2 TIMOTEO 2
2
Joya ecua soldadocuana apoa epotii nequipoquiani jamaya ba'ecapoquijji Jesosa Quitojo echacochacojji
1Timoteo, miya ecue bacuaejjanei jayojja poani. Jesosa Quitojo oe queaca'a jjapomeequicue onijje enequipoquijji. Eyacuiñajjiya miya queapamenee acapoquiani ojayanei ejjashahuabaquijji. 2Eyaya miya esohuicuana queapame huohuipoquianaje queahuisocuana anicajo. Jamajjeya jjeya Jesosaja epeejji joya queaja'a ba'epoquianicuana oya esohuiya huohuipoquiacue ma eya mi huohuipoquianajeya. Majoya quijje mique sohuihuohuicuaa peacuana sohuihuohuipea-aiquicaje oya esohuiya.
3A'a oe Eyacuiñajjijo chacochacopajea'yojji onaa miya eya jayojja queacamajanee acani jjabaquimajje. Queaca'atii oe nequipoquicue Quitojo joya ecua soldadocuana peajaajjicuananijje jjaquecuaquiani queaca'atii nequipoquiani jama pea-aiya pocue. 4Bacue, soldadocuana apoa epo nequi peajaajjinijje ejjaquecuaquijji pea echacojjijo chacochacoajja, bobi jjeshejjijo chacochacoajja. Ache quemo ohuaya equi iyacaje majo jjashahuabaquiajja. Oya caca oe oja etii poanija esohuineijo jjashajja-ajjaquiani oja etii queabihui pojji onijje. Mahuisoneijotiiya oya jjashahuabaquiani. 5Oya jayojjaya pelotaquishijji poanicuana queapame hue'ehue'ecajji joya ecua etehuecuana jaa jamaya. Jama hue'eme mi-amajje copa ojaya eiñajji pojjeamatii poaje. 6Jiquio ca pea esohui ebameesahuajji ba'a: Meshichacojji poanicuaa chacochaconeimajje ebionei oja bana ijjiacoocaje oja chaco sosejje. 7Jjeya oe jiquio esohuicuanajo queaja'a jjashahuabaquicue. Jama poajo Emeshimeseneiya miya queasapaja'a pomeecaje ojo queapame echacochacojji.
8Jesosa Quito oe shahuabapoquiacuetii. Oya emeshimese Davidja osecua poa. Majoya oya emano'yo jaa shequimeeca'yapoa. Jiquio esohui queapame Quitojo ejjanahuemeequi'yojji oya esohuiya eyaya huohuiquiaña cuana. 9Oya esohui queapameya Quitojo eya huohuiquiañajojoya queacamajanee pomeecani cuaa majoya. Eya quibo jeyocanaje cadenaa jeanobiameemajje. Dejja mimishi ejjaquecuaqui jama eya acanaje cuaa oja esohuijoya. Eyacuiñajjija esohui queapame Jesosa Quitojo ca ejeanobiameejji pojjeama. Maya huohuicapoquijetii cuaa. 10Jamajjeya jamatii queacamajanee nequiya oja esohuijo eyaya huohuipoquiajetii cuana queaca'atii nequipoquianiya. Majoya Eyacuiñajjija babacacuana Jesosa Quitojo ejjanahuemeequi'yojji jjashahuabaquicaje'yo eya esohui huohuiajje. Ma oja babacacuanaya quijje poquicaje'yo Eyacuiñajji queaca'aneetii queasajajanee nequiyasijje onijje ba'etiitii'yohua.
11Jiquio esohui e'ejojonei poani jama ba'a:
“Yahuajo eseya Quitonijjetii mano'yapoa.
Jamajjeya eseya onijje pea-ai ba'etiitiipoquije'yo.
12Eseya queaca'atii nequipoquiajo jamatii queacamajanee acani cuaa oja esohuijo
quijje Eyacuiñajjiya eseya nequimeecaje onijje queaca'a ojjañacuana huoojeapoquiajjitii epojji.
Eseya o sapo'yoajjatii poajo, cajaa po'yajo, ca ohuaya eseya quijje jama acaje ba'a:
‘Miya ecuea pojjeamatii ba'epoquinaje.’
13Jamatii ese oja esohuijo jjashajja-ajjaqui'yoajja poajo, cajaa po'yajo,
Eyacuiñajjiya ma ohua yahuajo huohuicapoa huisotii esohui ajeyocapoquije.
Ojaya ejjashahuabaquijjicuana pea ea'yojjitii pojjeama poaje.”
Jamaya poani oja esohui etehue jaa.
Eyacuiñajjijo queapametii chacochacocapoquijji apoa epo etiica'a nequi
14Jiquio esohui huohuipoquiacuetii Jesosaja epeejjicuana. Eyacuiñajjiya comacuanaya bacapoquianitii jamajjeya esohui queapamepishanajo mimijajica-ajja, quenequeneca-ajja pea-ai. Jama pomajje Jesosaja epeejjicuana queapame pojjeama ba'eje. Coma esohui queapamepishana shajja-ajjajji poajecuanaya Eyacuiñajjijo echacochacojji pojjeamatii poaje. 15Miya ca oe queaca'atii ba'epoquisapocue Eyacuiñajjija ebajji miya apoa epo queapame ojo echacochacopoquijji. Eyacuiñajjija esohui ebionei queaja'a baneicajji peacuana huohuiquijji bichoamaneiya. ¿Ajeo queabicho epojji oja esohui baneimajje, oja esohuijo queaca'a ba'epoquisapomajje pea-ai? Ajeopishana. 16Joya ecua Eyacuiñajjima'cuana jamatii mimijeani a'a oe jama pea-aiya mimijji. Jesosaja epeejji joya jama mimime poanicuana queamimishi popoquije, o shajja-ajjajji poajecuana pea-ai. 17Bacue, onaja esohui queaquehuacuana jiquio ecua emanomeejjicuaa ijjiacapoquiani jama pea-ai poani. Ma oja esohui queaquehua shajja-ajjajji poanajecuana joya ecua dejja emanomeejjijo manopoqui'yani jamaya poani. Jama queaquehua huohuime aca'yani Himeneo bajjani dejjaa, Filetohua pea-ai. 18Ohuaya esohui huohuitaicani cuana jama ba'a: “Eyacuiñajjiya becacuana shequimeeca'yonaje. Oja eyami caca oe eshequi'yojjitii pojjeama o mano'yajo.” Jama huohuitaimeya acani cuana. Beca Jesosaja epeejjicuana ohua jama acajje queaquehuanee jjashahuabaquio'oyani Eyacuiñajjija esohuijo. 19Joya e'ejojonei Eyacuiñajjija'yo poanicuana ca queaquehuatii ejjashahuabaqui'yojji pojjeama ba'epoquije oja esohuijo. Jiquio ecua equi iyajji ebionei mei queaquemo nequiacoocani cuaa jamaya oja epeejjicuana e'ejojonei queaca'a ba'epoquije. Comacuanaya Eyacuiñajjiya bacani ojaya'yo oja jeasii jayojja. Oya jama poani ba'a: “Eyacuiñajjija ebatii ache e'ejojonei ojaya'yo poani.” Oya jama pea-ai poani ba'a: “Ojjaña joya ja'anei Jesosa Quito eomese poani ajji, comacuanajaya oja mimishi cajaa aneica'yojji.”
20Bacue, oe equi queaquemojo aquianacuana queanahuenee oro oopana, meioshe oopana pojjeama ani, ecuiahua. Joya queapamepishana aquianacuana eani pea-ai meshimisi edahuaca'a, acui equecua pea-ai. Jamajjeya joya queapamenee ani queanahue bacani cuaa oe mecajje iyacajji fiesta yajjijo. Pea aquiana ca joya queapamepishana ani nahueama bacani cuaa ojjaña pojjajo acapoquijji. 21Oya jayojja eseya Jesosaja epeejjicuana queaboejea mimishiama oque jjaquiaquicajji. Jama pomajje jiquio ecua aquiana queanahue bacani cuaa jama pea-aiya eseya poaje. Majoya Eyacuiñajjiya eseya nequimeecaje queapame ojo echacochacopoquijji. Jamajjeya eseya jjajaahuananeiquicapoquijji Eyacuiñajjija echacojji eapoquiajji cua ohua ese chacomeesa-acaje huisotiicuanajo.
22Timoteo, jamajjeya oe joya ecua dejjasho'icuana shacuima' nequi queamimishi epojjijo peanijje jjashahuabaquianitii, jama pea-aiya a'a pojji. Coma mimishicuana cajaa acue, queahuesha nequicue. Queaca'a oe pocue queaja'atii eba'epoquijji mimishiama. A'a oe Eyacuiñajjija esohuijo jjashahuabapajeaqui'yojji. Peacuanaya minijje ba'eca queajea apoquiacue. Queaquijijjijajinee ba'epoquicue. Jamaya pocue ojjaña joya queaquijijjibojea ja'anei Jesosa Quitoja bajjanijo mimipoquianicuananijje oja mimishi cuijeaca'yonajejojoya. 23A'a esohui queapamepishanajo peacuananijje jjamimicuiajeanobiajeaquijji. Jama pomajje mimijajiani cuana. Jama epojji quiana ca queasapaja'a pojjeama poani. 24Jesosaja epeejjicuana joya Emeshimeseneijo chacochacopoquianitii peanijje mimijajica-ajja. Oya ca queapame ba'ecapoquijji ojjañacuananijje. Oya quenequenecuajica-ajja. Eyacuiñajjija esohui ojaya baneicajji queaja'a peacuana huohuijji. 25Joya queaquehua'yo shajjama' jayojja po'yanicuana ojaya jjapashineijje niñesheaca'yojji. Jama niñesheame aca'yajje pojja'a Eyacuiñajjiya oya pea jjashahuabaquime pomeecaje'yo oja mimishijo queaja'a eba'eo'oyajji, Eyacuiñajjija esohui queaja'a ebaneijji pea-ai. 26Jama huohuimeya oya aca'yojji o queaja'a jjabaqui'yojji edosiquiaa oya dasiacanaje queamimishi epo-o'oyajji. Oya jjeya ejeyo jayojja ani o'oya edosiquianaja. Cua edosiquiaa o ameesa-acani queamimishi epojji coma dejjaa acanaje.
Currently Selected:
2 TIMOTEO 2: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
