2 CORINTIOS 10
10
Pablohua oya e'ejojonei ona sohuihuohuiquinequijji poani huohuicanaje cuana
1Becacuana pa e miquianaque poquimajje queametepishana mimiani. Majoya e queamiquianahuesha nequimajje ca queatecue poaniya esohui tehueaña meteamaneiya pa. Bacue, Quito queapameneetii nequipoquiapoa, mimitecueama oya ponequiapoa. Jamajojoya aje eyaya mimitecueama nequiya miquiana jjashahuabaquimeesa-aña e miquianaque epoquijjijo. 2Bacue, e miquianaque poquiajo a'a eya queamimitecue pomeejji ma e niñebajji poanicuananijje. Ecuana pa jamatii ecuanajanei ejjashahuabaquijjijo ba'epoquiani. Eya ca iña apoa macuananijje ja'anei emimijji o cojjanei nequimajje. 3E'ejojonei ecuana yamijji jiquio meshijo nequi dejjacuana ojayanei ejjashahuabaquijjijo ba'epoquianitiinijje nequiani. Jamatii ecuana quenequenecuajiajja macuananijje oya masemaseani ecuanajo bamajje. Jiquio meshijo nequi dejjacuana masemasecuajinanani jama pojjeama ca ecuana poani. 4Ecuana queaca'a nequipoquiani ecuanaja ejjashahuabaquijjineijo pojjeama. Eyacuiñajjiya ca ecuana queaca'a nequimeesahuacapoquiani joya dejja oma' jayojja poanicuananijje queaja'a emimijji esohuijo. Edosiquiaa macuanaja esohuicuana siajje poani queaca'apishana pomeecani. Jamatii oja esohuicuana siajje poani ja'anei ecuaa huohuije meteamaneiya peacuanaja ebajji oya siajje poani. 5Eyacuiñajjima' jayojja poanicuaa, oyanei queasapaja'a poanicuaaya, ojayanei ejjashahuabaquijji huohuicani. Eyacuiñajjija esohui ca queaja'a bameejjima acani macuaaya. Jamatii ecuaa oya siajje poani ja'anei huohuije meteamaneiya. Majoya ecuaa oja esohui e'ejojonei pojjeama poani peajjanei bameeje cuana. Jamajjeya ecuaa ojjañacuanaja ejjashahuabaquijjicuana bameeje queaja'a a'a Quitoja jayojja pea-ai poani ebajji. Dejjaja ejjashahuabaquijji Quitoja jayojja pojjeama bamajje ecuaa oya pea jjashahuabaquime pomee'yosa-aje Quitoja jayojja epo'yojji. 6Quitoja esohuijo a'a ojjañatii miquiana jjashajja-ajjaquipoquiani baquije quiana. Joya shajjama'tii jayojja poanicuananijje ecuana apoa epo nequi o tecueaquijji oja mimishijo.
7Miquiaaya ojjaña bapoquiaña ebiajjejjetii, eyamiquipajje pojjeama. Joya e'ejojonei Quitoja'yo poani jjabaquianicuanaja, eya pea-ai Quitoja'yo poani ojaya bacajji o jayojja pea-aiya. 8E'e pojja'a miquianaya jjashahuabaquiani eya jjabihuiaquiani Eyacuiñajjija babaca poanijjejojo. Bacue, e'ejojonei Emeshimeseneiya eya babacacapoa ona sohuihuohuiquinequijji epojji. Jamaya Eyacuiñajjiya eya nequimeecani Jesosaja epeejjicuana queaca'a tiimeesahuajjijo. Eya nequimeecani Jesosaja epeejjicuana queayenonee pomeejjijo pojjeama, ejjachamameequi'yojjijo pojjeama pea-ai. Chojja, eya majo pojjeama nequimeecani. Jamajjeya eya queabicho pojjeama nequi ona sohuihuohuijji. 9Ecuea esohui ecue tehuecuanajo miquianaya quea-eyajjanei pomeesapo-ajja poani. 10Becacuana pa jama poani ejo ba'a: “Oja tehue esohui queaca'a, queabishaa jayojja huohuicani ohuaya. Eyamineijo nequi ca mimisajajea-ama poani. Ehuijo nequimajje queasohuijochiya huohuicani ohuaya jjapashineijje” jamaya pa eya acani cuaa quehuajje. 11Bacue, joya esohui ejo jama mimime poani e chamajo oya huohuicue ecuana miquianaja meshiyasijje poquimajje joya ecua ecuaa esohui tehuenaje queaca'a, queabishaa jayojja poaniya jama pea-aiya ecuana poquije.
Pablo queabihui poa ojaya echacojo
12Becacuana oyatii queahuiso jjabihuiaquiani oja chaco queapamejo. Peaja chaco ca peajja jayojja ohuaya bacani. Jama pea-ai posapo-ajjanei ca ecuana poani. Macuanaya queaquehuanee jjashahuabaquiani. Achajja ecuana ba'epoquiani jjabaquica-ajja peaja eba'ejjicuana bamajje. A'a ecuana queapame, a'a ecuana queapame pojjeama poani jjabaquica-ajja peaja eba'ejjijo o jayojja pea-ai epojji. Joya jama jjabaquianicuana ca sapadojjoma' jayojja poani. 13E'ejojonei ecuana queahuisonee chacochacopoquinaje Eyacuiñajjijo. Ma ecuanaja chacojjimajo ca ecuana emimipoquijji pojjeama. Majo ejjabihuiaquijji pojjeama. Eyacuiñajjiya ecuana huohuicapoa ache hueshahuasijje oja esohui dojocajji. Ohuaya ecuana miquianaja meshi Corinto bajjaniyasijje oja esohui dojomeesahuacapoa. Jamajjeya ma echacojotii ecuana jjabihuiaquije. 14Ecuana poquiani ma Eyacuiñajjiya ecuana huohuicani meshicuanahuasijje epoquijji. Jamajjeya ecuana cocuamaya poquiapoa miquianaja meshiyasijje. ¿Achajja shai quiana ecuana cocuamaya poquijjimatii epojojjemo ba'epoquiquiae? Ecuana ca esohui queapame Quitojo miquiana sohuihuohuicooquijji poa. 15Ecuana queahuisonee chacochacopoquinaje Eyacuiñajjijo. Majoya queabihui poani. Ecuana ca jjabihuiaquiajja peaja echacojo. Ecuana shajja-ajjasapoani miquianaya queaca'a tiipoquiani oja esohuijo. Jamaya ecuaa sohuihuohuipoquiaje quiana ma Eyacuiñajjiya ecuana huohuimeesa-acani huisotii esohuijo. 16Bacue, ecuana queahuesha poquisapoani esohui queapame Quitojo peajaajjicuana huohuiquiya, ma miquiana ba'eca queahueshaneeyasijje pea-ai. Jamatii ecuana pea Eyacuiñajjija esohuihuohuijji chacochacoani meshiyasijje epoquipea-aijji pojjeama poaje. Majoya ecuana peaja echacojo ejjabihuiaquijji pojjeama poaje.
17Eyacuiñajjija esohui yahuajonei etehue jaa jama poani ba'a: “Joya queaca'a jjabaquisapoanicuana Emeshimeseneijo queaca'a poani jjabaquicue, oja eyamineijo pojjeama.” 18Joya oyanei jjabihuiaquianicuana queapame pojjeama poani bacajji. Joya Emeshimeseneiya queapame ba'e acani dejjacuana, eponacuana pea-ai caca oe queapame poani esejaya oya bacajji.
Currently Selected:
2 CORINTIOS 10: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
