2 TIMOTEO 4
4
Eyacuiñajjijo chacochacocapoquijjitii
1Emeshimesenei Jesosa Quitohua poeo'oyamajje ojjañacuana eshe ba'eca, emano'yocuana pea-ai huohuicaje'yo a'a oya queapame a'a oya queamimishi ba'epoquinaje. Jamaya oya queaca'aneetii poeje o'oya ojjañacuana huoojeapoquiajji epojji. Eyacuiñajjiya, Jesosa Quitohua pea-ai eseya bacaniya eyaya miya huohuineiaña jama echacojji. 2A'a oe Eyacuiñajjija esohui huohuipajea-ajja'yojji. Apoa epotii nequicue ojjaña pojjajo, mecajje pea-ai Eyacuiñajjija esohui peacuana huohuipoquiajji. Queaja'a oe bameecue cuana esohui ohua pea esohui poso shajja-ajjacajo. Jesosaja epeejji ae poca-ajja huohuipea-aicue meteamaa. Niñesheacue cuana queaja'a eba'epoquijjitii oja esohuijo. Quenequenecuajiajja esohui huohuipoquiacue cuana jamatii ma queacamajaneetii nequiya. 3Quijje oe-ejjenei epojja apoa, poechipiajo Eyacuiñajjija esohuinei shajja-ajjatiisapo'yoajja pocaje queahuisocuana. Pea esohuihuohuijjinishocuana queahuiso sa-ajjacaje'yo cuaa ma onaa shajja-ajjasa-acaje esohuihuohuijjinisho poaje dejjacuanaya. 4Jamajjeya quijje queahuisocuaa Eyacuiñajjija esohui e'ejojonei cajaa acaje'yo. Majoya etiiquianaja esohuijo jjashajja-ajjaquisapoaje'yo cuana. 5A'a oe miya pea-ai jama jjashahuabaquime pojji. Queaja'atii ca miña oe jjashahuabaquipoquicue jiquio esohuijotii. Queaca'atii nequipoquicue jamatii queacamajanee acani cuaa esohuijo. Eyacuiñajjija esohui queapame oe huohuipoquiacuetii cuana ma esohuijo ejjanahuemeequi'yojjiya. Ojjaña ma oja echacojji yajjiya Eyacuiñajjiya miya nequimeecanaje, maya queapame apoquiacue.
6Bacue, e mano'yojji epojja beshahuanei apoa, poechipinaje. Jjeya eya quecuameecaje'yo Roma etii poanicuaa Eyacuiñajjija esohuijo. 7Eya jjabaquiani ecuea eba'ejjijo. Eya queapame chacochacopoquianitii Eyacuiñajjijo jamatii onaa queacamajanee acapoquiani. Ecuea cajaa ajjima'nei poanaje ojo echacochacopoquijji. Ma e Eyacuiñajjiya huohuicanaje huisotii ecuea echacojji eyaya ajeyopoquianaje. 8Jamajjeya e ojo queapame chacochacopoquinaje sosejje corona apoa'ya eani ecuea ejjesheñaquijji. Emeshimeseneiya ache queapame ache queamimishi huohui'yojji poaniya eya maya quiacaje epojja ma e quiajji epojja apoa poajo. Eyanei pojjeama ohuaya quiacaje. Ojjaña joya o queajea ajji o poeo'oyajjijo jjaishoaneiquipoquinajecuana quiapea-aicaje ohuaya.
Ae Timoteoja acajji Pablohua tehuecapoa
9E bao'oyaa oe poecuajicue. A'a oe shonoshonojji. 10Bacue, Jesosaja epeejji Demas bajjani enijje nequipajea'yonaje jiquio meshijo ani aquiana queahuiso sapomajje. Jamajjeya oya poqui'yonaje Tesalónica meshiyasijje. Pea Cresente bajjani ca poqui'yonaje provincia Galaciahuasijje. Tito ca Dalmacia meshiyasijje poqui'yonaje. 11Lucas bajjani che oenei enijjetii ani. Jiquiacua poejjimahuaa Marcos ba-ajjaquisocue. Majoya miyaya minijjetii oya ye'yocue ba'yomajje. Ohuaya eya chacosahuacaje. 12Tíquico ca Éfeso meshiyasijje huoojeanaje. 13Ecue jeanana daqui-ao ye'yocue eque poe'yomajje Carpoja equijo ani. Oya Troas meshijo ba'e. Esohui etehuecuana ye'yocue joya ejeejo tehue jaa, a'a pajea'yojji.
14Alejandro baajee dahuajji poani queamasenee poanaje enijje. Emeshimeseneiya o queanee pojji huoojeacaje enijje queamase o poanaje sosejje. 15Jjajaahuananeiquicue oe ma dejjajoya. Jiquio eseya huohuiaña esohui ohuaya cajaanei aca'yani, shajja-ajjameejjima aca'yani cuana jjeya.
16Etii poanicuanaja cojjaneijo e nequiajo ebionei chama'nei poanaje pea queapame emimijji ejo e nahuejji. Ojjañacuaa eya jiñajeaca'yonaje queamete pomajje. Eya Eyacuiñajjinijje mimiani ojaya majo queanee pomeejjima yajjijo. 17Jamatii eya eenei nequi e'ejojonei Emeshimeseneiya eya asahuacanaje. Ohuaya eya queaca'a pomeecanaje majo nequica judío pojjeamacuana sohuihuohuijji. Jamajjeya Eyacuiñajjija esohui meteamaneiya huohuinaje cuana ma esohuijo ejjanahuemeequi'yojjiya. Ma e bajji poanaje dejja etii ibia' queamasenee jayojja poanaje. Coma dejjaaya eya emanomeecaje'yo poso jjabaquinaje. E'ejojonei Eyacuiñajjiya eya nahuecanaje ma dejjajo e emanomeeca'yo poanijje. 18Jamaya Emeshimeseneiya eya nahuecapoquije dejjamasecuanajo. Majoya quijje ohuaya eya nequimeecaje'yo ma ohua ojjañacuana huoojeacapoquianitii meshi Eyahuasijje. Eyacuiñajji bihuiapajeaca-ajja. Oya cabihuiatiitiicapoquiahua cuaa.
Pablohua oe-ejjenei esohui acapoa
19Prisca, Aquila pea-ai esohui queapame acue. Onesíforo, oja huapa pojjeamacuana pea-ai esohui queapame apea-aicue. 20Erasto ca Corinto meshijotii nequi ecue jeanana. Trófimo Mileto meshijo ani eyaya oya queamano ani jeana'yonaje. 21Eque poecuajicue queahuoeneenee she epoe cuahuajo. Eubulohua, Pudenteya, Linohua, Claudiaa pea-ai esohui mi queabihui pojji huoojeacanaje. Ojjaña Jesosaja epeejjicuaa jiquiojo aniya huoojeapea-aicanaje.
22Emeshimesenei Jesosa Quito minijje nequipoquianitii. Eyacuiñajjiya quiana queapameneetii ca'acapoquiahua ojayanei ejjashahuabaquijjijo.
Currently Selected:
2 TIMOTEO 4: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
