1 TESALONICENSES 5
5
Apoa epotii ba'epoquicue Emeshimesenei epoeo'oyajjijo
1Jesosaja epeejjicuana, eyaya quiana huohuinaje Jesosa poeo'oyajjijo. Jamatii ecuea etehuejji pojjeama poaje acheshono oya poeje o'oya. 2Esejaya ca bajjimanei poani acheshono shai oya poeje o'oya. Jiquio ecua siipojji equimeseja bajjimanei poecuajiani, jamaya Emeshimesenei poecuajije o'oya queahuisocuana ojo jjaishoaquijjimatii ba'ecajo. 3Quijje queahuiso jama poaje ba'a: “Ecuana queapame ba'epoquiani ojee, chama' queamase epojji. ¡Ajeo queamete epojji!” Ona jama poanijo epojja ona queayenonee po'yojji ona queaneenee po'yojji poecuajije. Joya ecua eponacuana jamatii jjabaquijjima ani bacuaneecuajiani, jamaya poaje cuana o queaneenee po'yojji epojja poecuajiajo. Queaneeneetii pocuajije'yo cuana. 4Miquianaya ca jjeya jama pea-ai queametenee epocuaji'yojji pojjeama poani. Dejja mimishicuana quea-aapo jayojjatii ba'epoquiani jama pojjeama quiana jjeya ba'epoqui'yani, jamajjeya o poeo'oyajjijo eseya jjaishoaquipoquiani. Siipojji jama pojjeama oya poeje o'oya miquianajo. 5Miquianajaya ca jjeya eba oya poeje o'oya. Jamajjeya eseya jjeya queaja'a ba'epoquiani joya ecua dejja epojjajo queaja'a poquiani jama. 6Jamajjeya eseya joya ecua peacuana ecahui jayojjatii ba'epoquiani jama pea-aiya poca-ajja. Eseya ca jjaishoaquipoquianitii o poeo'oyajjijo apoa epo nequi. Joya ecua dejja cachasa ishiajjanei queaja'a jjashahuabaquiani jama pea-aiya ba'ecapoquijji. 7Bacue, joya dejjacuana, eponacuana pea-ai mecajje cahuiani comacuanajaya bajjima yajja poani cuana. Joya huoojjicuana mecajje huooani. 8Eseya ca jama pojjeama jjeya queaja'a ba'epoquiani. Joya ecua dejjacuana epojjajo queaja'a chacochacopoquiani jamaya eseya ba'epoquiani. Jamajjeya eseya joya ecua soldadocuana jjajaahuanaquinequiani jama pea-aiya pocajji. Eyacuiñajjija esohuijo jjashahuabaquicapoquijjitii, esejaya peacuana esenijje ba'eca queajea acapoquijji pea-ai. Acheshono Eyacuiñajjiya eseya apoa acaje'yo dojosohuacaje'yo, eseya majoya queabihui jjaishoaquipoquianitii jiquio ecua soldadocuanaja ejahuojjaca'a eiyatii poani jamaya. 9Eyacuiñajjiya queaqueneya queaneenee pomeecaje'yo cuana oja mimishijo. Eseya ca queaneeneetii epomee'yojji pojjeama ohuaya bacapoa. Jamajjeya eseya ohuaya majoya jjashahuabameequica'yonaje Emeshimesenei Jesosa Quitojo ejjanahuemeequi'yojji. 10Jesosa Quito esejo mano'yapoa ese onijje eba'epoqui'yojji. Jamajjeya eseya jjeya eshe ba'e mano'yomajje pea-ai onijjetii ba'epoquije'yo. 11Jamajjeya se oe esenijje ba'eca Jesosaja epeejjicuananijje esohui queapamejo mimipoquicue. O queaca'a tiipoquijjijo pea-ai esohui queapame mimipoquicue. Jiquio jjeya miquiaaya aña esohuiya oyatiiya apoquiacue.
Esohui oe-ejjenei huohuicapoa Pablohua
12Jesosaja epeejji ecuanaja dohuecuana jjo'icuana, joya miquiana sohuihuohuijji poanicuana etii oya queapame poani bapoquiacue quiaa. Oya Emeshimeseneija nequimee miquiana jaahuanapoquiajji poani, miquiana sohuihuohuipoquiajji poani. 13Coma dejjacuanaya Eyacuiñajjijo chacochacopoquiani, jamajjeya quiaa oya queajea apoquiacue, queapame poani oya bapoquiacue. Miquiananijje ba'eca Jesosaja epeejjicuananijje oe queabihui queneama ba'epoquicue ojee oya meshijo.
14Ecuaa quiana huohuiajjaneiaña joya chacochacoajja poanicuanajo miquianaja o tecueajji o chacochacojji. Joya queametenee poanicuana o meteama pojjijo niñesheacue. Joya ca'a-ama poanicuana miquianaja o asahuajjijo ecuaa quiana huohuipea-aiaña. Ojjañacuananijje oe queapame ba'epoquicue, a'a onijje quenequenecuajijji.
15Jjabaneiquicue quiana oe joya miquiana queamimishi ajji poanicuanajo. A'a onijje queamimishi popea-aisapojji ejjasoseaquiajji onijje. Ojjañacuananijje ca queapame pocapoquijji. Miquiananijje ba'e Jesosaja epeejjicuana oe queapame asahuapoquiacue, Jesosaja epeejji pojjeamacuana pea-ai.
16Queabihui pea-ai quiana oe ba'epoquicue. 17Eyacuiñajjinijje oe mimitiipoquicue ojjaña pojjajo, mecajje pea-ai. 18Ojjañacuanajo Eyacuiñajji gracias apoquiacue. Jamaya Eyacuiñajjiya quiana ba'emeesa-acapoquiani joya Jesosa Quitojo ejjashahuabaqui'yocuana.
19Edojjoshahuapameja esohui miquianaja eyamijo nequija a'a cajaa ajji, a'a pajea'yojji. 20A'a joya Edojjoshahuapameja quia esohui yejji poani dejja cajaa ajji quiaa. 21A'a ohua e'ejojonei Eyacuiñajjija esohui huohuicani ebajji shajja-ajjaneineicue. Ma ohua esohui queapame huohuicanaje huanacue miquianaja esapajo. 22Ojjaña queamimishi epojjijo oe queahuesha nequicue. A'a jama queamimishi popea-aisapojji.
23Eyacuiñajjiyanei jiquio ese queaquijijjijajinee pomeejji poaniya quiana mimishiama caba'emeecapoquiahua. Miquianaja esapadojjo, edojjoshahua, eyami pea-ai canahuecapoquiahua ohuaya miquiana queaja'a ba'epoquijji eseja Emeshimesenei Jesosa Quito poeo'oyajo. 24Eyacuiñajji yahuajoneitii esejo jjashahuabaquianiapoa ese oja jama epomeejjijo. Oya pea jjashahuabaquime po'yoajjanei poani majoya. Jamajjeya ohuaya e'ejojonei eseya jamaya pomeecaje.
25Miquianaya Jesosaja epeejji ecuanaja dohuecuana jjo'icuana, ecuanajo oe mimipoquicue.
26Miquiananijje ba'e Jesosaja epeejjicuana oe queabihuiya shemo tojjojjequicue Emeshimeseneija bajjanijo.
27Eya Emeshimeseneija babaca oja nequimee. Jamajjeya jiquio eya tehuenaje esohui acue ojjaña majo Jesosaja epeejjicuana ba'ecaja eshajja-ajjajji.
28Eseja Emeshimesenei poani Jesosa Quitohua quiana queapamenee ca-acapoquiahua ojayanei ejjashahuabaquijjijo.
Currently Selected:
1 TESALONICENSES 5: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
