2 CORINTIOS 6
6
1E'e, bacue ecuana ojee Eyacuiñajjijo queapame chacochacopoquiani. Jamajje ecuaaya miquiana queaja'a ba'emeesa-aña. Eyacuiñajjiya quiana queapamenee acapoquiani ojayanei ejjashahuabaquijjijo, jamajjeya quiana oe a'a jamatii ba'epoquijji o sapo'yoajja jayojja. 2Eyacuiñajjija esohuijo yahuajonei etehue jaa jama poa ba'a:
“Miya queacamajanee ba'e jjabaquimajje enijje miminaje.
Eyaya mique mimi shajja-ajjanaje mi asahuajji.
Epojja mi nahuejji epojji poeajo eyaya miya nahuenaje”
jamaya poa. Jamajjeya jjeyanei queapame poani ojo ejjashahuabaqui'yojji. Jiquio pojjajotiiya jjanahuemeequica'yojji Quitojo.
Pabloja queacamajanee poa ona sohuihuohuiquinequijji epojji
3Ecuana caca oe queaquehua pojjeama ba'epoquiani Quitojo echacochacopoquijji. Jamajjeya ecuanaja chaco Quitojo peajja eajji pojjeama cuanaja. 4Ecuana ojjañajo queapame hueya-amanei chacochacopoquiani. Jamajojoya queahuisocuaa ecuana bacani e'ejojonei Eyacuiñajjijo queapame chacochacopoquiani. Onaa queaneenee pomeecajje ecuana jamatii queaneeca'a nequipoquiapoa quenequenejjima. Ecuanaja bobi, daquicuana queahuoejo ehuoshojji chama' poa jamatii oja esohuijo chacochacopoquiapoa. Queacamajanee pomeecajje ecuana chacochacopajeajjimatii poa. 5Ecuana esohuijo cuiasejjajeameecapoa cuaa queahuiso. Jeanobiameepea-aicapoa ecuana ejjajeanobiaquijji equiyasijje. Masemasecuajicapoa ecuanajo esohui huohuipoequi bamajje. Ecuaa chaconeineiapoa ecuanaja emeya queacamajanee poaniya. Cahuijjimatii jjapojjaquiapoa ona sohuihuohuipoequitii. Ecuana queashoenee pea-ai ponequiapoa bobima'tii nequi. 6Ecuana queaja'a mimishiama ba'epoquiani bacapoa cuaa. Eyacuiñajjija esohuicuana ecuaa queaja'anee huohuipoquiañatii pea-ai. Ecuana quenequenecuajijjima poa onanijje. Queapamenee ecuaa asahuapoquiapoa cuana jamatii bejjo yajjijo pojjeama. E'ejojonei Edojjoshahuapameya ecuanaja yamijo nequiya queaca'a pomeecapoa, ecuananeitii pojjeama. Ecuaa peacuana queajeanee apoquiaña, enabaanei pojjeama. Jamajojoya aje ecuana e'ejojonei Eyacuiñajjijo chacochacopoquiani bacani cuaa. 7Esohui e'ejojonei ecuaa huohuipoquiaña siajje pojjeamaa. Eyacuiñajjiya ecuana queaca'a pomeecani jiquio ecua soldado apoa ejjaquecuaquijji poani jama pea-ai. Ecuana queajjashahuabaquija'a nequiani etii poaninijje emimijji. Esohui queapame ehuohuijji, pea esohui ejjanahuequijji pea-ai ecuaa saja-apoquiaña meteamaa. 8Oe pojjajo ecuana queapame chacochacoani Eyacuiñajjijo bacani cuaa. Majoya pea pojjajo ecuanaja chacojo jjaniñebaquiani, peajja jayojja ecuana acani cuaa. Oe pojjajo ecuanaja chacojo queapame mimiani. Majoya pea pojjajo ecuanaja chacojo queaquehua mimiani. Ecuana siajje poani poso acani cuaa, jamatii esohui e'ejojonei apoquiaña. 9Oja bajjima jayojja ecuana acanaje queahuisocuaa, jamatii ecuana ebaneitii poanaje cuanaja. Ecuana oja esohuijo emanoje'yo poso queahuiso acanaje cuaa, jamatii ecuana eshetii nequi so'o echacochacopoquijji. Ecuana queaneenee pomeecani etiicuaa oja esohuijo, jamatii ecuana manomee'yojjima acani so'o. 10Ecuana queayeno pomajamajani queahuisocuana esohui basapo-ajjanei bamajje, jamatii ecuana queabihuitii nequipoquiani Eyacuiñajjijo. Ecuana quea-aquianahuiso pojjeama ba'e, jamatii ecuaa peacuana queabihuinee ba'emeesahuaña. Ecuana bacani cuaa aema'nei, jamatii ecuana jjabaquiani ojjaña Eyacuiñajjija quia ecuana queabihui pojji ejjeshejeyo.
11Bacue, Jesosaja epeejji Corinto meshijo ba'eca, ecuaa e'ejojonei quiana huohuineinaje, esohui huanaquehuajjimaa. Ecuanaja quiana queajeanee poani. 12Che oema' quiana ecuaa cajaa asa-aña, botiama pojjeama aña. Miquiaaya caca oe ecuana beshahuanei queajeapishana aña. 13Eyaya quiana bapoquiañatii ecue bacuacuana jama queajeanee. Jamajjeya ecuaa quiana a-ajjaneiaña ecuana che queajeanee pea-ai acue jiquio ecua ecuaa quiana queajeanee aña jama pea-aiya.
A'a oe joya Eyacuiñajjima' jayojjacuananijje ojee jjapeequipoquijji
14Joya Eyacuiñajjima' jayojja ba'e o sapo-ajjanei poanicuananijje ojee a'a jjapeequipoquijji quiana. A'a joya epona Eyacuiñajjima' jayojja anijo jjahuanaquijji, a'a dejja Eyacuiñajjima' jayojja nequijo jjahueaquijji. A'a ojee onijje jjapeequipoquijji. Bacue, ¿a'a joya queamimishitii poani joya ecua pea queamimishi pojjeama ba'e jama poani pea-ai? Chojja de, pea jjashahuabaquime poani oya. ¿A'a jiquio queajeaja'a ojee queamisijo anime? Chojja, ojee aniajja. 15Quito edosiquiananijje aniajja, onijje ojee nequiajja. Oya jayojja Jesosaja epeejjicuana ojee jjapeequipoquica-ajja Jesosaja epeejji pojjeamacuananijje. 16Eyacuiñajji Jesosaja epeejjicuanaja yamijo nequiani, jamajjeya eseya dejjaja ne jjashahuabaquica'yoajja o bihuiajjijo. Oya ca Eyacuiñajji jama pojjeama. E'ejojonei eseya Eyacuiñajji eshetii poani anijji popoquianitii. Eyacuiñajji jama poa ba'a:
“Eya ecue nahue'yocuananijje nequipoquijetii.
Eya ojaya Eyacuiñajji popoquije o jaahuanapoquiajjitii popoquije.
Enijje jjapeequicapoquijetii ecue nahue'yocuana.
Ecueatii poani eyaya oya bapoquiaje.”
17Jamajjeya Emeshimesenei jama poanitii ba'a:
“Joya queamimishitii poanicuanajo oe queahuesha nequicue.
Jiquio mi queamimishi pomeejji poani a'a napajji a'a queajea ajji.
Majoya eyaya quiana queabihuineeya ja'ajjequije.
18E'e, eya miquianajaya Chii popoquijetii.
Miquianaya ca ecue bacuaejjacuana, ecue bacuasecuana pea-ai popoquijetii.”
Jama mimimeya poani Emeshimesenei queaca'aneetii nequi.
Currently Selected:
2 CORINTIOS 6: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
