2 CORINTIOS 8
8
Pablohua huohuicanaje ajeo bejjo quiacajji
1Ecue dohuecuana jjo'icuana, ecuaa quiana jjeya huohuije Jesosaja epeejjicuanajo ma provincia Macedonia meshijo ba'eca queahuiso Eyacuiñajjija esohuijo jjachichaquipoquianicuanajo. Achajja Eyacuiñajjiya ojayanei ejjashahuabaquijjijo majo ba'eca queapamenee acapoquiani huohuije. 2Dejja mimishicuaa queacamajanee pomeecani macuana Eyacuiñajjija esohuijo, jamatiiya ma meshijo ba'eca Jesosaja epeejjicuana queabihuitii ba'epoquiani. Jamatii aema'pishana ba'eya queahuiso oja bejjo quiacapoquiani cuaa Eyacuiñajjija echacojji yajji quea-aquianahuiso poaniya jayojja. 3Ecuea eba ecuea ecojjoja majo ba'ecacuaa oja bejjo queabihuiya Eyacuiñajjija echacojji yajji quiacuajicanaje, peaja quiameejo pojjeama. Ache huiso bejjo oja jjeshe jaa bamajje quiacanaje. Queahuiso quiasa-acanaje jamatii mahuiso ojaya jjeshejjima poanaje. 4Ecuana huohuiajjaneicanaje ma meshijo ba'ecacuaa Jesosaja epeejjicuana Judea meshijo ba'eca asahuajjijo oja bejjo equiajji. 5Ma oja jaa huisotii bejjo queahuisonee quiacanaje cuaa Eyacuiñajjija echacojji yajji ma ecua ecuana jjashahuabaquinaje majo ba'ecacuaa oepojji quiacajejo jama pojjeama. Queahuisonee ca quiacanaje. Bacue, ebionei oya jjaquiaquinaje Emeshimeseneijo Eyacuiñajjija echacojji yajji. Ecuana asahuajjijo pea-ai jjaquiaquinaje Eyacuiñajjiya oya jama pomeesa-acani jjabaquimajje. 6Tito miquianaja meshijo anijo miquiaaya bejjo Jesosaja epeejjicuana asahuajji quiacoonaje. Jamajjeya ecuaa Tito huohuiajjaje ma miquiaaya queajeaneeya quiajeyoje huisotii bejjo oja chichajeyojjijo. 7Miquianaya Jesosaja epeejji Corinto meshijo ba'eca ojjañajo queapamenee popoquiani. Queaja'anee jjashahuabaquipoquiani quiana esohuijo. Esohui queapame huohuicuajipoquiaña sohui jochiamaa. Miquiaaya queaja'anee Eyacuiñajjija esohui bapoquiaña peacuana huohuijji. Eyacuiñajjija echacojji asaneineiaña quiaa hueya-amaneiya. Ecuana pea-ai quiaa queajeanee apoquiaña ma ecua ecuaa miquiana queajeanee apoquiaña jama pea-aiya. Jamajjeya quiaa oe che oya jayojja pea Jesosaja epeejjicuana asahuacue. Miquianaja chicha bejjocuana queabihuineeya quiacue o asahuajji.
8Eyaya esohui jama huohuime aña miquianaja aquiana, bejjocuana ecuea equiameejjijo pojjeama, miquiana chacomeejji poani jamaa pojjeama. Pea meshijo ba'eca Jesosaja epeejjicuaa queabihuiya quiacani eyaya quiana huohuiaña oya jayojja miquiana epojjijo. Jamajjeya miquiaaya pea meshijo ba'eca Jesosaja epeejjicuana asahuaña, bejjo quiaña shajja-ajjamajje miquianajaya e'ejojonei queajeanee poani bacaje cuaa, enabajonei mimiani pojjeama. 9Miquianajaya eba eseja Emeshimesenei Jesosa Quitohua miquiana queapamenee acanaje ojayanei ejjashahuabaquijjijo. Yahuajonei oya eojjaña-aquianamese enequiapoatii Eyajo. Jamatii ohuaya ojjaña jiñacapoa jiquio meshiyasijje epoejji. Oya dejjapojji poa. Jamajjeya oya aema' jjapomeequiapoa miquiana quea-aquianahuiso jama eba'etiitii'yojji Eyahuasijje.
10Bacue, ecuea ejjashahuabaquijji huohuije so'o miquianajaya bejjo echicha Eyacuiñajjija echacojji yajji equiajji majo queapame epojjijo. Yahuajo pea shequiajajo miquianaya jjashahuabacooquiapoa aquiana, bejjocuana equiajjijo Jesosaja epeejjicuana asahuajji. Miquiaaya ebionei queabihuineeya bejjo chichacooapoa. 11Jamajjeya jjeya chichajeyo'yocue cua miquiaaya quiasa-aña huisotii Jesosaja epeejjicuana asahuajji. Jamaya miquiaaya bejjo quiajeyoje'yo queabihuineeya ma ecua miquiaaya yahuajo queabihuineeya bejjo quiacooapoa jama pea-aiya. 12Joya oja bejjo queabihuiya quiasapojjicuaa Eyacuiñajjija echacojji yajji ache huiso oja jjeshe jaa bamajje queapame quiacapoquijji. Eyacuiñajjiya ca quiameejjima acani ma ojaya jjeshejjima bejjo.
13¡A'a bejjo ojjañatii quiajeyojji miquianaya queacamajanee pojji quijje bejjomajo! Chojja, ecuana jama huohuisapo-ajja. Peacuana asahuacajji miquiana jayojja pea-ai oya eba'epoquijji. 14Jjeya miquianaya bejjojji, bobijji poani. Judea meshijo ba'eca Jesosaja epeejji ca aema'nei. Jamajjeya oya asahuacajji quianaja. E'e pojja'a quijje miquianaya bejjoma', bobima' poaje. Majoya Jesosaja epeejji Judea meshijo ba'ecacuaa miquiana asahuacaje oya jayojjaya. Jama quiamajjeya o bobi huisoajja pea-ai queapame ba'epoquije miquiana, Judea meshijo ba'eca pea-ai. 15Eyacuiñajjija esohui yahuajonei etehue jaa jama poani ba'a: “Ma queahuiso chichacapoa Eyacuiñajjija quia bobi eyajje oque mahuisotiiya poa, queahuisonee pojjeama poa. Ma oepojji chichacapoa oja quia bobi eyajje oque mahuisotiiya poa, oepojjinei pojjeama poa.”
Corintocuiñajjicuanaja Tito queapame eja'ajjequijjijo huohuicanaje
16Eyacuiñajjiya oya jjashahuabaquime miquiana queaja'a ba'emeesahuajjijo Titoja esapajo nequimeepea-aicanaje ma ecua ecuana ohuaya jjashahuabameequicanaje jama pea-aiya. Jamajje ecuaa Eyacuiñajji gracias aña majoya. 17Bacue, oya Tito ecuanaja esohuijo jjashajja-ajjaquinaje miquianaque epoquijji. Oya miquianajo queahuiso jjashahuabaquiani, jamajjeya oya miquianaque poquisaneipoani. Jjeya oya poquije cocuama ojayanei ejjashahuabaquijjijo, peaja poquimeejo pojjeama.
18Titonijjetii eyaya pea Jesosaja epeejji huoojeapea-aije. Queahuiso Jesosaja epeejjicuana ejjachichaquipoqui oja meshicuanajo queapame mimipoquiani jiquio ecue huoojea dejjajoya. Ohuaya esohui queapame Quitojo huohuicapoquiani queaja'anee queahuiso meshicuanahuasijje. 19Jesosaja epeejjicuana queameshihuisojo ba'ecacuaa jjachichaquipoquianiya jiquio dejja babacacanaje ecuananijje epoquipea-aijji peacuanaja quia bejjocuana chichasahuaquiya. Jamajjeya ecuaa ojjañatii Jesosaja epeejjicuanaja quia bejjocuana queapame jeaquije Judea meshijo ba'ecacuanaja yajji. Majoya Eyacuiñajji bihuiacaje cuaa. Ecuaaya Jesosaja epeejjicuana asahuaquisa-aña bacaje cuaa. 20Bacue, ecuana queahuisopishana poquije Jesosaja epeejjicuanaja quia bejjo queahuisojo ecuanajo pea-ai ona ejjaniñebaqui poanijje. Oeya siicaje eaca poanijje jamaya ecuana poquije. Ecuana ca ma esohui shajja-ajjasapo-ajja. 21Jamajjeya ecuaaya queapame ja'anei quiaquije cuana Jesosaja epeejjicuanaja chicha bejjocuana, eyayanei pojjeama. Eyacuiñajjiya ecuana bacanitii achajja, ache huiso quiaquije. Achajja, ache huiso quiaquije ecuananijje nequica dejjacuaa bapea-aicaje.
22Jiquio ecuananijje nequi Jesosaja epeejji eyaya huoojeapea-aije ma miquianaque poquijenijjeya. Oya queapame chacochacopoquinaje hueya-amanei queahuiso Eyacuiñajjija chacocuanajo. Oya miquianaja meshiyasijje poquisaneipoani Eyacuiñajjija esohuijo echacochacojji miquianaya queaja'a ba'epoquiani shajja-ajjamajje. 23Tito ecuea epeejjinei enijje chacochacopoquiani miquiana queaja'a ba'epoquijjijo. Ma ca pea Jesosaja epeejji beca dejja Titonijje poquipea-aije Jesosaja epeejjicuana jjachichaquipoquianija babaca ehuoojeajji. Ma beca dejja queapame chacochacoani bamajjeya queahuisocuaa Quito bihuiacani. 24Jamajjeya joya miquianaque poquije dejjacuana ja'ajjequicue queabihuineeya miquianaja oya queajeajojoya. Ecuana queabihuinee mimiani peacuananijje miquianajo. Jamajjeya jiquio dejjacuana miquiaaya queapame ja'ajjequiajo ecuana e'ejojonei mimiani miquianajo queaja'a ba'e bacaje pea Jesosaja epeejjicuaa.
Currently Selected:
2 CORINTIOS 8: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
