2 CORINTIOS 3

1Ecuana jama poani shajja-ajjamajje, ¿a'a ecuana Quitojo echacochacojji jjabihuiaquio'oyani baña quiaa? E'e pojja'a ¿a'a ecuana pea esohuihuohuijji poanicuana jama pea-ai pocajji? Bacue, oya etiija tehue papenijji poeani achajja oya chacochacoje miquianajaya ebajji. ¿A'a ecuaa miquiana papeni tehuemeeje peaja meshiyasijje chacochacohua epoquijji? ¿A'a miquianaque epoejji ecuana etiija quia papenijji pocajji? 2Chojja, ecuana ca jama pojjeama, papeni etehuemeejji pojjeama aje. Miquianayanei ca ecuanaja papeni etehue jayojja poani achajja ecuana chacochacopoquiani peacuanaja ebajji. Achajja ecuana oja esohuijo chacochacopoquinaje miquiana huohuijji ecuanaja ebanei jiquio ecua ecuanaja sapadojjojo etehue jaa jamaya. Ecuaanei pojjeama quiana achajja ba'e baña, queahuisocuaa pea-aiya ca quiana bacapoquiani achajja ba'e ecuanaja esohui shajja-ajjamajje. Jiquio ecua papeni etehue acani cuaa, jama pea-aiya quiana bacani cuaa. 3Bacue, miquianajaya eba'ejji jiquio ecua papeni etehue jama pea-aiya poani Quitoja tehue ecuanaja ye. Jamajje ecuaa oja esohui huohuipoquiajje miquiana jjashahuabaqui'yonaje ojo. Jamatii miquianajaya eba'ejji papeninei dejjaja tehue jama pojjeama poani. Eyacuiñajji eshetii poanija Edojjoshahuapameja tehue jayojja ca quiana ca poani. Jamajjeya Edojjoshahuapame achajja queapame ba'ecapoquijji meibeje equecuapejjajo tehueajja. Ohuaya ca huohuicanitii achajja ba'ecapoquijji miquianajaya eyamiquipajje, equijijjijje pea-ai.

4Eyacuiñajjiya miquianaya queapame ba'epoquiani Quitojo bacani ecuanaja huohui esohui shajja-ajjamajje. Jamajjeya jiquio jjeya ecuaa huohuiaña esohui e'ejojonei poani. 5Bacue, ecuananei queaca'a poani jjabaquiajja Quitojo queapame echacochacopoquijji. Chama'nei ecuanajo queapame epojji. Eyacuiñajjiya ca ecuana queaca'a pomeecani ojo queapame echacochacopoquijji. 6Eyacuiñajjiya ecuana oja esohui eyacua huohuipoquiajji epojji queaca'a pomeecapoa. Jiquio oja quia esohui eyacua Moisesja tehuecuana jama pojjeama poani. Oja quia esohui eyacua ca Edojjoshahuapamejo jjashajja-ajjaquicapoquijji poani. Eyacuiñajjija esohui Moisesja tehuecuaa eseya huohuicanitii ese queamimishi poanijo se manoje'yo. Eyacuiñajjija Edojjoshahuapame ca ese ba'etiitiimee'yojji poani.

7Bacue, Moisesja tehuecuaa se huohuicanitii joya oya jayojjaya miba'etiipoquimajje manoje'yo. Ma ebionei Eyacuiñajjija esohui ohua quiacapoajo meibejejo oja tehue Eyacuiñajji queasajajanee poa ojjañaja oya queaca'aneetii poani ebajji. Eyacuiñajji queasajajanee poanijojoya Moisés queacojjasajaja bacapoa Israelja osecuacuaa. Jamajjeya oja cojja bajjima acapoa ebionei oya queacojjasajaja poajojoya. Jamatii quijje oya jjacojjasajaja-amaqui'yapoa. 8Jiquio Edojjoshahuapameya yecaje Eyacuiñajjija quia esohui queapameya queahuisocuana ba'etiitiimeecaje'yo ma ecua Eyacuiñajjija esohui Moisesja tehueya acapoa jama pojjeama, ma ca queapamepishana poani. 9Moisesja etehuecuaa se huohuicanitii ojjaña joya oja tehuecuana jayojjaya miba'epoquimajje comacuanaya quea-Eyacuiñajjihueshatii nequicaje'yo Cuaqui-aiyasijje oja mimishijo. ¡Achepameneenee ca poaje ma pea oja quia esohui jiquio Eyacuiñajjiya eseya eseja mimishima'yo bacaje Quitojo! Maya caca oe queapamenee poani, Moisesja tehuecuana jama pojjeama. 10Ma ebionei oja quia esohui Moisesja tehuecuana queapame poani ecuaa bapoa. Jjeya ca ecuaa maya baña queapamepishana. Jiquio pea esohui Eyacuiñajjiya dejjacuana, eponacuana oja mimishima'yo bacaje Quitojo ca queapameneenee poani ecuaa baña. 11Ma Eyacuiñajjija quia esohui Moisesja tehuecuana queapame poani, jamatii quijje Eyacuiñajjiya pea esohui oja ejjocojo ejaajji quiacapoa. Jiquio esohui Quitojo ca queapamenee poani ejjachamaqui'yojji pojjeamatii poaje.

12Jamajjeya ecuana jiquio pea oja esohui Quitojo oe po'yoajja poanijoya jjashahuabaquipoquimajje meteama poani peacuana sohuihuohuiquijji epojji. 13Yahuajonei Moisés jjacojjapaaquiapoa onijje israelitacuanaja oya jjacojjasajaja-amaquipoqui'yani ebaca poanijje. Ecuana ca ma ecua Moisés poa jama pea-ai epojji pojjeama. Eyacuiñajjija quia esohui Moisesja tehuecuana eshahuabatiitii'yojji pojjeama poaje. Jiquio esohui Quitojo ca shahuabatiitiicapoquije ojjañacuaa. 14Jamatii Eyacuiñajjiya israelitacuana ma pea esohuijo Quitojo queaja'a bameejjima acapoa. Jjeya pea-ai Moisesja tehuecuana shahuabacapoquianitii cuaa majotii oya jayojjatii eba'epoquijji. Jjeya israelitacuana ejjacojjapaaqui jayojja poani Moisesja tehuecuana jayojja ba'etiitiipoquica-ajja jama ebaca poanijje. Quitohua oeneiya caca oe israelitacuana jjacojjapaaquijjima jayojja pomeecaje'yo queaja'a ejjashahuabaquimeejji Moisesja tehuecuanajo queapamenee mimishima'yo epojji pojjeama. 15E'e, jjeyaneitii pea-ai israelitacuaa jjachichaquimajje Moisesja tehuecuana huohuicanitii oya jayojjaya eba'epoquijji. Eyacuiñajjija esohui Quitojo ca israelitacuanaja queaquehuatii poani, ejjacojjapaaquitii jama ba'epoquiani cuana. 16Oe dejja, epona pea-ai Emeshimesenei Quitojo jjashahuabaqui'yajo Eyacuiñajjiya ma o jjacojjapaaquijji poani chama'yo acani ojaya queaja'a ebajji Moisesja tehuecuana jayojja ba'etiitiicapoqui'yoajja. 17Emeshimesenei Edojjoshahuapame pea-ai poani. Ojjaña joya Jesosa Quito e'ejojonei Emeshimesenei ajji poanicuana queabihui ba'epoquije. Oya ojjaña Moisesja tehuecuana jayojja ba'epoquitiiajja poaje oja mimishima'yo Eyacuiñajjija ebajji. Edojjoshahuapameya oya queabihui ba'emeesahuacapoquije joya ecua dejja ejeanobia ani jeacuayaca'yajje queabihuinee poqui'yani jama. 18Jamajjeya eseya jjeya ejjacojjapaaquitii jama pojjeama po'yani, sapaquehua-ama'yo ba'e. Ese ojo queaja'a ba'epoquiani bamajje Emeshimesenei queaca'aneetii queasajajanee poani bacaje cuaa. Eseya Emeshimesenei jayojja queajjashahuabaquija'atii epojji, queaja'atii eba'epoquijji pea-ai popoquiani. Jamajjeya ojjaña pojjajo Emeshimeseneiya Edojjoshahuapame poaniya eseya queaca'a pomeecapoquianitii.

Currently Selected:

2 CORINTIOS 3: ESE

Highlight

Compare

Copy