COLOSENSES 2

1Eyaya jiquio esohui huohuiaña miquianajaya ebajji eya queahuiso jjashahuabaquipoquiani miquiana asahuajjijo. Laodicea meshijo ba'ecacuana asahuajjijo pea-ai eya queahuisonee jjashahuabapea-aiquipoquiani. Ojjaña Jesosaja epeejjicuana joya e oja ecojjaja ba pojjima'cuana eyaya asahuaneisa-aña, miquianaja meshijo ba'eca e ba pojjima'cuana pea-ai asahuaneisa-aña. 2Macuana, miquianaya pea-ai queaca'a eba'epoquijji eyamiquipajje, oya jjashahuabaquime pea-ai epojji, miquiananijje ba'eca Jesosaja epeejji queajea eapoquiajji pea-ai, eyaya queahuiso majoya sohuihuohuiaña. Eyacuiñajjija ejjashahuabaquijji queaja'a ebajji miquiana queajjashahuabaquija'a eba'epoquijji pea-ai eyaya queahuiso majo sohuihuohuiaña. Yahuajonei quio Eyacuiñajjija ejjashahuabaquijji bajjimanei poa cuanaja. Quito queapamenee nequipoanitii bajjimanei quianaja poa. 3Quitoja ebajeyojeyo Eyacuiñajjija ejjashahuabaquijjicuana. Jamajjeya Quitohuanei eseya queaja'a bameesahuacapoquiani ojjaña ojaya ejjashahuabaquijjicuana. Ojjañajo queaja'a eba'epoquijji Quitoja ebajeyojeyotii pea-ai ojaya ese huohuijji. 4Jamaya eyaya quiana huohuiaña peacuanaja esohui queapame jayojjajo miquiana ejjadasiameequi poanijje. Oja huohui esohui queahuisocuaa queapame poso shajja-ajjacaje jamatii oya siajje poaje. 5E'e, eya miquiananijje ojee anijjimatii jamatii eya queahuiso miquianajo jjashahuabaquipoquiani. Eyaya queabihuiya shajja-ajjanaje miquiana queaca'a tiipoquiani Eyacuiñajjijo ojee, oya jayojja pea-ai jjashahuabaqui'yome epo ba'e Quitojo shajja-ajjanaje.

Jesosaja epeejji poanicuana pea jjashahuabaquime eyacua ba'ecapoqui'yojji

6Jjeya miquianaya e'ejojonei Emeshimesenei Jesosa Quitojo jjashahuabaqui'yonaje, ojaya'yotii quiana poani. Jamajjeya quiana oe ojoneitii queaca'a ba'epoquicue. 7Jesosa Quitojo queaca'a ba'epoquicue jiquio ecua acui queaca'a nequiani esajja meshiquipajo queadoe nequijojoya jama pea-aiya queaca'a ba'epoquicue ojo. Miquianaya queaca'a tiipoquije Jesosa Quitojotii jama queaja'a jjashahuabaquimajje. Jama miquiana epojjijoya quianaja eshajja-ajja. Eyacuiñajji gracias amajamajapoquiacue quiaa e'ejojoneiya.

8E'e, jjajaahuananeiquicue quiana oe joya miquiana siajje asapojji poajecuanajo. Jiquio meshijo nequicacuanaja esohuinei ohuaya huohuisa-acaje quiana mahuisotiiya. Ojayanei ejjashahuabaquijji achajja Eyacuiñajji nequi huohuicaje miquiana dasiajji. Comacuaaya caca etiiquianaja esohuicuana shahuabacapoquianitii. Eshahuacuanaja jiquio meshijo queaca'a nequija ejjashahuabaquijjicuana ohuaya huohuicani pea-ai. Jesosa Quitoja esohui jayojja eba'epoquijjijo ca oya jjashahuabaquiajjanei.

9Bacue, ojjañatii Eyacuiñajjija ejjashahuabaquijjicuana ca Quitoja eyamijo nequi, ojaya ebajeyojeyo, Quito Eyacuiñajji pea-ai poaniyajjejojoya. 10Ojjañatii Eyacuiñajjija quia queapame ojo echacochacojji ejjeshejeyo quianaja, apoa quiana pomeecanaje. Che oema' ojaya quiajjima miquiana Quitonijje ojee nequi ojaya'yo poanijojoya. Quito caca eojjañacuanamese poani. Ojjaña joya eyajo nequica eshahuacuana, angelcuana pea-ai queaca'a etii poanicuana ohuaya huoojeacapoquianitii. 11Miquianaya Quitojo jjashahuabaqui'yajo Eyacuiñajjiya nahueca'yonaje ojaya'yo epojji. Miquiana jjacuiishashajehuisejjajeameequianijo pojjeama ohuaya quiana jama pomeeca'yonaje ojaya'yo. Ohuaya miquianaja mimishicuana miquianaja yamijo nequi jeajeaca'yonaje queahuesha ojaya'yo epojji. Jamajjeya quiana ca jjeya queamimishitii ba'esapo'yoajja poaje. Queapame quiana ba'e'yosapoaje. 12Bacue, miquianaya enaojjojo jjaiñajeanobiameequinaje jiquio ecua Quitonijje ojee huananobia jaanaje jjanidojjojo jamaya quiana poanaje. Oya jayojjaya quiana onijje eshequi'yo nequiani Eyacuiñajji queaca'anee poanijo jjashahuabaqui'yomajje. E'ejojonei ohuaya Quito emano'yo jaa shequimeecooca'yapoa. 13Yahuajo quiana quea-Eyacuiñajjihueshatii ba'epoquiapoa edojjoshahua mano'yo miquianaja mimishicuanajo. Oja sohuima'tii quiana yahuajo ba'epoquiapoa, jamajjeya aje quiana jjacuiishashajehuisejjameequijjima poa. Jjeya ca quiana ca Eyacuiñajjiya eba'ejji eyacua quiacanaje. Ma ecua ohua Quito shequimeeca'yapoa jama miquianaja edojjoshahua eshe pomeeca'yonaje. Ojjañatii miquianaja mimishicuana ohuaya cuijeajeyoca'yonaje, chama'yo acanaje. 14Eyacuiñajjiya oja Bacuaejja acui ecuiata'apeejo manoje'yo bamajje ese queaneetii pomee'yojji poani eseja mimishijo etehue jaa chama'yo acanaje. Moisesja tehuecuanaja ese queaneetii epomee'yojji eseja mimishijo ehuohuijjitii pojjeama pomeeca'yonaje, acui ecuiata'apeejo ecacajea ba'e jama pomeeca'yonaje. 15Jesosa Quitohua acui ecuiata'apeejo mano'yomajje eshahuamasecuana joya eyajo nequica queaca'a etii poanicuana miquiana huoojeapoquiajji poanaje jeabichajeajeyoca'yapoa, gana-ajeyoca'yapoa. Majoya ohuaya eshahuamasecuana queabicho pomeeca'yapoa queahuisocuanaja oya ca'a-ama'yo poani ebajji, ejeyo jayojja dojoca'yani pea-ai ebajji cuanaja.

Ma quijje Eyacuiñajjiya miquiana quiacajejo Eyahuasijje jjashahuabapea-aiquicajji

16Jamajjeya oe a'a shajja-ajjajji cuana joya miquiana jama ajji poaje ba'a: “A'a coma bobi ijjiaca-ajja ijjiajji, a'a coma ishica-ajja ishijji. Eyacuiñajji jama sapo-ajjanei. Fiestacuana eapoquiajji epojjacuana poe'yani shahuabapoquiacuetii, ba'i eyacua pea-ai shahuabapoquiacue. Jiquio ejomishocajji sábado epojja Eyacuiñajjija queanahue, pea epojjacuana ca jama pojjeama.” Jamaya quiana acajetii cuaa. A'a esohui jama shajja-ajjajji ohua jama acajje. 17Esohuicuana jama eba'epoquijji eatiitiipoquiajji pojjeama poaje'yo. Quito poeapoajo ma esohuicuana pajeaca'yojji poanaje. Jamatii Eyacuiñajjiya ma esohuicuana jamaya huohuimeecoocapoa cuana quijje queaja'a jjabahuejjaquijji Quitojo. E'ejojonei Quito miquiana nahue'yojji poani. 18Peacuana esohuihuohuijjinisho poani poeje. Esohui queaquehua yecaje. Jama quiana acanañaje oyatii queasapaja'a poani jjabaquianiya ba'a: “Miquianajaya ca bajjimanei esohui, Eyacuiñajjija esohui jayojja ba'esapo-ajja quiana. Eyacuiñajjiya ecuana ca jjacahuibaquiani jayojja ani queahuiso bameecanaje. Jamajjeya ecuanaja ebanei miquiana sohuihuohuijji. Ecuaa eyajo nequi angelcuana bamajje oya bihuiaña. Ecuanaja eyamijo queanee jjapomeequiani Eyacuiñajjija ecuana queapame poani ebajji,” jamaya quiana acañaje cuaa. Ma dejjacuaaya ojayanei ejjashahuabaquijjicuana huohuicani. Jamajjeya a'a oe oja esohui shajja-ajjajji. 19Joya jama jjasohuihuohuiquime poanicuana Quito oja Emeshimesenei epojjijo jjashahuabaqui'yoajja. Quito ca ojjaña joya ojo jjashahuabaqui'yonajecuanaja esapa jayojja poani oja Emeshimesenei. Eseya caca oja eyami jayojja poani ojjaña oja epeejjicuana. Ohuaya eseya eshe pomeecapoquiani. Ohuaya eseya ojee queaca'a tiimeecapoquiani jiquio ecua eseja yamija sa' epajjajje quiniquinijji ojee nequiani jama. Jama saya Eyacuiñajji popoquiani esejo.

20Jjabaquicue quiana oe Quitonijjetii ojee mano'yonaje. Jjeya ca jiquio meshijo ba'ecacuana queamimishi pomeejji poani eshahuamasecuana emiquianamesetii pojjeama'yo poani. Jama po'yani jjabaquimajje ¿yajjajje acuae quiana jiquio meshijo nequicacuanaja esohui queaquehuajo jjashajja-ajjaquipoquianitii Eyacuiñajjija quiana queapame poani ebajji? 21Oja esohui queaquehua jama poani ba'a: “A'a coma bobi ijjiaca-ajja napajji emeya, a'a ijjiajji, a'a coma pea aquiana napajji pea-ai.” Jamaya poani cuana Eyacuiñajjija oya queapame poani ebajji nisho majoya. 22Coma esohuicuanajo queaja'a eba'epoquijji pojjeama poaje quiana. Ma miquiaaya ijjiaña bobi, aquianacuana napaña pea-ai oe poaje'yo quijje. Ma jama huohuime acani esohuicuana ca quijje pajeacaje'yo coma dejjacuaaya ojayanei ejjashahuabaquijjicuana huohuicapoquianijojoya. 23Joya dejjaja esohuineicuana shajja-ajjapoquiajji poanicuana ca queapamenee ba'epoquiani poso jjabaquiani. Oya jama poani ba'a: “Ecuana queasapaja'anee oja huohuijo jjashajja-ajjaquipoquijetii.” Oya jama poani pea-ai ba'a: “Ecuanaja eyaminei ecuaaya queanee pomeeje queamimishi epo poanijje. Majoya ecuanaja eyamijo queamimishi posapo'yoajja poaje queanee jjapomeequimajje,” jamaya poani cuana. Chojja de, jamajo pojjeama oya queamimishi posapo'yoajja poaje, mimishi oja yamijotii nequipoquije.

Currently Selected:

COLOSENSES 2: ESE

Highlight

Compare

Copy