2 CORINTIOS 7
7
1E'e, ecue dohuecuana jjo'icuana, ecuea quiana queajeanee. Jiquio esohuicuana queapamenee poani Eyacuiñajjija quia ma ohua quijje ajeyocaje'yo, jamajjeya eseya queapame mimishiama ba'ecapoquijji. Jiquio ese queamimishi pomeejji poanicuanajo queahuesha nequicue. Miquianaja eyaminei oe nahuecue, queajjashahuabaquija'a miquianaja esapadojjojje popea-aicue. Eyacuiñajji queaca'anee nequitii eojjañamese poani. Ohuaya ecuana bacapoquianitii. Jama jjashahuabaquime pomajje queaja'a mimishiama ba'epoquicue ojaya'yo.
Jesosaja epeejji Corintocuiñajjicuaa Pablo queabihui pomeecanaje
2Ecuana oe che queajeanee acue quiaa e'ejojonei equijijjijo, enabaanei pojjeama. Bacue, ecuana miquiananijje che oema'nijje siajje pojjima' poanaje. Ecuana miquiana dasia pojjima'nei poanaje. Miquianaja bejjo queahuiso jjeshe pojjima' poanaje pea-ai, siijjimanei. 3Eyaya esohui jama aña miquiana niñebajjijo pojjeama. Bacue, oya esohuiya quiana huohuije o'oya eyaya miquiana queajeaneetii apoquiaña. Ma ecua eyaya quiana yahuajo huohuinaje jamaya, oya esohuiya aña. Ojee eshe ba'yaniya, mano'yomajje pea-ai ecuea quiana queajeatii popoquije. 4Eya miquiananijje ja'anei mimiani queamimihuiso pojjeama. Eya queabihuinee miquianajo mimiani peacuananijje miquianaya queaja'a ba'epoquiani shajja-ajjamajje. Miquianaya queaja'atii eba'epoquijji jjashahuabaquimajje queabihui poani. E'ejojonei queacamajanee ecuana acani cuaa Eyacuiñajjija esohuijo, jamatii eya queabihuinee nequi chacochacotiisapoani majoya.
5Ecuana Macedonia meshi bañaquimajje jomishocajjimanei chacochacoñaquinajetii. Queacamajaneetii acapoquinaje pea meshijo nequicacuaa cua ecuana poquinaje meshiyasijje. Ecuana botiamanei acanaje cuaa etecueaneijji. Ecuana queamete nequipoquinaje eyamiquipajje. 6Eyacuiñajji caca oe joya queayenonee poanicuana yenoama pomeesahua'yojji poani. Jamajjeya ecuana yenoama pomeesahuaca'yonaje ohuaya. Tito miquianaja meshijo ani poe'yonaje bamajje ecuana queabihui po'yonaje ojo. 7O poe'yonajejonei pojjeama ecuana queabihui po'yonaje. Oya queabihuinee poani miquianaja eba'ejji queaja'a poani shajja-ajjamajje ecuana queabihui majo popea-ai'yonaje. Ohuaya esohui huohuicañanaje eya basa-aña quiaa e asahuaneijji epojji. Ohuaya huohuipea-aicañanaje miquianaya queayeno jjashahuabaquiani ejo e queacamajanee onaa acanijo. Miquianaya ejo jama jjashahuabaquiani shajja-ajjamajje eya queabihuinee poanaje.
8Ebionei eya queayeno poanaje so'o ecue tehue esohuiya quiana queayenonee pomeecanaje shajja-ajjamajje. Eya ca jjeya majo queayenotii pojjeama poani. Miquianaya queayenotii pojjeama pea-ai jjeya poani majoya. 9Miquianaya queayenonee poani shajja-ajjamajje eya queabihui pojjeama poanaje. Bacue, miquianaya ecue tehuejo queayenonee poani jjabaquimajje jjashahuabaquio'oyanaje queaja'a eba'ejjijo. Majoya eya queabihui po'yonaje, jamatii pojjeama. Eyacuiñajjiya miquiana queayeno pomeesa-acanaje miquianaja mimishijo. Jamajjeya eyaya ecue tehuejo miquiana jamatii queayeno pomeejjima anaje. 10Bacue, Eyacuiñajjiya dejjacuana, eponacuana pea-ai queayeno pomeecani pea jjashahuabaquime epo'yojji oja mimishijo. Majoya oya jjanahuemeequije'yo ojo pea jjashahuabaquime po'yomajje. Jamajjeya majonei queayenotii poca-ajja. Jesosaja epeejjicuana queayeno poani jamatii joya ecua Eyacuiñajjima' jayojjacuana queayenopishana poani jama pea-ai pomajje ca jamatii ba'epoquijetii, pea jjashahuabaquime epo'yojji pojjeama. Majoya oya pea jjashahuabaquime po'yojjimatii ba'e quea-Eyacuiñajjihueshatii nequipoquije. 11E'ejojonei miquianaya queayenonee poanaje, ma Eyacuiñajjija ejjashahuabaquijji poanaje jamaya. Miquianaya jjabaquisaneipoanaje pea jjashahuabaquime po'yani queapame eba'epoqui'yojji. Mimishi jjeya cajaa a'yaña jjabaquisaneipoanaje pea-ai. Miquianaya queaquene poanaje ma queamimishi poanaje dejjanijje oja mimishi queatainee poanaje bamajje. Miquianaja eya jjeya queanahue pea-ai ma ecua yahuajo poanaje jama pojjeama. Ma queamimishinee poanaje miquiananijje jjachichaquipoquinaje dejja jeacuaya'yosa-anaje quiaa oja mimishijo. E'ejojonei miquianaya queaja'anee posaneipoanaje ma dejjanijje ojjañaja ebajji. 12Eyaya quiana esohui tehuenaje ma dejja queamimishinee poanajejonei pojjeama tehuenaje. Ma oja mimishijo queayeno pomeecanajecuanajonei pojjeama pea-ai eyaya quiana tehuenaje. Eyaya ca esohui jamaya tehuenaje miquiaaya ecuana queajeanee aña ejjabameequijji Eyacuiñajjijo. 13Miquianaya queahuiso jjashahuabaquiani ecuanajo shajja-ajjamajje ecuana queabihui po'yonaje majoya. E'ejojonei ecuana queabihui pomee'yonaje quiaa, jamatii ecuana queabihuinee po'yonaje Tito miquiananijje ani queabihui poe'yonaje bamajje. Tito queabihuinee po'yonaje miquianaya queaja'a ba'epoquio'oyani baquimajje. 14Eya yahuajo queabihui miminaje Titonijje o poquijjimahuajo miquianaja eba'ejjijo queaja'a po-o'oyani shajja-ajjamajje. Eya siajje poani pojjeama ohuaya baquicanaje. Bacue, ecuaa esohui e'ejojonei quiana huohuipoquianaje. Oya jayojja ma ecuana Titonijje miminaje jayojja miquianaja eba'ejjijo e'ejojonei poani ohuaya baquicanaje. 15Titohua quiana queajeanee shahuabacanitii miquianaya oja esohuijo jjashajja-ajjaquinajejojoya. Miquiaaya oya ecue huoojea queapamenee ja'ajjequime anaje oja esohui eshajja-ajjajji. 16Jjeya eya queabihuinee po'yani miquianaya pea jjashahuabaquime po-o'oyani queaja'a ba'eo'oyani shajja-ajjamajje.
Currently Selected:
2 CORINTIOS 7: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
