2 TIMOTEO 3
3
Quijje oe-ejjenei epojja apoa poajo achajja jiquio meshijo ba'eca pocaje
1Timoteo miquea bacajji quijje oe-ejjenei epojja apoa poechipianijo queacamajaneenee poaje jiquio meshijo queaja'a eba'epoquijji. 2Jama quijje ba'ecaje cuana ba'a: Dejjacuana eponacuana pea-ai queahuiso ojayanei eba'ejjijo jjashahuabaquipoquije, peajo ca jjashahuabaquiajja poaje. Queabejjojeanee ba'ecaje cuana. Oyaneitii queaca'a poani jjabaquicaje, oyatii jjabihuiaquicaje pea-ai. Eyacuiñajjija esohuijo jjaniñebaquicaje. Oja chiija, oja naeja esohuijo shajjama' jayojja pocaje cuana. Eyacuiñajjiya oya asahuacajje jamatii gracias po-ajja. Eyacuiñajjija esohui peajja jayojja acaje cuaa. 3Pea queacamajanee poajo jamatii easahuajji pojjeama poaje cuanaja, oya queajea ebajji pojjeama poaje cuanaja. Queahuiso jjaniñebaquicaje cuana peajo. Queamimishi epojji peanijje cajja eajji pojjeama ba'ecaje. Queahuiso jjacuiaquijji pocaje cuana. Joya queapame poani botiamanei acaje cuaa. 4Queahuisocuana jjapeenishoquicaje peanijje jamatii, e'ejojonei epojji pojjeama. Jamatii mimijeacaje cuana queatainee. Oyaneitii queaca'a poani jjabaquije cuana. Oyanei queabihui pojjijo jjashahuabaquicaje cuana. Eyacuiñajji ca shahuaba'yojjimatii acaje cuaa. 5Queapame ba'e Jesosaja epeejji jayojja poani jjabaquicaje cuana. Jamatii macuanaya e'ejojonei pojjeama poaje siajje ba'ecaje. Eyacuiñajji queaca'aneetiija oya pea jjashahuabaquime queaja'a epomeejji jjapomeequi'yoajja pocaje. A'a oe joya dejjacuana jama queamimishitii ba'epoquianinijje jjapeequijji. 6Jjeya becacuana jamaya queamimishi ba'epoquiani nobiquinaje peacuanaja equiyasijje esohui queaquehuajo mimiya. Ma equicuanajo ani eponacuana ca'a-ama poani dasiacanaje cuaa. Ma eponacuanaya queayeno jjabaquinaje oja mimishijo, jamatii mimishi oja sapajotii nequiya oya queamimishi pomeecanitii. 7Ma eponacuaaya esohuicuana shajja-ajjatiitiicani queaja'a eba'ejji nisho, jamatii Eyacuiñajjija esohui e'ejojonei jama ba'eajja. 8Ma ecua yahuajonei eyamiquecua Jannes bajjaniya, pea Jambres bajjani pea-aiya Moisesja esohui shajja-ajjameejjima a-ajjacapoa jama pea-aiya dejjacuaa quijje Eyacuiñajjija esohui e'ejojonei shajja-ajjameejjima acaje. Esohui siajje caca oe huohuicaje cuaa. Ma dejjacuana Eyacuiñajjija esohui queapame Quitojo jjashahuabaquisapo'yoajjanei poaje, jamajjeya Eyacuiñajjiya oya queapame pojjeama bacaje. 9Ma dejjacuanaja esohui queaquehua ojaya ehuohuipoquiajjitii pojjeama poaje. Ma ecua yahuajonei queahuisocuaa Jannes, Jambres pea-ai sapadojjoma' jayojja mimiani shajja-ajjamajje cajaa acapoa, jama pea-aiya acaje cuaa ma quijje esohuihuohuijjinisho poajecuanaja esohui.
Pablohua esohui Timoteo queaca'atii nequipoquijjijo huohuicapoa
10Bacue Timoteo, miquea eba, eshajja-ajjanei ecue huohui esohuicuana. Miquea eba eya queaja'a ba'epoquiani. Miquea eba pea-ai ajeo eya ba'epoquiani, ejoneitii pojjeama. Eyacuiñajjija echacojji yajjijo ca eya nequipoquiani. Eyacuiñajjija esohuijo eya jjashahuabaquipoquianitii. Eya queaca'atii nequipoquiani jamatii onaa queacamajanee acapoquiani. Eyaya peacuana queajeanee apoquiaña. 11Miquea eba pea-ai yahuajo eya queacamajanee, queanee pea-ai acapoquinaje cuaa esohuijo Antioquía meshijo nequi, Iconio meshijo nequi, Listra meshijo nequi pea-ai. Jamatii majo queacamajanee nequi Emeshimeseneiya eya nahuecapoquinaje dejjamasecuanajo. 12E'ejojonei ojjaña joya Jesosaja epeejjicuana queaja'a ba'epoquitiisapoani ejjaquiaqui Quitojo, comacuanaya queacamaja acapoquije cuaa Eyacuiñajjija esohuijo. 13Oya jayojja joya queamimishi ba'epoquiani cuana quea-ojamimishihuisonee popoquije. Joya siajjepojjicuaa esohui queaquehuanee acapoquijetii. Comaaya queahuiso dasiacapoquije cuana. Oya pea-ai ojayanei esohuijo jjadasiaquipoquije.
14Miya ca oe a'a jama popea-aijji. Queaca'a oe nequipoquicue. Ma miya queaja'a shajja-ajjapoquianaje esohui a'a cajaa a'yojji. Maya miyaya baña e'ejojonei poani. Miquea eba ache huisocuaa miya esohuicuana queapame huohuicapoquinaje. 15A'a jjapajeaqui'yojji miyaya esho'yahuaa Eyacuiñajjija esohui etehue shajja-ajjapoquiapoa. Miya oja esohui shajja-ajjamajje e'ejojonei jjashahuabaqui'yapoa Jesosa Quitojo ejjanahuemeequi'yojji. 16Bacue, ojjañatii Eyacuiñajjija esohuicuana Edojjoshahuapameja quia poani, esenijje dejjaja quia pojjeama. Ojaya esohui etehueya eseya huohuicani achajja queaja'a ba'ecapoquijji. Ae poca-ajja, ae pocajji ohuaya huohuipea-aicani. Ache esohuijo pea eniñesheajji oja esohui jayojja queaja'a eba'ejji huohuipea-aicani Eyacuiñajjija esohui etehueya. 17Majoya Jesosaja epeejji dejjacuana, eponacuana pea-ai apoa epo etiica'a chacochacopoquije queapame Eyacuiñajjijo oja esohui etehue baneimajje.
Currently Selected:
2 TIMOTEO 3: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
