COLOSENSES 4

1Echacomeejji poaniya quiaa, joya mijo chacochacoanicuana ejjeshe queapame chacomeecue queamaseya pojjeama. A'a oya chacomeeneijji oepojjinei bejjo sosejje. A'a oe quiana jjapajea-ajjaquijji emiquianamese Eyajo nequiya quiana bacapoquianitii.

2A'a oe mimipajea-ajjajji Eyacuiñajjinijje. Jjabaquicue oe miquiana ajeo mimipoquiani onijje. Oya Eyacuiñajji gracias apoquiacuetii pea-ai. 3Ecuanajo pea-ai mimipoquicue Eyacuiñajjinijje Emeshimeseneija ecuana epoquimeesahuajjijo peacuana sohuihuohuiquiya. Jiquio ecua esecuejjani ca'apejocani jamaya ecuana pea meshiyasijje poquijjijo mimipoquicue. Eyacuiñajjija esohui queapame Quitojo, ma onaja shajja-ajjajjimanei poani esohui, ecuaa huohuiquisa-aña cuana. Ma esohuijoya eya jiquiojo jjeya ejeanobia ani. 4Mimipea-aicue ejo ecuea Eyacuiñajjija esohui queapame Quitojo peajaajjicuana queaja'anee ehuohuiquijjijo. Ecuea jamaya huohuiquicajji cuana.

5Queasapaja'a oe ba'epoquicue joya Jesosaja epeejji pojjeamacuananijje pea-ai. A'a jamatii mimijjima onijje ba'epoquijji, esohuijo oe mimipoquicue onijje ojjaña pojjajo. 6Esohui e'ejojonei queapame acapoquijji quianaja peacuana queabihui pojji majoya. Ohua miya Eyacuiñajjija esohuijo huohuiajjacajje yajja saja-ama aje queaja'a o huohuijjijo jjashahuabaquicue quiana.

Pablohua tehuecapoa esohui oe-ejjenei ehuohuijji

7Eseja dohue queajeanee Tiquicohua jiquio enijje queahuiso Emeshimeseneijo chacochacopoquipea-aianiya achajja eya jiquiojo ani miquianajaya ebajji ohuaya esohui dojocaje. 8Jamajjeya eyaya oya huoojeaje miquianaque ecuana queapame jiquiojo ani miquianaya majoya queabihui epojji ecuanajo. 9Pea eseja dohue queajea Onésimo poquipea-aije onijje. Oya Eyacuiñajjijo queaja'atii ba'epoquiani, oya miquiananijje ejjachichaquipoquipea-aiya miquianaja meshijo ba'e. Ma becaa Jesosaja epeejjiya ecuanajo esohui huohuicañaquije miquianaque.

10Aristarcohua jiquio enijje ejeanobiapea-ai aniya esohui miquiana queabihui pojji huoojeacani. Marcos pea-aiya Bernabeja pea pojjeamaa esohui queapame huoojeapea-aicani miquianaque. Miquianajaya eba Marcos miquianaja meshiyasijje poquiajo queabihuiya oya ja'ajjequicue quiaa. 11Jiquio meshijo nequi dejja Jesosaa, bajjani pea Justohua, esohui queapame huoojeapea-aicani miquianaque. Mahuisoneiya jiquiojo ani tres judío dejjacuana enijje chacochacopoquiani esohui Eyacuiñajjiya ojjañacuana huoojeacapoquianitii huohuijjijo. Oya esohui queapame Quitojo ejjashahuabaqui'yo. Eya queahuisonee asahuacanaje ma dejjacuaaya. 12Pea dejja Epafras bajjaniya esohui queapame huoojeapea-aicani, oya Jesosa Quitojo chacochacomajamajapoquiani. Epafras miquiananijje ejjachichaquipoqui miquianaja meshijo pea-ai ba'e, queahuiso mimipoquiani Eyacuiñajjinijje ojaya quiana queaca'a enequimeepoquiajjijo. Miquiana Eyacuiñajjija echacojji yajjijo jjaquiaquipoquijjijo pea-ai oya mimipoquiani onijje. 13Ecuea eba Epafras queahuiso miquianajo jjashahuabaquipoquianitii achajja quiana ba'e. Oya queahuiso mimipoquiani pea-ai majoya miquiana queaja'a eba'epoquijjijo Eyacuiñajjija esohui jayojja. Miquianajoneitii pojjeama oya jjashahuabaquipoquiani, Laodicea meshijo ba'ecacuanajo, Hierápolis meshijo ba'ecacuanajo pea-ai oya mimipoquiani Eyacuiñajjinijje. 14Lucas eshicuijjibajji ecuanaja queajea poaniya esohui queapame huoojeapea-aicani miquianaque, Demas bajjani pea-aiya.

15Jesosaja epeejjicuana Laodicea meshijo ba'eca esohui queapame acue ecuanajo. Ninfa, ma oja equijo jjachichaquipoquiani huisotii Jesosaja epeejjicuana pea-ai esohui queapame apea-aicue ecuanajo. 16Jiquio esohui papenijo eya miquianaque tehuenaje bajeyomajje huoojeacue ma Laodicea meshijo ba'eca Jesosaja epeejji jjachichaquipoquianicuanaja ebapea-aijji. Majoya Laodicea meshijo ba'eca Jesosaja epeejjicuaa ecue tehue bajeyomajje huoojeacaje'yo miquianajaya ebao'oyajji. 17Jesosaja epeejji Arquipo bajjani jama aquicue oya ba'a: “Emeshimeseneija quia miquea echacojji queapame oe ajeyo'yocue.”

18Eyaya Pablohua ecue emeneiya jiquio esohui miquianaque oe eajji tehueaña. A'a pajeajji eya etiicuanaja jeanobiamee ani Eyacuiñajjija esohuijo. Eyacuiñajjiya quiana queapamenee ca-acapoquiahuatii ojayanei ejjashahuabaquijjijo.

Currently Selected:

COLOSENSES 4: ESE

Highlight

Compare

Copy