2 CORINTIOS 4

Jesosa Quitojo esohuihuohuijji poaniya esohui tehuecanaje

1Eyacuiñajji queapameneeyajjejojoya ecuana oja esohuihuohuijji epojji nequimeecapoa, jamajjeya ecuana queamete pojjeama nequipoquiani. 2Ecuana ca oja esohui peacuana huohuinishoajja poani o dasiajjijo. Ecuana ca jama posapo-ajjanei poani. Eyacuiñajjija esohui ecuana huohuitaiajja, pea huohuime a'yoajja pea-ai. Ecuaa caca oe esohui e'ejojonei huohuipoquiaña, mahuisoya. Jiquio ecuaa huohuipoquiaña esohui jayojjaya ecuana ba'epoquiani. Jamaya ecuana queaja'a ba'epoquiani queahuisocuanaja ecuana e'ejojonei chacochacopoquiani ebajji, siajje pojjeama. Eyacuiñajjiya pea-ai ecuana queapame chacochacopoquiani ojo bacani. 3Jiquio esohui queapame Quitojo ma ecuaa huohuipoquiañaya queaquehua shajja-ajjacani cuaa ejjacojjapaaquitii jamaa. Comacuanaya oja mimishijjitii Cuaqui-aiyasijje epoqui'yojjicuaaya jiquio esohui queaquehuatii shajja-ajjacani. 4Mahuisotiicuanaya jiquio esohuijo jjashahuabaqui'yoajjatii poani jiquio meshijo ba'ecacuaa bihuiacani edosiquiaa queasapaquehuanee pomeecanajejjejojoya. Jamajjeya esohui queapame Quitojo oya queaca'aneetii queasajajanee poani basapo-ajjanei poani cuana. Quitohua eseya queaja'a bameecani achajja Eyacuiñajji nequi. 5Bacue, ecuana ecuanaja eba'ejjineijo pojjeama mimiani, majonei ejjashahuabaqui'yojji pojjeama. Jesosa Quito Emeshimesenei poanitiijo esohui ca ecuaa huohuiaña quiana. Ecuana ca jjabaquiani miquiana asahuapoquiajji poani oya Jesosa ecuanaja queajeajojo. 6Yahuajoneinei Eyacuiñajjiya jiquio meshi queamisi oopanahuasijje jeaja'acapoa queaja'a epojji oja esohuijo. Oya jayojjaya Eyacuiñajjiya ecuanaja sapadojjojje equijijjijje jjaja'ameequicapoa Quitojo ejjashahuabaqui'yojji. Jamaya Eyacuiñajji jjabameequipoquiani oya queaca'aneetii queasajajanee nequipoquiani Jesosa Quitojo esejaya queaja'a ebajji.

Queaca'atii ba'ecapoquijji jamatii queacamajanee poani

7Jiquio esohui queapame Quitojo ecuanaja sapadojjojo huana jaa Eyacuiñajjija quia. Ecuanaja eyami jiquio ecua meshimisi jama ca'a-ama, pameamapishana pea-ai poani. Jama jjabaquimajje queaja'a ecuaa baña Eyacuiñajji queaca'aneeya ecuana nequimeecani oja esohuihuohuiquijji epojji, ecuanajoneitii pojjeama. 8Ecuana queacamajanee pojji poeanitii, jamatii ecuana chacochacopoquianitii Eyacuiñajjijo. Ecuana queayeno jjashahuabaquinaje ecuana queacamaja pojji poeajo, jamatii oja esohui cajaa ajjima' nequiani. 9Ecuana queanee pomeecanaje queahuiso oja esohuijo, jamatii Eyacuiñajji ecuananijjetii nequipoquiani ecuana asahuajji. Ecuana cuianeineicanaje cuaa, jamatii ecuana manomee'yojjima acanaje. 10Cua ecuana poquije meshiyasijje esohuihuohuiya queacamajanee acani macuiñajji nequicacuaa. Ma ecua Jesosa acapoa jama pea-aiya ecuana acapoquiani. Botiamanei acani, manomee'yosa-acani pea-ai. Jamatii onaa jama queaneenee pomeecanijo queahuisocuaa bacani ecuana eshe nequipoquiani Jesosa Quito queaca'anee poanijojoya, ecuanajoneitii pojjeama. 11Ecuana ca eshe nequi jjabaquipoquianitii Eyacuiñajjiya ecuana queacamajanee pojji huoojeacanitii Jesosaja esohuihuohuijji poanijojoya. Jamajjeya dejjacuaa ecuana manomee'yosa-acani shajja-ajjamajje queahuisocuaa bacanaje e'ejojonei Jesosaa ecuana eshe nequimeecani. 12Jamaya ecuana jjabaquipoquiani queacamajaneetii popoquije oja esohuijo. E'e pojja'a ecuana majoya manoje'yo. Jamajjeya ecuaa queacamajanee poaniya quiana sohuihuohuiajje queaja'a ba'epoquije.

13Eyacuiñajjija esohui yahuajonei etehue jaa jama poani ba'a: “Eya ojo jjashahuabaqui'yonaje, jamajjeya eyaya peacuana huohuinaje.” Oya jayojja pea-ai ecuana poani, ojo jjashahuabaqui'yomajje peacuana esohui huohuiaña. 14Ecuanaja eba Eyacuiñajjiya Emeshimesenei Jesosa Quito shequimeeca'yapoa. Eyacuiñajjiya ecuana pea-ai mano'yajo shequimeecaje'yo quijje Jesosa Quito jayojja. Majoya miquiananijjetii ecuana dojopea-aicaje'yo o aniyasijje. 15Ojjaña jiquio ecuana queanee, queacamaja pea-ai pomeecani cuaa oja esohuijo miquianaya queaca'a pojjijo poeani. Eyacuiñajjiya ojayanei ejjashahuabaquijjijo queahuisocuiñajjicuana queapamenee acapoquiani. Majoya queahuisocuaa Eyacuiñajji bihuiacaje oya jama poani bamajje.

16Jamajjeya ecuana queametetii pojjeama nequipoquiani. E'e, ecuana ebiajjejje queanee poani, eyami manopoqui'yani pea-ai. Ecuanaja eyamiquipajje ca ecuana queaca'a nequimeecapoquiani ojjaña pojjajo Eyacuiñajjiya. 17Jjeya jiquio meshijo nequi ecuana queanee acani cuaa oe pocuajiani, ojaya queaneetii epomeejji pojjeama. Jamajjeya ecuana jama queanee acajje queaja'a bapoquiaje acheca'aneetii, achepamenee pea-ai ecuana ba'eje'yo Eyahuasijje. 18Jamajjeya ecuana jiquio ecojjaa baña huisotii aquianacuanajo jjashahuabatiiquipoquiajja. Ma ecuanaja ecojjajo jjabameequiajja poanijo ca ecuana majotii jjashahuabaquipoquianitii. Jiquio ecuanaja ecojjaa baña huisotii aquianacuana oe poaje'yo, jjachamaquije'yo. Ma ecuanaja ecojjajo jjabameequiajja poani ca nequitiitiije'yo, oe po'yoajja.

Currently Selected:

2 CORINTIOS 4: ESE

Highlight

Compare

Copy