2 CORINTIOS 9
9
Esenijje Jesosaja epeejjicuana asahuacajji bejjo Eyacuiñajjija echacojjijo quiamajje
1Miquianajaya chicha bejjocuanajo Jesosaja epeejjicuana aema'nei Jerusalén meshijo ba'eca asahuajji ecuea etehuetiijji pojjeama poaje. 2Ecuea ebanei miquianaya bejjo quiasaneipoani Eyacuiñajjija echacojji yajji majo ba'eca asahuajji. Eya queabihui mimianitii Macedonia meshijo ba'ecacuananijje miquianajo jama ba'a: “Yahuajo pea shequiajajo Acaya meshijo ba'ecacuana apoatii epo poanaje Jerusalén meshijo ba'eca asahuajji epojji” jamaya eya poanaje miquianajo. Miquianaya macuiñajjicuana asahuaneisapoani shajja-ajjamajje queahuiso Macedonia meshijo ba'ecacuana asahuapea-aisapoanaje. 3Jjeya jiquio enijje nequi tres dejjacuana eyaya huoojeaña ma eya queabihuinee miquianajo miminaje esohui peacuananijje eya siajje poani peacuaa ebaca poanijje. Eya jamaya poanaje miquiaaya bejjo queahuiso chichaña Jesosaja epeejjicuana asahuajji. Jamajjeya bejjo apoa acue, chichajeyo'yocue ehuoojeajji. 4E'e pojja'a becacuana Macedonia meshijo ba'eca Jesosaja epeejji enijjetii miquianaque poquipea-aisapoaje. Majoya quiana apoa pojjima' ani bejjo huoojeajji bañaquimajje ecuana queabicho poñaquije bejjo miquianaja chichajeyojjimajo. Miquianaya pea-ai queabicho poaje eya e'ejojonei bejjo echichajjijo miminajejojoya. 5Eya jama baquisapo-ajja miquianaya apoa pojjima' ani bejjo huoojeajji. Jamajjeya eya jjashahuabaquinaje ebionei eyaya huoojeaje jiquio enijje nequi tres Jesosaja epeejjicuana miquiana baa. Jiquio poquijecuaa miquianaja quia bejjo chichameesahuacaje ma miquiaaya huohuinaje huisotii quiaje. Jamaya miquianaja quia apoa poaje ecuana cocuama poquijjimahuajo. Majoya queabihuineeya bejjo chichanaje quiaa bacaje cuaa, peaa chichameecuajicanijo pojjeama. Miquianajaya chicha bejjo apoa ajjimajo ca miquiana queabejjonahue poani bacachana cuaa.
Bejjo nahueca-ajja Eyacuiñajjija echacojjijo equiajji
6Jiquio esohui shahuabacuetii jama ba'a: “Joya eso' oepojji quecuacani, quijje oepojji pea-ai sejjacaje'yo. Joya eso' queahuisonee quecuacani ca, quijje queahuisonee pea-ai sejjacaje'yo.” 7Jesosaja epeejjicuanaja oja bejjo quiacapoquijji Eyacuiñajjija echacojji yajji ma oya ebionei jjashahuabaquinaje huisotiiya equiajjijo. Queayenohua peaja esohuijo pea-ai ojaya bejjo quiaca-ajja. Eyacuiñajjiya queajeaneeya bacani joya queabihuinee oja bejjo quiajji poanicuana oja echacojji yajjijo. 8Eyacuiñajjiya miquiana queabihui pojji quiacapoquije queahuisonee oya jama sapomajje. Majoya miquianaya queabihui ba'epoquije oja quiacuanajo, aema' pojjeama. Eyacuiñajjiya jama pomeecajje miquiaaya pea minijje ba'ecacuana asahuaje. 9Eyacuiñajjija esohui yahuajonei etehue jaa jama poani ba'a:
“Joya queapame ba'epoquianiya aema'cuana asahuacani queahuiso.
Ohua peacuana queapame asahuacanijo
Eyacuiñajjiya joya pea asahuajji poanicuana shahuabacapoquianitii queabihuiya.”
10Bacue, Eyacuiñajjiya eso' equecuajji quiacani joya meshichacojji poanicuanaja yajji. Ohuaya bobi quiacani pea-ai ojjañaja eijjiajji. Jamajjeya Eyacuiñajjiya quiana quiajeyocaje cua miquiaaya sañahuisotii queabihui eba'epoquijji, peacuana asahuapoquiajji pea-ai. Majoya miquiaaya queaja'anee ba'epoquianiya queahuisocuana asahuapoquiaje. 11Jamaya Eyacuiñajjiya quiana queabobihuiso pomeecaje queabejjohuiso jjeshemeesahuacaje peacuana miquianaja meshijo ba'eca aema'cuana asahuapoquiajji queabihuinee. Miquianajaya chicha bejjo ma ecuaa jeaquije shajja-ajjamajje queahuiso Jesosaja epeejjicuaa ma pea meshijo ba'ecacuaaya Eyacuiñajji bihuiacaje. 12E'ejojonei miquianajaya chicha bejjohua ma ecuaa jeaquijeya aema'nei ba'eca Jesosaja epeejjicuanaja eijjiajji bobi jjeshecaje. Majoneitii pojjeama. Miquiaaya bejjo queahuiso quiaña bamajje Eyacuiñajji bihuiamajamajacaje macuiñajjicuaaya. 13E'ejojonei ma meshijo ba'eca Jesosaja epeejjicuaa Eyacuiñajji bihuiamajamajacaje. Miquiaaya bejjo queahuisonee quiaña Jesosaja epeejjicuana aema' asahuajji shajja-ajjamajje miquianaya e'ejojonei queapame ba'epoquiani Eyacuiñajjija esohui jayojja bacaje cuaa, siajje poani pojjeama. Eyacuiñajjija esohui queapame Quitojo jayojja quiana ba'epoquiani bapea-aicaje cuaa. 14Miquianajaya chicha bejjo quijje jjeshemajje ma meshijo ba'eca Jesosaja epeejjicuana queahuiso mimipoquije miquianajo Eyacuiñajjinijje queamiquianajea jjabaquimajje. Jamaya mimipoquije miquianajo Eyacuiñajjiya quiana queapamenee acapoquiani ojayanei ejjashahuabaquijjijo bamajje. 15Eyacuiñajji gracias apoquiacuetii oja quiacuana sosema' queapameneenee poanijojoya. Chama'nei pea esohui esejaya eajji o queapameneenee poanijojoya.
Currently Selected:
2 CORINTIOS 9: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
