1 TESALONICENSES 4

Queaja'a se ba'ecapoquijji Eyacuiñajji esejo queabihui pojji

1Ecuanaja dohuecuana jjo'icuana, Emeshimesenei Jesosaja bajjanijo ecuaa huohuiajjaneiaña miquiana queaja'atii eba'epoquijjijo. Ecuaa quiana yahuajo huohuinaje achajja queaja'a ba'ecapoquijji oja esohuijo. Jjeya miquiana queaja'a ba'epoquiani. Jamajjeya quiana oe jamaya queaja'atii ba'epoquisatiipocue Eyacuiñajji queabihui pojji miquianajo.

2Miquianajaya eshajja-ajja ecuanaja huohui esohui achajja queaja'a ba'ecapoquijji. Jesosa Quitoja huoojeaa ecuaa quiana huohuineinaje esohui majoya. 3Eyacuiñajjiya quiana queaja'anee mimishiamanei ba'emeesa-acapoquiani miquiana ojaya'yo poanijojoya. Jamajjeya a'a peaja ehuanasejo, peaja yahuejo onijje ejaajjijo jjashahuabaquijji. Eyacuiñajji ca jama sapo-ajjaneinei esejo. 4Jamajjeya quiana oe dejjacuana jjabaneiquicajji miquianaja ehuanaseneijo queapame eba'epoquijji. Queajjashahuabaquija'a onijje ba'epoquicue mimishiama Eyacuiñajjija'yo poanijjejojoya. Miquianaja huanasecuana queapame poani jaahuanapoquiacue Eyacuiñajji queabihui pojji. 5Joya ecua dejjacuana Eyacuiñajjima' jayojja poani quea-eponahuisonijje ejaajjijo jjashahuabaquipoquianitii jama pea-aiya oe a'a popea-aijji. 6Jamajjeya oe jjajaahuananeiquipoquicue. A'a queamimishi pojji miquiananijje ba'eca Jesosaja epeejjicuananijje. Ecuanaja quiana queaja'a ehuohui joya jama queamimishi ba'eme poaje quiana Eyacuiñajjiya queanee pomeecaje. 7Bacue, Eyacuiñajjiya eseya nahueca'yonaje peacuananijje queamimishitii eba'epoqui poanijje, peanijje ejaa poanijje. Eseya ca ojaya'yo poani jamajjeya queaja'a eyacua ba'ecapoqui'yojji. 8Joya dejjaa jiquio ecuaa huohuiaña esohui cajaa acani comaaya Eyacuiñajjija esohui cajaa apea-aicani, ecuanaja esohuinei pojjeama. Eyacuiñajjiya quiana oja Edojjoshahuapame quiacanaje miquiana queaja'a ba'emeepoquiajji epojji.

9Eyacuiñajjiyanei quiana queaja'a jjashahuabaquimeecanaje majoya miquianaja pea Jesosaja epeejjicuana queajea eapoquiajji. Jamajjeya esohui esenijje ba'eca Jesosaja epeejjicuana queajea eajjijo ecuea etehueo'oyajji pojjeama poaje. 10E'e, jamaya miquiaaya eseja dohuecuana, jjo'icuana pea-ai ojjaña Macedonia meshijo ba'ecacuana queajea apoquiaña. Jamatii ecuaa quiana huohuiajjapoquiaña Jesosaja epeejjicuana miquianaja meshijo ba'eca queajeaneetii eapoquiajjijo. 11Queapame oe ba'epoquicue quiana shajjaquijjoama, peajo jjaniñebaquijjima. Miquianaja emejanei chacojo oe queapame ba'epoquicue. A'a peaja echacojo jjashahuabaquijji. Jama eba'epoquijji ecuaa yahuajo quiana huohuinaje esohui. 12Jama chacome amajjeya quiana queabobihuiso poaje. Jesosaja epeejji pojjeamacuaa miquiana queapame hueya-ama bacaje jama chacochacome poajo.

Emeshimesenei Jesosa Quito poeje o'oya jiquio meshiyasijje

13Jesosaja epeejji ecuanaja dohuecuana, jjo'icuana pea-ai, ecuaa quiana jjeya huohuiaña miquianaja queaja'a ebajji joya Jesosaja epeejji emano'yocuanajo. Eyacuiñajjima' jayojjacuana queayenoneetii popoquiani emano'yocuanajo. Jama miquiana epopea-ai poanijje majoya ecuaa quiana esohui huohuiaña. 14Eseya jjashahuabaqui'yonaje Jesosa emano'yo jaa Eyacuiñajjiya shequimeeca'yapoa. Jamajjeya eseya jjashahuabaqui'yani ojjaña joya Jesosaja epeejji poanaje emano'yocuana Eyacuiñajjiya quijje shequimeepea-aicaje'yo. Jesosanijjetii enequipoqui'yojji shequimeecaje'yo oja epeejji poanajecuana.

15Jiquio ecuaa miquiana jjeya huohuiaña Emeshimeseneija quia esohuiya. Ojjaña eseya joya eshetii ba'e Emeshimesenei poeo'oyajo ebionei epoquicoo'yojji pojjeama se poaje so'o. Ma Jesosaja epeejjicuana emano'yo caca oe ebionei shequimeecoocaje'yo. Majoya aje eseya dojosohuapea-aiquicaje'yo. 16Jesosa poeo'oyajo esohui janobajjimanei taaaje shajja-ajjacaje cuaa. Angelcuana huohuijji poani etii janobajjimanei taaapea-aije. Eyacuiñajjija baasa janobajjimanei miasajajeacaje shajja-ajjapea-aicaje cuaa. Majoya Emeshimesenei Eyajo ani nequioqueje. Ojjaña Jesosaja epeejjicuana emano'yo jaa ebionei shequimeecoocaje'yo ohuaya. 17Majoya aje eseya joya eshetii ba'e Emeshimeseneiya dojosohuaquicaje'yo ma Jesosaja epeejji ebionei emano'yocuananijjetii ojee botejjee Emeshimeseneinijje eani'yojji Eyahuasijje. Jamaya eseya Emeshimeseneinijje ojee ba'etiitiije'yo. 18Jamajjeya jiquio esohui miquiananijje ba'eca Jesosaja epeejji huohuitiitiipoquiacue o majo queabihui ba'epoquijji. Miquianaya pea-ai oe majotiiya jjashahuabaquipoquicue queayeno poani jjabaquimajje.

Currently Selected:

1 TESALONICENSES 4: ESE

Highlight

Compare

Copy