COLOSENSES 1

Ebionei esohui queapame acapoa Pablohua

1Eya Pablo Jesosa Quitoja huoojea ona sohuihuohuiquinequijji poani Eyacuiñajjija ejjashahuabaquijjijo oja babaca. Eya jiquiojo ani eseja dohue Jesosaja epeejji Timoteonijje. 2Eyaya jiquio esohui tehueaña miquianajaya eseja dohuecuana, jjo'icuana Quitoja'yo poanija ebajji. Miquianaya ciudad Colosas meshijo ba'eca jjachichaquipoquiani ojaya esohuijo. E'e, queaja'a quiana ba'epoquiani oja esohui jamaya. Eyacuiñajji eseja Chii-aiya miquianaya queapamenee ca-acapoquiahuatii ojayanei ejjashahuabaquijjijo, queaquijijjijajinee capomeecahua quiana pea-ai ohuaya.

3Ecuaa queahuiso onijje mimipoquianiya Eyacuiñajji gracias amajamajaña miquianajo. Oya eseja Emeshimesenei Jesosa Quitoja Chii poani. 4Miquianaya e'ejojonei Jesosa Quitojo queaja'a jjashahuabaquipoquianitii shajja-ajjamajje ecuaa Eyacuiñajji bihuiaña. Ojjaña Jesosaja epeejjicuana queajea apoquiaña ecuaa shajja-ajjapea-ainaje. 5Jamaya quiana queaja'a ba'epoquiani ma quijje Eyacuiñajjiya quiana quiacaje ejjeshejjijo jjaishoaquipoquianijjejojoya. Oja esohui queapame Quitojo e'ejojonei poani bamajje queabihui jjaishoaquitiipoquiani quiana oja quiacuanajo Eyajo ani ejjeshejeyojji. 6Jiquio Eyacuiñajjija esohui queapame Quitojo miquianaja eshajja-ajja, maya queahuisocuaa ojjaña meshiyasijje ba'ecaa shajja-ajjapea-aicani. Ma esohuijo jjashahuabaqui'yaniyacuana Eyacuiñajjiya queapame acapoquiani. Jamajjeya queahuisocuana tiipoquiani oja esohuijo acuicuana tiimajje queajjajjahuiso poani jama. Miquianaya pea-ai oja esohui e'ejojonei poani shajja-ajjacoomajje jjashahuabaqui'yapoa e'ejojonei Eyacuiñajjiya quiana queapamenee acapoquijetii ojayanei ejjashahuabaquijjijo. E'ejojonei jamaya poani oja esohui miquiaaya bapoa. 7Epafras bajjaniya, jiquio eseya queajea aña Jesosaja epeejjiya, miquiana oya esohuiya queapame huohuicanaje. Oya ecuananijje chacochacopoquipea-aiani queapamenee Quitojo miquiana queaja'a ba'emeesahuajji. 8Ohuaya esohui miquianaja eba'ejjijo yecanaje. Edojjoshahuapameya quiana queajeanee ameesahuacapoquiani miquiananijje ba'ecacuana ohuaya huohuicaña'yonaje.

9Jamajjeya ecuana Eyacuiñajjinijje mimipajeajjimatii popoquiani esohui miquianaja eba'ejjijo shajja-ajjacoomajje. Ecuana mimipoquiani onijje miquianaja ebaneijjijo Eyacuiñajjiya quiana ba'emeesahuasa-acani queaja'a. Eyacuiñajjija esohui miquianaja queaja'anee ebajjijo ecuana mimipea-aipoquiani. 10Jamaya miquianaja queaja'a poani bamajjeya queapamenee ba'epoquije mimishiama Emeshimeseneija'yo poanijjejojoya. Cua Eyacuiñajjiya miquiana ameesa-acani huisotii echacojji ajeyopoquiaje quiaa ojaya ejjashahuabaquijjicuana jama. Miquianaya jama poaje bamajje Eyacuiñajji queabihui poaje. Queajjajjahuiso jayojja quiana ohuaya pomeecaje. Eyacuiñajji queaca'aneetii nequiani queaja'a quiaa oya bapoquiaje jama jjashahuabaquime pomajje. 11Eyacuiñajji queaca'aneetii nequipoquiani. Jamajjeya ecuana mimipoquipea-aiani onijje ojaya miquiana queaca'a etiimeepoquiajjijo oya queaca'aneetii nequipoquianijojoya. Majoya miquiana queacamajanee queanee pea-ai pomeejjicuana poeyajo Eyacuiñajjija esohui cajaa eanana'yojji pojjeama poaje. Chojja, ohuaya quiana queaca'a nequimeesahuacajetii queabihui. 12Dejjacuaa queacamajanee acajje jamatii miquiaaya queabihuiya Eyacuiñajji Echii-ai gracias apoquiajetii. Ohuaya quiana queapame miquianaja mimishima'yo acanaje onijje eba'etiitii'yojji ma ohua huoojeacapoquianitii meshi queasajajaneeyasijje. Cuamaya ojjaña ojaya'yo poanicuaa Eyacuiñajjija quia queapamecuana jjeshejeyocaje. 13Eyacuiñajjiya eseya nahueca'yonaje ebionei eshahua Satanás queaca'a poanijo oya e-esemesetii epo poanijje. Oya quea-aapo jayojjatii popoquiani. Jjeya se ca quea-aapo jayojjatii pojjeama ba'epoqui'yani Eyacuiñajjija Bacuaejja queajeajo jjanahuemeequi'yomajje. Jjeya oya e-esemese po'yonaje. 14Eyacuiñajjiya eseya jjesheca'yonaje oja Bacuaejjajo jjashahuabaqui'yajo, eshahuajatii epo'yojji pojjeama. Ojjaña eseja mimishicuana ohuaya cuijeaca'yonaje, chama'yo acanaje.

Eyacuiñajji Jesosa Quitojo esenijje jjabeiqui'yonaje jamatii pojjeama

15Eyacuiñajji eseja ecojjajo jjabameequiajjatii poani. Jamajjeya Quitohua eseya queaja'a bameecani achajja Eyacuiñajji nequipoquiani oya oja Bacuaejja poaniyajjejojo. Quito ca epana pojjeama, ma oyametii poani. 16Eyacuiñajjiya Quito ojjañacuana jiquio meshijo eanijji, eba'ejji, enequijji pea-ai panameecapoa ojee onijje pea-aiya. Joya ecojjajo jjabameequijjicuana, joya ecojjajo jjabameequiajjacuana pea-ai ohuaya panameecapoa. Angelcuana, eshahuamasecuana joya eyajo queaca'a nequiani peacuana huoojeajji poani pea-ai Eyacuiñajjiya Quito panameecapoa ojee onijje pea-aiya. Ojjañatii Quito bihuiapoquiajji epojji Eyacuiñajjiya panameecapoa cuana. 17Quito eanitiiapoa ojjaña aquianacuana chamahuajo. Ojjaña oja panacuana queapamenee nequipoquiani oja esohuijo, jamatii pojjeama. 18Quito ojjaña Eyacuiñajjija epeejjicuana jjachichaquipoquianija sapa jayojja poani. E'e, ojjaña oja epeejjicuana Quitoja eyami jayojja poani. Quito ebionei Eyacuiñajjija Bacuaejja poani. Eyacuiñajjiya Quito ebionei shequimeeca'yapoa, jamajjeya oya ebionei ojjañacuana huoojeapoquiajji epojji nequimeecapoa. 19Eyacuiñajjiya queabihuineeya ojayanei ejjashahuabaquijjijo oja Bacuaejja Quito pomeecapoa o jayojja pea-ai enequipoquijji. Jamajjeya Quitohua ojjaña bajeyojeyocapoquiani, Eyacuiñajjija ejjashahuabaquijjicuana ojaya ebajeyojeyo. 20Eyacuiñajji jjashahuabaquiapoa Quitojo, Quitohua ojjaña oja panacuana eyajo nequica, jiquio meshijo ba'ecacuana pea-ai queapame pomeecaje'yo onijje eani'yojji. Eyacuiñajjiya oja Bacuaejja acui ecuiata'apeejo ba'e oja na' cuayaquije'yo bamajje ojjaña oja panacuana queapame onijje eani'yojji pomeecapoa.

21Bacue, miquianaya yahuajo quea-Eyacuiñajjihueshatii ba'epoquiapoa. O sapo-ajjanei quiana ebionei ba'epoquiapoa miquianaja sapadojjojje queamimishitii jjashahuabaquipoquiapoajjejojoya. 22E'ejojonei Eyacuiñajji oja Bacuaejja oja yamineijo mano'yapoa bamajje oya jjabeiqui'yapoa miquiananijje. Jjeya quiana ca ojaya'yo, miquianaja mimishima'yo, queanee epomee'yojji pojjeama pea-ai bacani quiana ohuaya. Jamaya Eyacuiñajjiya quiana bacapoquianitii, quijje o ani cojjaneijo enequimeejji pea-ai jamaya bacaje. 23Jamajjeya quiana oe oja esohuijotii queaja'a jjashahuabaquipoquicue queaca'a ojo eba'epoquijji. A'a peaja esohuijo ejjanahuemeequi'yojji jjaishoaqui'yojji. Ma miquiaaya shajja-ajjanaje esohuijotiiya oe jjashahuabaquipoquicuetii. A'a oe Eyacuiñajjija esohui queapame cajaa a'yojji quiaa. Queameshihuisocuanahuasijje jiquio esohui queapame Quitojo ehuohuiqui cuanaja. Jiquio Eyacuiñajjija esohui queapame Quitojo ehuohuiquijji eya majoya chacochacomajamajapoquiani.

Eyacuiñajjiya Pablo oja epeejjicuana ejjachichaquipoqui anica queaca'a nequimeepoquiajji epojji pomeecapoa

24Jjeya eya queabihuitii poani jamatii miquiana sohuihuohuijji poanijojoya queacamajanee pomeecani cuaa. Eyacuiñajji ejo jama sapoanijo eya apoa epo queanee epopea-aijji oja esohuijo ma ecua Quito queaneenee pomeecapoa cuaa jama pea-aiya eya acaje cuaa. Jamajjeya eya ecuea eyamineijo jjeya queanee pomeecani cuaa oja epeejjicuana ejjachichaquipoqui eya sohuihuohuiañajojoya. 25Majoya Eyacuiñajjiya eya babacacapoa oja echacojji eapoquiajji. Jamajjeya eyaya oja esohui huohuipoquiaje miquianaja queaja'a ebaneijji. 26Yahuajonei Eyacuiñajjija ejjashahuabaquijji pea etiiquianacuanaja ebajji ojaya huohuimeejjimanei poa. Ojjañacuanaja maya bajjimanei poa ebionei. Jjeya se ca oja ejjashahuabaquijji ohuaya bameesahuacani joya ojaya'yo poanicuanaja queaja'a ebajji. 27Eyacuiñajjiya oja epeejjicuana achepamenee ojaya ejjashahuabaquijji poani bameesa-acani cuana ma yahuajo pea etiiquianacuanaja bajjimanei poa oja ejjashahuabaquijji. Jjeya ca ojjaña meshijo ba'ecacuanaja oja ejjashahuabaquijji queaja'a bacajji. Oja ejjashahuabaquijji jama poani ba'a: Quito miquianaja judío pojjeamacuanaja eyamidojjojo nequipoquipea-aije. Jamajjeya Quitohua quiana Eyacuiñajji queaca'aneetii queasajajanee poaniyasijje nequimeecaje'yo ma miquianaya queabihui jjaishoaquipoquiani meshiyasijje epoqui'yojji quijje.

28Jamajjeya ecuaa esohui Quitojo queahuisoneecuana huohuipoquiaña. Achajja queaja'a eba'epoquijji oja esohui jayojja ecuaa queahuiso sohuihuohuiaña, ae aca-ajja niñesheaña pea-ai. Jamaya ecuana chacochacopoquiani Jesosaja epeejjicuana queaca'a mimishiama etii ejjaca'aqui o cojjaneijo enequi'yojji quijje. 29Jamajjeya eya hueya-amanei queacamajanee pea-ai chacochacomajamajapoquiani miquiana queaca'a tiipoquijjijo ojo. Quitohua ecuea eyamijo nequiya eya queaca'a pomeecani peacuana sohuihuohuiquijji epojji, eyanei queaca'a poanijo pojjeama.

Currently Selected:

COLOSENSES 1: ESE

Highlight

Compare

Copy