FILIPENSES 4

1Jesosaja epeejji ecue dohuecuana jjo'icuana, ecuea quiana queajeanee. Eyaya quiana baquio'oyasaneiaña. Eya queabihuinee poani miquianajo. Eya peacuananijje queabihui mimiani miquiana queaja'a ba'epoquiani shajja-ajjamajje. Jamajjeya quiana Emeshimeseneijo queaca'atii ba'epoquicue.

2Jesosaja epeejji ecue jjo'i Evodia bajjani, Síntique pea-ai eyaya quiana huohuineiaña oya jayojja jjashahuabaquime pea-ai epojji Emeshimeseneijo. 3Ecuea epeejji enijje chacochaconaje hueya-ama eyaya miya huohuiaña ma beca eponajo Jesosaja epeejji oya ejjabeimeequi'yojji. Ma beca epona hueya-ama enijjetii chacochaconaje Eyacuiñajjija esohui queapame Quitojo ehuohuisahuajji. Oya chacochacopea-ainaje Eyacuiñajjija esohuijo Clemente bajjaninijje ma peacuana enijje chacochaconajenijje pea-ai. Ojjaña macuanajaya oja bajjani etehue jaa Eyahuasijje eba'etiitiipoqui'yojji.

4Emeshimeseneijo queabihuinee pocue. Oya esohuiya quiana huohuio'oyaña, Emeshimeseneijo queabihuinee pocue. 5Peacuana miquiananijje ba'eca o asahuajji epojjijo jjashahuabaquicue queabihui. E'e, Emeshimesenei o poeo'oyajji epojja poechipi'yani.

6A'a oe queayenotii queamete jjashahuabaquipoquijji ma quijje acajejo. Eyacuiñajjinijje ca oe mimicapoquijji ojjañajo oja miquiana easahuapoquiajjijo. Onijje mimianiya oya gracias apea-aicue. 7Ma miquiana queayeno pomeejji poanijo onijje mimiajo ohuaya quiana queaquijijjijajinee pomeecaje. E'ejojonei Eyacuiñajjiya miquiana jaahuanacapoquije queaquijijjimete epo poanijje, queasapadojjomete epo poanijje pea-ai miquiana Jesosa Quitoja'yo poanijojoya. Esenijje dejjaja ca bajjimanei poani achajja Eyacuiñajjiya queaquijijjijaji pomeecani oja epeejjicuana.

8Jesosaja epeejji ecue dohuecuana jjo'icuana, jiquio ecuea esohui oe-ejjenei. Ojjaña joya e'ejojonei poanijo oe jjashahuabaquipoquicue. Joya queahuisocuaa esohui queapame acanijo jjashahuabaquipoquicue. Joya queapamenee mimishiamajo, joya queajeanee ameejji poanijo, joya Eyacuiñajjiya queapame bacanijo, joya queahuisocuana queapame mimianijo pea-ai jjashahuabaquipoquicue. Ojjaña joya queapame poanijo Eyacuiñajji bihuiajji jjashahuabaquipoquicue pea-ai.

9Ma eya miquiana huohuipoquianaje esohui jayojja ba'epoquicuetii. Achajja ba'ecapoquijji esohui ecue huohui shahuabatiipoquiacue. Achajja eya ba'epoquiani banaje quiaa, oya jayojja ba'epoquicue e jama poani bamajje. Miquianaya jama popea-aijo ma queaquijijjijajinee pomeejji poani Eyacuiñajji miquiananijjetii nequipoquije.

Pablohua gracias acapoa onaja quia Eyacuiñajjija echacojji yajji yahuajo oja jjeshejo

10Emeshimeseneiya eya queabihuinee pomeecani miquianaya e bejjo quiajjijo jjashahuabaquio'oyani shajja-ajjamajje. Ecuea ebatii poani miquianajaya eya pajeajjima poanaje. Miquianaja ca queacamajanee poanaje e asahuajji bejjo ehuoojeajji. 11Eya jama mimime poani miquiananijje eya aquianamajo pojjeama queayeno poani. Eya ca iña jjabahuejjaquinaje queabihui eba'epoquijji ma Eyacuiñajjiya eya quiacani huisotiijo. 12Ecuea eba aquianama' eba'ejjijo, quea-aquianahuiso pea-ai epojjijo. E'e, eya ca iña jjabahuejjaquinaje queabihui eba'epoquijji jamatii aema' ba'epoquiani, quea-aquianahuiso popoquiani pea-ai. Oya jayojja pea-ai queashoenee ba'epoquiani queajejje pea-ai eya queabihuitii ba'epoquiani. 13E queacamajanee pojjicuana poeajo Quitohua eya queaca'atii nequimeecani queaja'a eba'epoquijji. 14Jamaya Quitohua eya nequimeecapoquiani jamatii eya queabihui poanaje miquiaaya eya asahuanaje queacamajanee ani shajja-ajjamajje.

15Miquianaja Filipos meshijo ba'ecaja eba eya provincia Macedonia meshijo nequi Eyacuiñajjija esohui queapame Quitojo peacuana huohuiquiya poquiajo, miquiaayanei eya poquimeesahuanaje. Pea Jesosaja epeejjicuanaja ca eya jama ajjima' poanaje. 16E Tesalónica meshijo nequijo miquiaaya bejjo huoojeanaje ecuea bobi jjeshejji. Oe huoojeame pojjeama anaje quiaa, bejjo huoojeao'oyanaje e asahuajji. 17Bacue, eya bejjojonei pojjeama jjashahuabaquiani. Eyacuiñajjija quia queapame Eyajo ani miquianaja quijje ejjeshejjijo ca jjashahuabaquiani miquiaaya peacuana asahuapoquianaje sosejje. 18Miquianaja huoojea bejjo Epafroditoja ye ejjeshe. Queahuiso poanaje, jamajjeya eya queacamaja pojjima' poanaje bobijo, yani esejja. Miquianaja huoojea e asahuajji jiquio ecua dejjaa ehuone enaa jehui'yo Eyacuiñajji quiacani jama. Eyacuiñajjiya miquianaja quia queapame bacani queashiyepame ba'esohuaquiani jama. 19Jamajjeya ecuea Eyacuiñajjiya cua miquiaaya sañahuiso eba'epoquijji quiacapoquije ojayanei ejjashahuabaquijjijo. Eyacuiñajji eojjaña-aquianamese poani. Jamajjeya miquianaya Jesosa Quitoja'yo poanijojoya ojjaña quiacapoquije ohuaya. 20Eseja Eyacuiñajji ejjabihuiatiiquipoqui. Oya eseja Chii-ai poani. Jamaya capoahua.

Pablohua oe-ejjenei esohui tehuecapoa

21Ojjaña Eyacuiñajjija epeejji Jesosa Quitoja'yo poani miquiana majo ani esohui queapame acue ejo. Jiquio enijje ani Jesosaja epeejjicuaa miquiana queabihui pojji esohui huoojeacani. 22Ojjaña Jesosa Quitoja'yo poanicuana jiquiojo anicaa esohui miquiana queabihui pojji huoojeapea-aicani. Roma emeshimeseja equi-aijo chacochacoanicuana esohui queabihui pojji huoojeapea-aicani cuaa. 23Emeshimesenei Jesosa Quitohua miquiana queapamenee ca-acapoquiahuatii ojayanei ejjashahuabaquijjijo. Mahuiso.

Currently Selected:

FILIPENSES 4: ESE

Highlight

Compare

Copy