1 JUAN 2

Quito ese queapame pomee'yojji

1Miquianaya ecue bacuacuananei jayojja poani Quitojo, jamajjeya eyaya esohui jamaya tehueaña miquiana queamimishi epo-o'oya poanijje. Bacue, ese queamimishi poajo enequi ese queapame pomee'yojji poani Eyacuiñajji Echii-aija ebajji. Maya caca Jesosa Quito, oya queapameneetii mimishiamanei nequipoquiani. 2Jesosa Quito oyatii jjaquiaquiapoa eseja mimishicuanajo emano'yojji. Majoya ohuaya eseja mimishicuana chama'yo acapoa, sosequiajeyoca'yapoa. Esejayanei mimishicuana pojjeama, ojjaña jaajjicuanaja pea-ai ohuaya sosequiajeyoca'yapoa.

3Bacue, eseya Eyacuiñajjija esohuicuanajo jjashajja-ajjaquipoquimajje e'ejojonei onijje jjapeequipoquiani, oja epeejji e'ejojonei poani se jjabaquipoquije. 4Becacuana jama poani ba'a: “Ecuea Eyacuiñajji ebanei, eya onijje jjapeequipoquiani oja epeejjinei poani.” Jamatii macuanaya Eyacuiñajjija esohuijo jjashajja-ajjaquiajja ba'epoquiani. Jamajjeya ma jama pojjicuana siajje poani, Eyacuiñajjija esohui e'ejojonei chama'nei oja sapajo ehuana. 5Joya oja esohuijo jjashajja-ajjaquijji poanicuaaya caca oe e'ejojonei Eyacuiñajji queajea acapoquianitii. Jama pomajjeya se queachipi onijje nequipoquije, ojaya'yo se poani jjabaquipoquije. 6Jamajjeya joya jama poanicuana ba'a: “Eya onijjetii queapame jjapeequipoquiani, ojaya'yo.” Coma jama pojjicuana ma ecua Jesosa queapamenee nequipoquiapoa jama pea-aiya queaja'a ba'ecapoquijji.

Esohui eyacua Eyacuiñajjija

7Ecue dohuecuana jjo'icuana, ecuea quiana queajeanee poani. Jiquio jjeya eya tehueaña esohui eyacua pojjeama. Oyatiiya ma yahuajonei miquiaaya shajja-ajjacooapoaya tehueaña. Jiquio esohuitiiya yahuajonei ejaatiiapoa, miquianajaya ebanei. 8Jiquio eyaya miquianaque tehueaña jamatii yahuajoneitii esohui poaya eyacua jayojja poani. Yahuajo jiquio esohui jayojjaya Quito ba'epoquiapoa. Ohuaya oja esohui ajeyocapoquiapoa jiquio ecua miquiaaya jjeya apoquiaña jamaya. Jjeya quiana ca quea-aapo jayojjatii pojjeama'yo ba'epoquiani Jesosa Quito queajeaja'aneetii nequipoquianijojoya.

9Becacuana jama poani ba'a: “Eya ca iña queaja'atii ba'epoquiani cuaquijiji jama.” Majoya joya jama poani cuaa onijje Jesosaja epeejji botiama acani, niñebacani. Jamajjeya comacuana quea-aapotii meca jayojja ba'epoquiani. 10Joya onijje Jesosaja epeejjicuana queajea apoquiajji poanicuana caca oe e'ejojonei poani, macuanaya queaja'a ba'epoquiani cuaquijiji jama. Jamajjeya chama'nei o queamimishi pomeeo'oyajji. 11Bacue, joya onijje Jesosaja epeejjicuana botiama ajji poani ca quea-aapo jayojjatii ba'epoquiani. Macuanaya jjabaquiajja achacua shai poquiani quea-aapohua oya jjabaquiajja jayojja pomeecanijjejojoya.

12Miquianaya ecue bacuacuananei jayojja poani Quitojo, jamajjeya eyaya jiquio esohui tehueaña miquianaque. Eyacuiñajjiya miquianaja mimishicuana cuijeaca'yonaje, chama'yo acanaje oya Jesosa Quito esejo jjaquiaquiapoajojoya emano'yojji. 13Echiimesecuana, eyaya jiquio esohui jamaya tehueaña miquianajaya ebatiijojoya Jesosa Quito maya yahuajoneitii enequiapoa oyatiiya. Dejjasho'icuana shacuima' nequi, eyaya jiquio esohui jamaya tehueaña edosiquiana miquiana queamimishitii pomeejji pojjeama'yo poanijojoya, emiquianamesetii pojjeama'yojojoya. Ecue bacuanei jayojja quiana poani Jesosajo, jamajjeya eyaya jiquio esohui jamaya tehueaña miquianajaya eseja Chii-ai Eyacuiñajji ebaneijojoya.

14Echiimesecuana, eyaya jiquio esohui jamaya tehueaña miquianaja ebatiijojoya Jesosa Quito maya yahuajoneitii enequiapoa oyatiiya. Dejjasho'icuana shacuima' nequi, eyaya jiquio esohui jamaya tehueaña miquianaya queaca'a nequipoquianijojoya. Eyacuiñajjija esohui e'ejojonei miquianaja sapadojjojo huananeinaje. Jjeya edosiquiana miquiana queamimishitii pomeejji pojjeama'yo, emiquianamese pojjeama'yo oya.

15Jiquio meshijo nequica dejjaja ejjashahuabaquijji queamimishi joya ohua acani a'a queajea apea-aijji, a'a ca coma queapame poso ajji. Oya jayojjaya jiquio meshijo anica aquianacuana a'a jeabajji queahuiso ejjeshejji. Jiquio meshijo nequica dejjaja ejjashahuabaquijji queajea amajje miquianajaya Eyacuiñajji Echii-ai queajea eajji pojjeama poaje. 16Bacue, jiquio meshijo nequica dejjaja ejjashahuabaquijjicuana pea poani, Eyacuiñajjija jama pojjeama. Jiquio meshijo nequica dejjacuana queaquehua jjashahuabaquiani jama ba'a: “Esejayanei ejjashahuabaquijji queamimishi epojji eseja yamijo nequi jamaya ba'ecajji. Cua eseja ecojjaa queapame ani baña huisotii aquianacuana ojjaña jjeshecapoquijji. Eseyaneitii queaca'a poani jjabaquicajji.” Jamaya jiquio meshijo nequicacuana queaquehua jjashahuabaquipoquiani. 17Bacue, quijje jiquio meshijo nequica dejjaja ejjashahuabaquijjicuana queamimishi, ojjaña aquianacuana pea-ai oe popoquije'yo, chama'yo poaje. Joya Eyacuiñajjija ejjashahuabaquijji ajji poanicuana caca oe ba'etiitiimeecaje'yo Eyacuiñajjiya, ojjaña macuanaya ejjachamaqui'yojjitii pojjeama poaje.

Esohui e'ejojoneijo, esohui siajjejo pea-ai tehuecapoa

18Ecue bacuanei jayojja quiana poani Quitojo. Beshahuanei epojja oe-ejjenei apoa, poechipiani. Miquiaaya shajja-ajjanaje Jesosa Quito sapo-ajjanei poani dejja ebionei poecooje. Bacue, jjeya queahuisocuana o sapo-ajjanei poani, o cajaa ajji poanicuanaya epoe. Jamajojoya seja bacajji oe-ejjenei epojja beshahuanei apoa. 19Jjeya joya o sapo-ajjanei po'yanicuana ebionei esenijje aniajjahuanaje esohuijo. Majoya esohui cajaa a'yomajje poqui'yonaje cuana jiquio ecua eseya queaja'a jjashahuabaneiquipoquiani Eyacuiñajjija esohuijo jama pea-ai posapo'yoajjajjejojoya. Jama jjashahuabaquime po-ajjajjemo eseya jiña'yojjimatii acaquiae. Jamaya oja esohui cajaa aca'yonaje cuaa esejaya oya queaja'anee ebajji ojjaña macuana Jesosaja epeejji e'ejojonei pojjeama poanaje, eseya jama pojjeama.

20Quitohua quiana Eyacuiñajjija Edojjoshahuapame quiacanaje miquianaja eyamidojjojo enequipoqui'yojji. Jamajjeya miquianajaya eba oja esohui e'ejojonei poani majoya. 21Eyaya miquianaque tehueaña jiquio esohui miquianaja bajjimajo pojjeama. E'ejojonei miquianaja jiquio ebajojoya eyaya miquianaque tehueaña. Joya esohui e'ejojonei yejji poanicuana esohui siajje huohuiajja. 22¿Ache dejja acuae siajjepojji poani? Joya Jesosa Eyacuiñajjija huoojea pojjeama ajji poanicuana. Macuanaya Quito sapo-ajjanei poani, o botiamanei poani, Eyacuiñajji Echii-ai, oja Bacuaejja pea-ai cajaa acani. 23Jamajjeya ojjaña joya Eyacuiñajjija Bacuaejja cajaa ajji poanicuaaya Eyacuiñajji Echii-ai pea-ai cajaa acani. Ojjaña joya oja Bacuaejjaja'yo poanicuana e'ejojonei Eyacuiñajji Echii-aija'yo pea-ai poani.

24Jamajjeya quiaa oe Eyacuiñajjija esohui miquianaja sapajo jaa nahuepoquiacuetii ma yahuajo miquiaaya shajja-ajjacooapoa esohuitiiya. Oja esohui queanahuenee bapoquiamajje queapame quiana jjapeequipoquije Eyacuiñajjinijje, oja Bacuaejja Quitonijje pea-ai. 25Jesosa Quitohua esejo esohui e'ejojonei acapoa jama ba'a: Ohuaya eseya ba'etiitiimeecaje'yo onijje Eyahuasijje.

26Jjeya eyaya tehuepea-aije esohuihuohuijjinishocuanajo joya miquiana pea esohuijo jjashahuabameequijji poanicuanajo. 27Jjabaquicue, miquianaya oja Edojjoshahuapame yamijji poani Jesosa Quitoja quia. Jamajjeya quiana ojoneitii jjeya queaja'a ba'ecapoquijji, pea dejjacuana jiquio meshijo nequicaja sohuihuohuijo pojjeama. Ohuaya Edojjoshahuapameya ojjaña Eyacuiñajjija esohuicuana queaja'a bameesahuacapoquiani quiana. Cua ohua queaja'a bameesahuacani esohui e'ejojonei poani, siajje pojjeama. Jamajjeya quiana oe Quitonijjetii ba'e, ma Edojjoshahuapameya queaja'a bameesahuacani huisotii esohuicuanajo jjashajja-ajjaquipoquicue.

28Ecue bacuanei jayojja quiana poani Quitojo, jjeya Quitonijjetii jjapeequipoquicue ojee, jjashajja-ajjaquipoquicue ojo. Majoya quiana quijje o poeo'oyajo meteama poaje o ja'ajjequijji. Jamajjeya quiana jama jjashahuabaquime pomajje bichoama poaje o cojjanei enequijji.

29Miquianajaya ebatii poani Jesosa Quitohua queapameneetii acapoquiani. Jamajjeya miquianajaya bapea-aicajji ojjaña joya queapame queaja'a ba'epoquianicuana Eyacuiñajjija bacua e'ejojonei poani.

Currently Selected:

1 JUAN 2: ESE

Highlight

Compare

Copy