2 CORINTIOS 5

1Bacue, esejaya eyami jiquio ecua equi jiquio meshijo ani jama, ma ecua dejjaa daquiequi jjequiquinicani jama pea-ai oya poani. Coma ca anitiitiipoquiajja. Jamatii esejaya eba jiquio eyami mano'yajo Eyacuiñajjiya pea ese ba'etiitii'yojji eyami Eyahuasijje quiacaje'yo, equi queapame eanitiitiijji jamaya. Ma pea eyami eyacua dejjaja pana pojjeama poaje, Eyacuiñajjija pana poaje'yo. 2Eseya jjajjeanajeaquiani jiquio eyamijo ba'e queayeno popoquianitii queacamajaneejo. Jamajjeya se Eyahuasijje ba'etiitii'yosaneipoani pea eyami eyacuajo. 3Pea eyami eyacua eseyaya saneineiaña. Majoya eseya jamatii yamima' enequijji pojjeama poaje Eyajo. 4Jamajjeya eseya jjajjeanajeaquiani jiquio eyamijo ba'e daquiequijo ba'e jama queayenotii se popoquiani queacamajajo. Jjeya ca eseya pea eyamijo ba'etiitii'yosapoani. Jamajjeya jiquio eseja eyami mano'yajo pea eyami queapamenee Eyacuiñajjiya quiacaje'yo ese ba'etiitiipoqui'yojji. 5Eyacuiñajjineiya ca se ca oe jama epo'yojji pomeecaje. Jjeya ohuaya oja Edojjoshahuapame eseja yamijo enequi'yojji quiacanaje. Jamajjeya majoya queaja'a bacajji ojjaña ma ohua huohuicapoa huisotii eyami eyacuajo oya jayojjaya quiacaje'yo.

6Jamajjeya eseya oja esohuijotii jjashahuabaquipoquiani cajaa pojjima' nequi. Esejaya eba eseya ca jiquio eyamijotii ba'e Emeshimesenei aniyasijje poqui'yojjima poaje so'o. 7Jjeya eseja ecojjaja Emeshimesenei bajjima so'o, jamatii se ba'epoquiani oja esohuijo e'ejojonei ejjashahuabaquipoqui. 8Eseya caca meteama poani emano'yojji. Jamajjeya jiquio eyami beshahuanei cajaa aña Emeshimesenei aniyasijje epoqui'yojji jiquio ecua se eseja equiyasijje poqui'yani jama epo'yojji. 9E'e pojja'a jiquio meshijo se ca iyeshequiajahuiso eshe nequipoquije. E'e pojja'a beca se ca jjeya manoje'yo jiquio ecua se eseja equiyasijje poqui'yani jamaya. Jamajje eseya queaja'a ba'esaneipoani Eyacuiñajji queabihui pojji. 10Ojjaña eseya oja epeejjicuana mano'yomajje o cojjaneijo nequije. Emeshimesenei Quitohua huohuicaje'yo achajja eseya oja epeejji epo ba'epoquinaje. Majoya ojjaña eseyaya oja epeejjicuaa jjesheje ma eseya eshe ba'yahua queapame apoquinaje sosejje. A'a queapame, a'a queapame pojjeama eseya chacochaconaje Emeshimeseneiya huohuicaje'yo esosequiajji.

Pablo jjabaquinaje queapame chacochacopoquiani Eyacuiñajjijo

11Eyacuiñajjiya ecuana bacapoquianitii. Ecuaa shahuabapoquiaña oya queaca'aneetii nequi eojjañacuanamese poani. Jamajojoya ecuaa dejjacuana, eponacuana pea-ai jjashahuabameequi'yosa-aña ojaya esohuijo. Eyacuiñajjija ebajeyojeyo ecuanaja chaco. Miquianajaya pea-ai queaja'a bacajji ecuana queapame chacochacopoquiani ojo. 12Ecuana ca jjashahuabaquiajja ejjabihuiaquijji Quitojo queapame chacochacopoquiani jjabaquimajje. Jama posapo-ajja ecuana. Ecuana shajja-ajjasapoani miquianaya queapame mimiani peacuananijje ecuanaja echacojo. Majoya miquiaaya ma ecuana niñebajji poanicuana queaja'a huohuije ecuana queapame chacochacopoquiani. Coma dejjacuaaya ecuana ebiajjejjetii bacani, eyamiquipajje pojjeama. 13E'e pojja'a ecuana bacani cuaa sapadojjoma' jayojja poani Eyacuiñajjija echacojji yajjijo. Chojja, ecuana ca jama pojjeama bacani Eyacuiñajjiya. Bacue, ecuana queaja'a jjashahuabaquiani miquiana asahuapoquiajji epojjijo. 14Quitohua eseya queajeanee acapoquiani jjabaquimajje esejaya peacuana queapame asahuacapoquijji. Esejaya ebanei oe dejja mano'yapoa ojjaña esecuanajo, jamajjeya ojjaña eseya manopea-ai'yonaje onijjetii. 15E'ejojonei Quito mano'yapoa ojjaña esecuanajo. Jamajjeya ojjaña joya ojo jjashahuabaquije'yo huisotiicuana queapame ba'epoquije ojayanei echacojji yajjijotii pojjeama. Quitojo pea-ai ca queapame chacochacopoquije. Quito mano'yapoa majoya aje Eyacuiñajjiya oya shequimeeca'yapoa ojjaña ese nahue'yojji epojji.

16Jamajjeya eseya jjeya peacuanajo jjashahuabaquiajja achejaajji poani oya, achajja cojjame poani, ebiajjejje oya baca-ajja. Yahuajo eseya jamaya queaquehua jjashahuabaquime popoquinaje Quitojo. Jjeya ca jama pojjeama eseya jjashahuabaqui'yani ojo. 17Jamajojoya aje joya Quitojo jjanahuemeequi'yani dejjacuana eponacuana eyacua po'yani. Ma oya yahuajo jjashahuabaquipoquinaje queamimishi epojji chama'yo pomeecanaje. Jjeya caca oya pea jjashahuabaquime queapame ba'epoquije'yo eyacua. 18Jamaya Eyacuiñajjiya eseya pomeecani pea jjashahuabaquime queapame eba'epoqui'yojji eyacua. Eseyanei se ca jama jjapomeequiajja. Eyacuiñajji Quitojo jjabeiqui'yonaje esenijje. Jamajjeya oya eseja mimishi shahuababeca'yoajja poani. Jjeya ohuaya eseya nequimeecani peacuana huohuiquijji Eyacuiñajji Quitojo jjabeiqui'yonaje ojjañacuananijje o ejjanequichipiqui'yojji ojo. 19Jama poanijje Eyacuiñajji ojjaña ba'ecacuananijje jjabeiqui'yonaje Quitojo oya ojjañacuanaja mimishicuanajo mano'yapoa bamajje. Jamajjeya Eyacuiñajji eseja mimishicuana shahuababeca'yoajjatii poani. Jjeya caca Eyacuiñajjiya eseya jiquio esohui queapame huohuiquijji epojji nequimeecani oya queneama'yo posapoani ojjañacuananijje Quito ojjañacuanaja mimishijo mano'yapoa bamajje. 20Jjeya ecuana jjabaquiani Quitoja huoojea poani peajaajjicuana jiquio esohui queapame huohuiquijji epojji. Eyacuiñajjineiya ecuana oja esohui queapame quiacani peacuana huohuiquijji epojji oja huoojea. Jamajjeya Quitoja bajjanijo ecuaa jama huohuime quiana aña yajja miquianaya pocajji. E'ejojonei Quitojo jjashahuabaqui'yocue Eyacuiñajji ejjabeiqui'yojji miquiananijje. 21Quito caca oe mimishima'neitii ba'epoquiapoa jiquio meshijo nequi. Eyacuiñajjiya Quito eseja mimishijji bacapoa oja emanomee'yojji. Majoya Eyacuiñajjiya eseya eseja mimishima'yo bacanitii Quitojo oya eseja mimishijo mano'yapoa sosejje.

Currently Selected:

2 CORINTIOS 5: ESE

Highlight

Compare

Copy