bajjima poani miquianaya Quitonijje ojee Eyacuiñajji Eyajo anija'yo poanitii. 4E'ejojonei Quitohua quiana jjeya eyacua ba'emeecapoqui'yani ojaya'yo poanijojoya. Jamajjeya Quito queaca'aneetii queasajajanee poeo'oyajo miquianaya onijjetii poepea-aije queaca'a queasajaja pea-ai.

Pablohua tehuecapoa esohui eba'ejji echiijo, eba'ejji eyacuajo pea-ai

5Jamajjeya oe miquianaja ejjashahuabaquijji queamimishi epojji miquianaja eyamijotii nequi cajaanei a'yocue, manojeamee'yocue. A'a pea dejjajo, pea eponajo jjashahuabaquijji onijje ejaajjijo. A'a miquianaja eyami quiajji peanijje queamimishi epojji. Miquianaja ejjashahuabaquijji peanijje ejaajji cajaanei a'yocue. A'a queamimishi posapojji. A'a oe queabejjohuiso posapojji. Joya dejjaa majotii jjashahuabaquipoquimajje bejjo oja Eyacuiñajji jayojja ohuaya shahuabacapoquijetii, queajeanee acaje. 6Ojjaña joya oja esohuijo jjashajja-ajjaquiajjatii popoquianicuana coma mimishicuana eapoquiajjitii, Eyacuiñajjiya queaqueneneeya queaneenee pomeecaje'yo macuanaya oja mimishijo quijje. 7Jamaya miquianaya ba'epoquiapoa yahuajo queamimishitii jjashahuabaquipoquiapoajjejojoya. 8Jjeya quiaa ca oe coma mimishicuana ojjañatii cajaanei a'yocue. A'a queacojjaquenetii ba'epoquijji peacuananijje. A'a quenequenecuajijji. A'a miquiananijje ba'eca botiama ajji. A'a peacuana mata-ajji miquianaja esohui queataiya. A'a esohui queatai jeacuayajji ojo. 9A'a miquiananijje Jesosaja epeejjicuana siajje ajji. Yahuajo quiana jamaya ba'epoquiapoa. Jjeya ca mimishi miquianaja yamijo nequi ca'a-ama pomeeca'yonaje Eyacuiñajjiya. Jamajjeya miquianaja ejjashahuabaquijji queamimishi epojji cajaanei a'yonaje jiquio ecua seya daquichii jeajeaña jamaya. Jjeya quiana pea jjashahuabaquime eyacua ba'epoqui'yani. 10Miquianaya pea jjashahuabaquime eyacua ba'epoqui'yani joya ecua se pea daqui eyacuajji nequi'yani jama jayojja Quitojo po'yani. Jamajjeya quiana jjeya queaja'a ba'epoquije. Queaca'a tiipoquije quiana ojjaña pojjajo Eyacuiñajji jayojja pea-ai jjashahuabaquime epopoquijji. Eyacuiñajji miquiana panajji epo. 11Jjeya Eyacuiñajjiya ojjaña oja epeejjicuana oya jayojja pea-ai poani ojaya queanahuenee bacapoquiani. Dejjacuaa bacani judiocuana queapamenee judío pojjeamacuana ca queapamepishana. Eyacuiñajjiya ca jama pojjeama jjeya bacani cuana. Oya jayojja pea-ai cuiishashajjicuana, ecuiishashajehuisejjajea pea-ai ohuaya bacanitii ojaya queanahuenee pea-ai. Pea esohuijo mimianicuana, ebiojo ba'ecacuana pea-ai oya jayojja pea-ai ohuaya bacanitii queanahuenee pea-ai. Joya ejjeshe peajo chacochacopoquianitiicuana, joya oyatii oja meshijo chacochacoanicuana pea-ai ohuaya bacanitii oya jayojja pea-ai. Jamaya Eyacuiñajjiya ojjaña eseya oja epeejjicuana oya jayojja pea-ai bacapoquianitii Quito eseja yamijo nequianijojoya. Ojjaña eseya Quitojoneitii ba'epoquiani.

12E'e, Eyacuiñajjiya miquiana queajeanee acapoquianitii, ojaya'yo bacani oja babaca. Jiquio ecua dejjacuaa daqui eyacua huoshocani peaja ebajji jamaya pea jjashahuabaquime eyacua ba'epoqui'yocue peacuanaja ebajji miquiana Eyacuiñajjija'yo poani. Jamajjeya oe peacuana queayeno poani bamajje asahuacue. A'a miquianayanei queaca'a poani poso jjabaquijji. A'a oe quenequenecuajijji peanijje. Peacuanajo queapame jjashahuabaquicue pea-ai o asahuajjijo. Peaja ejjashahuabaquijji queapame shajja-ajjapea-aicue. 13Miquiananijje ba'eca Jesosaja epeejjicuananijje a'a quenequenecuajijji cua ohua acajejo miya asapea-aipo-ajjajjejojo. Jjapashineijje oe mimipoquicue onijje queneama. Oya minijje queamimishi poajo ca oe oja mimishi pajeacuaji'yocue. Jiquio ecua Quitohua eseja mimishicuana pajeaca'yani jama pea-ai oja mimishi acue. A'a oja mimishi shahuabapoquiajjitii. 14Jamaya quiana queapame ba'ecapoquijji. Miquiananijje ba'eca Jesosaja epeejjicuana pea-ai queajeanee apoquiacuetii. Jamaya queapamenee eba'epoquijji. Majoya jama pomajje quiana queabihuinee ba'epoquije ojee oya meshijo ba'e. 15E'ejojonei Quitohua miquiana queaquijijjijajinee pomeecani miquiana ojee queaja'a ba'epoquiajo oe eyami jayojja poajo. Jamajjeya ache quianaja acajji ohuaya queaja'a bameesahuacaje. Jamajjeya quiaa oe a'a esohui queaquehua jeacuayajji, a'a queamase pojji pea-ai ojee queabihui ba'ejjima epojji. Chojja, jama ba'eme poca-ajja. Eyacuiñajji gracias apoquiacuetii ojjañajo.

16Esohui queapame Quitojo miquianajaya sapadojjojo huanapoquiacuetii, queanahuenee oe bacue. Miquiananijje ba'eca Jesosaja epeejjicuana sohuihuohuipoquiacue Eyacuiñajjija esohuijo queaja'a o ba'epoquijji. Queaquehua poajo oya niñesheacue. E'ejojonei, jamatii enabajonei pojjeama Eyacuiñajji gracias apoquiacue sohuicuayaniya oja esohui Salmosjo. Pea esohui etehuecuana jaajo pea-ai queabihui ojo ejjashahuabaquijji sohuicuayacue. 17Ojjaña jiquio miquiana mimipoquiani esohuicuanajo, jiquio miquiana chacochacopoquianijo pea-ai queapamenee apoquiacue Jesosaja epeejji poaniyajjejojoya. Eyacuiñajji eseja Chii-ai gracias apoquiacuetii ojjañajo eseja Emeshimesenei Jesosa Quitoja bajjanijo.

Pablohua tehuecapoa esohui achajja ba'ecapoquijji ehuanasenijje, yahuenijje pea-ai

18Ehuanasecuana bacue, miquianajahuecuanaja esohuijo oe jjashajja-ajjaquipoquicue. E'e, jamaya queapame ba'ecapoquijji Emeshimesenei Jesosaja epeejjicuana ojaya'yo poani jjabaquimajje. 19Yahuecuaa miquianaja huanasecuana queajeanee apoquiacue. A'a joya ecua mijo chacochacoani jama tecueame oya ajji. A'a onijje queaquene mimijji.

20Ebacuacuana pea-ai, miquianaja chiija esohuijo, enaese pea-aija esohuijo jjashajja-ajjaquipoquicue ojjañajo. Jamajoya Emeshimesenei queabihui poani miquiananijje. 21Echiimesecuana, enaesecuana pea-ai joya bacuajjiya quiaa, a'a oe miquianaja bacuacuana queaquene pomeejji tecueamajamajapoquiajje. Majoya oya queayenotii popoquije, queapame ba'epoquisapo-ajja poaje.

22Joya peajo chacochacopoquianitii ejjeshe, jiquio meshijo miquiana chacomeejji poanija esohuijo jjashajja-ajjaquipoquicue, oja esohui jayojja apoquiacue. Ohua miquiana bacaquitii chacochaconeinishoca-ajja o queabihui pojjijo. Chojja, e'ejojonei chacochaconeicajji jamatii o chamajo Emeshimeseneiya quiana achajja chacochacoqui bacanitiijjejojoya. 23Ojjaña jiquio miquiaa chacopoquiaje huisotii hueya-amaneiya queabihuiya chacojeyocue. Ma echacojjiya Emeshimeseneiya miya ameecani jamaya oe jjabaquicue, dejjajonei pojjeama quiana chacochacoani jjabaquicue. 24Miquianajaya eba quijje eseja Emeshimeseneiya miquiana queabihuitii pojji quiacaje Eyajo nequiya. Jamaya quiana ohuaya quiacaje quijje Emeshimesenei Quitojo queapame e'ejojonei chacochacopoquinaje sosejje. 25Becacuana joya queamimishitii ba'epoquiani ca Eyacuiñajjiya queanee pomeecaje o jjabahuejjaquijji oja mimishijo. Ohuaya ojjañacuana oya jayojja pea-ai bacaje ojaya eba'ejjijo a'a queapame a'a queamimishi poanaje ehuohui'yojji.

Currently Selected:

COLOSENSES 3: ESE

Highlight

Compare

Copy