1 JUAN 3

Eseya Eyacuiñajjija bacua poani jjabaquicajji

1Jjabaquicue quiana oe, achejeanee Eyacuiñajji Echii-aiya eseya acapoquianitii. Eseya oja bacua e'ejojonei poani ohuaya bacanitii. Jiquio meshijo nequica dejjacuanaja se ca oja bacua poani bajjimanei poani, macuanaja Eyacuiñajji bapea-aijjimajojoya. 2Ecue dohuecuana jjo'icuana, e'ejojonei eseya jjeya Eyacuiñajjija bacua poani, ojaya'yo. Quijje se ae shai poaje'yo esejaya bajjima so'o. Jjeya ca esejaya ebanei Jesosa Quito poeo'oyajo o jayojja pea-aiya se poaje'yo eseyaya oya queaja'anee bajejojoya achajja oya queaca'aneetii nequipoquiani. 3Ojjaña joya queabihui jjaishoaquipoquianicuaa Quitojo o poeo'oyajjijo oja mimishi cajaanei acani queaja'a eba'epoquijji, jiquio ecua Jesosa Quito queaja'anee mimishima'neitii nequipoquiani jama pea-ai epojjiya.

4Bacue, ojjaña joya queamimishi ba'epoquianicuana Eyacuiñajjija esohui etehuema' jayojjatii ba'yani. Jamajjeya ojjaña joya queamimishitii ba'epoquianicuaa Eyacuiñajji cajaa acani. 5Miquianajaya ebatii Jesosa Quito jiquio meshiyasijje poeapoa ojjañacuanaja mimishicuana cuijea'yohua. Oya ca mimishima'neitii nequipoquiani. 6Jamajjeya ojjaña joya Quitonijje ojee queapame jjapeequipoquianicuana queamimishitii ba'epoqui'yoajja poani. Bacue, joya queamimishi popoquianicuanaja ca Quito bajjimanei poani, ojo jjashahuabaquiajjanei pea-ai ba'yani. 7Ecue bacuanei jayojja quiana poani Quitojo. A'a peacuanaja esohui siajjejo jjadasiameequijji. Bacue, joya queaja'anee ba'epoquianicuana caca oe mimishiama poani joya ecua Quito queaja'aneetii nequipoquiani jama pea-aiya. 8Joya queamimishitii ba'epoquianicuana ca edosiquianaja epeejji, ojayatii poani. Yahuajoneitii edosiquiana queamimishi pocooapoa, jjeya pea-ai mimishijjitii nequipoquiani. Jamajjeya majoya Eyacuiñajjija Bacuaejja poeapoa jiquio meshiyasijje edosiquianaja ejjashahuabaquijjicuana queamimishi, oja echacojjicuana pea-ai chama'yo ajea'yohua.

9Bacue, joya Eyacuiñajjija bacua poanicuana queamimishitii ba'epoqui'yoajja Eyacuiñajjija ejjashahuabaquijji eyacua oja sapajo nequipoquianijojoya. Jamajjeya ojjaña macuana queaquehua queamimishi ba'epoqui'yoajja Eyacuiñajjija'yo poanijjejojoya. 10Jamajjeya queaja'a bacajji quianaja ache Eyacuiñajjija'yo poani oja bacuacuana, ache edosiquianajatii poanicuana pea-ai oja bacuacuana jayojja. Bacue, joya onijje Jesosaja epeejji queajea a-ajja poanicuana, joya queapame ba'epoquiajja pea-ai Eyacuiñajjija'yo pojjeama ca comacuana poani.

Miquiananijje Jesosaja epeejjicuana queajea acue

11Jiquio jjeya eya tehueaña esohui miquianajaya yahuajoneitii eshajja-ajja. Jama poanitii ba'a: esenijje Jesosaja epeejjicuana oe queajeanee apoquiacue. 12A'a oe ma ecua yahuajonei Caín queamimishitii ba'epoquiapoa jama pea-aiya pojji. Oya eshahuaja epeejji poa. Jamajjeya ohuaya oja chahua cuiahuejjaca'yapoa. ¿Yajjajo shai oja chahua cuiahuejjaca'yapoa? Oya Caín queamimishitii nequipoquiapoajjejojoya. Oja chahua ca queapame jjashahuabaquipoquiapoa, jamajjeya oya oja o'iya botiamanei acapoa.

13Ecue dohuecuana jjo'icuana, jiquio meshijo nequica dejjacuaa quiana botiamanei acani Eyacuiñajjija esohuijo jjabaquimajje, a'a jjahuohuiajjaquijji yajjajo botiama acani. 14Eseya jjeya ma ecua se yahuajo Eyacuiñajjijo ejjasejjaqui nequi emano'yo jayojja ba'epoquiapoa jama pojjeama'yo. Jjeya se ca ejjasejjaqui pojjeama'yo ba'yani Eyahuasijje eba'etiitii'yojji onijje quijje. Jamaya se jjabaquipoquiani esenijje Jesosaja epeejjicuana seya queajea añajojoya. Joya peacuana queajea a-ajja ca ejjasejjaquitii Eyacuiñajjijo ba'epoquiani emano'yo jayojjatii. 15Ojjaña joya onijje Jesosaja epeejjicuana botiamanei ajji poanicuana ca o queacua'yojji epo jayojja bacani Eyacuiñajjiya. Miquianajaya bacajji, ¿a'a dejjacuana pea quecua'yojji poani jamatii ba'etiitiije'yo Eyahuasijje? ¡Chojja de! 16Jesosa Quitohua e'ejojonei eseya queajeanee acapoquiani, jamajjeya oya ese nahue'yojjijo jjaquiaquiapoa emano'yojji. Oya jayojjaya eseya esenijje Jesosaja epeejjicuana queajeanee apoquiamajje Quito jayojja pea-ai jjashahuabaquime poaje, jjaquiaquije peacuana asahuajjijo. 17Bacue, oe Jesosaja epeejji quea-aquianahuiso poaniya pea onijje Jesosaja epeejji bobima' ani bamajje asahuajjima acani. ¿A'a joya quea-aquianahuisohua ma pea aema' poani e'ejojonei queajea acani? Chojja. 18Ecue bacuanei jayojja quiana poani Quitojo. A'a oe peacuana queajeanisho ajji miquianaja enabaa. Chojja, jama poca-ajja. Peacuana e'ejojonei queajeanee amajje asahuaneipoquiacue.

Eyacuiñajjijo queaca'a ba'ecapoquijji

19Bacue, esenijje Jesosaja epeejjicuana queajea apoquiamajje eseya jjabaquije e'ejojonei Eyacuiñajjija'yo poani, siajje pojjeama. Jama pomajjeya eseya Eyacuiñajjijo jjanequichipiquije onijje emimijji meteama. 20Eseya pojja'a queayeno jjabaquiani eyamiquipajje queamimishi pomajje. Jamatii Eyacuiñajjiya eseja mimishi queaja'anee bajji poaniya mimishi cuijeaca'yani. E'e, ohuaya ojjañatii bajeyojeyocani. 21Ecue dohuecuana jjo'icuana, eyamiquipajje eseja mimishi ecuijea'yo jjabaquimajje jjanequichipiquije Eyacuiñajjijo onijje emimijji meteama. 22Majoya se ohuaya cua eseya huohuiajjaje huisotii quiacapoquije ese oja esohui etehuejo jjashajja-ajjaquipoquianijojoya, cua ohua ese ameesa-acani cuana echacojji eseya ajeyopoquiañajojoya pea-ai. 23Eyacuiñajjija esohui esejaya yajji jama poani ba'a: Oja Bacuaejja Jesosa Quitojo jjashahuabaquica'yojji. Esenijje Jesosaja epeejjicuana queajeanee acapoquijji pea-ai ma ecua yahuajo ohuaya esohui huohuicapoa jamaya. 24Ojjaña joya oja esohuicuanajo jjashajja-ajjaquipoquijjitii poanicuana queapame jjapeequipoquiani Eyacuiñajjinijje. Oya jayojja Eyacuiñajji ojjaña macuananijje queabihui jjapeequipoquiani pea-ai. Majoya eseya jjabaquiani Eyacuiñajji esenijje nequipoquiani oja quia Edojjoshahuapame esenijjetii nequipoquianijojoya.

Currently Selected:

1 JUAN 3: ESE

Highlight

Compare

Copy